Tsaʼ quila pañimil yicʼot tsaʼ coliyon ti Roma. Yaʼ baqui tsaʼ coliyon wen pʼumpʼum jax, i wen wocol tsaʼ c ñusa. Maʼañic tsaʼ j cʌñʌ c mamá i tiʼ pejtelel ora mach weñic tsaʼ ajñiyon quicʼot c papá. Lajal tsaʼ caji c mel bajcheʼ jiñi añoʼ bʌ ti calle.

Tsaʼ c teche xujchʼ cheʼ bʌ 10 jaxto c jabilel, i cheʼ bʌ añix 12 tsaʼ putsʼiyon loqʼuel ti cotot. Jiñi c papá mach junsujtel jach tsajñi i locʼsañon yaʼ ti cárcel. Maʼañic miʼ ñumel jumpʼejl qʼuin cheʼ maʼañic mic chaʼlen leto quicʼot jiñi lac piʼʌlob i wen orajax cujil michʼ. Cheʼ bʌ 14 c jabilel tsaʼ loqʼuiyon majlel ti cotot i maʼañix tsaʼ chʌn sujtiyon majlel. Tsaʼ chumleyon ti calle i tsaʼ caji j cʼʌn droga tac. Cheʼ miʼ yochel jiñi acʼʌlel, mic jam juncojt carro i yaʼ mij cochel ti wʌyel, i cheʼ miʼ sʌcʼan mic majlel c sʌclan baqui mic jax poc c bʌ.

Tsaʼ sujtiyon ti wen yujil bʌ xujchʼ. Mic xujchʼiben i bolsa jiñi xʼixicob ti bij, i cheʼ ti icʼan miʼ cochel ti xujchʼ ti ototʌl tac. Tsaʼ cajiyon ti wen cʌjñel i tsaʼ subentiyon chaʼan mi cochel ti jumpʼejl banda wen cʌmbil bʌ. Ili tsiʼ coltayon chaʼan ñumento chuqui mic mel, come tsaʼ cajiyon ti xujchʼ ti banco tac. come wen jontolon, jiñi banda tsaʼ caji i wen qʼueloñob ti ñuc. Tiʼ pejtelel ora quicʼot ñumel c juloñib, i cheʼ bʌ mic wʌyel yaʼan quicʼot tiʼ yebal j cʼʌnjol. Tsaʼ caji c wen mel mach bʌ weñic, mij cʼʌn droga tac, mic chaʼlen xujchʼ, mic chaʼlen tsʼiʼlel yicʼot mic chaʼlen tsucu tʼan. Jiñi policía tiʼ pejtelel ora miʼ sʌclañon, i mach junsujtelic jach tsaʼ otsʌntiyon ti cárcel. Cabʌl jab tsaʼ ajñiyon ti calle yicʼot ti cárcel.

Ti jumpʼejl bʌ qʼuin cheʼ bʌ tsaʼ loqʼuiyon ti cárcel, tsajñi c julaʼtan juntiquil c tía. Joñon mach cujilic, pero jiñi c tía yicʼot chaʼtiquil c primojob tsaʼ sujtiyob tiʼ testigojob Jehová. Tsiʼ subeyoñob chaʼan mic majlel quicʼotob tiʼ tempa bʌ i tsaʼʌch c jacʼʌ majlel. Cheʼ bʌ tsaʼ cʼotiyon lojon yaʼ tiʼ Yotlel tempa bʌ, tsaʼ c wersa alʌ chaʼan yaʼ mi caj c buchtʌl tiʼ tʼejl jiñi puerta chaʼan mij qʼuel majqui miʼ yochel yicʼot miʼ loqʼuel, pero wersa añʌch quicʼot c juloñib.

Jiñi tempa bʌ tsiʼ qʼuextʌbeyon j cuxtʌlel. Tsaʼ c ñaʼta chaʼan jiñi lac piʼʌlob wen qʼuexelobʌch bajcheʼ jiñi qʼuelbiloʼ bʌ c chaʼan, wen tseʼtseʼñayob yicʼot utsob. Cʼʌlʌl ili ora, wen cʼajalto c chaʼan bajcheʼ yilal tsiʼ qʼueleyoñob jiñi Testigojob yicʼot jiñi i yutslelob tsaʼ bʌ i pʌsʌyob. ¡Mach wis lajalic bajcheʼ yilal yaʼ baqui tsaʼ tiliyon!

