• JABIL CHEʼ TSAʼ CHʼOCʼA: 1963

• PAÍS: GRAN BRETAÑA

• YAN TAC BɅ: TSIʼ CɅYɅ JIÑI ÑUMEN ÑUC BɅ CARRERA

BAJCHEʼ QUILAL TI WAJALI:

Tsaʼ quila pañimil ti jiñi tejclum Croydon am bʌ ti Londres. Jiñi c papá yicʼot c mamá tilemob ti jiñi isla caribeña ti San Vicente. Añon lon 9 queran bʌ lon c bʌ, i joñon jiñi i seislel. Jiñi c mamá ochem ti jiñi Iglesia Metodista, pero joñon maʼañic tsaʼ c chʼʌmʌ ti ñuc i ñopbal. Cheʼ bʌ xcolelonto cabʌl jax chuqui com c ñop. Lʌcʼʌ tiʼ pejtelel ora tic vacación mic pejcan libro tac muʼ bʌ c majñan yaʼ ti biblioteca.

Cheʼ bʌ tsaʼ loqʼuiyon ti escuela, tsaʼ c ñaʼta j coltañob jiñi yomoʼ bʌ coltʌntel. Tsaʼ c teche yicʼot jiñi mach bʌ añobic i yotot, jiñi discapacitadojoʼ bʌ o jiñi wocol bʌ miʼ chʼʌmbeñob i sujm chuqui miʼ cʌntesʌntelob. Tsaʼ c teche jumpʼejl curso chaʼan administración de la salud ti jumpʼejl universidad. Cheʼ bʌ tsaʼ loqʼuiyon ti universidad tsaʼ c taja jiñi ñuc tac bʌ eʼtel i tsaʼ mejli c mʌn chuqui tac com lets bʌ i tojol. Tsaʼ sujtiyon ti asesora yicʼot ti investigadora social. Cojach yom an c chaʼan jumpʼejl computadora yicʼot internet chaʼan mic mel jiñi queʼtel. Cheʼ bʌ mic majlel ti colem tejclum tac mij cʌytʌl cabʌl semana ti jiñi hotel muʼ bʌ c wen mulan, mij cʼʌn jiñi gimnasio tac, mic majlel baʼ miʼ mejlel masaje tac yicʼot ti sala de belleza i mic wen mulan j qʼuel pejtelel chuqui utsʼatax bʌ an yaʼi. Tsaʼ c lon ñaʼta chaʼan tijicña chumulon. Pero maʼañic tsaʼ j cʌyʌ c ñaʼtan jiñi yomoʼ bʌ coltʌntel.

BAJCHEʼ TSIʼ QʼUEXTA C PENSAR JIÑI BIBLIA:

Cabʌl jab tsaʼ j cʼajtibe c bʌ chucoch wʌʼañonla ilayi i chuqui i sujmlel jiñi laj cuxtʌlel. Pero maʼañic baʼ ora tsaʼ c ñaʼta c sʌclan i jacʼbal yaʼ ti Biblia. Jumpʼejl bʌ qʼuin cheʼ ti 1999 tsiʼ julaʼtayon jiñi quijtsʼin Margaret yicʼot i yamiga. Tiʼ chaʼticlelob i testigojob Jehová. I jiñi i yamiga wen uts yicʼoton, jin chaʼan tsaʼ c jacʼʌ estudio yicʼot. Pero tiʼ caj jiñi queʼtel yicʼot cheʼ bajcheʼ chumulon maʼañic tsaʼ c wen aqʼue i yorajlel jiñi estudio.

Ti 2002, ti ojlil jab majlel, tsaʼ majliyon ti chumtʌl ti Inglaterra chaʼan mic bej chajpan c bʌ yaʼ ti universidad i mic taj yambʌ c título. Yaʼi tsaʼ cajiyon ti majlel ti tempa bʌ chaʼan i testigojob Jehová quicʼot calobil. Anquese lon tsajñon ti universidad, maʼañic tsaʼ c ñaʼta chucoch an jiñi wocol i bajcheʼ miʼ mejlel ti tojʼan, jinto cheʼ tsaʼ j cʌñʌ muʼ i yʌl jiñi Biblia. Tsaʼ bʌ i coltayon jaʼel jiñʌch Mateo 6:24, chaʼan mach mejlic lac chʼujutesan Dios yicʼot lac sʌclan chubʌʼan. Cujil chaʼan yom mic yajcan chuqui jiñi ñumen ñuc bʌ i cʼʌjñibal c chaʼan.

