Julio: Ernesto, wen mi cubin cheʼ mic subeñet chaʼan bʌ Biblia. * Ti yambʌ qʼuin tsaʼ cʼajtibeyon chaʼan bʌ jiñi i Yumʌntel Dios, i tsaʼ subeyon chaʼan jiñi i testigojob Jehová miʼ yʌlob chaʼan Jesús tsiʼ teche i yeʼtel ti 1914.

Ernesto: Cheʼʌchi, pejcʌbil c chaʼan ti laʼ jun tac baqui mi laʼ wʌl chaʼan jiñi i Yumʌntel Dios tsaʼ tejchi cheʼ ti 1914, i an chuqui com c ñaʼtan. Jatet mi laʼ wʌl chaʼan pejtelel chuqui mi laʼ ñop loqʼuem ti Biblia.

Julio: Cheʼʌchi, tiʼ pejtelel.

Ernesto: Tsaʼix c pejca ti tsʼʌcʌl jiñi Biblia, i maʼañic baqui mic taj jiñi «1914», cheʼto jaʼel tsaʼ c sʌcla ti Biblia yaʼ ti internet i maʼañic chuqui miʼ yʌl chaʼan jiñi.

Julio: An chaʼchajp com bʌ c subeñet wem bʌ maʼ mel, an a pejca ti tsʼʌcʌl jiñi Biblia yicʼot maʼ qʼuel ti ñuc.

Ernesto: Mucʼʌch, come jumpʼejlʌch libro wen ñuc bʌ i cʼʌjñibal mij qʼuel.

Julio: I sujmʌch, yambʌ wem bʌ tsaʼ mele jiñʌch cheʼ maʼ sʌclʌben i jacʼbal jiñi a cʼajtiya tac yaʼ ti Biblia come jiñʌch yom bʌ mi lac mel chaʼan mi lac bej sʌclan jiñi i sujmlel. * ¡Weñʌch cheʼ woli a chaʼlen wersa!

Ernesto: Wocolix a wʌlʌ Julio, comʌch c ñumen cʌn majlel, jin chaʼan tsaʼ caji c sʌclan ti jiñi libro woli bʌ laj qʼuel majlel chaʼan bʌ jiñi 1914. Pero miʼ yʌl chaʼan juntejc teʼ tsaʼ bʌ sejqʼui i tsaʼ chaʼ coli..., i maʼañic tsaʼ c wen chʼʌmbe i sujm.

Julio: Ah, jʌjʌʼ. Jumpʼejlʌch profecía am bʌ ti capítulo 4 chaʼan Daniel, i ñajal Nabucodonosor, rey bʌ yaʼ ti Babilonia.

Ernesto: Jin mecu jiñi, mach junsujtel jach tsaʼ c pejca i maʼañic tsaʼ c ñaʼta bajcheʼ miʼ taj i bʌ jiñi i Yumʌntel Dios yicʼot jiñi 1914.

Julio: Mach a pensarin, mi jiñicto Daniel tsaʼ bʌ i tsʼijbu ili libro tiʼ chʼʌmbe i sujm jaʼel.

Ernesto: ¿I sujm?

Julio: Cheʼi. Qʼuele muʼ bʌ i yʌl ti Daniel 12:8: «Joñon tsaʼ cubi, pero maʼanic tsac chʼʌmbe isujm».

Ernesto: Tsaʼ c lon ñaʼta chaʼan c bajñel jach maʼan mic chʼʌmben i sujm.

Julio: ¿A wujil ba chucoch Daniel maʼan tiʼ chʼʌmbe sujm jiñi? Come maxto i yorajlelic chaʼan miʼ chʼʌmben i sujm, pero wʌle muqʼuix i mejlel lac chʼʌmben i sujm jiñi profecía tsaʼ bʌ i tsʼijbu.

Ernesto: ¿Muqʼuix?

