Julio: Ernesto, ¿bajcheʼ a wilal? Tsaʼ tili c chaʼ julaʼtañet chaʼan mi laj cʌl chaʼan bʌ jiñi Biblia. *

Ernesto: Weñʌch.

Julio: ¡Utsʼat bajcheʼ jiñi! Cheʼ bʌ tsajñiyon ti yambʌ qʼuin tsaʼ laj qʼuele chucoch mi lon cʌl chaʼan jiñi i Yumʌntel Dios tsiʼ teche yumʌntel ti 1914. * Yaʼ ti capítulo 4 chaʼan Daniel tsaʼ laj qʼuele junchajp chucoch. ¿Cʼajal baʼ chaʼan?

Ernesto: Ah jʌjʌʼ, jin chaʼan i ñajal jiñi rey Nabucodonosor.

Julio: Cheʼ mecu. Yaʼ ti ñajal tsiʼ qʼuele juntejc colem teʼ muʼto bʌ i cʼotel cʼʌlʌl ti panchan. I tsiʼ yubibe i tʼan juntiquil ángel woli bʌ i yʌl chaʼan laʼ sejqʼuic jiñi teʼ. Cojach tsaʼ cʌyle jiñi i wiʼ yicʼot i xujcʼunteʼlel. Cheʼ jiñi tsaʼ ñumi «siete jab» i jiñi teʼ tsaʼ chaʼ coli. * Yicʼot jaʼel tsaʼ laj qʼuele chaʼan jiñi profecía chaʼyajl tsaʼ tsʼʌctiyi. ¿Cʼajal baʼ chaʼan baqui bʌ jiñi ñaxam bʌ?

Ernesto: Aah, ¿mach ba jiñic cheʼ tsaʼ sojqui jiñi Nabucodonosor i cheʼʌch tsiʼ ñusa siete jab bajcheʼ jiñi?

Julio: Cheʼʌchi. I ti jimbʌ ora Nabucodonosor tsiʼ cʌyʌ ajñel bajcheʼ rey. Jiñi i chaʼpʼejlel jiñʌch jiñi profecía chaʼan jiñi siete jab cheʼ bʌ jiñi i yumʌntel Dios ila ti Pañimil tsaʼ waʼle, cheʼ bʌ tsaʼ jisʌnti Jerusalén ti jabil 607 cheʼ maxto tilemic Cristo. Ti jimbʌ ora maʼañix juntiquil rey waʼchocobil bʌ ti Jehová ila ti Pañimil. Cheʼ bʌ tsaʼ ñumi jiñi siete jab Dios tsiʼ waʼchoco yambʌ rey pero yaʼix ti panchan, i jiñi i Yumʌntel Dios tsiʼ teche i mel i yeʼtel. Pero chaʼan mi lac ñaʼtan jalix tsaʼ tejchi jiñi i Yumʌntel Dios, yom mi laj qʼuel jaypʼejl tsaʼ mero jalʼa jiñi siete jab. ¿Wolix baʼ ñaʼtan?

Ernesto: Jʌjʌʼ, chaʼ cʼajalix c chaʼan tsaʼ bʌ la cʌlʌ ti yambʌ qʼuin.

Julio: Weno. Laʼ laj qʼuel jaypʼejl tsaʼ jalʼa jiñi siete jab. Chaʼan mic chaʼ wen ñaʼtan tsaʼʌch c chaʼ qʼuele jaʼel. Laʼ laj qʼueleʼ majlel.

Ernesto: Yomʌch.

Julio: Cheʼ bʌ tsaʼ tsʼʌctiyi tiʼ tojlel Nabucodonosor, tsaʼʌch jalʼa siete jab. Pero ti jiñi yambʌ, cheʼ bʌ tsaʼ tsʼʌctiyi tiʼ Yumʌntel Dios, ñumento tsaʼ jalʼa.

Ernesto: ¿I bajcheʼ a wujil?

Julio: Jiñi siete jab tsaʼ tejchi ti jabil 607 cheʼ bʌ maxto tilemic Cristo, i cheʼ bʌ tsaʼ jisʌnti Jerusalén. Mi jiñi siete jab mi lac tech lac tsic ti jabil 607 mi laj cʼotel ti jabil 600, pero maʼañic chuqui miʼ pʌs chaʼan ti jiñi jabil tsaʼ tejchi jiñi i Yumʌntel Dios. I cheʼ bajcheʼ tsaʼix laj qʼuele, tsaʼto ñumi cabʌl jab chaʼan Jesús miʼ tilel wʌʼ ti Pañimil, i cheʼ bʌ wʌʼixʼañi tsiʼ yʌlʌ chaʼan jiñi siete jab maxto tsʼʌctiyemic.

Ernesto: Aah, cheʼʌchcuyi.

Julio: Jin chaʼan, ili siete jab ñumen jal bajcheʼ jiñi tsaʼ bʌ ujti tiʼ tojlel Nabucodonosor.

Ernesto: ¿Ñumen jal?

Julio: Bueno, ti Apocalipsis an jumpʼejl profecía wen lajal bʌ yicʼot jiñi tsaʼ bʌ i yʌlʌ Daniel, i miʼ coltañonla lac ñaʼtan jaypʼejl miʼ jalʼan jiñi siete jab. Ti jiñi profecía miʼ yʌl chaʼan uxpʼejl jab yicʼot ojlil jiñʌch 1,260 qʼuin. * Jin chaʼan, jiñi siete jab, 2,520 qʼuin. ¿Am baʼ cʼajtiya?