Ti wajali cheʼ bʌ muʼto i yujtel jiñi estudio de libro tiʼ yotot jiñi Testigojob tsajñon cheʼ bʌ miʼ chaʼleñob ti estudiar jiñi libro ¿Existe un Creador que se interese por nosotros? * Iliyi tsiʼ coltayon c ñaʼtan chaʼan cojach Jehová miʼ mejlel i tojʼesan jiñi lac wocol tac. Pero yaʼ ti universidad miʼ yʌlob chaʼan mach cʼʌñʌlic mi lac ñop Dios chaʼan mi lac taj i sujmlel laj cuxtʌlel. Jiñʌch tsaʼ bʌ i wen michʼesayon, an jaxto chaʼpʼejl uw j cajel ti clase i tsaʼ j cʌyʌ, tsaʼ caji c ñumen aqʼuen i yorajlel chaʼan mic ñumen cʌn Dios.

Junchajp tsaʼ bʌ i coltayon j qʼuextan bajcheʼ chumulon jiñʌch Proverbios 3:5, 6: «Ñopo lac Yum tiʼ pejtelel a pusicʼal. Mach a bajñel ñaʼtan bajcheʼ jach a wom maʼ mel. Tiʼ pejtelel chuqui maʼ mel ñaʼtan lac Yum. Cheʼ jini mux caj i chajpʌbeñet a bijlel». Tsaʼ bʌ j cʌñʌ ti Dios jiñʌch tsaʼ bʌ i ñumen aqʼueyon c tijicñʌyel, mach jiñic jiñi taqʼuin mi jiñicto ñuc tac bʌ eʼtel. Ñumento com cʌqʼuen j cuxtʌlel Dios cheʼ bʌ tsaʼ caji c ñumen cʌn chuqui yom chaʼan ili pañimil yicʼot cheʼ bʌ Jesús tsaʼ yʌcʼʌ i bʌ ti chʌmel chaʼañonla. Cheʼ ti 2003 tsaʼ cʼoti c chʼʌmjaʼ i tsaʼ sujtiyon tiʼ testigo Jehová, cʼʌlʌl ti jimbʌ ora tsaʼto caji c bej qʼuextan majlel bajcheʼ yilal chumulon chaʼan mic ñumen aqʼuen i yorajlel c melben i yeʼtel Dios.

WENLEL TAC TAJBIL BɅ C CHAʼAN:

Mic wen qʼuel ti ñuc cheʼ camigojix Dios, wʌle ora cheʼ j cʌñʌyix, an c ñʌchʼtʌlel yicʼot c tijicñʌyel. Cheʼ jaʼel, mic wen ubin c tijicñʌyel cheʼ bʌ mi cajñel quicʼot jiñi xucʼul bʌ i wiñicob Dios.

Mic wen ubin c tijicñʌyel chaʼan jiñi woli bʌ j cʌn ti Biblia yicʼot ti tempa bʌ. Cheʼ jaʼel mic wen mulan c suben yañoʼ bʌ jiñi ñopbil bʌ c chaʼan. Jin chaʼan tsaʼ caji c melben i yeʼtel Jehová tiʼ pejtelel ora, tsaʼ c teche ti junio 2008. Cheʼ bajcheʼ jiñi, mij coltan lac piʼʌlob i tajob i wenlel ili ora yicʼot ti talto bʌ qʼuin. Maʼañic baʼ cubi cabʌl c tijicñʌyel bajcheʼ ili. Mic wen aqʼuen wocolix i yʌlʌ Dios come añix i sujmlel j cuxtʌlel.

