Jiñi Biblia tsiʼ qʼuextʌbeyob i pensar

¿CHUQUI tsiʼ ñijca juntiquil wiñic chaʼan miʼ chaʼ sujtel ti jiñi ñopbal baqui tsaʼ coli? ¿Bajcheʼ juntiquil alob tsiʼ taja i tat yom bʌ cʼʌlʌl cheʼ bʌ chutto? Laʼ laj qʼuel chuqui miʼ yʌlob.

«Chaʼ com sujtel ti Jehová tsaʼ cubi» (ELIE KHALIL)

JABIL CHEʼ TSAʼ CHʼOCʼA: 1976

PAÍS: CHIPRE

YAN TAC BɅ: TSIʼ CɅYɅ I ÑOPBAL

BAJCHEʼ QUILAL TI WAJALI: Ti chʼocʼayon ti Chipre, pero tsaʼ coliyon ti Australia. Jiñi c tatob i testigojob Jehová, tsaʼ i chaʼleyob wersa chaʼan miʼ pʌsbeñoñob i cʼuxbiya Dios yicʼot muʼ bʌ i yʌl jiñi Biblia. Pero cheʼ bʌ tsaʼ cajiyon ti colel majlel, mach weñic bajcheʼ tsaʼ caji c mel. Mic putsʼel loqʼuel ti cotot ti acʼʌlel, i quicʼot jiñi camigojob lajal bʌ c jabilel quicʼotob mi lon c xujchʼin carro tac i mic wen otsan c bʌ ti wocol.

Ti ñaxan, mucul jach mic mel come mic bʌcʼñan chaʼan jiñi c papá yicʼot c mamá miʼ michʼañob, pero ti wiʼil, maʼix tsaʼ cajiyon ti bʌqʼuen. Jiñi camigojob ñumen ñucobix i maʼan miʼ cʼuxbiñob Jehová, cheʼ jaʼel tsaʼix i wen cʌntesayoñob c mel mach bʌ weñic. Wen jontoloñix, ti jumpʼejl bʌ qʼuin tsaʼ c sube c papá yicʼot c mamá chaʼan maʼañix chuqui com chaʼan jiñi i ñopbalob. Tsiʼ ñopoyob i coltañon, pero maʼañic tsaʼ c jacʼʌ. Tiʼ caj bajcheʼ yilalon tsiʼ wen aqʼueyob i chʼijyemlel.

Tsaʼ loqʼuiyon ti cotot i tsaʼ cotsa c bʌ ti droga tac. Tsaʼ caji c pʌcʼ marihuana yicʼot tsaʼ caji c wen chon. Mic wen mel tsʼiʼlel yicʼot mic ñusan cabʌl ora ti discoteca tac, i wen jontol tsaʼ sujtiyon. Ora jach mic michʼan cheʼ bʌ an majqui miʼ subeñon o miʼ melbeñon maʼan bʌ mic mulan. An qʼuiñil mic jatsʼ o mic suben tsʌts bʌ tʼan jiñi muʼ bʌ i melbeñon mach bʌ weñic. Tiʼ sujm, tsaʼ bʌ caji c ñumen mel jiñʌch tsaʼ bʌ i subeyoñob c tac c ñaʼ chaʼan mach yomic mic mel.

BAJCHEʼQUI JIÑI BIBLIA TSIʼ QUEXTɅBEYON C PENSAR: Tsaʼ sujti ti camigo juntiquil muʼ bʌ i wen cʼʌn droga i tsaʼ bʌ chʌmi i papá cheʼ bʌ chutto. Cabʌl chuqui mi lon c wen al, mach yʌlʌyic mi wen acʼʌlelix. Mach junsujtel jach tiʼ subeyon chaʼan miʼ wen cʼajtesan i tat. Come cʼʌlʌl cheʼ bʌ chutonto cʌmbil c chaʼan chaʼan jiñi chʌmeñoʼ bʌ mi caj i chaʼ chʼojyelob, jin chaʼan tsaʼ caji c suben chaʼan ti talto bʌ qʼuin, Jesús mi caj i chaʼ tejchesan jiñi sajtemoʼ bʌ (Juan 5:28, 29). Tsaʼ c sube: «Ñaʼtancu, mi caj a chaʼ qʼuel jiñi a papá, i ti lac pejtelel mi caj lac luʼ mejlel ti chumtʌl ti jumpʼejl paraíso ila ti pañimil». Ili tsaʼ bʌ c sube tsiʼ wen aqʼue i ñʌchʼtʌlel i pusicʼal.

