Tsaʼ bʌ i ñumen qʼuele ti ñuc Jesús jiñʌch chaʼan miʼ «sub jiñi wen tʼan chaʼan i Yumʌntel Dios» (Lucas 8:1). Tsaʼʌch i wen chaʼle wersa i tsiʼ chaʼle ñajt bʌ xʌmbal tiʼ pejtelel Israel chaʼan miʼ subeñob jiñi lac piʼʌlob chaʼan bʌ jiñi yumʌntel. Cheʼ jaʼel, ti jiñi chʌmpʼejl Evangelio muʼ bʌ i taj ti tʼan tsaʼ bʌ i mele Jesús, ñumen ti cien miʼ tilel baqui Jesús tsiʼ taja tiʼ tʼan jiñi i Yumʌntel Dios. Ili miʼ pʌsbeñonla chaʼan Jesús tsaʼʌch i wen taja ti tʼan chaʼan jiñi i Yumʌntel Dios (Juan 21:25).

¿Chucoch tsaʼʌch i wen qʼuele ti ñuc jiñi i Yumʌntel Dios? Ti ñaxan, come Dios tsiʼ yajca bajcheʼ rey chaʼan jiñi Yumʌntel (Isaías 9:6; Lucas 22:28-30). Pero maʼañic tsiʼ mele chaʼan jach yom i taj i ñuclel (Mateo 11:29; Marcos 10:17, 18). Yujil chaʼan ili Yumʌntel mi caj i coltan jiñi muʼ bʌ i wen cʼuxbiñob, i Tat yicʼot jiñi xcʌntʼañob i chaʼan, jin chaʼan tiʼ subu jiñi i Yumʌntel Dios. *

Jesús miʼ wen cʼuxbin i Tat (Proverbios 8:30; Juan 14:31). Miʼ wen qʼuel ti ñuc jiñi utsʼatax bʌ i melbal tac, bajcheʼ jiñi cʼuxbiya, jiñi pʼuntaya yicʼot cheʼ toj chuqui miʼ mel (Deuteronomio 32:4; Isaías 49:15; 1 Juan 4:8). Jin chaʼan tsʼaʼ miʼ yubin jiñi lot tac muʼ bʌ i yʌjlel tiʼ tojlel i Tat. An ajli chaʼan Dios mach i wentajic cheʼ mi la cubin wocol, o chaʼan jiñi miʼ yʌqʼueñonla jiñi wocol. Jin chaʼan Jesús tsiʼ chaʼle wersa i sub «jiñi wen tʼan tac chaʼan bʌ Yumʌntel» come jiñʌch muʼ caj i sʌqʼuesʌben i cʼabaʼ i Tat (Mateo 4:23; 6:9, 10). ¿Bajcheʼ mi caj i mel?

Jiñi Yumʌntel cabʌl chuqui mi caj i tojʼesan. Jehová «mi caj i sujcubeñob i yaʼlel i wut» jiñi lac piʼʌlob. Mi caj i la jisan muʼ bʌ i yʌcʼonla ti uqʼuel, «maʼañix miʼ cajel chʌmel, mi muqʼuicto i cajel chʼijyemlel, uqʼuel yicʼot cʼuxyajiyel» (Apocalipsis 21:3, 4). Wocolix i yʌlʌ jiñi i Yumʌntel Dios, maʼañix baʼ ora mi caj la cubin wocol. *

Mi lac chʼʌmben i sujm chucoch Jesús tsiʼ mulaj i sub jiñi i Yumʌntel Dios, come jiñʌch muʼ bʌ caj i pʌs chaʼan jiñi i Tat wen yujil pʼuntaya yicʼot wen pʼʌtʌl (Santiago 5:11). Pero ili Yumʌntel mach cojach mi caj i mel chuqui wen bʌ tiʼ tojlel Dios. Mi caj i coltan jaʼel jiñi xcʌntʼañob i chaʼan come mucʼʌch i cʼuxbiñob.