Julio: Jʌjʌʼ, jiñi versículo 9, miʼ yʌl: «Come mucul to mi caj i cʌytʌl ili tʼan jinto miʼ cʼotel i yorajlel cheʼ miʼ cajel ti ujtel». Cheʼ bajcheʼ maʼ qʼuel, ili profecía mi caj i chʼʌmbentel i sujm cheʼ bʌ añoñixla ti cojix bʌ qʼuin. I pejtelel chuqui mi laj qʼuel miʼ pʌs chaʼan añoñixla ti jiñi cojix bʌ qʼuin, ili muʼto caj lac bej cʌn majlel ti jiñi libro. *

Ernesto: ¿Muʼ ba i mejlel a tsictesʌbeñon jiñi profecía?

Julio: Mi caj c ñop.

Julio: ¿Wem ba maʼ qʼuel cheʼ mi lac ñaxan qʼuel tsaʼ bʌ i ñajle jiñi rey Nabucodonosor, i mi la cʌl baqui bʌ i sujmlel?

Ernesto: Weñʌch.

Julio: Nabucodonosor tsiʼ ñajle juntejc colem teʼ wen chaʼan bʌ muʼto bʌ i cʼotel ti panchan, ti jiñi i ñajal juntiquil ángel tsiʼ chaʼle tʼan i tsiʼ yʌlʌ chaʼan miʼ sejqʼuel jiñi teʼ i cojach tsaʼ cʌyle i xujcʼunteʼlel, tsaʼ ñumi 7 jab i tsaʼ chaʼ chʼocʼa jiñi teʼ i tsaʼ chaʼ coli. * Ili profecía tsaʼ ñaxan tsʼʌctiyi ti Nabucodonosor, juntiquil rey wen pʼʌtʌl bʌ lajal bʌ bajcheʼ jiñi colem teʼ chan bʌ muʼto bʌ i cʼotel ti panchan. Pero cheʼ jaʼel lajal bajcheʼ tsaʼ sejqʼui i tsaʼ ajñi bajcheʼ jiñi 7 jab. ¿Cʼajal ba a chaʼan chuqui i sujmlel jiñi?

Ernesto: Mmm... Mach cʼajalix c chaʼan.

Julio: Jiñi Biblia miʼ yʌl chaʼan jiñi Nabucodonosor tsaʼ sojqui i tsaʼ ajñi 7 jab bajcheʼ jiñi, i tsiʼ cʌyʌ i yeʼtel bajcheʼ rey. Pero cheʼ bʌ tsaʼ ujti jiñi 7 jab, tsaʼ chaʼ tojʼa i ñaʼtʌbal i tsiʼ chaʼ chʼʌmʌ i yeʼtel. *

Ernesto: Woliyʌch c chʼʌmben majlel sujm, pero ¿bajcheʼ miʼ taj i bʌ jiñi i Yumʌntel Dios yicʼot jiñi 1914?

Julio: Weno, muʼ bʌ i yʌqʼueñonla lac ñaʼtan jiñʌch cheʼ ili profecía tsaʼ tsʼʌctiyi chaʼ sujtel. Ñaxam bʌ, jin cheʼ Nabucodonosor tsiʼ jumucʼ cʌyʌ i yeʼtel, yambʌ jiñʌch cheʼ tsiʼ jumucʼ cʌyʌ i mel i yeʼtel jiñi i Yumʌntel Dios. Jiñi i chaʼpʼejlel jiñʌch baqui ochem jiñi i Yumʌntel Dios.

Ernesto: ¿I bajcheʼ maʼ ñaʼtan jiñi?

Julio: Come jiñi profecía añʌch chuqui miʼ yʌl muʼ bʌ i tsʼitaʼ aqʼueñonla lac ñaʼtan, yaʼ ti Daniel 4:17 miʼ yʌl chaʼan jiñi profecía tsaʼ ajqʼui chaʼan miʼ ñaʼtʌntel tiʼ pejtelel pañimil chaʼan an i pʼʌtʌlel lac Yum bajcheʼ yumʌl ti pañimil. Miʼ yʌqʼuen i yumʌntel majqui jach yom. ¿Tsaʼ baʼ taja a qʼuel jiñi tʼan yumʌl ti pañimil?

Ernesto: Tsaʼʌch, miʼ yʌl chaʼan lac Yum tiʼ tojlel pañimil.

Julio:¿Majqui woliʼ taj ti tʼan maʼ wʌl?

Ernesto: Mi cʌl chaʼan jiñʌch Dios.