Ti wiʼil, jiñi camigo tsaʼ caji i taj ti tʼan chaʼan jiñi cojix bʌ qʼuin o chaʼan jiñi Trinidad. Mij cʼʌn jiñi i Biblia chaʼan mic pʌsben texto tac muʼ bʌ i pʌs i sujmlel tiʼ tojlel Jehová, Jesús yicʼot chaʼan jiñi cojix bʌ qʼuin (Juan 14:28; 2 Timoteo 3:1-5). Cheʼ bʌ mic wen suben i chaʼan bʌ Jehová jiñi camigo, mic ñumen ñaʼtan Jehová.

Jiñi i sujmlel am bʌ tic pusicʼal, tsaʼ bʌ i cʌntesayoñob jiñi c papá c mamá, xucʼu xucʼul tsaʼ caji ti colel. An qʼuiñil cheʼ bʌ yaʼañon quicʼot camigojob ti jumpʼejl qʼuiñijel i choncol lon j cʼʌn droga tac mij cʼajtesan Jehová. Jiñi camigojob miʼ yʌlob chaʼan miʼ cʼuxbiñob Dios, pero tiʼ melbalob miʼ pʌsob chaʼan mach cheʼiqui. Mach com cheʼ mic mel bajcheʼ jiñi, tsaʼ cʼoti j cʌn chaʼan yomʌch mic chaʼ sujtel ti Jehová.

Tiʼ sujm, mach wocolic mi laj cʌn yom bʌ mi lac mel, pero wocolʌch chaʼan mi lac mel. Añʌch mach bʌ wocolic tsaʼ cubi chaʼan mij qʼuextan. Jumpʼejl ejemplo, mach wocolic tsaʼ cubi chaʼan mij cʌy jiñi droga tac. Cheʼ jaʼel, mach wocol tsaʼ cubi chaʼan mij cʌy c ñochtañob jiñi mach bʌ weñic chuqui miʼ melob yicʼot chaʼan mic tech estudio yicʼot juntiquil anciano.

Pero an wocolʌch bʌ tsaʼ cubi chaʼan mij qʼuextan, jiñʌch cheʼ ora mic michʼan. An qʼuiñil mucʼʌch i ñumel cabʌl ora i maʼañix mic wen michʼan, pero mic chaʼ yajlel tiʼ melol, i cheʼ bʌ mi cujtel bajcheʼ jiñi, c mul mi cubin i maʼañix chuqui wento bʌ mic mel mi cubin. Anquese wen chʼijyemon, tsaʼ c sube jiñi Testigo muʼ bʌ i yʌqʼueñon estudio chaʼan bajcheʼ yubil mi cubin. Come wen yujil pijt yicʼot wen uts, tsaʼʌch i wen ñuqʼuesʌbeyon c pusicʼal. Ti jumpʼejl bʌ qʼuin, tiʼ subeyon chaʼan mic pejcan jiñi La Atalaya baqui miʼ yʌl chaʼan mach yomic mi lac lujbʼan lac chaʼlen wersa chaʼan jiñi la com bʌ lac taj. * Tsaʼ c tsʼitaʼ tsaji lon chuqui miʼ mejlel c mel cheʼ bʌ mic michʼan. Chʌn cʼajal c chaʼan jiñi tsaʼ bʌ c pejca yicʼot cheʼ mic wen melben oración Jehová, cʼunteʼ cʼunteʼ tsaʼ j cʌyʌ jiñi cabʌl michʼajel. Ti abril cheʼ ti jabil 2000, tsaʼ c chʼʌmʌ jaʼ i tsaʼ sujtiyon tiʼ testigo Jehová. Wen tijicña tsiʼ yubiyob jiñi c tatob.

WENLEL TAC TAJBIL BɅ C CHAʼAN: An c ñʌchʼtʌlel yicʼot sʌc jiñi j conciencia, come maʼix mic bibʼesan c bʌcʼtal ti droga yicʼot tiʼ melol tsʼiʼlel tac. Mach yʌlʌyic chuqui choncol c mel, mi choncolon ti eʼtel, mi añon ti tempa bʌ o yambʌ chuqui choncol c mel, ñumen tijicñayon yicʼot mij qʼuel ti ñuc jiñi j cuxtʌlel.