• JABIL CHEʼ TSAʼ CHʼOCʼA: 1973

• PAÍS: AUSTRIA

• YAN TAC BɅ: MIC WEN CHAʼLEN ALAS CHAʼAN I TAJOL TAQʼUIN

BAJCHE QUILAL TI WAJALI:

Tsaʼ quila pañimil ti jumpʼejl familia católico bʌ ti jumpʼejl alʌ tejclum wem bʌ chumulob i cʼabaʼ Braunau (Austria). Baqui maʼañic wen cabʌl jontolil.

Cʼajal c chaʼan chuqui tsaʼ ujti ti jumpʼejl icʼan cheʼ bʌ an jaxto 11 c jabilel, ti 1984. Juntiquil wem bʌ camigo tsaʼ bʌ c chaʼle alas fútbol quicʼot, tsaʼ chʌmi ti jumpʼejl accidente ti carro. Cabʌl jab maʼañic tsaʼ ñajayi c chaʼan cheʼ tsaʼ chʌmi jiñi camigo. Maʼañic tsaʼ j cʌyʌ j cʼajtiben c bʌ chuqui mi lac chaʼlen cheʼ mi lac chʌmel.

Cheʼ bʌ tsaʼ j cʌyʌ clase, tsaʼ cajiyon ti eʼtel bajcheʼ xmel luz. Mach cabʌlic qʼuin tsaʼ ñumi i tsaʼ caji c mulan jiñi alas chaʼan taqʼuin. Anquese mic wen asin taqʼuin, maʼañic mic tajben i wocolel come añʌch c taqʼuin. Cheʼ jaʼel mic wen aqʼuen i yorajlel jiñi yan tac bʌ alas yicʼot mic ñʌchʼtan música bajcheʼ heavy metal yicʼot punk. Tsaʼ c wen mele tsʼiʼlel tac yicʼot mic wen mulan majlel ti discoteca yicʼot ti qʼuiñijel tac. Mic laj mel chuqui jach com, pero mach tijicñayoñic.

BAJCHEʼ TSIʼ QUEXTA C PENSAR JIÑI BIBLIA:

Ti 1995, juntiquil Testigo añix bʌ i jabilel tsaʼ cʼoti i julaʼtañon ti cotot, i tsiʼ yʌqʼueyon Jumpʼejl libro muʼ bʌ i jacʼ ili cʼajtiya «¿Chuqui mi lac chaʼlen cheʼ mi lac chʌmel?». Tsaʼʌch c chʼʌmʌ come muʼto c chʌn ñaʼtan bajcheʼ tsaʼ chʌmi jiñi camigo. Tsaʼ c laj pejca jiñi libro i mach cojach muʼ bʌ i yʌcʼben i jacʼbal jiñi j cʼajtiya.

Cabʌlʌch chuqui tsaʼ j cʌñʌ i mach cojic jach chaʼan jiñi chʌmel. Come cʼʌlʌl cheʼ bʌ tsaʼ coliyon jiñi c ñopbal jiñʌch jiñi católica, cojach mic ñop ti Jesucristo. Pero cheʼ tsaʼ caji c pejcan jiñi Biblia tsaʼ sujti ti camigo jaʼel jiñi Jehová, i Tat jiñi Jesucristo. Tsaʼ c mulaj cheʼ bʌ tsaʼ j cʌñʌ chaʼan juntiquilʌch Dios muʼ bʌ i mejlel lac lʌcʼtesan lac bʌ tiʼ tojlel. Miʼ yʌcʼ i bʌ ti cʌjñel tiʼ tojlel muʼ bʌ i sʌclañob (Mateo 7:7-11). Tsaʼ j cʌñʌ jaʼel chaʼan añʌch bajcheʼ yubil miʼ yubin i bʌ yicʼot chaʼan tiʼ pejtelel ora miʼ tsʼʌctesan i tʼan. Ili cojix bʌ tsiʼ coltayon chaʼan com j cʌn bajcheʼ an tsʼʌctiyem jiñi profecía tac am bʌ ti Biblia. Tsaʼ bʌ j cʌñʌ tsiʼ pʼʌtʼesʌbeyon c ñopoñel ti Dios.

