Jiñi Biblia tsiʼ qʼuextʌbeyob i pensar
Jiñi Biblia tsiʼ qʼuextʌbeyob i pensar
¿CHUQUI jiñi tsaʼ bʌ i ñumen qʼuele ti ñuc juntiquil wiñic yaʼ ti Escocia anquese an ñumen ñuc bʌ i troñel? ¿Chuqui tsiʼ colta juntiquil wiñic yaʼ ti Brasil chaʼan miʼ cʌy i mel tsʼiʼlel yicʼot droga tac? ¿Chuqui tsiʼ colta juntiquil xcolel yaʼ ti Eslovenia chaʼan miʼ cʌy i cʌlʌx jap lembal? Laʼ laj qʼuel chuqui miʼ yʌlob.
«Wen chumulon yilal» (JOHN RICKETTS)
JABIL CHEʼ TSAʼ CHʼOCʼA: 1958
PAÍS: ESCOCIA (REINO UNIDO)
YAN TAC BɅ: WEN CABɅL I CHUBɅʼAN
BAJCHEʼ QUILAL TI WAJALI: Tsaʼ coliyon ti jumpʼejl familia wen am bʌ i taqʼuin. Jiñi c papá juntiquilʌch soldado yaʼ ti Gran Bretaña, jin chaʼan jiñi c familia yicʼot joñon baqui jach mi lon c majlel. Cheʼ jaʼel, tsaʼ chumleyon lojon ti Escocia, ti Inglaterra, Alemania, Kenia, Malasia, Irlanda yicʼot Chipre. Cheʼ bʌ añix 8 c jabilel, jiñi c papá yicʼot c mamá tsiʼ chocoyoñob majlel ti escuela yaʼ ti Escocia, tsaʼ c chaʼle c bʌ ti graduar ti Universidad de Cambridge.
Cheʼ bʌ añix 20 c jabilel, tsaʼ c teche jumpʼejl eʼtel ti jumpʼej empresa chaʼan petroleo i tsaʼ jalʼayon 8 jab. Ñaxan tsaʼ c chaʼle eʼtel ti América del Sur, ti wiʼil ti África i cojix bʌ ti Australia Occidental, baqui tsaʼ c teche jumpʼejl empresa i ti wiʼil tsaʼ c choño.
Cheʼ bʌ tic choño jiñi c empresa, tsaʼ c taja cabʌl taqʼuin i mach i cʼʌjñibalix mic bej chaʼle eʼtel, jin chaʼan cheʼ bʌ añix 40 c jabilel tsaʼ j cʌyʌ eʼtel. ¿Chuquito mi caj c mel wʌle cheʼ maʼix mucʼon ti eʼtel? Tsaʼ caji j cʌn ñumel pañimil, ñaxan tsaʼ j cʌñʌ ti wen Australia, chaʼ sujtel tsaʼ c xʌñʌ Australia ti moto, ti wiʼil tsaʼ majli j cʌn yan tac bʌ tejclum. Wen chumulon yilal.
BAJCHEʼQUI JIÑI BIBLIA TSIʼ QUEXTɅBEYON C PENSAR: Cheʼ bʌ muʼto caj j cʌy eʼtel, tsaʼ cubi chaʼan com cʌqʼuen wocolix i yʌlʌ Dios come wen chumulon. Jin chaʼan tsaʼ c teche majlel ti jiñi Iglesia Anglicana, come jiñʌch tsaʼ bʌ j cʌñʌ cheʼ bʌ chutonto, pero yaʼi maʼan miʼ wen cʌntesʌntel chaʼan Biblia. Ti wiʼil tsaʼ caji i cʌntesañon juntiquil mormón, pero maʼañic tsaʼ c mulaj come maʼañic miʼ chʼʌmob ti ñuc jiñi Biblia.
Ti jumpʼejl bʌ qʼuin, jiñi i testigojob Jehová tsaʼ cʼotiyob ti cotot. Ora jach tsaʼ j qʼuele chaʼan jiñi muʼ bʌ i ñopob chuculʌch tiʼ Tʼan Dios. Jumpʼejl texto tsaʼ bʌ i pʌsbeyoñob jiñʌch 1 Timoteo 2:3, 4, baqui miʼ yʌl chaʼan Dios yomʌch «chaʼan pejtelel lac piʼʌlob miʼ tajob i coltʌntel i miʼ cʌñob ti tsʼʌcʌl jiñi i sujmlel». Tsaʼ bʌ c mulaj jiñʌch cheʼ jiñi Testigojob mach cojach miʼ qʼuelob ti ñuc chaʼan yujilob muʼ bʌ i yʌl jiñi Biblia, jiñʌch cheʼ miʼ qʼuelob miʼ sujmʌch muʼ bʌ i yʌl.