Mi cʌqʼuen wocolix i yʌlʌ Jehová chaʼan jiñi c tatob am bʌ c chaʼañob come maʼan baʼ ora tsiʼ ñaʼtayob chaʼan maʼix mi caj c weñʼesan c melbal. Cheʼ jaʼel, mic ñaʼtan jiñi tʼan tsaʼ bʌ i yʌlʌ Jesús ti Juan 6:44: «Maʼañic majqui miʼ mejlel ti tilel baʼañon, cojach mi jiñi Tatʌl, jiñi tsaʼ bʌ i chocoyon tilel, miʼ pʌy tilel». Wen tijicñayon cheʼ ti chaʼ sujtiyon ti Jehová come jiñʌch tsaʼ bʌ i pʌyʌyon tilel.

«Com juntiquil c tat tsaʼ cubi» (MARCO ANTONIO ALVAREZ SOTO)

JABIL CHEʼ TSAʼ CHʼOCʼA: 1977

PAÍS: CHILE

YAN TAC BɅ: OCHEM TI JUMPʼEJL BANDA CHAʼAN HEAVY METAL

BAJCHEʼ QUILAL TI WAJALI: Tsaʼ i cosayon c mamá ti Punta Arenas, jumpʼejl tejclum yaʼ ti Magallanes, lʌcʼʌl an ti sur yaʼ ti América del Sur. Jiñi c papá yicʼot c mamá tsiʼ cʌyʌyob i bʌ cheʼ bʌ an jaxto 5 c jabilel, cheʼ bʌ tsaʼ ujti bajcheʼ ili, tsaʼ caji cubin chaʼan maʼañic majqui miʼ cʼuxbiñon. Com juntiquil c tat tsaʼ cubi.

Jiñi c mamá miʼ chʼʌm estudio yicʼot i testigojob Jehová i miʼ pʌyon majlel ti tempa bʌ. Pero tsʼaʼ mi cubin cheʼ miʼ pʌyon majlel i yaʼ ti bij mic wen tech michʼ. Tsaʼ j cʌyʌ majlel cheʼ bʌ 13 c jabilel.

Ti jiñi bʌ ora muqʼuix c mulan jiñi música i tsaʼ j qʼuele chaʼan mucʼʌch i mejlel c mel. Cheʼ bʌ 15 c jabilel tsaʼ caji c jatsʼ música heavy-metal baqui miʼ yujtel qʼuiñijel tac bajcheʼ festival, cheʼ jaʼel ti bar yicʼot ti yan tac bʌ qʼuiñijel. Mic tempan c bʌ quicʼotob wen yujiloʼ bʌ chaʼan música, i jiñi tsiʼ yʌqʼueyon c mulan yan tac bʌ música. Tsaʼ c teche clase chaʼan música yaʼ ti escuela am bʌ yaʼ baqui chumulon. Cheʼ bʌ añix 20 c jabilel, tsaʼ majliyon ti Santiago, i capital Chile, chaʼan mic bej chaʼlen clase chaʼan música. Pero maʼan tsaʼ j cʌyʌ jiñi j grupo chaʼan heavy-metal, tsaʼʌch caji c bej chaʼlen jatsʼ música yicʼotob.

Cabʌl chuqui mic mel, pero maʼan tsiʼ yʌqʼueyon c tijicñʌyel. Chaʼan mach cheʼ mi cubin c bʌ bajcheʼ jiñi, mic jap lembal yicʼot mij cʼʌn droga tac quicʼot jiñi poj c familia bʌ mi cubin. Wen jontol c melbal: Luʼ iʼicʼ c pislel mic xoj, wen an c tsuctiʼ yicʼot wen tam i tsutsel c jol, cʼʌlʌlto tic xiñil miʼ cʼotel.

Come wen jontolon, baqui jach mi cotsan c bʌ ti jatsʼ i mic taj wocol yicʼot jiñi policíajob. Ti jumpʼejl bʌ qʼuin, junmojt muʼ bʌ i choñob droga tac, tsaʼ caji i ticʼlañon lojon yicʼot camigojob. Come yʌcon, tsaʼ c jatsʼʌyob, i jiñiyob tsiʼ wen jatsʼʌyoñob i tsaʼto i xuluyob c xʌcʼtiʼ.

