Michelle: Sofía, ¿bajcheʼ a wilal? Wen cheʼ mic chaʼ tajet.

Sofía: Tijicña miʼ cubin jaʼel cheʼ bʌ mic chaʼ qʼuelet Michelle.

Michelle: Ti yambʌ ora cheʼ bʌ ti lac chaʼle tʼan, tsaʼ la cʌlʌ chaʼan bajcheʼ yubil miʼ yubin Dios cheʼ bʌ mi lac ñusan wocol. * I ti a subeyon chaʼan añix ora caj a cʼajtiben a bʌ jiñi, ñumento cheʼ bʌ tsaʼ yajli i tiʼ xulu a bʌ a mamá ¿i bajcheʼ bej yilal an?

Sofía: An qʼuiñil poj tijicña i an qʼuiñil mach cheʼqui, waʼli poj wenta an.

Michelle: Mi cʌl wocolʌch chaʼan tijicña mi lac ñusan cheʼ bʌ an majqui cʼam ti la cotot.

Sofía: Cheʼʌchi, an i tajol mij cʼajtiben c bʌ mi jalto mi caj lac bej ñusan wocol.

Michelle: I sujmʌch jiñi muʼ bʌ a wʌl. Mach cujil mi cʼajal a chaʼan chaʼan ti yambʌ ora tsaʼ j cʼajtibet chucoch Dios miʼ bej acʼ chaʼan mi lac ñusan wocol cheʼ an tsaʼ i pʼʌtʌlel chaʼan miʼ jisan.

Sofía: Cʼajalʌxto c chaʼan.

Michelle: Chaʼan mi laj qʼuel bajcheʼ miʼ jacʼ jiñi Biblia, laʼ lac chaʼ ñaxan tsʼitaʼ al tsaʼ bʌ la cʌlʌ maxto jali.

Sofía: Yomʌch.

Michelle: Tsaʼ lac taja ti tʼan tiʼ tojlel juntiquil xucʼul bʌ wiñic, tsaʼ bʌ i cʼajtibe i bʌ chucoch Dios miʼ yʌcʼ chaʼan mi lac bej ñusan wocol pero Dios maʼañic tsiʼ yʌʼle mi tsaʼicto i sube chaʼan maʼañic i ñopoñel.

Sofía: Jʌjʌ, mach cujilic jiñi.

Michelle: Tsaʼ laj cʌñʌ jaʼel chaʼan Jehová maʼañic miʼ mulan cheʼ mi la quilan wocol. Jiñi Biblia miʼ yʌl chaʼan ti wajali cheʼ bʌ jiñi i tejclum woliʼ ñusan «wocol», wocol tsiʼ yubi jaʼel. * ¿Mach ba añic miʼ yʌqʼueñonla lac tijicñʌyel iliyi cheʼ bʌ Dios cʼux miʼ yubin jiñi lac wocol jaʼel?

Sofía: Mucʼʌch.

Michelle: Ti wiʼil, tsaʼ cʼoti laj comol ñaʼtan chaʼan Dios wen pʼʌtʌlʌch, i mi cheʼʌch bajcheʼ jiñi mucʼʌch i mejlel i jisan bajcheʼ jach ora yom jiñi wocol tac.

Sofía: Jincu maʼan bʌ mic chʼʌmben i sujm jiñi. ¿Chucoch maʼañic miʼ jisan jiñi wocol cheʼ añʌch tsaʼ i pʼʌtʌlel?

Michelle: Chaʼan mi lac chʼʌmben i sujm, laʼ laj qʼuel jiñi ñaxam bʌ libro am bʌ ti Biblia, Génesis. ¿Am ba a wubi ti alol chaʼan tiʼ tojlel Adán yicʼot Eva i yicʼot jiñi wut teʼ mach bʌ yomic miʼ cʼuxtʌl?

Sofía: Añʌch, tiʼ cʌntesayoñob yaʼ ti catecismo. Dios tiʼ subeyob chaʼan mach yomic miʼ cʼuxob jiñi wut teʼ, pero maʼañic tsiʼ jacʼʌyob.

Michelle: Weñʌch. Pero laʼ laj qʼuel chuqui tsaʼ ñaxan ujti, come jiñʌch muʼ bʌ caj i coltañonla lac ñaʼtan chucoch mi la quilan wocol ili ora. ¿A wom ba pejcan Génesis, capítulo 3, versículo 1 cʼʌlʌl 5?

Sofía: Yomʌch, miʼ yʌl: «Ñumen pʼipʼ i pusicʼal jini lucum bajcheʼ pejtelel yan tac bʌ bʌteʼel tsaʼ bʌ i mele lac Yum Dios. Jini lucum tsiʼ sube jini xʼixic: ¿Isujm ba tsiʼ yʌlʌ Dios: ‹Mach yomic mi laʼ cʼuxben i wut pejtel jini teʼ am bʌ ti jini pʌcʼʌbʌl›? Cheʼ tsiʼ cʼajtibe xʼixic jini lucum. Jini xʼixic tsiʼ sube: Miʼ mejlel j cʼux lojon i wut jini teʼ tac am bʌ ti pʌcʼʌbʌl. Pero Dios tsiʼ yʌlʌ: ‹Mach yomic mi laʼ cʼux i wut jini teʼ am bʌ ti yojlil jini pʌcʼʌbʌl. Mach laʼ tʌl ame chʌmiquetla›, cheʼen jini xʼixic. Jini lucum tsiʼ sube: I lot. Maʼanic mi caj laʼ chʌmel. Yujil Dios mux i cajñel laʼ wut cheʼ mi laʼ cʼuxben i wut jini teʼ. Lajal mi caj laʼ wajñel bajcheʼ Dios. Mi caj laʼ cʌn chuqui tac utsʼat yicʼot chuqui tac jontol. Cheʼ tsiʼ yʌlʌ lucum».

