Juntiquil tatʌl miʼ suben jiñi i yalobil am bʌ 7 jabilel: «Ti wajali, Dios tsiʼ mele jiñi Lum yicʼot pejtelel chuqui an yaʼi. Tsiʼ mele jaʼel jiñi Qʼuin, Uw yicʼot jiñi ecʼ tac». Jiñi i yalobil jumucʼ ñʌchʼʌl miʼ cʌytʌl i miʼ cʼajtin: «Papá... ¿i majqui tsiʼ mele Dios?».

Jiñi i tat, miʼ suben: «Maʼañic majqui. Dios añʌch cʼʌlʌl». Jiñi i jacʼbal tsaʼ bʌ aqʼuenti wen jach tsiʼ yubi i maʼañic chuqui tsiʼ yʌlʌ. Pero cheʼ bʌ woliʼ colel majlel bej anto i cʼajtiya chaʼan bʌ jiñi. Wocol miʼ ñop chaʼan an juntiquil maʼañic bʌ i tejchibal. I miʼ ñaʼtan: «¿Bajcheʼ an i sujmlel jiñi? Jinto jiñi universo an i tejchibal». Jiñi cʼajtiya chaʼan ¿baqui tsaʼ tili Dios? maxto jacʼbil.

¿Chuqui miʼ yʌl jiñi Biblia? Lajal jach bajcheʼ tsaʼ bʌ i yʌlʌ jiñi tatʌl tsaʼ jaxto bʌ lac taja ti tʼan. Moisés tiʼ sube Jehová: «C Yum, c chumlibet lojon cʼʌlʌl ti wajali. Cheʼ maxto anic tsaʼ mele colem wits, cheʼ maxto anic tsaʼ mele jini lum yicʼot pañimil, Diosetʌch. Cʼʌlʌl wajali cʼʌlʌl ti pejtelel ora, Dioset» (Salmo 90:1, 2). I jiñi xʼaltʼan Isaías lʌcʼʌl lajal chuqui tsiʼ yʌlʌ: ¿Maxto ba añic tsaʼ laʼ ñaʼta? Jiñʌch lac Yum Dios am bʌ tiʼ pejtelel ora tsaʼ bʌ i mele pejtel pañimil. ¿Mach ba añic ubibil laʼ chaʼan? (Isaías 40:28). I ti carta chaʼan Judas miʼ yʌl chaʼan Dios añʌch cʼʌlʌl «tiʼ pejtelel ora» (Judas 25).

Ili versículo tac miʼ pʌs chaʼan Dios jiñʌch «Rey am bʌ tiʼ pejtelel ora», cheʼ bajcheʼ tsiʼ yʌlʌ jiñi apóstol Pablo (1 Timoteo 1:17). Ili yom i yʌl chaʼan Dios añʌch cʼʌlʌl ti wajali, mach yʌlʌyic jaypʼejl jab mi lac chaʼ sujtel majlel ti lac pat, añʌch tiʼ pejtelel ora (Apocalipsis 1:8). Dios maʼañic i tejchibal yicʼot i yujtibal, ili jiñʌch junchajp wen ñuc bʌ tiʼ tojlel.

¿Chucoch wocol mi lac chʼʌmben i sujm iliyi? Come mach jalic cuxulonla, jin chaʼan mach cheʼic mi laj qʼuel jiñi muʼ bʌ i ñumel majlel cheʼ bajcheʼ miʼ qʼuel Jehová. Jumpʼejl ejemplo, jiñi mil jab bʌ lac chaʼan i chaʼan Jehová jumpʼejl jach qʼuin come chʌn añʌch tiʼ pejtelel ora (2 Pedro 3:8). Laʼ laj cʌl jumpʼejl lajiya. Juncojt sajcʼ colemix bʌ cuxul jach 50 qʼuin. ¿Mejl ba i chʼʌmben i sujm bajcheʼ yubil cheʼ cuxul 70 yicʼot 80 jab, cheʼ bajcheʼ joñonla? ¡Tajol mach mejlic! Joñonla cheʼonla bajcheʼ jiñi sajcʼ cheʼ mi lac laj lac bʌ la quicʼot Dios. Jiñi lac ñaʼtʌbal pʼisbil jach baqui miʼ cʼotel cheʼ mi lac laj yicʼot i chaʼan (Isaías 40:22; 55:8, 9). Jin chaʼan, añʌch chuqui am bʌ i chaʼan mach bʌ añic miʼ mejlel lac chʼʌmben i sujm.

Anquese wocol mi lac chʼʌmben i sujm chaʼan Dios añʌch cʼʌlʌl ti wajali, i sujmʌch iliyi. Mi añʌch majqui tsiʼ mele Dios, cheʼ jiñi jiñʌch tsaʼ bʌ i mel pejtelel chuqui an. Pero jiñi Biblia miʼ yʌl chaʼan Dios jiñʌch tsaʼ bʌ i mele pejtelel chuqui an (Apocalipsis 4:11). I la cujil jaʼel, chaʼan jiñi universo maʼañic ti ñaxan (Génesis 1:1, 2). ¿Cheʼ jiñi, bajcheʼ tsaʼ tili? Yom chaʼan jiñi tsaʼ bʌ i mele wʌn añix ti ñaxan. I cheʼ jaʼel, jiñʌch yom wʌn am bʌ ti ñaxan, bajcheʼ jiñi i Yalobil yicʼot jiñi ángelob (Job 38:4, 7; Colosenses 1:15). Tsiquil chaʼan cheʼ bʌ tsaʼ caji i mel chuqui an, Dios i bajñel jaxto. Maʼañic majqui tsiʼ mele, come maʼañic majqui an i bajñel jach.

Cheʼ wʌʼañonla yicʼot cheʼ an jiñi universo miʼ pʌsbeñonla chaʼan an Dios am bʌ tiʼ pejtelel ora. Jiñi tsaʼ bʌ i yʌcʼʌ chaʼan miʼ ñijcan i bʌ jiñi universo yicʼot tsaʼ bʌ i yʌcʼʌ bajcheʼ yom miʼ mel i yeʼtel pejtelel chuqui an, yom wʌn añʌch tsaʼ bʌ i mele ti ñaxan. Cojach jiñi tsaʼ bʌ mejli i laj aqʼuen i cuxtʌlel chuqui tac an (Job 33:4).