TEMA AM BɅ TIʼ TEJCHIBAL
¿Muʼ ba mejlel i ticʼlañonla jiñi pornografía?
Jiñi pornografía añix tiʼ pejtelel pañimil. * Miʼ mejlel lac taj ti televisión, ti música yicʼot ti Internet (baqui miʼ mejlel ti letsʌntel foto tac). Cheʼ jaʼel, ti película, ti revista, videojuego tac, celular o yan tac bʌ. Ili ora ñumen cabʌl lac piʼʌlob miʼ qʼuelob pornografía, ñumento bajcheʼ wajali (qʼuele jiñi recuadro « ¿Bajcheʼ cʼamel miʼ qʼuejlel jiñi pornografía?»).
Jiñi lac piʼʌlob qʼuexelix bajcheʼ miʼ qʼuelob jiñi pornografía. Jiñi maestra Gail Dines tsiʼ yʌlʌ chaʼan wajali maxto cʌlʌx cheʼic miʼ pʌstʌl jiñi pornografía cheʼ bajcheʼ ili wʌle.
Ixcu jatet, ¿chuqui maʼ ñaʼtan? ¿Muʼ ba mejlel i ticʼlañonla jiñi pornografía? Jesús tsiʼ yʌlʌ: «Jiñi wem bʌ teʼ miʼ yʌcʼ wem bʌ i wut, pero jiñi ocʼben bʌ teʼ mach weñic miʼ yʌcʼ i wut» (Mateo 7:17). ¿Chuqui ti wocol miʼ yʌcʼ jiñi pornografía? Laʼ laj qʼuel uxchajp.
¿Chuqui ti wocol miʼ taj jiñi muʼ bʌ i qʼuel pornografía?
MUʼ BɅ I YɅL JIÑI WEN YUJILOʼ BɅ: Jiñi muʼ bʌ i wen mulan i qʼuel pornografía mach yomix i cʌy i qʼuel, lajalix miʼ yubin bajcheʼ jiñi droga.
Brian, * muʼ bʌ i wen mulan i qʼuel pornografía ti Internet i maʼañic majqui miʼ mejlel i ticʼ, miʼ yʌl: «Lajal bajcheʼ ñucʼbil c chaʼan droga. Mucʼ ti wen cʼux c jol yicʼot mic chaʼlen bʌqʼuen come c mulʌch mi cubin. Tsaʼ c chaʼle wersa chaʼan mij cʌy, pero tsaʼ ñumi cabʌl jab».
Jiñi muʼ bʌ i wen mulan i qʼuel pornografía maʼañic miʼ subob. I bajñelix yomob ajñel, miʼ quisñiñob i bʌ, mach chʌn xucʼulobix i ñaʼtʌbal i miʼ bajñel michʼleñob i bʌ. An muʼto bʌ i ñaʼtañob i tsʌnsañob i bʌ. Cheʼʌch tsaʼ ujti tiʼ tojlel Sergio, ti jujumpʼejl qʼuin miʼ chaʼlen ti descargar pornografía. Miʼ yʌl: «Joñon jax tsaʼ caji c bajñel ñaʼtan c bʌ, maʼañix j cʼʌjñibal tsaʼ cubi, an c mul i joy ñupʼulon tsaʼ cubi c bʌ. Quisintic jax yubil chaʼan mij cʼajtin j coltʌntel».
Anquese jumucʼ jach mi laj qʼuel jiñi pornografía pero añʌch i wocolel. Jiñi doctora Judith Reisman, muʼ bʌ i wen qʼuel jiñi wocol tac chaʼan jiñi pornografía, tsiʼ yʌlʌ chaʼan cheʼ mi laj qʼuel wocol mi lac ñajʌtesan. Susan, am bʌ 19 i jabilel, mach yʌlo tsajalic i chaʼan tsiʼ qʼuele pornografía ti Internet i ti wiʼil tsaʼix i wen mulaj i qʼuel. Miʼ yʌl: «Jiñi tsaʼ bʌ j qʼuele maʼañic miʼ ñajʌyel c chaʼan. Mach yʌxʌlic co miʼ tilel tic pensar jiñi tsaʼ bʌ j qʼuele. Tsaʼ c ñaʼta chaʼan maʼañic baʼ ora mi caj c ñajʌtesan».
MUʼ BɅ LAJ CɅN: Jiñi pornografía wen wocol chaʼan mi laj cʌy laj qʼuel i miʼ wen ticʼlañonla (2 Pedro 2:19).
¿Bajcheʼ miʼ ticʼlan lac familia jiñi pornografía?