Pero ñumen cʼux bʌ tsaʼ cubi jiñʌch chuqui tsiʼ melbeyoñob jiñi poj camigojoʼ bʌ mi cʌl. Ti jumpʼejl qʼuin, tsaʼ cʼoti c ñaʼtan chaʼan jiñi c novia wajalix caj i lotiñon yicʼot jiñi poj camigo bʌ mi cʌl i jiñi yambʌ camigojob maʼan tiʼ subeyoñob. Jiñi tsiʼ wen aqʼueyon c chʼijyemlel.

Tsaʼ chaʼ sujtiyon majlel ti Punta Arenas, tsaʼ caji cʌcʼ clase chaʼan bʌ música yicʼot jatsʼ violonchelo. Cheʼ jaʼel, tsaʼ c bej chaʼle grabar quicʼot jiñi grupo heavy-metal. I yaʼi tsaʼ j cʌñʌ Sussan, juntiquil xchʼoc wen i lecax bʌ i tsaʼ cajiyon lon ti tem chumtʌl. Ti wiʼil, Sussan tiʼ yubi chaʼan jiñi i mamá miʼ ñop chaʼan an uxtiquil Dios, i joñon maʼan mic ñop jiñi, jin chaʼan tsiʼ cʼajtibeyon: «¿Baqui bʌ jiñi i sujmlel?». Tsaʼ c sube chaʼan jiñi cʌntesʌntel mach i sujmic, chaʼan mach mejlic c pʌsben yicʼot jiñi Biblia, pero chaʼan j cʌñʌyʌch majqui miʼ mejlel i pʌsben. Tsaʼ c sube chaʼan jiñi i testigojob Jehová miʼ mejlel i tsictesʌbeñob. Jin chaʼan, tsaʼ caji c melben oración Dios i tsaʼ j cʼajtibe i coltaya, i jiñi añix ora maʼan baʼ c mele.

Cheʼ añix ñumen chaʼpʼej uxpʼejl qʼuin, tsaʼ j qʼuele juntiquil wiñic am bʌ j qʼuele mi cubin i tsaʼ j cʼajtibe miʼ testigo Jehová. Tsaʼ i tsʼitaʼ bʌcʼñayon tiʼ caj bajcheʼ quilal, pero uts jach tsiʼ jacʼʌ chuqui tsaʼ bʌ j cʼajtibe chaʼan jiñi tempa bʌ tac. Tsaʼ c ñaʼta chaʼan ili i jacʼbalʌch coración tsaʼ bʌ c mele. Tsajñon ti tempa bʌ i tsaʼ buchleyon ti wiʼil pat chaʼan maʼan majqui miʼ wen qʼueloñob. Pero cabʌl tsiʼ cʌñʌyoñob come mi cajñel cheʼ bʌ chutonto. Tiʼ subeyoñob chaʼan tijicñayob cheʼ tsaʼ cʼotiyon i tsiʼ meqʼueyoñob, ili tsiʼ wen aqʼueyon c ñʌchʼtʌlel. Lajal bajcheʼ tsaʼ chaʼ sujtiyon ti cotot tsaʼ cubi. Cheʼ bʌ tsaʼ j qʼuele jiñi Testigo tsaʼ bʌ i yʌqʼueyon estudio cheʼ bʌ chutonto, tsaʼ c sube chaʼan miʼ chaʼ aqʼueñon estudio.

BAJCHEʼQUI JIÑI BIBLIA TSIʼ QUEXTɅBEYON C PENSAR: Ti jumpʼejl bʌ qʼuin tsaʼ c pejca Proverbios 27:11, baqui miʼ yʌl: «Yom pʼipʼ a pusicʼal calobil. Ñuqʼuesʌbeñon c pusicʼal». Toj sajtel c pusicʼal cheʼ tsaʼ j qʼuele chaʼan juntiquil wiñic miʼ mejlel i tijicñesʌben i pusicʼal jiñi Dios tsaʼ bʌ i luʼ mele chuqui tac an, tsaʼ j cʌñʌ jaʼel chaʼan Jehová jiñʌch jiñi c tat muʼ bʌ i cʼuxbiñon i am bʌ c wen sʌcla.

