1, 2. a) ¿Chucoch maʼañic mi laj cotsan lac bʌ ti wocol tac muʼ bʌ i tʼox jiñi quixtañujob? (Qʼuele jiñi dibujo am bʌ tiʼ tejchibal.) b) ¿Chuqui miʼ ñaʼtan jiñi quixtañujob chaʼañob i país, i cultura o jiñi equipo chaʼan alas muʼ bʌ i ñumen mulañob? c) ¿Chuqui miʼ yujtel cheʼ bʌ an muʼ bʌ i ñaʼtañob chaʼan ñumen yujilob bajcheʼ yañoʼ bʌ?

ILI ora, cabʌl wiñicob xʼixicob (quixtañujob) tʼoxolob come ñuc miʼ yubiñob i bʌ tiʼ caj baqui tilemob, bajcheʼ yilalob i colorlel i pʌchʌlel o chaʼan yʌñʌlob i cultura. Pero jiñi i wiñiconbʌla Jehová maʼañic mi laj cotsan lac bʌ ti política yicʼot ti jiñi wocol tac muʼ bʌ i yʌcʼ tʼox bʌ. ¿Chucoch? Come mi laj cʼuxbin Jehová yicʼot com lac jacʼben i tʼan (1 Juan 5:3). Mi lac jacʼben i mandar anquese baqui jach chumulonla o baqui jach tsaʼ laj quila pañimil (chʼocʼayonla). Ñuc bʌ i cʼʌjñibal chaʼañonla jiñʌch cheʼ mi laj cʌqʼuen laj coltaya Jehová yicʼot i yumʌntel (Mateo 6:33). Jin chaʼan mi laj cʌl chaʼan ‹mach i chaʼañoñicla pañimil› (pejcan Juan 17:11, 15, 16; Isaías 2:4).

² Cabʌl quixtañu miʼ ñaʼtañob chaʼan jiñi i país yicʼot jiñi i cultura ñumen wen cheʼ bajcheʼ i chaʼan jiñi yañoʼ bʌ. An yambʌ cheʼ bʌ miʼ yʌlob jaʼel chaʼan tiʼ tojlel jiñi equipo chaʼan alas muʼ bʌ i ñumen mulañob. Iliyi an i yʌcʼʌ chaʼan cabʌl miʼ ñop i lajiñob i bʌ, miʼ tsʼaʼleñob i bʌ yicʼot miʼ cʼotel i tsʌnsañob jiñi mach bʌ lajalic chuqui miʼ ñaʼtañob bajcheʼob. Anquese jiñi i testigojonbʌla Jehová maʼañic mi laj cotsan lac bʌ ti jiñi  wocol tac, tajol mucʼʌch mejlel i ticʼlan lac familia yicʼot joñonla jaʼel. Tajol miʼ mejlel lac ñusan tsʌts bʌ toʼol ticʼlʌntel. Cʼux mi laj cubin bajcheʼ jiñi come cheʼ tsiʼ meleyonla Jehová, tsiʼ yʌcʼʌ chaʼan miʼ mejlel lac ñaʼtan chuqui mach bʌ weñic woli (choncol) ti ujtel (Génesis 1:27; Deuteronomio 32:4). Jin chaʼan, tajol mi lac mulan tʼan tiʼ contra juntiquil yumʌl cheʼ bʌ miʼ mel mach bʌ weñic. Pero ¿muʼ ba caj la cotsan lac bʌ?

3, 4. a) ¿Chucoch maʼañic mi laj cotsan lac bʌ ti alol i chaʼan bʌ política i maʼañic mi lac majlel ti guerra? b) ¿Chuqui mi caj laj qʼuel ti ili temaj?

³ An cabʌl miʼ yotsañob i bʌ ti leto tac chaʼan bʌ política come cheʼʌch miʼ subentelob ti yumʌl chaʼan yom miʼ melob. Pero jiñi isujm bʌ xñoptʼañonla maʼañic mi laj cotsan lac bʌ ti alol i chaʼan bʌ política i maʼañic mi lac majlel ti guerra. ¿Chucoch? Come mi lac lajin bajcheʼ tsiʼ mele Jesús (Mateo 26:52). Maʼañic mi laj cʌl chaʼan ila tiʼ pañimil (mulawil) Satanás an junchajp ñumen wem bʌ bajcheʼ jiñi yan tac bʌ (2 Corintios 2:11). Jin chaʼan, maʼañic mi laj cotsan lac bʌ ti jiñi wocol tac i chaʼan bʌ pañimil (pejcan Juan 15:18, 19).