Cheʼ bʌ tsaʼ cajiyon ti estudio yicʼotob, tsaʼ cʼoti j cʌn jiñi i sujmlel. Tsaʼ cʼoti j cʌn chaʼan Dios yicʼot Jesús mach lajalobic i chaʼan mach ochemobic ti jiñi trinidad (Juan 14:28; 1 Corintios 11:3). Añix ora caji c sʌclan ili i sujmlel, i cheʼ bʌ tsaʼ cʼoti j cʌn tsaʼ j qʼuele chaʼan mach wocolic baqui mi lac tajeʼ.
Mach jalic tsaʼ ñumi, tsaʼ caji c tech majlel tiʼ tempa bʌ jiñi Testigojob. Tsaʼ c mulaj chaʼan wen utsob yicʼot bajcheʼ miʼ jacʼob jiñi principio tac am bʌ ti Biblia. Wen chʼujulob tsaʼ j qʼueleyob. Cheʼ bajcheʼ miʼ cʼuxbiñob i bʌ, tsiʼ yʌqʼueyon j qʼuel chaʼan añobʌch tiʼ sujm bʌ ñopbalʌl (Juan 13:35).
WENLEL TAC TAJBIL BɅ C CHAʼAN: Cheʼ bʌ tic chaʼle chʼʌmjaʼ, tsaʼ j cʌñʌ Diane, juntiquil xchʼoc wen utsʼatax bʌ tsaʼ bʌ coli bajcheʼ i testigo Jehová. Tsaʼ c mulaj chaʼan wen utsʼatax i melbal i ti wiʼil tsaʼ ñujpuñiyon lojon. Tsaʼ j qʼuele chaʼan jiñi i coltaya jumpʼejlʌch bendición tilem bʌ ti Jehová.
Com lon majlel ti jumpʼejl tejclum baqui anto ñumen yom xsubtʼañob, jin chaʼan, ti 2010 tsaʼ majliyon lojon ti Belice, ti Centroamérica. Wʌʼi mi lon c suben wen tʼan quixtañujob muʼ bʌ i cʼuxbiñob Dios i yomoʼ bʌ i ñumen cʌn.
Wʌle cheʼ j cʌñʌyix jiñi i sujmlel chaʼan Dios yicʼot chaʼan Biblia, miʼ yʌqʼueñon c ñʌchʼtʌlel. Cheʼ mic chaʼlen subtʼan tiʼ pejtelel ora, an mejlem j coltan yonlel lac piʼʌlob chaʼan miʼ mejlel i cʌñob muʼ bʌ i yʌl jiñi i Tʼan Dios. Maʼan yambʌ muʼ bʌ i ñumen aqʼueñon c tijicñʌyel, cojach cheʼ mij qʼuel bajcheʼ jiñi Biblia choncol i qʼuextʌbeñob i pensar yonlel lac piʼʌlob, cheʼ bajcheʼ tsiʼ qʼuexta c chaʼan. Tsaʼ cʼoti j cʌn bajcheʼ miʼ mejlel cʌqʼuen wocolix i yʌlʌ Jehová chaʼan am bʌ yʌqʼueyon tij cuxtʌlel.
«Wen uts tsiʼ pejcayoñob» (MAURÍCIO ARAÚJO)
JABIL CHEʼ TSAʼ CHʼOCʼA: 1967
PAÍS: BRASIL
YAN TAC BɅ: TSIʼ MELE CABɅL TSʼIʼLEL
BAJCHEʼ QUILAL TI WAJALI: Tsaʼ coliyon ti Avaré, jumpʼej alʌ tejclum am bʌ ti São Paulo, i lʌcʼʌ tiʼ pejtelel yaʼ bʌ chumulob yaʼi pʼumpʼuñob.