Michelle: Wocolix a wʌlʌ. Laʼ lac wen qʼuel ili versículo tac. Ñaxan, miʼ yʌl chaʼan juncojt lucum tsiʼ pejca jiñi Eva. Ti yan tac bʌ parte yaʼ ti Biblia miʼ yʌl chaʼan tsaʼ bʌ i ñoj chaʼle tʼan jiñʌch jiñi Diablo come tsiʼ cʼʌñʌ juncojt lucum chaʼan miʼ chaʼlen tʼan. * Satanás tsiʼ cʼajtibe Eva baqui bʌ jiñi mandar tsaʼ bʌ i yʌlʌ Dios chaʼan maʼañic miʼ cʼuxob jiñi i wut teʼ. ¿Chuqui tsiʼ yʌlʌ Dios chaʼan chuqui mi caj i yujtel tiʼ tojlel Adán yicʼot Eva mi maʼañic tsiʼ jacʼbeyob i mandar chaʼan mach yomic miʼ cʼuxob jiñi i wut teʼ?

Sofía: Mi caj i chʌmelob.

Michelle: Cheʼʌchi. Jiñi Diablo tsiʼ yʌlʌ mach bʌ weñic tiʼ tojlel Dios. Qʼuele chuqui tsiʼ yʌlʌ: ‹Maʼañic mi caj laʼ chʌmel›. ¡Woliʼ yʌl chaʼan Dios juntiquilʌch xlot!

Sofía: Jiñi maʼañic baʼ ubibil c chaʼan.

Michelle: I cheʼ bʌ Satanás tsiʼ yʌlʌ chaʼan Dios juntiquilʌch xlot, tsaʼ loqʼui jumpʼejl cʼajtiya yom bʌ miʼ ñumel cabʌl ora chaʼan miʼ mejlel ti jajqʼuel. ¿A wujil ba chucoch?

Sofía: Mach cujilic.

Michelle: Chaʼan mi lac chʼʌmbe i sujm, laʼcu la cʌl bajcheʼ ili. Ñaʼtancu chaʼan ti jumpʼejl bʌ qʼuin, mic tilel i mic subeñet chaʼan joñon ñumen pʼʌtʌlon bajcheʼ jatet. ¿Bajcheʼ maʼ pʌsbeñon chaʼan mach i sujmic woli bʌ cʌl?

Sofía: Tajol an chuqui mi lac mel chaʼan mi laj qʼuel miʼ sujmʌch.

Michelle: Cheʼʌchi. Tajol miʼ mejlel lac sʌclan chuqui al bʌ chaʼan mi laj qʼuel majqui miʼ mejlel i chʼuy i yaʼi mach wocolic ti qʼuelol majqui jiñi ñumen pʼʌtʌl bʌ.

Sofía: Melelʌch.

Michelle: Pero ¿ixcu mi tsaʼ tiliyon i mi cʌl chaʼan a wujil lot? Yaʼi mero qʼuexelʌchix, ¿mach ba cheʼiqui?

Sofía: Cheʼʌchi.

Michelle: Come jumpʼejlʌch lot maʼañic miʼ mejlel lac pʌs cheʼ bajcheʼ ti la cʌlʌ chaʼan majqui jiñi ñumen am bʌ i pʼʌtʌl.

Sofía: Melelʌch muʼ bʌ a wʌl.

Michelle: Tiʼ sujm, chaʼan maʼ pʌs chaʼan machʌch a wujil lot, yom miʼ ñumel cabʌl ora chaʼan jiñi yambʌlob miʼ qʼuelob bajcheʼ yilal a melbal.

Sofía: An i sujmlel muʼ bʌ a wʌl.

Michelle: Laʼ lac chaʼ qʼuel jiñi relato am bʌ ti Génesis. ¿Tsaʼ ba i yʌlʌ jiñi Diablo chaʼan ñumen an i pʼʌtʌlel bajcheʼ Dios?

Sofía: Maʼañic.

Michelle: Dios mach wocolic miʼ pʌs majqui an i pʼʌtʌlel. Tsaʼ bʌ i yʌcʼʌ ti ñaʼtʌntel Satanás jiñʌch chaʼan maʼañic miʼ mejlel ti ñopbentel muʼ bʌ i yʌl Dios. Lajal bajcheʼ tiʼ sube Eva: «Dios woli jach i lotiñet, joñon i sujm woli bʌ c subeñet».

Sofía: An i sujmlel yubil.