⁴ Come xmulilonla, tajol anto chuqui mach weñic mi laj qʼuel tiʼ tojlel jiñi mach bʌ lajalobic laj quicʼot (Jeremías 17:9; Efesios 4:22-24). Ti ili temaj mi caj laj qʼuel bajcheʼ miʼ mejlel i coltañonla jiñi Biblia chaʼan mi lac mʌlben tiʼ pejtelel jiñi muʼ bʌ i yʌcʼonla chaʼan mi lac tʼox lac bʌ tiʼ tojlel yañoʼ bʌ. Cheʼ jaʼel, mi caj laj cʌn bajcheʼ yom mi laj qʼuel jiñi yañoʼ bʌ cheʼʌch bajcheʼ miʼ qʼuel Jehová yicʼot Jesús. Jiñʌch mi caj i coltañonla chaʼan xucʼul mi la cajñel tiʼ yumʌntel Dios.

5, 6. a) ¿Bajcheʼ yilal tsiʼ qʼuele Jesús tiʼ pejtelel jiñi quixtañujob? b) ¿Chucoch cheʼ tsiʼ ñaʼta bajcheʼ jiñi?

⁵ Cheʼ bʌ wocol maʼ wubin chaʼan maʼañic maʼ wotsan a bʌ, cʼajtiben a bʌ: «¿Chuqui tsiʼ mele Jesús cheʼ jiñiqui?». Cheʼ bʌ Jesús tsajñi wʌʼ ti Pañimil, jiñi quixtañujob yaʼ ti Judea, Galilea yicʼot Samaria mach utsʼatic miʼ qʼuelob i bʌ. Jumpʼejl ejemplo, jiñi judíojob yicʼot samaritanojob maʼañic miʼ pejcañob i bʌ (Juan 4:9). An chaʼmojt xñoptʼañob judíojoʼ bʌ tiʼ pejtelel ora miʼ letojiñob i bʌ, jiñi fariseojob yicʼot saduceojob (Hechos 23:6-9). Jiñi judíojob tsaʼ bʌ i pejcʌbeyob i Mandar Moisés tsaʼ cʼoti i ñaʼtañob chaʼan ñumen yujilob, chaʼan mach lajalobic bajcheʼ jiñi maʼañic bʌ tsiʼ pejcayob jiñi mandar (Juan 7:49). Cabʌl muʼ bʌ i tsʼaʼleñob jiñi xchʼʌm tojoñelob yicʼot jiñi romanojob (Mateo 9:11). Pero Jesús maʼañic tsiʼ yotsa i bʌ ti cheʼ tac bʌ bajcheʼ jiñi. Isujm chaʼan tsaʼʌch i colta jiñi i sujmlel bʌ chaʼan Jehová yicʼot i ñaʼtayix chaʼan Dios tsiʼ yajca tiʼ tejclum jiñi judíojoʼ bʌ. Pero maʼañic baqui ora tsiʼ cʌntesa chaʼan ñumen ñucob jiñi xcʌntʼañob i chaʼan tiʼ tojlel yañoʼ bʌ (Juan 4:22). Tsaʼ bʌ i mele jiñʌch tsiʼ cʌntesayob chaʼan miʼ cʼuxbiñob tiʼ pejtelel jiñi quixtañujob (Lucas 10:27).

⁶ Jesús junlajal tsiʼ qʼuele tiʼ pejtelel jiñi quixtañujob. Maʼañic juntiquil ñumen ñuc bʌ tiʼ tojlel yambʌ. ¿Chucoch? Come Jehová tsiʼ mele jiñi quixtañujob chaʼan ili Pañimil miʼ bujtʼel jiñʌch bajcheʼ ti chajp ti chajp i colorlelob (Génesis 1:27, 28). Jin chaʼan, Jehová yicʼot Jesús maʼañic miʼ ñaʼtañob chaʼan jumpʼejl jach bajcheʼ yilal i colorlel quixtañu, jumpʼejl país o jumpʼejl jach tʼan ñumen ñuc bʌ (Hechos 10:34, 35; Apocalipsis 7:9, 13, 14). Cheʼʌch yom mi lac ñaʼtan jaʼel (Mateo 5:43-48).

7, 8. a) Jiñi xñoptʼañonbʌla, ¿majqui mi laj cʌqʼuen laj coltaya, i chucoch? b) ¿Chuqui yom mi laj cʼajtesan chaʼan jiñi i wocol tac ili pañimil?