Cheʼ bʌ maxto quila pañimil jiñi c papá tsaʼ chʌmi. I cheʼ bʌ chutonto mic lʌpben i bujc c mamá cheʼ bʌ mach yaʼic an. Tsaʼ caji c mel c bʌ bajcheʼ xʼixic i jiñi lac piʼʌlob tsaʼ caji i yʌlob chaʼan mic mulan wiñic. Ti wiʼil, tsaʼʌch cajic c piʼlen chʼitoñob yicʼot wiñicob añobix bʌ i jabilel chaʼan mic chaʼlen piʼleya yicʼotob.
Cheʼ bʌ 20 c jabilel, tsaʼ caji c sʌclan chaʼan mic piʼlen wiñicob, xʼixicob i cabʌl baqui tsaʼ c taja, ti centro nucturno, ti bar yicʼot ti Iglesia. Cheʼ bʌ miʼ mejlel jiñi carnaval, jiñi escuela chaʼan samba miʼ pʌjyel. Joñon ochemon ti jiñi escuela, jin chaʼan mic chaʼlen son yaʼ ti carnaval i mic xoj c pislel bajcheʼ xʼixic, i tsaʼ cʼotiyon ti wen cʌjñel.
Jiñi camigojob jiñʌch muʼ bʌ i piʼleñob wiñicob, muʼ bʌ i choñob i bʌ i muʼ bʌ i cʼʌñob droga tac. An tsaʼ bʌ i subeyoñob j cʼʌn cocaína, i mach jalic tsaʼ ñumi tsaʼ caji c wen mulan. An i tajol jumpʼejl acʼʌlel mic ñucʼ cocaína quicʼot camigojob, i an qʼuiñil c bajñel jach mic ñucʼ jumpʼejl qʼuin, come wen yajyajon an tsaʼ bʌ caji i yʌlob chaʼan an c chaʼan sida.
BAJCHEʼQUI JIÑI BIBLIA TSIʼ QUEXTɅBEYON C PENSAR: Ti jiñi bʌ ora tsaʼ j cʌñʌyob jiñi i testigojob Jehová i wen uts tsiʼ pejcayoñob. Tsiʼ pejcʌbeyoñob Romanos 10:13, baqui miʼ yʌl chaʼan «majqui jach miʼ cʼajtin coltaya tiʼ cʼabaʼ Jehová mi caj i coltʌntel». Tsaʼ cʼoti j cʌn chaʼan wen ñucʌch i cʼʌjñibal cheʼ mij cʼʌmben i cʼabaʼ Dios. Tsaʼ bʌ caji c mel cheʼ bʌ tsaʼix ujti c ñucʼ jiñi cocaína jumpʼejl acʼʌlel, mic jam jiñi c ventana i mij qʼuel ti panchan, mij cʼajtiben Jehová ti wocol tʼan chaʼan miʼ coltañon.
Tsaʼ j qʼuele chaʼan jiñi c mamá miʼ wen pensarin chaʼan mach weñic chuqui mic mel, jin chaʼan tsaʼ j cʌyʌ jiñi droga tac. Mach jalic tsaʼ ñumi i tsaʼ cajiyon ti estudio yicʼot jiñi i testigojob Jehová. Tiʼ subeyoñob chaʼan jiñʌch jiñi estudio muʼ bʌ caj i coltañon chaʼan mij cʌy jiñi droga tac, i cheʼʌch tsaʼ ujti.
Cheʼ bʌ tsaʼ caji c ñumen cʌn majlel jiñi i sujmlel am bʌ ti Biblia, tsaʼ cʼoti c ñaʼtan chaʼan yom mij qʼuextan c melbal. Ñumen wocol bʌ tsaʼ cubi chaʼan mij cʌy jiñʌch i mulʌntel wiñicob come cʼʌlʌl cheʼ bʌ chutonto mic mulañob. Yom bʌ mij cʌy jaʼel jiñʌch c ñochtan jiñi poj camigojoʼ bʌ yilal, cheʼ jaʼel tsaʼ j cʌyʌ majlel ti bar yicʼot ti centro nocturno.
Anquese wocolʌch tsaʼ cubi chaʼan mij cʌy jiñi melbalʌl tac, tsaʼ bʌ i ñumen aqʼueyon c tijicñʌyel jiñʌch chaʼan Jehová miʼ qʼuelon ti wen yicʼot miʼ qʼuel ti ñuc cheʼ bʌ mic chaʼlen wersa (1 Juan 3:19, 20). Ti 2002 tsaʼ j cʌyʌ jiñi melbalʌl tac yicʼot i piʼlentel wiñicob, i cheʼ jiñi tsaʼ cʼoti c chʼʌmjaʼ i tsaʼ sujtiyon tiʼ testigo Jehová.