Ernesto: Aah, luʼ weñʌch, pero maxto añic mic wen ñaʼtan chucoch mi laʼ wʌl chaʼan jiñi i Yumʌntel Dios tsaʼ tejchi ti 1914.

Julio: Bueno, laʼ laj qʼuel. Yaʼ ti Biblia, an profecía tac muʼ bʌ i cʼʌn jumpʼejl qʼuin chaʼan miʼ taj ti tʼan jumpʼejl jab. * I mi cheʼ mi lac mel jaʼel yicʼot jiñi 2,520 qʼuin am bʌ i chaʼan jiñi siete jab, miʼ sujtel ti 2,520 jab. I mi tsaʼ lac teche lac tsic jiñi 2,520 jab ti 607 cheʼ bʌ maxto tilemic Cristo mi laj cʼotel ti 1914. * Jin chaʼan mi lon cʌl chaʼan ti 1914 tsaʼ tsʼʌctiyi jiñi siete jab i Jesús tsaʼ waʼchoconti ti Rey tiʼ Yumʌntel Dios. Cheʼ jaʼel, ti ili jabil tsaʼ caji ti tsʼʌctiyel profecía tac muʼ bʌ i yʌl jiñi Biblia chaʼan jiñi cojix tac bʌ qʼuin.

Ernesto: ¿Chuqui tac ti profecía?

Julio: Ti Mateo 24:7, Jesús tsiʼ wʌn alʌ chuqui tac mi caj i yujtel cheʼ bʌ miʼ tech yumʌntel ti panchan: «Mi caj i contrajin i bʌ jumpʼejl tejclum yicʼot yambʌ, jumpʼejl yumʌntel yicʼot yambʌ, miʼ cajel wiʼñal yicʼot yujquel lum ti cabʌl tejclum». Ilayi, Jesús tsiʼ yʌlʌ chaʼan miʼ cajel wiʼñal yicʼot yujquel lum. ¿Mach ba jiñic woli bʌ i yujtel ila ti Pañimil cʼʌlʌl ti jimbʌ ora?

Ernesto: Cheʼʌchcu yubili.

Julio: Jesús tsiʼ yʌlʌ jaʼel chaʼan miʼ cajel guerra tac. I jiñi libro chaʼan Apocalipsis tsiʼ wʌn alʌ chaʼan miʼ cajel ti cabʌl tejclum i chaʼan mi caj i wen acʼ wocol. * ¿Cʼajal baʼ chaʼan jalix tsaʼ ujti jiñi Primera Guerra Mundial?

Ernesto: Ti 1914. ¡Aah!, i jin cheʼ bʌ mi laʼ wʌl chaʼan Jesús tsiʼ teche yumʌntel. Maʼañic tsaʼ wis ñumi tic jol bajcheʼ jiñi.

Julio: Cheʼ mecu, cheʼ bʌ mi lac wen qʼuel jiñi profecía chaʼan bʌ jiñi siete jab yicʼot chaʼan bʌ jiñi cojix tac bʌ qʼuin, utsʼat miʼ taj i bʌ. Jin chaʼan mi lon c ñop chaʼan Jesús tsiʼ teche yumʌntel ti 1914, i cʼʌlʌl ti jiñi jabil chumulonla ti jiñi cojix tac bʌ qʼuin. *

Ernesto: Mmm, wolito c ñop c laj chʼʌmben i sujm.

Julio: Mach a pensarin. Ti ñaxan, wocolʌch tsaʼ cubi jaʼel chaʼan mic chʼʌmben i sujm. Pero mic pijtan chaʼan pejtelel tsaʼ bʌ la cʌlʌ tsiʼ pʌsbeyet chaʼan añʌch chucoch mi lon cʌl chaʼan Jesús tsiʼ teche yumʌntel ti 1914 anquese jiñi Biblia maʼañic miʼ jamʌ al jiñi jabil. I mic pijtan chaʼan tsaʼʌch mejli c pʌsbeñet chaʼan pejtelel muʼ bʌ lon c ñop loqʼuemʌch ti Biblia.

Ernesto: A jiñi cheʼʌchi, tiʼ pejtelel ora cheʼ an chuqui maʼ tsictesʌbeñon, maʼ cʼʌn jiñi Biblia. Cheʼ bʌ an chuqui mij cʼajtibeñet, maʼañic maʼ wʌl «mi cʌl chaʼan». Pejtelel ora maʼ cʼʌn jiñi Biblia. Pero ¿chucoch wocol ti chʼʌmbentel i sujm? ¿Chucoch maʼañic tsiʼ toj alʌ Dios chaʼan Jesús mi caj i yochel ti rey ti 1914?

Julio: Wen jiñi a cʼajtiya. Jiñi Biblia cabʌl chuqui mach bʌ jamʌ tsiquilic miʼ yʌl. ¿Chucoch cheʼ tsiʼ mele Dios bajcheʼ jiñi? ¿Chucoch yomto mi lac chaʼlen wersa chaʼan mi lac chʼʌmben i sujm? ¿Bajcheʼ a wʌlʌ cheʼ ti yambʌ semana mi la cʌl iliyi?

Ernesto: Yomʌch, wʌʼ mic pijtañeti.