Cheʼ bʌ chutonto mic wen mulan chuqui tac melbil. Yicʼot c familia mic majlel ti xʌmbal ti jiñi mateʼel tac yicʼot ti jiñi jaʼ tac am bʌ tiʼ joytʌlel jiñi tejclum, Jyväskylä, am bʌ tiʼ yojlil jiñi Finlandia. Cheʼ jaʼel, mic wen mulan jiñi añimal tac. ¡Cheʼ bʌ chutonto baqui jach mij qʼuel jiñi tsʼiʼ tac yicʼot xmis tac mic mulan c luʼ mecʼ! Cheʼ bʌ tsaʼix coliyon, tsaʼ caji c wen cʼojoʼtan cheʼ bʌ miʼ wen ticʼlʌntel jiñi añimal tac, jin chaʼan tsaʼ ochiyon ti jiñi junmojt lac piʼʌlob muʼ bʌ i coltañob jiñi añimal tac. Yaʼi tsaʼ j cʌñʌ yambʌ lac piʼʌlob cheʼ bʌ miʼ ñaʼtañob jaʼel bajcheʼ joñon.

Cheʼ jaʼel, mi lon c mel campaña tac baqui miʼ coltʌntel jiñi añimal tac. Mic puc lon jun yicʼot mi lon c mel marcha tac tiʼ tojlelob jiñi muʼ bʌ i mʌñob i pʌchʌlel jiñi añimal tac yicʼot tiʼ tojlel jiñi laboratorio tac baqui miʼ cʼʌjñel añimal tac. Ti wiʼil tsaʼ c mele lon jumpʼejl organización baqui miʼ coltʌntel jiñi añimal tac. Pero tiʼ caj jiñi muʼ bʌ lon c meleʼ yaʼi miʼ yotsañon lon ti wocol yicʼot jiñi añoʼ bʌ i yeʼtel. Mach junsujtel jach tsaʼ chujquiyon i tsaʼ ujti meloñel tic tojlel.

Cheʼ jaʼel, tsaʼ caji j cʼojoʼtan yan tac bʌ wocol, jin chaʼan tsaʼ ochiyon ti jumpʼejl organización cʌmbil bʌ bajcheʼ Amnistía Internacional yicʼot Greenpeace, i tsaʼ c chaʼle wersa chaʼan mij coltañob. Cheʼ jaʼel, tsaʼ c chaʼle wersa j coltañob jiñi wen pʼumpʼuñoʼ bʌ yicʼot jiñi maʼañobic bʌ chuqui miʼ cʼuxob.

Pero ti wiʼil, tsaʼ cʼoti j qʼuel chaʼan maʼañic miʼ mejlel j qʼuextan ili pañimil. Anquese an qʼuiñil an tacʌch wocol muʼ bʌ lon c jot, añʌch yan tac bʌ woli bʌ i ñumen tsʌtsʼan majlel. Lajal bajcheʼ i pʼʌtʌlel ili jontolil yoque chuculʌch i chaʼan ili pañimil i maʼañic majqui i wenta chuqui miʼ yujtel. Maʼañic chuqui miʼ mejlel c mel tsaʼ cubi.

Cheʼ maʼañic chuqui miʼ mejlel c mel miʼ yʌcʼon ti pensar, jin chaʼan tsaʼ chaʼ caji c ñaʼtan Dios yicʼot jiñi Biblia. Anquese ti wajali tsaʼix c chaʼle estudio yicʼot jiñi testigojob i mij qʼuel ti ñuc cheʼ miʼ pʌsob i yutslel, pero ti jiñi bʌ ora maxto chajpʌbiloñic chaʼan mij qʼuextan c melbal. Pero ili ora qʼuexelix.

Tsaʼ c sʌcla jiñi c Biblia i tsaʼ c teche c pejcan. Jumpʼejlʌch i tsʼʌcal chaʼan bajcheʼ yubil mi cubin. Tsaʼ c pejca texto baqui miʼ taj ti tʼan chaʼan yom wen miʼ qʼuejlel jiñi añimal tac. Jumpʼejl ejemplo, Proverbios 12:10 miʼ yʌl: Jiñi toj bʌ miʼ cʌntan i yʌlacʼ. Cheʼ jaʼel, tsaʼ c chʼʌmbe i sujm chaʼan mach i mulic Dios chaʼan jiñi wocol tac ti ili pañimil. An ili wocol tac chaʼañʌch tiʼ caj chaʼan lʌcʼʌ tiʼ pejtelel jiñi quixtañujob maʼañic miʼ jacʼbeñob i mandar Jehová. Tsiʼ ñijca c pusicʼal chaʼan jiñi i cʼuxbiya yicʼot jiñi i pijt muʼ bʌ i pʌs ti lac tojlel (Salmo 103:8-14).