Julio: Jiñʌchi. Ili tʼan miʼ pʌs chaʼan jiñi profecía mach cojach woliʼ taj tiʼ tʼan Nabucodonosor, woliʼ taj ti tʼan jaʼel chaʼan bajcheʼqui jiñi i Yumʌntel Dios mi caj i mel i yeʼtel wʌʼ ti pañimil. Cheʼ muqʼuic laj qʼuel tilel chuqui miʼ yʌl jiñi profecía, mi caj laj qʼuel chaʼan i sujmʌch woli bʌ la cʌl.

Ernesto: Yomʌch.

Julio: Yaʼ ti libro chaʼan Daniel añʌch junchajp muʼ bʌ i wen taj ti tʼan, jiñʌch bajcheʼqui mi caj i mel i yeʼtel jiñi i Yumʌntel Dios, i jiñi i rey jiñʌch Jesucristo. Bajcheʼ yilal maʼ qʼuel cheʼ maʼ sʌclan Daniel 2:44, a wocolic poj pejcan.

Ernesto: Yomʌch, miʼ yʌl: «Cheʼ woliyob ti yumʌntel, jini Dios am bʌ ti panchan mi caj i waʼchocon yambʌ Yumʌl, mach bʌ yujilic jilel. Mi caj i mʌjlel i chaʼan. Mi caj i laj jisan pejtel jini yumʌlob. Mi caj i yajñel tiʼ pejtelel ora».

Julio: Wocolix a wʌlʌ, ili versículo, ¿woli ba i taj ti tʼan i Yumʌntel Dios?

Ernesto: Mmm... Mach cujilic.

Julio: Ili versículo miʼ yʌl chaʼan jiñi yumʌntel mi caj i yajñel tiʼ pejtelel ora, ti yambʌ tʼan maʼañic mi caj i jisʌntel. ¿Am ba yumʌl wʌʼ ti pañimil muʼ bʌ caj i jalʼan bajcheʼ i yumʌntel Dios?

Ernesto: Maʼañic.

Julio: I sujmʌch, mi caj laj qʼuel yambʌ profecía muʼ bʌ i taj ti tʼan chaʼan i Yumʌntel Dios. Ili mi lac taj ti Daniel 7:13, 14 i miʼ yʌl chaʼan an juntiquil muʼ bʌ caj i sujtel bajcheʼ rey. Qʼuele muʼ bʌ i yʌl: «Jini Winic tsaʼ aqʼuenti i pʼʌtʌlel, yicʼot i ñuclel yicʼot i yumʌntel. Pejtel winicob yujiloʼ bʌ tʼan ti chajp ti chajp tsaʼ caji i yumañob. An i pʼʌtʌlel tiʼ pejtelel ora. Maʼanic miʼ caj ti jilel i yumʌntel». Ili versículo tac miʼ taj ti tʼan tsaʼix bʌ la cʌlʌ tilel.

Ernesto: Cheʼʌchi, miʼ chaʼ al chaʼan jiñi yumʌntel.

Julio: I sujmʌch, i mach baqui jach bʌ yumʌl woliʼ taj ti tʼan. Tsaʼ baʼ qʼuele chaʼan miʼ yʌl chaʼan tsaʼ aqʼuenti i yeʼtel tiʼ pejtelel wiñicob yujiloʼ bʌ tʼan ti chajp ti chajp, yom bʌ i yʌl chaʼan mi caj i mel i yeʼtel tiʼ tojlel ili pañimil.

Ernesto: Maʼañic tsaʼ j qʼuele ti ñaxan, pero añʌch i sujmlel jiñi woli bʌ a wʌl come yaʼʌch miʼ yʌl.

Julio: Laʼcu lac chaʼ qʼuel iliyi, miʼ yʌl: «An i pʼʌtʌlel tiʼ pejtelel ora. Maʼanic miʼ caj ti jilel i yumʌntel». ¿Mach ba lʌcʼʌ lajalic ili versículo bajcheʼ miʼ yʌl Daniel 2:44, tsaʼ jaxto bʌ lac pejca?

Ernesto: Cheʼʌchi, lajalʌch.