Tsaʼ j qʼuele chaʼan cojach jiñi Testigojob miʼ chaʼleñob wersa i coltañob jiñi lac piʼʌlob chaʼan miʼ chʼʌmbeñob i sujm jiñi Biblia. Jiñi versículo tac muʼ bʌ i tilel tiʼ juñob mic laj tsʼijbun chaʼan mic sʌclan ti jiñi c Biblia católica. Cheʼ bʌ tsaʼ caji c ñumen cʌn majlel tsaʼ cʼoti j cʌn chaʼan tsaʼ c taja jiñi i sujm bʌ ñopbalʌl.

Ti jiñi Biblia tsaʼ j cʌñʌ jaʼel chaʼan yom mic jacʼben i tʼan Jehová. Cheʼ bʌ tsaʼ c pejca Efesios 4:22-24, tsaʼ j cʌñʌ chaʼan yom mij cʌy jiñi ñoxix bʌ c melbal, come cheʼʌch ñʌmʌlon ti chumtʌl ti wajali, i jin chaʼan yom mic pʌs jiñi tsijiʼ bʌ c melbal tsaʼ bʌ mejli cheʼ bajcheʼ yom Dios. Ti orajach tsaʼ j cʌyʌ c mel tsʼiʼlel i tsaʼ j cʌyʌ c sʌclan chubʌʼañʌl tac yicʼot alas chaʼan taqʼuin (1 Corintios 6:9, 10). Tsiquilʌch chaʼan mi com j qʼuextan pejtelel jiñi mach bʌ weñic c melbal, yomʌch mij cʌy jiñi mach bʌ wen taquic bʌ camigojob i mic sʌclan jiñi mucʼʌch bʌ i jacʼbeñob i tʼan Dios.

Wocolʌch tsaʼ cubi jiñi, pero tsaʼ c taja wem bʌ camigojob cheʼ bʌ tsaʼ cajiyon ti majlel tiʼ tempa bʌ jiñi Testigojob. Cheʼ jaʼel, tsaʼ caji c bej pejcan jiñi Biblia yicʼot tsaʼ caji c bej ñaʼtan majlel woli bʌ j cʌn. Cʼunteʼ cʼunteʼ tsaʼ caji j qʼuextan majlel jiñi música muʼ bʌ c mulan, com bʌ c mel yicʼot bajcheʼ quilal. Ti 1995 tsaʼ c chʼʌmʌ jaʼ i tsaʼ sujtiyon bajcheʼ Testigo.

WENLEL TAC TAJBIL BɅ C CHAʼAN:

Wʌle, ñumen pʼisbil jach bajcheʼ yilal mij qʼuel jiñi taqʼuin yicʼot chubʌʼañʌl tac. Cheʼ jaʼel an j cʌñʌ c ticʼ c bʌ i mach orajix mic michʼan yicʼot maʼañix mic chʌn pensarin jiñi talto bʌ qʼuin.

Mic wen ubin c tijicñʌyel come añon ti jumpʼejl familia am bʌ tiʼ pejtelel pañimil muʼ bʌ i chʼujutesañob Jehová. Miʼ mejlel cʌl yicʼot c tijicñʌyel chaʼan maʼañix mic sʌclan bajñel com bʌ, mic melben i yeʼtel Jehová yicʼot mic mel chuqui utsʼat bʌ tiʼ tojlel yañoʼ bʌ.

• JABIL CHEʼ TSAʼ CHʼOCʼA: 1963

• PAÍS: GRAN BRETAÑA

• YAN TAC BɅ: MACH TIJICÑAYIC CHUMULON

BAJCHEʼ QUILAL TI WAJALI:

Tsaʼ quila pañimil ti Inglaterra, pero cheʼ bʌ 7 c jabilel tsaʼ majliyon lojon ti chumtʌl ti Australia, baqui miʼ wen cʼotel lac piʼʌlob ti xʌmbal ti Queensland yaʼ ti Gold Coast. Anquese maʼañic lon c taqʼuin maʼañic baʼ ora tsaʼ lon c ñusa wiʼñal.