Tsaʼ caji c chʼʌm estudio yicʼotob jiñi Testigojob. Cheʼ bʌ woli c chʼʌm jiñi estudio tsaʼ j qʼuele chaʼan yom mij qʼuextan bajcheʼ yilal chumulon. Jumpʼejl ejemplo, tsaʼ wen cʼoti tic pusicʼal muʼ bʌ i yʌl Proverbios 13:20: «Jini muʼ bʌ i piʼleñob majlel jini weñoʼ bʌ i pusicʼal mucʼʌch i tajob i ñaʼtʌbal. Jini muʼ bʌ i piʼleñob majlel jini mach bʌ weñobic i pusicʼal miʼ yutsi pʼojlel i mul». Tsaʼ c chʼʌmbe i sujm chaʼan mach yomix mic wis ñochtañob jiñi añoʼ bʌ ti banda. Wocolʌch tsaʼ cubi, pero yicʼot i coltaya Jehová tsaʼʌch mejliyon.

Tsaʼ c sʌqʼuesa jiñi c bʌcʼtal. Tsaʼ c chaʼle wersa chaʼan mij cʌyeʼ jiñi cʼujts yicʼot jiñi droga tac. Tsaʼ c setʼe c jol, tsaʼ j cʌyʌ c lʌp cuyaʼ yicʼot tsaʼ j cʌyʌ cʌl tsucu tʼan tac. Ti jimbʌ ora tsaʼ cubi chaʼan mucʼʌch i mejlel c ticʼ c bʌ.

Maʼañic baʼ ora tsaʼ c mulaj c pejcan jun, jin chaʼan wen wocol tsaʼ cubi chaʼan mic xucʼchocon c pensar yicʼot chaʼan mic pejcan jiñi Biblia. Cʼunteʼ cʼunteʼ tsaʼ caji j cʼuxbin Jehová. I cheʼ jiñi, jiñi j conciencia tsaʼ caji i ticʼlañon. Ti beleʼ ora mach weñic mi cubin c bʌ i mic pensarin chaʼan Jehová maʼañic mi caj i ñusʌbeñon pejtelel chuqui am bʌ c mele. Cheʼ bʌ mi cubin c bʌ bajcheʼ jiñi, mic pejcan jiñi relato chaʼan jiñi rey David cheʼ bʌ Jehová tsiʼ ñusʌbe jiñi tsʌts tac bʌ i mul, i jiñi tsiʼ ñuqʼuesʌbeyon c pusicʼal (2 Samuel 11:1-12:13).

Yambʌ wocol bʌ tsaʼ cubi jiñʌch cheʼ mic subeñon wen tʼan jiñi lac piʼʌlob tiʼ yototob (Mateo 28:19, 20). ¡Mic wen bʌcʼñan cheʼ miʼ cʼotel c taj juntiquil tsaʼ bʌ c melbe mach bʌ weñic ti wajali! Pero tsaʼ c mʌlbe jiñi c bʌqʼuen, i tsaʼ caji cubin c tijicñʌyel cheʼ mij coltan yambʌlob chaʼan miʼ cʌñob jiñi lac Tat am bʌ ti panchan, muʼ bʌ i wen ñusʌbeñonla lac mul.

Cheʼ tsaʼ j cʌñʌ Jehová tsiʼ colta jiñi j cuxtʌlel. Cabʌl camigojoʼ bʌ ti wajali tsaʼix chʌmiyob o añob ti cárcel. Pero joñon tijicñayon i an c pijtaya ti talto bʌ qʼuin. An j cʌñʌ chaʼan yom mic pʌs c pecʼlel, mic jacʼ tʼan yicʼot mic ticʼ c bʌ chaʼan mach ti orajic mic michʼan, jin chaʼan ñumen wen añon quicʼot yambʌlob. Wen tijicña chumulon quicʼot jiñi quijñam Carmen. Ti lon c chaʼticlel mij coltan lojon jiñi lac piʼʌlob chaʼan miʼ ñumen cʌñob muʼ bʌ i yʌl jiñi Biblia.

Wʌle weñix bajcheʼ mic chaʼlen eʼtel. Bej woliyon ti eʼtel ti banco, pero mach chaʼañix mic chaʼlen xujchʼ, chaʼañix mic sʌqʼuesan.