WENLEL TAC TAJBIL BɅ C CHAʼAN: C mamá wen tijicña tsiʼ yubi cheʼ tsaʼ j qʼuexta jiñi c melbal, jin chaʼan tsaʼ caji i chʼʌm estudio jaʼel. Anquese ili ora mach cʼoqʼuic, come tsiʼ yʌqʼue derrame cerebral, pero mucʼʌch i bej cʼuxbin Jehová yicʼot jiñi Biblia.
Añix 8 jab cajel j cʌntesan jiñi quixtañujob chaʼan bʌ jiñi Biblia. Tiʼ sujm añʌch c chaʼle wersa chaʼan maʼañic mic chaʼ yajlel tiʼ melol jiñi mach bʌ utsʼatic, pero wen mi cubin c bʌ come mi cʌqʼuen i tijicñʌyel Jehová.
Ili ora ñumen tijicña mi cubin c bʌ come ñumen lʌcʼʌl an quicʼot Jehová i chumulon cheʼ bajcheʼ miʼ mulan.
«Mic wen cuch jiñi jap lembal» (LUKA ŠUC)
JABIL CHEʼ TSAʼ CHʼOCʼA: 1975
PAÍS: ESLOVENIA
YAN TAC BɅ: MIʼ ÑUMEL TI PʼIS TI JAP LEMBAL
BAJCHEʼ QUILAL TI WAJALI: Tsaʼ chʼocʼayon ti Liubliana, i capital Eslovenia. Cheʼ bʌ wen chutonto wen añon, pero cheʼ bʌ 4 c jabilel c papá tsaʼ i bajñel tsʌnsa i bʌ. Tiʼ caj jiñi, c mamá tsaʼ caji ti tsʌts bʌ troñel chaʼan miʼ yʌqʼueñon quicʼot queran i cʼʌjñibal bʌ lon c chaʼan.
Cheʼ bʌ 15 c jabilel tsaʼ majliyon ti chumtʌl baqui an c chuchuʼ. Tsaʼ c mulaj chumtʌl yaʼi come yonlel camigojob yaʼ jach chumulob yaʼ baqui añon lojon i ñumen libre mi cubin c bʌ cheʼ bʌ mach yaʼic chumul quicʼot c mamá. Cheʼ bʌ 16 c jabilel, tsaʼ caji c ñochtan junmojt lac piʼʌlob muʼ bʌ i wen mulañob jap lembal cheʼ ti sábado yicʼot domingo. Tsaʼ cʌcʼʌ ti tamʼan col, i ñoj yʌñʌlix jiñi c pislel tsaʼ bʌ caji c xoj, i ti wiʼil tsaʼ caji c ñucʼ cʼujts.
Tsaʼ c ñopo baqui jach bʌ droga, pero muʼ bʌ c ñumen mulan jiñʌch jap lembal. Ti ñaxan chaʼpʼej uxpʼejl copa jaxto mic jap, pero ti wiʼil mach jumpʼejl jach bux tsaʼ caji c bajñel jap. Wen cujil bajcheʼ mic mel chaʼan maʼañic miʼ cʌñob chaʼan wen on tsaʼ c japʌ. An i tajol miʼ cʼotel i ñaʼtañob chaʼan tsaʼʌch c japʌ cheʼ bʌ miʼ yubiñob i yujtsʼil quej, pero maʼañic miʼ ñaʼtañob chaʼan ñumen ti jumpʼejl litro tsaʼ c japʌ o chaʼan tsaʼ c japʌ cerveza xʌbʌl bʌ yicʼot vodka.
Mach junsujtel jach, yaʼ ti discoteca tsaʼ j coltayob jiñi camigojob chaʼan mic pʌyob majlel tiʼ yotot cheʼ bʌ wen yʌcob, anquese joñoñʌch ñumen on bʌ tsaʼ c japʌ. Ti jumpʼejl bʌ qʼuin, tsaʼ cubi juntiquil camigo i suben yambʌ chaʼan lajalon bajcheʼ jumpʼejl tambo maʼan bʌ miʼ bujtʼel, cheʼ bʌ tsaʼ cubi jiñi wen cʼux tsaʼ cubi. Come cheʼ miʼ subentel yaʼ ti Eslovenia jiñi wen mucʼoʼ bʌ ti jap lembal.