Anquese añʌch chuqui tsʼitaʼ an c chaʼan mach tijicñayic chumulon. Jiñi c papá miʼ wen jap lembal, jin chaʼan maʼañic mic wen cʼuxbin. Maʼañic mic mulan cheʼ miʼ wen jap lembal yicʼot cheʼ miʼ pʼumpʼun ticʼlan c mamá. Cabʌl jab tsaʼ ñumi chaʼan mic chʼʌmben i sujm chucoch cheʼ mi mel bajcheʼ jiñi, come tsaʼ cubi chuqui tsiʼ ñusa cheʼ bʌ tsajñi bajcheʼ soldado ti Malasia.

Cheʼ bʌ añonto ti secundaria tsaʼ c teche c wen jap lembal. I cheʼ bʌ an 16 c jabilel tsaʼ j cʌyʌ jiñi clase i tsaʼ ochiyon bajcheʼ soldado. Ti jimbʌ ora tsaʼ caji c ñop droga tac, pero tsaʼ caji c ñumen ñucʼ cʼujts yicʼot tsaʼ sujtiyon ti xjap lembal. Ti ñaxan ti sábado yicʼot ti domingo mic jap, ti wiʼil jujumpʼejlix qʼuin tsaʼ caji c mel.

An cheʼ bʌ 20 c jabilel cheʼ tsaʼ caji j cʼajtiben c bʌ mi añʌch Dios. «Tsaʼ c ñaʼta, mi añʌch Dios, ¿chucoch mi lac ñusan wocol yicʼot mi lac chʌmel?». Tsaʼto c mele poema tac baʼ mi cʌl chaʼan i mul Dios jiñi jontolil am bʌ ila ti pañimil.

Tsaʼ loqʼuiyon ti soldado cheʼ 23 c jabilel. Tsaʼ c taja cabʌl queʼtel i jumpʼejl jab tsaʼ c chaʼle xʌmbal ñumel ti colem tejclum tac, pero maʼañic tsiʼ yʌqʼueyon c tijicñʌyel mi añicto chuqui com c mel tij cuxtʌlel. Maʼañic chuqui miʼ ñijcañon chaʼan mic sʌclan cotot yicʼot wem bʌ queʼtel, com jach c wen jap lembal yicʼot c ñʌchʼtan música.

Cʼajalto c chaʼan cheʼ bʌ tsaʼ c ñaʼta chaʼan comʌch c tajben i sujmlel jiñi j cuxtʌlel. Cheʼ bʌ yaʼañon ti Polonia, tsajñi c julaʼtan jiñi campo i chaʼan xñujpʼelob ti Auschwitz. Añix pejcʌbil c chaʼan chuqui tac tsaʼ ujti yaʼi, pero cheʼ bʌ tsaʼ j qʼuele bajcheʼ yila tsaʼ i yʌqʼueyon c chʼijyemlel. Maʼañic mic chʼʌmben i sujm chucoch jiñi lac piʼʌlob wen jontolob. Cheʼ woliyon ti xʌmbal ñumel yaʼ ti campo woliyon ti wen uqʼuel i tsaʼ j cʼajtibe c bʌ: «¿Chucoch tsaʼ ujti iliyi?».

BAJCHEʼ TSIʼ QʼUEXTA C PENSAR JIÑI BIBLIA:

Cheʼ ti 1993, tsaʼ chaʼ sujtiyon ti cotot ti Australia, i tsaʼ caji c ñop c tajben i jacʼbal jiñi j cʼajtiya yaʼ ti Biblia. Mach jalic tsaʼ ñumi, chaʼtiquil Testigo tsaʼ cʼotiyob ti cotot i tiʼ subeyoñob chaʼan miʼ cajel jumpʼejl colem tempa bʌ ti jumpʼejl estadio lʌcʼʌl bʌ an yaʼi, i tsajñoñʌch.