MUʼ BɅ I YɅL JIÑI WEN YUJILOʼ BɅ: «Jiñi pornografía miʼ jem lac ñujpuñel yicʼot jiñi familia tac». (The Porn Trap [Las trampas del porno], i chaʼan Wendy yicʼot Larry Maltz.)
Jiñi pornografía miʼ tech wocol ti jumpʼejl ñujpuñel yicʼot ti familia tac...
come jiñi wiñic yicʼot xʼixic maʼañix miʼ wen ñopbeñob i bʌ i tʼan, maʼañix miʼ wen chʼʌmob i bʌ ti ñuc i maʼañix miʼ wen pʌsbeñob i bʌ cʼuxbiya (Proverbios 2:12-17).
come jin jax miʼ bajñel ñaʼtañob i bʌ, maʼañix miʼ ñaʼtañob i piʼʌl yicʼot mach wen tijicñayix chumulob (Efesios 5:28, 29).
miʼ tech i wen ñaʼtañob chaʼan bʌ jiñi tsʼiʼlel yicʼot chaʼan miʼ melob chuqui tac mach bʌ weñic (2 Pedro 2:14).
tajol muqʼuix caj i xicʼ jiñi i yijñam o i ñoxiʼal chaʼan cheʼix miʼ piʼleñob i bʌ cheʼ bajcheʼ qʼuelbil i chaʼan mach bʌ utsʼatix (Efesios 5:3, 4).
miʼ yʌqʼuen i ñaʼtan jiñi tsʼiʼlel i miʼ mel (Mateo 5:28).
Jiñi Biblia miʼ yʌl chaʼan jiñi wiñic yicʼot xʼixic mach yomic miʼ cʌyob i bʌ (Malaquías 2:16). I jiñi tsʼiʼlel miʼ jem jiñi ñujpuñel, jiñi wiñic yicʼot xʼixic miʼ cʌyob i bʌ i miʼ chaʼleñob i bʌ ti divorciar, i cheʼ jaʼel, miʼ yʌqʼuen i chʼijyemlel i yalobilob.
Jiñi pornografía an yambʌ bajcheʼ miʼ mejlel i ticʼlan jiñi alobob. Brian miʼ bej al: «Cheʼ bʌ an jaxto 10 c jabilel, tsaʼ c tajbe i revista chaʼan bʌ pornografía jiñi c papá cheʼ woliyon ti alas. Tsaʼ caji c mucu qʼuel, anquese mach cujilic chucoch mic mulan j qʼuel. I cheʼʌch tsaʼ caji c bej mel cʼʌlʌl cheʼ bʌ tsaʼ coliyon». An estudio tac muʼ bʌ i pʌs chaʼan jiñi pornografía an i yʌcʼʌ chaʼan jiñi xcolelob ñumen chutobto miʼ techob piʼleya, chaʼan mach juntiquilic jach majqui miʼ piʼleñob i chaʼan ñumen jontolob. Cheʼ jaʼel miʼ yʌsibeñob i ñaʼtʌbal yicʼot i pusicʼal.
MUʼ BɅ LAJ CɅN: Jiñi pornografía lajalʌch bajcheʼ jumpʼejl veneno, miʼ jisan jiñi cʼuxbiya, miʼ yʌcʼ cabʌl wocol yicʼot chʼijyemlel (Proverbios 6:27).
¿Chuqui miʼ yʌl jiñi i Tʼan Dios chaʼan jiñi pornografía?
JIÑI BIBLIA MIʼ YɅL: «Tsʌnsanla jiñi laʼ bʌcʼtal chaʼan maʼañic mi laʼ yajlel ti tsʼiʼlel, chaʼan maʼañic mi laʼ mel chuqui bibiʼ, chaʼan jiñi i cʌlʌx mulʌntel piʼleya maʼañic miʼ mʌlbeñetla, chaʼan maʼañic mi laʼ ñaʼtan mach bʌ weñic yicʼot chaʼan maʼañic mi laʼ cʌlʌx mulan chuqui tac an, come jiñi lajal bajcheʼ i chʼujutesʌntel melbil tac jach bʌ dios» (Colosenses 3:5).
Ti tsʼitaʼ bʌ tʼan, Jehová * miʼ tsʼaʼlen jiñi pornografía. Pero mach chaʼañic tsʌts i pusicʼal. Come tsiʼ meleyonla chaʼan miʼ mejlel lac piʼlen lac bʌ, i yom chaʼan jiñi ñujpuñemoʼ bʌ miʼ yubiñob i tijicñʌyel cheʼ bʌ miʼ melob, chaʼan miʼ pʌsbeñob i bʌ cʼuxbiya i chaʼan miʼ mejlelob i taj i yalobil (Santiago 1:17).