⁷ Jiñi xñoptʼañonbʌla maʼañic mi laj cʌqʼuen laj coltaya juntiquil yumʌl ila pañimil. Cojach Jehová yicʼot i yumʌntel. ¿Chucoch? Come cojach jiñi yumʌl ñumen wem bʌ. Satanás tsiʼ yʌlʌ yaʼ ti pʌcʼʌbʌl Edén chaʼan Jehová mach jiñic wem bʌ yumʌl tiʼ tojlel wiñicob xʼixicob. Tsiʼ yʌlʌ chaʼan ñumen wen bajcheʼ miʼ chaʼlen yumʌntel, pero Dios mach cheʼiqui, i yom chaʼan jiñi quixtañujob cheʼ miʼ ñopob jaʼel. Jehová miʼ cʌy chaʼan ti jujuntiquilonla mi lac ñaʼtan majqui mi caj laj coltan bajcheʼ yumʌl. Jin chaʼan cʼajtiben a bʌ: «¿Muʼ ba c jacʼben i tʼan Jehová come mic ñop chaʼan jiñʌch ñumen wem bʌ yumʌl? ¿Muʼ ba c ñop chaʼan cojach i yumʌntel Dios mi caj i jisan tiʼ pejtelel jiñi wocol?  ¿O muʼ ba c ñaʼtan chaʼan mach cʼʌñʌlic miʼ yumañonla Dios?» (Génesis 3:4, 5).

⁸ Laʼ laj cʌl iliyi, cheʼ añic majqui miʼ cʼajtibeñet chuqui maʼ ñaʼtan chaʼan jumpʼejl partido político o yambʌ organización lajal bʌ bajcheʼ jiñi, ¿chuqui mi caj a jacʼ? Yom mi laj cʼajtesan chaʼan cojach i yumʌntel Jehová miʼ mejlel i jisan i wocol ili pañimil yicʼot jiñi toʼol ticʼlʌntel, anquese añʌch yomoʼ bʌ i mel chuqui toj yicʼot yom bʌ i coltan jiñi quixtañujob. Jin chaʼan cojach mi laj cʌqʼuen laj coltaya Jehová. Mi mach cheʼic miʼ mejlel, yaʼ ti congregación miʼ yujtel cabʌl tʼox bʌ.

9. a) ¿Chuqui ti wocol tsaʼ ujti yaʼ ti congregación chaʼan Corinto? b) ¿Chuqui tsiʼ sube Pablo jiñi xñoptʼañob?

⁹ Cheʼ ti ñaxam bʌ siglo tsaʼ ujti jumpʼejl wocol ti congregación yaʼ ti tejclum Corinto. An xñoptʼañob tsaʼ bʌ cajiyob ti leto come jujuntiquil tsaʼ caji i yʌlob chaʼan añob tiʼ tojlel Pablo, yañoʼ bʌ ti Apolos, yañoʼ bʌ ti Cefas (Pedro) i yañoʼ bʌ tiʼ tojlel Cristo. Cheʼ bʌ Pablo tsiʼ yubi woli (yʌquel) bʌ ti ujtel, tsiʼ wen cʼojoʼta i bʌ. Ili jiñʌch jumpʼejl tsʌts bʌ wocol come i muchʼtʌlel jiñi congregación ti Corinto tsaʼ ochi ti wocol. Jin chaʼan Pablo tsiʼ subeyob: «Mach mi laʼ tʼox laʼ bʌ». Cheʼ jaʼel, tsiʼ subeyob chaʼan yom temel miʼ yajñelob yicʼot chaʼan yom ‹jumpʼejl jach i ñaʼtʌbal› miʼ yajñelob. Ti ili ora yom mi lac jacʼ jaʼel ili ticʼojel. Mach yomic an tʼox bʌ yaʼ ti congregación (1 Corintios 1:10-13; pejcan Romanos 16:17, 18).

10. ¿Chuqui yom i yʌl Pablo cheʼ bʌ tsiʼ laja jiñi bombiloʼ bʌ bajcheʼ chocbiloʼ bʌ majlel ti yambʌ país?