Ajñemoñix ti jiñi estadio chaʼan mij qʼuel xʼalas, pero ti jimbʌ ora qʼuexelʌch chuqui tsaʼ j qʼuele. Jiñi Testigojob utsob, wen jach i pislelob yicʼot jiñi i yalobilob wen jach miʼ yajñelob. Wen utsʼatax chuqui tsaʼ j qʼuele cheʼ ti xinqʼuiñil, yonlel Testigojob tsaʼ majliyon ti buchtʌl ti jam chaʼan miʼ cʼuxob i waj, i cheʼ bʌ tsaʼix chaʼ majliyob tiʼ buchlib maʼañic tsiʼ cʌyʌyob mi jumpʼejlic basura. Pero tsaʼ bʌ i ñumen acʼʌ ti toj sajtel c pusicʼal jiñʌch cheʼ tiʼ pejtelelob ñʌchʼʌl añob yicʼot tijicñayob, i jiñʌch com bʌ jiñi. Mach cʼajalic c chaʼan mi jumpʼejlic discurso tsaʼ bʌ ñumi, pero jiñi i melbalob tsaʼʌch cʌyli tic jol.

Ti jiñi jach bʌ acʼʌlel tsaʼ j cʼajtesa chaʼan jiñi c primo, cʌmbil bʌ i chaʼan jiñi Biblia yicʼot jiñi yan tac bʌ ñopbalʌl, añix ora tiʼ subeyon chaʼan Jesús tsiʼ yʌlʌ chaʼan mi caj i mejlel j cʌn jiñi i sujm bʌ xñoptʼañob tiʼ melbalob (Mateo 7:15-20). Jin chaʼan, tsaʼ c ñaʼta chaʼan yomixto mic tsʼitaʼ cʌn chucoch jiñi Testigojob qʼuexelobʌch, i jiñi tiʼ tsʼitaʼ aqʼueyon c ñaʼtan chaʼan mucʼʌch i mejlel c taj jumpʼejl wem bʌ c pijtaya.

Ti yambʌ semana, jiñi Testigojob tsaʼ bʌ i pʌyʌyoñob ti colem tempa bʌ tsiʼ chaʼ julaʼtayoñob. Tiʼ subeyoñob jumpʼejl estudio i tsaʼʌch c jacʼʌ. I tsaʼ cajiyon ti majlel ti tempa bʌ tac.

Cheʼ woli j cʌn majlel muʼ bʌ i yʌl jiñi Biblia, tsaʼ qʼuextʌyi bajcheʼ mic ñaʼtan tiʼ tojlel Dios. Tsaʼ j cʌñʌ chaʼan mach i mulic cheʼ an jiñi jontolil yicʼot jiñi wocol, i chaʼan chʼijyem miʼ yubin i bʌ cheʼ jiñi lac piʼʌlob miʼ melob mach bʌ weñic (Génesis 6:6; Salmo 78:40, 41). Tsaʼ cʌlʌ chaʼan mi caj c chaʼlen wersa chaʼan maʼañic mic lowben i pusicʼal i chaʼan mic tijicñesʌben i pusicʼal (Proverbios 27:11). Tsaʼ j cʌyʌ jiñi cigarro, jiñi lembal yicʼot tsʼiʼlel. Cheʼ ti marzo ti 1994, tsaʼ c chʼʌmʌ jaʼ i tsaʼ sujtiyon bajcheʼ i testigo Jehová.

WENLEL TAC TAJBIL BɅ C CHAʼAN:

Ili ora tijicñayoñix. Cheʼ bʌ chʼijyemon, maʼañix mic jap lembal. Mi an chuqui mic pensarin, mi cʌqʼuen tiʼ cʼʌb Jehová (Salmo 55:22).

Añix 10 jab ñujpuñemon quicʼot i tʼojol jax bʌ xʼixic i cʼabaʼ Karen, i an juntiquil majan quixicʼal i cʼabaʼ Nella. Ti lon j cuxticlel mi lon c wen chaʼlen subtʼan i mi lon j coltan yambʌlob chaʼan miʼ cʌñob jiñi i sujmlel tiʼ tojlel Jehová. Añix i sujmlel j cuxtʌlel.