Cheʼ bʌ Jesús muʼto caj i tilel wʌʼ ti Pañimil wen jal tsaʼ chumle yicʼot i Tat yaʼ ti panchan. Tsiʼ colta i mel pejtelel chuqui an bajcheʼ jiñi ecʼ yicʼot galaxia tac, cheʼ jaʼel ili utsʼatax bʌ Lum yicʼot pejtelel chuqui cuxul bʌ wʌʼi (Colosenses 1:15, 16). Pero joñonla jiñi tsaʼ bʌ cʼoti i ñumen cʼuxbin Jesús (Proverbios 8:31, TNM).

I jiñʌch jiñi cʼuxbiya tsaʼ bʌ i ñijca chaʼan miʼ chaʼlen subtʼan. Cʼʌlʌl tiʼ tejchibal i subtʼan tsiʼ yʌlʌ chaʼan tsaʼ tili i suben wen tʼan jiñi yomoʼ bʌ coltʌntel (Lucas 4:18). Pero Jesús mach tsaʼ jach i chaʼle subtʼan, tiʼ sʌcla bajcheʼ miʼ coltan jiñi yambʌlob. Ti jumpʼejl bʌ qʼuin cheʼ bʌ cabʌl lac piʼʌlob tsiʼ tempayob i bʌ chaʼan miʼ ñʌchʼtañob, Jesús tsiʼ wen pʼuntayob «jin chaʼan tsiʼ cʼoqʼuesa jiñi cʼamoʼ bʌ» (Mateo 14:14). Ti yambʌ qʼuin, juntiquil wiñic am bʌ i chaʼan bʌbʌqʼuen jax bʌ i cʼamʌjel tiʼ sube: «Cujil chaʼan miʼ mejlel a cʼoqʼuesañon mi cheʼʌch a wom». Come Jesús tsiʼ wen cʼuxbi yicʼot tsiʼ pʼunta, tiʼ sube: «Comʌch. Laʼ cʼocʼaquet» i tiʼ tsʼʌca (Lucas 5:12, 13). I cheʼ bʌ tsiʼ qʼuele chaʼan María woliʼ yucʼtan i yeran, Lázaro, come tsaʼ chʌmi, «tsaʼ wen ñijcʌyi i pusicʼal i wen chʼijyem tsiʼ yubi i bʌ» i «tsaʼ loqʼui i yaʼlel i wut» (Juan 11:32-36). Cheʼ jiñi an chuqui wen ñuc bʌ tsiʼ mele, anquese Lázaro añix chʌmpʼejl qʼuin tsaʼ chʌmi, Jesús tsiʼ chaʼ cuxtesa (Juan 11:38-44).

Jesús yujil chaʼan jiñi tsaʼ bʌ i chaʼ cuxtesayob mi caj i chaʼ chʌmelob. I jiñi tsaʼ bʌ i cʼoqʼuesayob mi caj i chaʼ cʼamʼañob. Pero yujilʌch jaʼel chaʼan jiñi wenlel tac muʼ bʌ caj i chʼʌm tilel jiñi i Yumʌntel Dios maʼañic baʼ ora mi caj i jilel. Jin chaʼan mach cojach tsiʼ mele milagro tac, tsiʼ chaʼle wersa chaʼan miʼ sub «jiñi wen tʼan chaʼan Yumʌntel» (Mateo 9:35). Jiñi milagro tac tsaʼ bʌ i mele tsaʼ jach i pʌsʌ pejtelel chuqui mi caj i mel jiñi Yumʌntel wʌʼ ti Pañimil, i lʌcʼʌlix mi caj i mel. ¿Chuqui mi caj i yujtel? Jiñi Biblia miʼ subeñonla.

• Mi caj i jilel jiñi cʼamʌjel tac.

  «Mi caj i chaʼ cʼotel i wut jini xpotsʼob. Mi caj i jajmel i chiquin jini xcojcob. Jini qʼuichqʼuichña bʌ i yoc mi caj i tijpʼel. Miʼ caj ti cʼay jini xʼumaʼ». Cheʼ jaʼel, «maʼanix mi juntiquilic muʼ bʌ caj i yʌl: ‹Cʼamon› » (Isaías 33:24; 35:5, 6).