¹⁰ Ti jumpʼejl bʌ qʼuin, Pablo tsiʼ cʼajtesʌbe jiñi xñoptʼañob bombiloʼ bʌ chaʼan jiñobʌch muʼ bʌ caj i majlelob ti panchan yicʼot chaʼan mach jin jach yom miʼ yʌcʼob i ñaʼtʌbal ti «chuqui jach an ti pañimil» (Filipenses 3:17-20). * (Pejcan jiñi nota.) Tsiʼ subeyob jaʼel chaʼan lajalobʌch bajcheʼ jiñi chocbiloʼ bʌ tilel tiʼ wenta Dios yicʼot Cristo. Cheʼ bʌ juntiquil miʼ chojquel majlel ti yambʌ país (embajador), maʼañic miʼ yotsan i bʌ ti jiñi wocol tac mi jiñic ti política am bʌ i chaʼan jiñi país. Cheʼ lajal jaʼel, jiñi bombiloʼ bʌ maʼañic miʼ yotsañob i bʌ tiʼ wocol tac yicʼot tiʼ política ili pañimil (2 Corintios 5:20). Jiñi xñoptʼañob añoʼ bʌ i pijtaya chaʼan miʼ chumtʌlob wʌʼ ti Pañimil, maʼañic miʼ yotsañob i bʌ jaʼel tiʼ wocol tac ili mulawil. Cojach miʼ yʌqʼueñob i coltaya jiñi i yumʌntel Dios.

11, 12. a) Mi com laj cʌqʼuen laj coltaya i yumʌntel Dios, ¿chuqui mach bʌ yomic mi lac wis ñaʼtan? b) ¿Bajcheʼ yilal tsiʼ qʼuele junmojt quixtañujob juntiquil hermana? c) ¿Chuqui tsiʼ colta jiñi hermana chaʼan miʼ cʌy i ñaʼtan mach bʌ weñic tiʼ tojlel yañoʼ bʌ?

¹¹ Cabʌl quixtañu lajaloʼ bʌ historia i chaʼan, i cultura yicʼot i tʼan, jin jach utsʼat miʼ qʼuelob i bʌ. Jin chaʼan wen ñuc miʼ yubiñob i bʌ chaʼan i país. Pero mach yomic mi lac ñaʼtan chaʼan ñumen la cujil bajcheʼ jiñi yañoʼ bʌ, yom mi laj cʌntan lac bʌ. Mi cheʼ mi lac ñaʼtan bajcheʼ jiñi, yom mi laj qʼuextan lac pensar. Ili mi caj i coltañonla chaʼan maʼañic mi laj cotsan lac bʌ ti chuqui jach. ¿Chuqui miʼ mejlel i coltañonla laj qʼuextan lac pensar?

¹² Laʼ laj qʼuel chuqui tsaʼ ujti tiʼ tojlel jiñi hermana Mirjeta. * (Qʼuele jiñi nota.) Tsiʼ yila pañimil ti jiñi país am bʌ i cʼabaʼ ti wajali bajcheʼ Yugoslavia. Tsaʼ coli ti jumpʼejl tejclum baqui jiñi quixtañujob miʼ wen tsʼaʼleñob jiñi chʼoyoloʼ bʌ ti Serbia. Pero tsiʼ cʌñʌ chaʼan Jehová maʼañic miʼ yʌl chaʼan an jach junmojt quixtañu ila ti pañimil ñumen ñucoʼ bʌ, i Satanás yom chaʼan miʼ tsʼaʼleñob i bʌ. Tsiʼ chaʼle wersa chaʼan miʼ qʼuextan i pensar. Pero cheʼ bʌ tsaʼ caji guerra ti jiñi país, mach utsʼatic tsaʼ bʌ caji i chaʼ ubin tiʼ tojlel jiñi serbiojob. Mach wis yomic i subeñob jiñi wen tʼan. Tsiʼ cʼajtibe i coltaya Jehová chaʼan miʼ cʌy i ñaʼtan mach bʌ weñic tiʼ tojlel yañoʼ bʌ come yujil chaʼan mach weñic. Cheʼ jaʼel, tsiʼ cʼajtibe chaʼan miʼ mejlel ti ochel bajcheʼ precursora. Jiñi hermana miʼ yʌl chaʼan wen coltʌbil i chaʼan jiñi subtʼan. Jiñi mach bʌ weñic miʼ ñaʼtan tsaʼ caji ti jilel majlel come miʼ chaʼlen wersa i lajin i cʼuxbiya Jehová cheʼ miʼ chaʼlen subtʼan.

13. a) ¿Chuqui tsaʼ ujti tiʼ tojlel jiñi hermana Zoila? b) ¿Bajcheʼ yubil tsiʼ yubi? c) ¿Chuqui miʼ cʌntesañonla chaʼan tsaʼ bʌ ujti tiʼ tojlel?