Pero ¿chucoch mi la cʌl chaʼan Jehová miʼ tsʼaʼlen jiñi pornografía? Laʼ laj qʼuel.
Jehová yujil chaʼan miʼ mejlel i yʌqʼueñob i sʌt i cuxtʌlel jiñi muʼ bʌ i qʼuelob (Efesios 4:17-19).
Miʼ cʼuxbiñonla i mach yomic mi lac taj wocol (Isaías 48:17, 18).
Come yom i cʌntan jiñi ñujpuñemoʼ bʌ yicʼot jiñi familia tac (Mateo 19:4-6).
Yom chaʼan sʌc lac melbal yicʼot mi laj qʼuelob ti ñuc jiñi yambʌlob (1 Tesalonicenses 4:3-6).
Yom chaʼan wen jach bajcheʼ miʼ yujtel jiñi piʼleya (Hebreos 13:4).
Jehová yujil chaʼan jiñi pornografía biʼtic jax chuqui miʼ pʌs, miʼ yʌcʼ chaʼan jin jach miʼ bajñel ñaʼtan i bʌ jiñi muʼ bʌ i qʼuel, i miʼ pʌs bajcheʼ yilal miʼ qʼuel Satanás jiñi piʼleya (Génesis 6:2; Judas 6, 7).
MUʼ BɅ LAJ CɅN: Jiñi pornografía miʼ mejlel i ñajtʼesañonla ti Dios (Romanos 1:24).
Pero Jehová miʼ pʼuntan jiñi yom bʌ i cʌy i qʼuel. Jiñi Biblia miʼ yʌl: «Lac Yum miʼ chaʼlen pʼuntaya, uts i pusicʼal. Jal miʼ michʼan. Cabʌl miʼ pʼuntañonla. Come yujil cʼuñonla, yujil melbilonla ti tsʼubejn» (Salmo 103:8, 14). Dios miʼ suben jiñi muʼ bʌ i pʌsob i pecʼlel chaʼan miʼ cʼajtiñob i coltʌntel tiʼ tojlel i miʼ tajob i pʼuntʌntel yicʼot «jiñi ñuc bʌ i yutslel» Dios cheʼ bʌ i cʼʌjñibal i chaʼañob chaʼan miʼ coltʌntelob (Hebreos 4:16; qʼuele jiñi recuadro « ¿Chuqui yom maʼ mel chaʼan maʼ cʌy a qʼuel pornografía?»).
An cabʌlob tsaʼ bʌ i jacʼʌyob i coltʌntel ti Dios. ¿Tsaʼ ba mejliyob ti coltʌntel? laʼ laj qʼuel muʼ bʌ i yʌl jiñi Biblia: «Tsaʼix pojquiyetla, tsaʼix sʌqʼuesʌntiyetla, tsaʼix qʼuejliyetla ti toj tiʼ cʼabaʼ lac Yum Jesucristo yicʼot tiʼ yespíritu lac Dios» (1 Corintios 6:11). An lajal bʌ miʼ yʌlob bajcheʼ tsiʼ yʌlʌ jiñi apóstol Pablo: «An c pʼʌtʌlel chaʼan chuqui jach mic mel wocolix i yʌlʌ jiñi muʼ bʌ i yʌqʼueñon c pʼʌtʌlel» (Filipenses 4:13).
Susan, tsaʼ bʌ mejli i cʌy i qʼuel jiñi pornografía, miʼ yʌl: «Cojach Jehová muʼ bʌ mejlel i coltañonla laj cʌy. Mi mucʼʌch laj cʼajtiben i coltaya, sʌc mi caj la cajñel yicʼot lʌcʼʌl mi caj la cajñel tiʼ tojlel. Dios maʼañic baʼ ora mi caj i cʌyonla».
^ parr. 3 Jiñi tʼan pornografía yom i yʌl pejtelel muʼ bʌ i cʼʌjñel chaʼan juntiquil lac piʼʌl miʼ tech i mulan piʼleya, yaʼ ochem foto yicʼot video tac baqui miʼ pʌstʌl wiñicob xʼixicob chacaloʼ bʌ, cheʼ jaʼel tʼan tac ti mensaje o ti grabación baqui miʼ yʌjlel chaʼan tac bʌ piʼleya.
^ parr. 8 An cʼabaʼʌl tac tsaʼ bʌ qʼuextʌyi.
^ parr. 25 Jiñi Biblia miʼ yʌl chaʼan i cʼabaʼ Dios jiñʌch Jehová.