• Maʼañix majqui mi caj i chʌmel.

  «Mi caj i yʌqʼuentelob jini pañimil jini tojoʼ bʌ. Mi caj i yajñelob tiʼ pejtelel ora» (Salmo 37:29).

  «Lac Yum mi caj i junyajlel jisan jini pʼʌtʌl bʌ muʼ bʌ i yʌcʼonla ti chʌmel. Cheʼ jini maʼanix majqui mi caj i chʌmel tiʼ pejtelel ora. Lac Yum Dios mi caj i sujcubeñonla i yaʼlel lac wut» (Isaías 25:8).

• Jiñi chʌmeñoʼ bʌ mi caj i chaʼ chʼojyelob.

  «Pejtelel jiñi añoʼ bʌ ti mucoñibʌl mi caj i yubibeñob i tʼan i mi caj i loqʼuelob» (Juan 5:28, 29).

  «Mi caj i chaʼ chʼojyelob» (Hechos 24:15).

• Ti lac pejtelel mi caj lac mel la cotot i mi caj lac taj la queʼtel.

  «Winicob mi caj i waʼchocoñob i yotot. Yaʼi mi caj i chumtʌlob. Maʼanic majch mi caj i chilbeñob. Cheʼ miʼ pʌcʼob tsʼusubil, mi caj i cʼuxbeñob i wut. Maʼanic majch mi caj i xujchʼibeñob. [...] Tijicñayob jini yajcʌbiloʼ bʌ c chaʼan, come i chaʼañobʌch pejtelel i wut i yeʼtel» (Isaías 65:21, 22).

• Maʼañix miʼ cajel guerra.

  « [Dios] miʼ yujtesan guerra cʼʌlʌl tiʼ pejtelel pañimil» (Salmo 46:9).

  «Maʼanix mi caj i chʌn chaʼlen contra jumpʼejl tejclum tiʼ tojlel yambʌ. Maʼanix mi caj i chʌn ñopob guerra» (Isaías 2:4).

• Mi caj lac taj i bʌl lac ñʌcʼ ti lac pejtelel.

  «Jini lac chol tsaʼix i yʌcʼʌ tac i cuch. Dios woliʼ pʌsbeñonla i yutslel, jiñʌch lac Dios» (Salmo 67:6).

  «Mi caj i yʌcʼ cabʌl i cuch jini cholel yaʼ ti joctʌl cʼʌlʌl ti pam tac jini wits» (Salmo 72:16).

• Mi caj i jilel jiñi pʼumpʼuñiyel.

  «Anquese pʼumpʼun [...] mach ti junyajlelic cʌybil» (Salmo 9:18).

  «Come miʼ locʼsan ti wocol jini pʼumpʼun bʌ cheʼ miʼ cʼajtiben, yicʼot jini ticʼlʌbil bʌ mach bʌ anic majqui miʼ coltan. Miʼ pʼuntan jini cʼun bʌ yicʼot jini pʼumpʼun bʌ. Miʼ coltan jini pʼumpʼuñoʼ bʌ» (Salmo 72:12, 13).

Cheʼ tsaʼix laj qʼuele iliyi, ¿tsaʼ baʼ ñaʼta chucoch Jesús miʼ wen qʼuel ti ñuc jiñi i Yumʌntel Dios? Jesús tiʼ sube jiñi wen tʼan chaʼan bʌ i Yumʌntel Dios pejtelel jiñi lac piʼʌlob tsaʼ bʌ i ñʌchʼtayob, come yujil chaʼan maʼañic yambʌ muʼ bʌ mejlel i tojʼesan jiñi wocol tac.

¿Muʼ baʼ mulan jiñi muʼ bʌ caj i mel Dios? Mi cheʼʌchi, ¿bajcheʼ miʼ mejlel a ñumen cʌn chaʼan jiñi i Yumʌntel Dios? ¿Chuqui yom maʼ mel chaʼan maʼ taj ili bendición tac?