 ¹³ Juntiquil hermana chumul bʌ ti México, i cʼabaʼ Zoila, tsaʼ majli ti chumtʌl ti Europa. Yaʼ tiʼ congregación an hermanojob chʼoyoloʼ bʌ ti yan tac bʌ tejclum i chaʼan América Latina. Miʼ yʌl chaʼan an muʼ bʌ i wen wajleñob jiñi i país, i costumbre yicʼot jiñi música tac am bʌ ti jiñi país. Miʼ wen michʼesan bajcheʼ jiñi. Pero tsiʼ cʼajtibe i coltaya Jehová chaʼan maʼañic miʼ yubin i bʌ bajcheʼ jiñi. ¿Chuqui miʼ cʌntesañonla tsaʼ bʌ ujti tiʼ tojlel Zoila? Chaʼan tajol an wocol bʌ miʼ mejlel i ticʼob bajcheʼ yubil miʼ yubiñob cheʼ bʌ an majqui miʼ taj ti tʼan i país. Jin chaʼan, maʼañic baqui ora yom mi la cʌl o mi lac mel muʼ bʌ i mejlel i yʌcʼ ti ñaʼtʌntel chaʼan junmojt quixtañu ñumen ñuc bajcheʼ jiñi yañoʼ bʌ. Mach la comic miʼ yujtel tʼox bʌ ti congregación mi jiñic tiʼ tojlel mach bʌ xñoptʼañobic (Romanos 14:19; 2 Corintios 6:3).

14. ¿Chuqui mi caj i coltañet chaʼan maʼ qʼuel jiñi yañoʼ bʌ cheʼ bajcheʼ miʼ qʼuel Jehová?

¹⁴ Jiñi xñoptʼañonbʌla i chaʼan Jehová juntemel añonla tiʼ pejtelel pañimil. Jin chaʼan, mach yomic mi lac ñaʼtan chaʼan ñumen wen jumpʼejl país o jumpʼejl tejclum bajcheʼ yan tac bʌ. Tajol jiñi lac familia o yan tac bʌ quixtañujob tsiʼ cʌntesayoñobla chaʼan yom mi laj cʼuxbin jiñi lac país. Tajol tsʼitaʼ anto chuqui mach bʌ utsʼatic mi laj cubin tiʼ tojlel jiñi quixtañujob chʼoyoloʼ bʌ ti yambʌ país, yʌñʌloʼ bʌ i cultura, yujiloʼ bʌ yambʌ tʼan o i colorlel i pʌchʌlelob. Mi cheʼ woli a ñusan, ¿chuqui mi caj i coltañet chaʼan maʼañix maʼ ñaʼtan bajcheʼ jiñi? Yom maʼ ñaʼtan bajcheʼ yilal miʼ qʼuel Jehová jiñi ñuc bʌ miʼ yubiñob i bʌ chaʼan i país yicʼot tiʼ tojlel yañoʼ bʌ. Cheʼ mi caj a pejcan Biblia ti a bajñelil o yicʼot a familia, sʌclan temaj tac muʼ bʌ i taj ti tʼan chaʼan jiñi. Cʼajtiben Jehová chaʼan miʼ coltañet a qʼuel jiñi yañoʼ bʌ cheʼʌch bajcheʼ miʼ qʼuel (pejcan Romanos 12:2).

15, 16. a) ¿Bajcheʼ yilal miʼ qʼueloñobla jiñi yañoʼ bʌ cheʼ yʌñʌlonla? b) ¿Bajcheʼ miʼ mejlel i coltañob i yalobil jiñi tatʌlob chaʼan xucʼulob ti Jehová?

¹⁵ Come mucʼʌch lac jacʼ chuqui miʼ subeñonla Jehová, jiñi lʌcʼʌl bʌ chumulob laj quicʼot, lac familia o lac piʼʌloʼ bʌ ti eʼtel (troñel) o ti clase miʼ cʼotel  i qʼuelob chaʼan mach lajaloñicla bajcheʼ yañoʼ bʌ (1 Pedro 2:19). Jesús tsiʼ yʌlʌ chaʼan an muʼ bʌ caj i tsʼaʼleñoñobla tiʼ caj yʌñʌlonla. Pero yom cʼajal lac chaʼan, yonlel jiñi quixtañu mach yujilobic chaʼan i yumʌntel Dios. Jin chaʼan, maʼañic miʼ cʼotel i ñaʼtañob chucoch ñuc i cʼʌjñibal chaʼañonla cheʼ cojach mi laj cʌqʼuen laj coltaya jiñi yumʌl.