Tsaʼ caji c ñaʼtan chuqui woli c mel tij cuxtʌlel, tsaʼ caji cubin chaʼan maʼan j cʼʌjñibal come muʼ bʌ c mel maʼañic i sujmlel yilal.
BAJCHEʼQUI JIÑI BIBLIA TSIʼ QUEXTɅBEYON C PENSAR: Lʌcʼʌ ti jiñi bʌ ora, tsaʼ caji j qʼuel juntiquil c piʼʌl wen qʼuexelix bʌ i melbal yicʼot wen utsix. Com c ñaʼtan bajcheʼ tsiʼ qʼuexta jiñi i melbal, jin chaʼan tsaʼ c sube chaʼan mi lon c majlel ti jap café chaʼan mi lon c tsʼitaʼ chaʼlen tʼan. Tiʼ subeyon chaʼan woli ti estudio yicʼot jiñi i testigojob Jehová. Cheʼ jaʼel, tiʼ subeyon chuqui choncol bʌ i cʌn majlel, come machʌch yoque cujil chaʼan bʌ ñopbalʌl. Jin chaʼan, cheʼ bʌ tiʼ subeyon jiñi woli bʌ i cʌn tsijibto tsaʼ cubi. Tsaʼ caji c tempan bʌ quicʼot jiñi Testigojob i tsaʼ caji c chʼʌm jumpʼejl estudio.
Cheʼ bajcheʼ jiñi tsaʼ cʼoti j cʌn jiñi utsʼatax bʌ i sujmlel. Jumpʼejl ejemplo, tsaʼ cʼoti j cʌn yaʼ ti Biblia chaʼan chumuloñixla ti «cojix tac bʌ qʼuin» i chaʼan mach jalix yom chaʼan Dios mi caj i jisan jiñi jontoloʼ bʌ wʌʼ ti Pañimil, pero jiñi muʼ bʌ i jacʼbeñob i tʼan mi caj i chumtʌlob tiʼ pejtelel ora yaʼ ti paraíso (2 Timoteo 3:1-5; Salmo 37:29). Jin chaʼan, tsaʼ caji c sʌqʼuesan jiñi j cuxtʌlel chaʼan mic mejlel ti ajñel jaʼel ti jiñi Paraíso.
Cheʼ bʌ tsaʼ c subeyob jiñi poj camigojoʼ bʌ chaʼan choncol bʌ j cʌn majlel tsaʼ i wajleyoñob. I jiñi tsiʼ pʌsbeyon chaʼan mach i sujmic bʌ camigojob. Tsaʼ cʼoti j cʌn jeʼel chaʼan cheʼ bʌ tsaʼ caji c tsʌcleñob jiñi muʼ bʌ i wen japob lembal tsaʼ cajiyon ti wen jap lembal jaʼel, come mucʼ jach i pijtañob chaʼan sábado yicʼot domingojix chaʼan miʼ majlelob ti jap lembal.
Tsaʼ j cʌyʌ jiñi mach bʌ weñobic amigojob i tsaʼ caji c sʌclan yambʌ yaʼ tiʼ testigojob Jehová. Jiñiyob mach cojach miʼ ñuqʼuesañob c pusicʼal, miʼ wen cʼuxbiñob Dios i miʼ chaʼleñob wersa chaʼan miʼ chumtañob cheʼ bajcheʼ miʼ yʌl jiñi i mandar Dios. Cheʼ tsaʼ caji c tsʌcleñob tsaʼʌch i wen coltayon, ti wiʼil tsaʼ j cʌyʌ jap lembal.
WENLEL TAC TAJBIL BɅ C CHAʼAN: Mi cʌqʼuen wocolix i yʌlʌ Jehová chaʼan tsiʼ coltayon come mach cʼʌñʌlix mic jap lembal chaʼan tijicñayon. Mach cujilic bajcheʼ tsaʼ ujtiyon cheʼ machic tsaʼ j cʌyʌ c mel jiñi mach bʌ weñic. Ili ora ñumen weñix bajcheʼ añon.
Jiñi 7 jab ñumen bʌ tilel, an c chaʼle coltaya yaʼ ti sucursal chaʼan i testigojob Jehová ti Eslovenia. Cheʼ tij cʌñʌ Jehová yicʼot cheʼ mic melben i yeʼtel an i yʌqʼue i sujmlel j cuxtʌlel.