Julio: Laʼcu lac chaʼ tsʼitaʼ al jiñi tsaʼix bʌ la cʌlʌ, jiñi profecía chaʼan capítulo 4 chaʼan Daniel miʼ yʌqʼuen i cʌn jiñi lac piʼʌlob chaʼan Dios jiñʌch am bʌ i yeʼtel bajcheʼ yumʌl wʌʼ ti pañimil. Ili profecía miʼ pʌsbeñonla chaʼan miʼ tsʼʌctiyel ti juntiquil ñumen ñuc bʌ bajcheʼ Nabucodonosor. Cheʼ jaʼel, tiʼ pejtelel jiñi libro chaʼan Daniel mi lac taj profecía tac muʼ bʌ i taj ti tʼan chaʼan bajcheʼqui jiñi i Yumʌntel Dios miʼ tech i mel i yeʼtel i jiñi rey jiñix Jesucristo. Tiʼ pejtelel iliyi miʼ pʌsbeñonla chaʼan jiñi profecía muʼ bʌ lac taj ti capítulo 4 chaʼan Daniel miʼ taj ti tʼan chaʼan i Yumʌntel Dios, ¿mach ba cheʼ maʼ qʼuel?

Ernesto: Cheʼʌchi, tsiquilʌch. Pero maxto añic woli c ñaʼtan bajcheʼ miʼ taj i bʌ yicʼot jiñi 1914.

Julio: Weno, laʼ lac chaʼ al i chaʼan bʌ jiñi rey Nabucodonosor. Tsaʼ la cʌlʌ chaʼan baqui tsaʼ ñaxan tsʼʌctiyi jiñi profecía, jiñʌch ti jiñi teʼ. Pero cheʼ bʌ tsaʼ sejqʼui jiñi teʼ yom i yʌl chaʼan tsiʼ jumucʼ cʌyʌ i mel i yeʼtel jiñi rey Nabucodonosor i tsaʼ ñumi 7 jab come tsaʼ sojqui, pero ti wiʼil tiʼ chaʼ taja i ñaʼtʌbal i tsaʼ chaʼ caji i mel i yeʼtel. I jiñi yambʌ tsaʼ tsʼʌctiyi cheʼ bʌ tsiʼ cʌyʌ i jumucʼ mel i yeʼtel jiñi i Yumʌntel Dios anquese mach tiʼ cajic chaʼan an chuqui mach bʌ weñic tsiʼ mele Dios.

Ernesto: ¿Bajcheʼ?, maʼañic woli c ñaʼtan.

Julio: Ti wajali miʼ yʌjlel chaʼan jiñi reyob ti Israel miʼ buchtʌlob tiʼ yumʌntel David o tiʼ buchlib Jehová, * come jiñi i yumʌntelob miʼ lajintel bajcheʼ i yumʌntel Dios. Pero ti wiʼil, lʌcʼʌ tiʼ pejtelel jiñi reyob tsiʼ ñajtʼesayob i bʌ ti Jehová, i lʌcʼʌ tiʼ pejtelel jaʼel jiñi israelitajob tsiʼ coltayob. I tiʼ caj jiñi, Jehová tsiʼ yʌcʼʌ chaʼan Babilonia miʼ chʼʌm Israel ti jabil 607 cheʼ bʌ maxto tilemic Cristo. Ti jiñi bʌ ora, Jehová tsiʼ cʌyʌ i waʼchocon reyob yaʼ ti Jerusalén, ili yom i yʌl chaʼan i Yumʌntel Dios tsiʼ cʌyʌ i jumucʼ mel i yeʼtel, ¿tsiquil ba yubil?

Ernesto: Tsiquilʌch yilal.

Julio: Jiñi 7 jab tsaʼ tejchi ti tsicol ti 607 cheʼ bʌ maxto tilemic Cristo. I ti jiñi bʌ ora tsiʼ jumucʼ cʌyʌ i mel i yeʼtel i Yumʌntel Dios, i cheʼ bʌ tsaʼ ujti jiñi 7 jab Dios tsiʼ waʼchoco yambʌ juntiquil rey, pero yaʼix ti panchan. Jiñi yan tac bʌ profecía tsaʼ bʌ lac pejca ti Daniel tsaʼʌch tsʼʌctiyi jaʼel tiʼ yujtibal jiñi 7 jab. Pero anto yambʌ cʼajtiya, ¿jalixqui tsaʼ ujti jiñi 7 jab? Mi tsaʼ lac tajbe i jacʼbal mi caj i mejlel lac ñaʼtan jalix tsaʼ tejchi i mel i yeʼtel jiñi i Yumʌntel Dios.

