AN YONLEL xñoptʼañob maʼan bʌ miʼ melob jiñi qʼuiñijel chaʼan navidad. ¿Muʼ ba i chaʼ ñaʼtañob i bʌ cheʼ maʼix miʼ melob? ¿Am ba chuqui miʼ chaʼ cʼajtesañob maʼix bʌ miʼ melob? ¿Muʼ ba i ñaʼtañob chaʼan jiñi i yalobilob an chuqui choncol i sʌtob wen utsʼat bʌ? Laʼ laj qʼuel chuqui miʼ yʌlob ojlil i testigojob Jehová chumuloʼ bʌ ti yan tac bʌ tejclum.

I cʼajtesʌntel Jesús. «Cheʼ bʌ maxto i testigojon Jehová, bixetic jach mi cajñel ti iglesia, Cojach ti Navidad o ti Pascua, i an i tajol mach tiʼ pejtelel ora mi cajñel. Pero mi muqʼuicto j cʼajtesan Jesús ti jiñi bʌ ora. Wʌle, cheʼ maʼañix mic mel jiñi navidad, mic tempan c bʌ quicʼot j congregación chaʼsujtel ti semana i mic pʌsbeñob yambʌlob chuqui miʼ yʌl jiñi Biblia chaʼan Jesús» (EVE, AUSTRALIA).

I yʌcʼol majtan. «Wen tijicña mi cubin cheʼ mi cʌqʼuentel jumpʼejl majtan maʼan bʌ pijtʌbil c chaʼan. ¡Mic wen mulan! Cheʼ jaʼel, mic mulan c mel tarjeta o dibujo tac chaʼan mi cʌqʼuen yambʌlob, i tijicñayob, i cheʼʌch joñon jaʼel» (REUBEN, IRLANDA DEL NORTE).

I coltʌntel jiñi pʼumpʼuñoʼ bʌ. «Tijicña mi cubin lon c cheʼ mi lon c chajpan chuqui miʼ cʼuxob jiñi cʼamoʼ bʌ. An qʼuiñil mi lon c chʼʌmben majlel pastel, ñichteʼ o yan tac bʌ majtañʌl muʼ bʌ i yʌqʼueñob i tijicñʌyel. Ili miʼ mejlel lac mel baqui jach bʌ qʼuin» (EMILY, AUSTRALIA).

Lac julaʼtan lac familia. «Cheʼ bʌ jiñi lac familia miʼ tempañob i bʌ ti yan tac bʌ qʼuin, jiñi xbiʼtalob miʼ ñumen mejlel i cʌñob i tíojob, i tatuchob yicʼot i primojob. Come maʼan mi lac mel tiʼ cajach jumpʼejl qʼuiñijel, jiñi lac familia yujilob chaʼan cheʼ mi lac julaʼtañob chaʼañʌch mi laj cʼuxbiñob i mach chaʼan jach tiʼ caj jumpʼejl qʼuiñijel» (WENDY, ISLAS CAIMÁN).

Mi lac pʌs ñʌchʼtʌlel. «Cheʼ bʌ muʼto c mel Navidad miʼ tempʌyel cabʌl queʼtel, i maʼan mic tajben i yorajlel chaʼan mic ñaʼtan chaʼan jiñi ñʌchʼtʌlel. Cujilix chaʼan jiñi Biblia miʼ yʌl chuqui muʼ bʌ caj i tajob jiñi quixtañujob, i cheʼ jaʼel tsaʼix c taja jiñi i sujm bʌ ñʌchʼtʌlel. Cujil chaʼan jiñi calobilob mi caj i chumtʌlob ti jiñi tsijiʼ bʌ pañimil» (SANDRA, ESPAÑA).