Michelle: Dios an i ñaʼtʌbal i yujil chaʼan yomʌch miʼ ñumel cabʌl ora chaʼan miʼ jajqʼuel jiñi lot tsaʼ bʌ i yʌlʌ jiñi Diablo. I cheʼ bajcheʼ jiñi miʼ ñaʼtʌntel chaʼan majqui jiñi tsaʼ bʌ i chaʼle lot.

Sofía: Pero cheʼ bʌ tsaʼ chʌmi jiñi Eva, ¿mach ba yaʼix tsaʼ jajqʼui jiñi?

Michelle: Miʼ mejlel laj cʌl chaʼan cheʼʌchi. Pero jiñi lot tsaʼ bʌ i yʌlʌ Satanás cabʌlto chuqui ochem. Laʼ lac chaʼ qʼuel jiñi versículo 5. ¿Chuqui yambʌ tsaʼ subenti jiñi Eva?

Sofía: Mi muʼ bi qui i cʼuxob i wut jiñi teʼ muʼ bi caj i jajmelob i wut.

Michelle: Cheʼʌchi, i cheʼ jaʼel muʼ bi caj i sujtelob bajcheʼ Dios i mi caj i cʌñob chuqui jiñi wem bʌ yicʼot chuqui jontol bʌ. I cheʼto jaʼel tsiʼ yʌcʼʌ ti ñaʼtʌntel chaʼan Dios woliʼ mʌctan jiñi quixtañujob chaʼan miʼ ñusañob i bʌ ti chuqui ñumen wem bʌ.

Sofía: Cheʼcu yubil.

Michelle: I jiñi jumpʼejlʌch lot tiʼ contra Dios jaʼel.

Sofía: ¿Bajcheʼ? Maʼañic mic ñaʼtan.

Michelle: Qʼuele, jiñi Diablo tsiʼ yʌqʼue i ñaʼtan jiñi Eva, i yaʼ ochemonla jeʼel chaʼan ñumen wen cheʼ maʼañic mi lac chuc lac bʌ tiʼ tojlel Dios. Jehová yujil chaʼan yomʌch miʼ yʌqʼuen i yorajlel chaʼan Satanás miʼ pʌs mi i sujmʌch jiñi woli bʌ i yʌl. Jin chaʼan tiʼ tsʼitaʼ aqʼue i yorajlel chaʼan miʼ chaʼlen yumʌntel ila ti pañimil. Ili jiñʌch tiʼ caj an cabʌl wocol, come mach jiñic Dios woliʼ yuman ili pañimil jiñʌch jiñi Diablo. * Pero an wem bʌ tʼan com bʌ c subeñet.

Sofía: ¿Wem bʌ tʼan?

Michelle: Jiñi, jiñi Biblia miʼ yʌl junchajp wen utsʼatax bʌ tiʼ tojlel Dios. Miʼ yʌl chaʼan Jehová lʌcʼʌl an tiʼ tojlel jiñi muʼ bʌ i ñusan wocol. Jumpʼejl ejemplo, laʼ laj qʼuel tsaʼ bʌ i tsʼijbu jiñi rey David yaʼ ti Salmo 31:7. David tsiʼ wen ñusa wocol cheʼ bʌ cuxulto, pero qʼuele chuqui tsaʼ bʌ subenti chaʼan Dios. ¿A wom baʼ pejcan?

Sofía: Yom, miʼ yʌl: «Mi caj c wen ubin c tijicñʌyel chaʼan a cʼuxbiya, come tsaʼ qʼueleyon ti wocol. Tsaʼ cʌmbeyon c pusicʼal ti wocol».

Michelle: Anquese David cabʌl tsiʼ ñusa wocol, tijicña tsiʼ yubi cheʼ yujil chaʼan Jehová mucʼʌch i qʼuel chuqui woliʼ ñusan. Ixcu jatet, ¿muʼ ba i yʌqʼueñet a tijicñʌyel cheʼ a wujil chaʼan Jehová miʼ qʼuel bajcheʼ woli a ñusan yicʼot bajcheʼ yubil maʼ wubin a bʌ anquese jiñi yambʌlob maʼañic miʼ chʼʌmbeñob i sujm?

Sofía: Tiʼ sujm, mucʼʌch.

Michelle: Cheʼ jaʼel, jiñi Biblia miʼ yʌl chaʼan Dios maʼan mi caj i bej acʼ chaʼan mi lac ñusan wocol. Miʼ yʌl jaʼel chaʼan tsʼitaʼ jax yom chaʼan miʼ jisʌben jiñi jontol bʌ i pañimil Satanás yicʼot miʼ chaʼ tojʼesan jiñi am bʌ i yʌsi. Cheʼto jaʼel jiñi am bʌ i ñusa a mamá yicʼot am bʌ a ñusa jatet. ¿Muʼ ba c mejlel ti chaʼ tilel ti yambʌ semana? Com c pʌsbeñet chucoch mucʼʌch i mejlel lac ñop chaʼan tsʼitaʼ jax yom chaʼan Dios miʼ jisan pejtelel jiñi wocol tac. *

Sofía: Yomʌch, mic pijtañet.