Ernesto: Jimba cheʼ ti 1914.

Julio: Jiñʌchi.

Ernesto: Pero ¿bajcheʼ mi lac ñaʼtan chaʼan jiñʌch jiñi jabil?

Julio: Cheʼ bʌ Jesús tsajñi wʌʼ ti pañimil tsiʼ yʌlʌ chaʼan jiñi 7 jab maxto ujt. * Jin chaʼan wen jalʌch miʼ ñumel iliyi. Cheʼ bʌ maxto wʌʼic an Jesús wʌʼ ti pañimil, wolix i tsijquel majlel jiñi 7 jab i cheʼ bʌ yaʼix an ti panchan tsaʼto bej caj ti tsijquel majlel. ¿Cʼajal ba a chaʼan tsaʼ la cʌlʌ chaʼan ili profecía tac chaʼan Daniel maxto añic mi caj i chʼʌmbentel i sujm jinto cheʼ ti cojix bʌ qʼuin? * Cheʼ lʌcʼʌlix miʼ yujtel jiñi siglo XIX, junmojt xpejcaya bibliajob an chuqui tsiʼ ñijcayob chaʼan miʼ tsajiñob ili profecía tac yicʼot yan tac bʌ. I cʼunteʼ cʼunteʼ tiʼ chʼʌmbeyob i sujm chaʼan jiñi 7 jab miʼ yujtel cheʼ ti 1914. Tsaʼ bʌ caji laj qʼuel ti ujtel tilel ti ili pañimil miʼ yʌqʼueñonla lac ñaʼtan chaʼan ti jiñi bʌ jabil tsaʼ caji i tech i mel i yeʼtel i Yumʌntel Dios yaʼ ti panchan i tsaʼ tejchi jaʼel jiñi cʌmbil bʌ bajcheʼ cojix bʌ qʼuin. Mucʼʌch c ñaʼtan chaʼan wocolʌch ti chʼʌmbentel i sujm ili Ernesto.

Ernesto: ¡I sujmʌch! Mi caj c chaʼ wen chajpan pejtelel ili woli bʌ a subeñon.

Julio: Mic chʼʌmbeñet i sujm Ernesto. Joñon jaʼel mach orajic tsaʼ c ñaʼta. Pero mic pijtan chaʼan ili tsaʼ bʌ la cʌlʌ miʼ coltañet a qʼuel chaʼan cheʼ bʌ jiñi i testigojob Jehová miʼ yʌlob chaʼan bʌ i Yumʌntel Dios chuculʌch ti Biblia.

Ernesto: Tsiquilʌch chaʼan cheʼʌchi, wen qʼuelbil c chaʼan chaʼan mucʼʌch laʼ wen qʼuel ti ñuc jiñi Biblia.

Julio: Mi cʌl cheʼʌch a wom a mel jaʼel. Cheʼ bajcheʼ tsaʼ la cʌlʌ, mach ti orajic miʼ mejlel lac ñaʼtan iliyi i mi cʌl añʌch yan tac bʌ a cʼajtiya. Jumpʼejl ejemplo, cheʼ bajcheʼ tsaʼ la cʌlʌ, jiñi 7 jab tsaʼ tejchi ti jabil 607 cheʼ bʌ maxto tilemic Cristo i mucʼʌch i yoque taj i bʌ yicʼot chaʼan bʌ jiñi i Yumʌntel Dios. Pero ¿chucoch mi la cʌl chaʼan tsaʼ tsʼʌctiyi ti 1914? *

Ernesto: Jiñʌch mecu maʼan mic wen ñaʼtan jiñi.

Julio: Jiñi Biblia miʼ coltañonla jaʼel chaʼan bajcheʼ miʼ mejlel lac tsic jiñi 7 jab. ¿A wom ba chaʼan mi la cʌl ti yambʌ ora? *

Ernesto: Yomʌch mic pijtañet.