Mucʼʌch, cabʌlob tiʼ petol pañimil. Ochemob ti jiñi junmojt muʼ bʌ i subob jiñi wen tʼan chaʼan bʌ i Yumʌntel Dios cheʼ bajcheʼ tsaʼ wʌn ajli yaʼ ti Salmo 68:11, (Traducción del Nuevo Mundo), baqui Jehová miʼ yʌl: «Jiñi xʼixicob muʼ bʌ subob jiñi wen tʼan lajalob bajcheʼ yonlel soldadojob».

Jiñi eʼtel muʼ bʌ i melob jiñi xʼixicob testigojoʼ bʌ qʼuexelʌch bajcheʼ muʼ bʌ i melob jiñi xʼixicob ti yambʌ ñopbalʌl. ¿Chucoch qʼuexelʌch?

Jiñi yambʌ xʼixicob añob i yeʼtel yaʼ tiʼ ñopbalob. I yaʼ jach miʼ chaʼleñob cʌntesa tiʼ templo o ti iglesia. Pero jiñi xʼixicob testigojoʼ bʌ miʼ loqʼuel i subeñob wen tʼan yambʌlob ti ototʌl o jiñʌch baqui miʼ tajob.

Yambʌ qʼuexel bʌ tiʼ tojlel jiñi testigojob. Jiñi xʼixicob ti yambʌ ñopbalʌl miʼ chʼʌmob tiʼ wenta jiñi muʼ bʌ i cʼotelob i miʼ cʌntesañob. Pero jiñi xʼixicob testigojoʼ bʌ maʼañic miʼ chaʼleñob cʌntesa mi yaʼan juntiquil wiñic chʼʌmʌlix bʌ i chaʼan jaʼ. Cojach miʼ melob jiñi ancianojob, wiñicob waʼchocobiloʼ bʌ chaʼan miʼ chaʼleñob cʌntesa (1 Timoteo 3:2; Santiago 3:1).

Yaʼ ti Biblia cojach jiñi wiñicob miʼ yʌl chaʼan miʼ chaʼleñob cʌntesa yaʼ ti congregación. Miʼ mejlel la cʌl chaʼan i sujmʌch iliyi come jiñi apóstol Pablo cheʼʌch tiʼ sube Tito superintendente bʌ ti jiñi bʌ ora. «Tsaʼ j cʌyʌyet ti Creta chaʼan [...] maʼ waʼchocon ancianojob ti jujumpʼejl tejclum» (Tito 1:5). Cheʼ jiñi tsiʼ yʌlʌ chaʼan «jiñi anciano mach yomic an i yʌlol chaʼan mach weñic i melbal, yom juntiquil jach i yijñam» (Tito 1:6). Jiñi apóstol lʌcʼʌ lajalʌch tsaʼ bʌ i tsʼijbu ti jiñi i carta tsaʼ bʌ i chocbe majlel Timoteo. Tsiʼ yʌlʌ: «Mi juntiquil wiñic woliʼ chaʼlen wersa chaʼan miʼ sujtel ti anciano, weñʌch jiñi eʼtel yom bʌ i taj. Jiñi anciano yom wen i melbal chaʼan jiñi lac piʼʌlob maʼañic miʼ yʌlob, yom juntiquil jach i yijñam, [...] yom chajpʌbil chaʼan miʼ chaʼlen cʌntesa» (1 Timoteo 3:1, 2).

Pero ¿chucoch jin jach jiñi wiñicob yom añob i yeʼtel yaʼ ti congregación? Pablo tsiʼ yʌlʌ: «Maʼañic mi cʌcʼ ti cʌntesa jiñi xʼixic mi chaʼañic miʼ chʼʌm i yeʼtel tiʼ tojlel wiñic, yom jach ñʌchʼʌl. Come Adán jiñʌch tsaʼ bʌ ñaxan mejli, i wiʼilix jiñi Eva» (1 Timoteo 2:12, 13). Dios ñaxan tsiʼ mele wiñic cheʼ jiñi tsiʼ mele jiñi xʼixic, ili miʼ pʌs chaʼan majqui jiñi yom bʌ miʼ chaʼlen cʌntesa yicʼot miʼ chʼʌm i yeʼtel.

Jesucristo jiñʌch i Yum tiʼ pejtelel jiñi i wiñicob Jehová, jin chaʼan miʼ tsajcʌbeñob i melbal. Cheʼ bajcheʼ miʼ yʌl Lucas, Jesús «tsaʼ majli i sub jiñi wen tʼan chaʼan i Yumʌntel Dios ti jujumpʼejl tejclum yicʼot ti jujumpʼejl alʌ tejclum tac». ¿I chuqui tsiʼ meleyob jiñi xcʌntʼañob i chaʼan cheʼ tsaʼ chojquiyob majlel i mel jaʼel ili eʼtel? «Tsaʼ majliyob ti jujumpʼejl alʌ tejclum, woliʼ subob ñumel jiñi wen tʼan tac» (Lucas 8:1; 9:2-6.)

Ili ora jiñi i tejclum Jehová, wiñicob o xʼixicob, tijicña woliʼ tsʼʌctesañob ili tʼan tac am bʌ ti Mateo 24:14. Jesús tsiʼ yʌlʌ: «I jiñi wen tʼan chaʼan bʌ Yumʌntel mi caj i sujbel tiʼ pejtelel pañimil chaʼan miʼ yubiñob jiñi tejclum tac, cheʼ jiñi mi caj i tilel jiñi i jilibal».