Com c tijicñesʌben i pusicʼal jiñi c Tat am bʌ ti panchan, i cheʼ jaʼel com c mel muʼ bʌ i mulan, pero cabʌl jab tsaʼ j cʼʌñʌ droga yicʼot tsaʼ c wen japʌ lembal. Tsaʼ cʼoti c ñaʼtan chuqui yom i yʌl Jesús cheʼ bʌ tsiʼ yʌlʌ ili tʼan am bʌ ti Mateo 6:24: «Maʼañic majch miʼ mejlel i melben i yeʼtel chaʼtiquil i yum». Cheʼ bʌ choncol j qʼuextan majlel c melbal, jiñi principio am bʌ ti 1 Corintios 15:33 tsiʼ wen coltayon: «Mi tsaʼ laʼ ñochta jiñi mach bʌ weñobic lac piʼʌlob mi caj laʼ cʌy laʼ mel chuqui tac wen». Tsaʼ cʼoti c ñaʼtan chaʼan maʼañic mi caj i mejlel j qʼuextan c melbal mi maʼan mij cʌy majlel baqui mach weñic yicʼot mi maʼan mij cʌy c ñochtan jiñi mach bʌ weñobic i melbal. Jiñi ticʼojel am bʌ ti Biblia jamʌ tsiquilʌch chuqui miʼ yʌl: Añʌch chuqui yom mic mel, yom mij cʌy c mel muʼ bʌ i bej acʼon ti yajlel tiʼ melol mach bʌ weñic (Mateo 5:30).

Come mic wen mulan jiñi música, wen wocol tsaʼ cubi chaʼan mij cʌy jiñi heavy-metal. Pero tiʼ coltaya jiñi camigojob yaʼ ti congregación tsaʼ mejli j cʌy. Tsaʼ j cʌyʌ jiñi qʼuixñijel yicʼot droga tac, tsaʼ c tsepe i tsutsel c jol yicʼot c tsuctiʼ chaʼan mach wen tamix, tsaʼix caji c xoj c pislel ti yan tac bʌ color. Cheʼ bʌ tsaʼ c sube Sussan chaʼan mi caj c tsep i tsutsel c jol chaʼan mach wen tamix, tiʼ subeyon: «Mi caj c majlel quicʼotet ti tempa bʌ, com j qʼuel chuqui miʼ melob yaʼi». Tsaʼʌch i wen mulaj jiñi tempa bʌ, mach jalic tsaʼ ñumi i tsaʼ caji i chʼʌm jumpʼejl estudio. Ti wiʼil, tsaʼ ñujpuñiyon lojon, ti 2008 tsaʼ c chʼʌmʌ lon jaʼ bajcheʼ i testigo Jehová. Wʌle, tijicña mi lon c melben i yeʼtel Jehová yicʼot c mamá.

WENLEL TAC TAJBIL BɅ C CHAʼAN: Tsaʼix loqʼuiyon ti jumpʼejl mulawil baqui maʼan i sujm bʌ tijicñʌyel yicʼot maʼan i sujm bʌ la camigojob. Mucʼʌch c bej mulan jiñi música, pero muqʼuix c yajcan baqui bʌ música. Chaʼan mij coltan c familia yicʼot yambʌ xcolelob, mic subeñob chuqui tsaʼ c ñusa. Com j coltañob i ñaʼtan chaʼan muʼ bʌ i yʌcʼ ili mulawil poj weñʌch yilal, pero mach cheʼiqui, cheʼ jach bajcheʼ «yonlel basura» (Filipenses 3:8).

Cheʼ tsaʼ c lʌcʼtesa c bʌ ti Dios, an c taja wem bʌ camigojob ti congregación, yaʼi añʌch jiñi cʼuxbiya yicʼot ñʌchʼtʌlel. Pero tsaʼ bʌ c wen mulaj jaʼel, jiñʌch cheʼ tsaʼ c taja jiñi c tat añix bʌ ora tsaʼ cajel c sʌclan, jiñʌch Jehová.

[Nota]

[Comentario]

«Ti chaʼ sujtiyon ti Jehová come jiñʌch tsiʼ pʌyʌyon»