¹⁶ Mi xucʼul la com ajñel la quicʼot Jehová, yom mi lac chaʼlen wersa lac chʌn jacʼben i tʼan anquese chuqui tac jach mi lac subentel o miʼ melob jiñi yañoʼ bʌ (Daniel 3:16-18). Tajol jiñi xcolelob wocol miʼ yubiñob cheʼ yom yʌñʌlob. An mucʼoʼ bʌ ti bʌqʼuen cheʼ maʼañic miʼ chaʼleñob ti saludar jiñi bandera o cheʼ maʼañic miʼ jacʼob i mel chuqui miʼ subentelob chaʼan tiʼ tojlel i país. Jin chaʼan, jiñi tatʌlob yom miʼ coltan i yalobilob chaʼan miʼ pʌsob i chʼejlel yaʼ ti escuela. ¿Bajcheʼ? Ti jiñi chʼujutesaya ti familia miʼ mejlel laʼ wʌl bajcheʼ yilal miʼ qʼuel Jehová tiʼ pejtelel jiñi. Cheʼ jaʼel, miʼ mejlel laʼ pʌsben bajcheʼ miʼ mejlel i tsictesañob i ñopbal ti tsiquil yicʼot ti wen jach (Romanos 1:16). Mi cʼʌñʌlʌch, mi laʼ mejlel ti tʼan yicʼot jiñi maestrojob chaʼan mi laʼ tsictesʌben chuqui mi lac ñop.

17. a) ¿Chuqui mach bʌ yomic mi lac ñaʼtan? b) ¿Chucoch mach yomic mi lac wersa al chaʼan ñumen wen chuqui la cujil melol?

¹⁷ I tilelʌch cheʼ mi lac mulan jiñi bʌlñʌcʼʌl, jiñi tʼan, jiñi teʼel tac yicʼot costumbre tac am bʌ yaʼ baqui chumulonla. Pero mach yomic mi lac ñaʼtan chaʼan ñumen wen muʼ bʌ lac mulan joñonla cheʼ bajcheʼ jiñi muʼ bʌ i mulan yañoʼ bʌ. ¿Chucoch? Come ti chajp ti chajp tsaʼ bʌ i mele Jehová chaʼañʌch miʼ yʌqʼueñonla lac tijicñʌyel (Salmo 104:24; Apocalipsis 4:11). Jin chaʼan, maʼañic i cʼʌjñibal cheʼ mi lac wersa al chaʼan ñumen wen chuqui la cujil bʌ melol joñonla.

18. ¿Chuqui mi lac taj cheʼ bʌ mi laj qʼuel yañoʼ bʌ cheʼ bajcheʼ miʼ qʼuel Jehová?

¹⁸ Jehová yom chaʼan majqui jach miʼ mejlel i cʌn, miʼ chʼujutesan yicʼot miʼ chumtʌlob tiʼ pejtelel ora (Juan 3:16; 1 Timoteo 2:3, 4). Jin chaʼan yom mi lac ñʌchʼtan muʼ bʌ i ñaʼtan la quermañojob. Mi maʼañic tiʼ contra muʼ bʌ i yʌl Jehová, mucʼʌch i mejlel lac chʼʌmbeñob ti ñuc anquese mach lajalic bajcheʼ muʼ bʌ lac ñaʼtan. Mi cheʼʌch mi lac mel, mi caj lac ñumen tajben i wenlel laj cuxtʌlel, ñumen tijicña mi caj lac ñusan yicʼot ñʌchʼʌl mi caj la cajñel la quicʼot la quermañojob. Bajcheʼ tsaʼix laj qʼuele, cojach mi laj coltan Jehová yicʼot i yumʌntel. Jin chaʼan, maʼañic mi laj cotsan lac bʌ tiʼ wocol tac ili pañimil, maʼañic mi lac pʌs chaʼan ñuc mi laj cubin lac bʌ yicʼot chaʼan mi lac lajeʼ lac bʌ tiʼ tojlel yañoʼ bʌ. Yom tijicña mi laj cubin lac bʌ yicʼot Jehová come miʼ pʌsbeñonla chaʼan mi laj cʼuxbin jiñi ñʌchʼtʌlel yicʼot chaʼan yom pecʼonla. Mi caj la cubin lac bʌ cheʼ bajcheʼ jiñi tsaʼ bʌ i tsʼijbu Salmo 133:1, muʼ bʌ i yʌl: «Utsʼatax cheʼ tijicña miʼ tem ajñelob hermanojob».