Ti jiñi bʌ ora, tsaʼ c taja yaʼ baqui yom mic tsʼijbun j cʼabaʼ, c tʼan, c dirección ti jiñi Libro ¿Chuqui miʼ cʌntesañonla tiʼ sujmlel jiñi Biblia?, i tsaʼ c choco majlel ti correo. Mach jalic tsaʼ ñumi, tiʼ julaʼtayoñob chaʼtiquil testigo i tsiʼ yʌlʌyob chaʼan miʼ yʌqʼueñoñob jumpʼejl estudio. I tsaʼʌch c jacʼʌ ti ora. Cheʼ jaʼel, tsaʼ caji c tech majlel ti tempa bʌ. I xucʼu xucʼul tsaʼ caji ti colel tic pusicʼal jiñi i sujmlel.

Wocolix i yʌlʌ jiñi Biblia, tsaʼ mejli j qʼuextan c melbal. Tsaʼ j cʌyʌ cʼujts, i tsaʼ j cʌyʌ j cʌlʌx jap lembal, tsaʼ c weñʼesa bajcheʼ yilalon, tsaʼ j qʼuexta bajcheʼ yilal mucʼon ti tʼan, i cheʼ jaʼel tsaʼ j qʼuexta bajcheʼ yilal mij qʼuel jiñi añoʼ bʌ i yeʼtel (Romanos 13:1). Cheʼ jaʼel, tsaʼ j cʌyʌ c mel tsʼiʼlel tac, wocol bʌ mi cubin chaʼan mij cʌy ti wajali.

Pero ñumen wocol bʌ tsaʼ cubi, jiñʌch bajcheʼ yilal yom mij qʼuel jiñi organización tsaʼ bʌ j colta. Mach ti orajic tsaʼ qʼuextʌyi jiñi c pensar. Ti ñaxan, tsaʼ cubi chaʼan mach weñic bajcheʼ woli c mel. Pero tsaʼ cʼoti j qʼuel, chaʼan muʼ bʌ caj i tojʼesan ili wocol tac jiñʌch jiñi i Yumʌntel Dios, jin chaʼan tic chaʼle wersa c mel yicʼot chaʼan mic chaʼlen coltaya yicʼot chaʼan mic suben jiñi quixtañujob (Mateo 6:33).

Cheʼ baʼ ora tsaʼ c teche c mel marcha tac, wen an jiñi tʼox bʌ: Junmojt weñoʼ bʌ i junmojt jontoloʼ bʌ, i orajach miʼ majlel i contrajin jiñi jontoloʼ bʌ. Ili ora, wocolix i yʌlʌ jiñi Biblia, tsaʼix j cʌyʌ jiñi tsʼaʼleya am bʌ tic pusicʼal i mic chaʼlen wersa chaʼan mij cʼuxbin tiʼ pejtelel jiñi quixtañujob (Mateo 5:44). Cabʌl jax bajcheʼ mic pʌs jiñi cʼuxbiya. Junchajp jiñʌch cheʼ mi cʌcʼ ti cʌñol jiñi i Yumʌntel Dios. Miʼ yʌqʼueñon c tijicñʌyel cheʼ bʌ mic mel iliyi, come miʼ yʌcʼ ñʌchʼtʌlel yicʼot tijicñʌyel, i miʼ yʌqʼuen jiñi lac piʼʌlob jiñi i sujm bʌ pijtaya.

Cheʼ bʌ mij cʌyben tiʼ cʼʌb Jehová pejtelel iliyi, an yʌqʼueyon c chaʼ taj c ñʌchʼtʌlel. Mic ñop chaʼan Dios, tsaʼ bʌ i meleyonla, maʼañic mi caj i yʌcʼ chaʼan jiñi quixtañujob yicʼot jiñi añimal tac, miʼ bej ilañob wocol, i cheʼ jaʼel, maʼañic mi caj i yʌcʼ chaʼan ili lum miʼ yoque jisʌntel. Tiʼ coltaya i Yumʌntel, mach jalix yom chaʼan miʼ tojʼesan ili am bʌ i yʌsiyob ili quixtañujob (Isaías 11:1-9). Tijicñayon, mach chaʼañic jax j cʌñʌ ili i sujmlel, chaʼañʌch an j colta yambʌlob chaʼan miʼ yʌcʼob i ñopoñel ti ili i sujmlel. Maʼañix mic ñop j qʼuextan ili pañimil.