«Cheʼ bʌ maxto jalic tsaʼ chʌmi c papá, jiñi c ñoxiʼal tsiʼ subeyon chaʼan añix yicʼot yambʌ xʼixic. Ti jumpʼejl bʌ qʼuin maʼañic tsiʼ subu i bʌ, tsiʼ chʼʌmʌ majlel i pislel i tsiʼ cʌyʌyon yicʼot chaʼtiquil calobil.» Anquese Janet tsiʼ taja jumpʼejl eʼtel (troñel), mach lets miʼ tojtʌl i maʼañic miʼ jastiyel chaʼan miʼ mʌn chuqui i cʼʌjñibal tac bʌ. Pero mach cojach an i wocol chaʼan taqʼuin. Janet tsiʼ chaʼ alʌ: «Tsaʼ c wen cʼojoʼta (pensali) chaʼan bajcheʼ mi caj c mel jiñi queʼtel tic bajñelil. Tic mul tsaʼ cubi cheʼ maʼañic mic mejlel cʌqʼuen chuqui yomob calobil bajcheʼ yambʌ tatʌlob. Muʼto c chʌn cʼojoʼtan ili ora chaʼan bajcheʼ yilal mij qʼuejlel lojon ti yañoʼ bʌ. ¿Muʼ ba i ñaʼtañob chaʼan maʼañic tsac chaʼle wersa chaʼan maʼañic miʼ jejmel c ñujpuñel?».

Jiñi oración jiñʌch tsaʼ bʌ i colta Janet chaʼan miʼ taj i ñʌchʼtʌlel i pusicʼal, chaʼan ñumen lʌcʼʌl miʼ yubin i bʌ ti Dios. «Ñumen mach tijicñayic mi cubin cheʼ ti acʼʌlel. Cheʼ ñʌchʼʌlix jiñi pañimil, cojach mij cubin bajcheʼ yubil miʼ tilel tic pensar mach bʌ wentaquic. Cheʼ mic mel oración yicʼot mic pejcan jiñi Biblia miʼ coltañon chaʼan mic mejlel ti wʌyel. Jiñi texto muʼ bʌ c wen mulan jiñʌch Filipenses 4:6 yicʼot 7 muʼ bʌ i yʌl: ‹Mach mi laʼ chaʼlen tsic pusicʼal pero ti pejtelel chuqui tac miʼ yujtel subenla Dios chuqui tac yom ti oración. Chʌn cʼajtibenla. Subenla wocolix i yʌlʌ. Cheʼ jiñi, i ñʌchʼtʌlel laʼ pusicʼal chʼoyol bʌ ti Dios mi caj i cʌntan laʼ pusicʼal yicʼot laʼ ñaʼtʌbal›. An c mele oración tsʼʌcʌl jumpʼejl acʼʌlel, i qʼuelbil c chaʼan bajcheʼ Jehová miʼ yʌqʼueñon c ñʌchʼtʌlel.»

Yaʼ ti bujtʌl, Jesús tsiʼ yʌlʌ tʼan tac muʼ bʌ i wen pʼʌtʼesañonla cheʼ an chuqui mi laj cʼojoʼtan. Tsiʼ yʌqʼueyonla i tʼan: «Yujil laʼ Tat chuqui anto yom laʼ chaʼan» (Mateo 6:8). Pero yom mi laj cʼajtiben. Mi lac ñumen lʌcʼtiyel ti Dios cheʼ mi lac mel oración. Jiñi Biblia miʼ yʌl: «Mi caj i lʌcʼtesan i bʌ baʼ añetla» (Santiago 4:8).

 Jiñi oración mach cojach i cʼʌjñibal chaʼan mi lac suben Jehová lac wocol. Come ‹jiñʌch muʼ bʌ i ñʌchʼtan jiñi oración›, miʼ cʌntan jiñi muʼ bʌ i ñopob (Salmo 65:2). Jin chaʼan, Jesús «ti cʌntesa chaʼan miʼ chaʼleñob oración tiʼ pejtelel ora. Mach yomic miʼ lujbʼañob» jiñi xcʌntʼañob i chaʼan (Lucas 18:1). Dios mi caj i jacʼbeñonla cheʼ maʼañic mi laj cʌy laj cʼajtiben i tojʼesaya yicʼot i coltaya. Yom i coltañonla yicʼot mucʼʌch caj i mel, mach yomic mi lac ñaʼtan chaʼan maʼañic. Mi maʼañic mi laj cʌy lac mel oración, woli (choncol) lac pʌs chaʼan añʌch lac ñopoñel (chʼujbiya) ti Dios (1 Tesalonicenses 5:17).

Chaʼan an lac ñopoñel ti Dios yom mi lac wen cʌn (Juan 17:3). Cheʼ mi lac pejcan jiñi Biblia, mi laj cʌn bajcheʼ yilal yicʼot chuqui miʼ ñaʼtan. Cheʼ jaʼel miʼ cʼotel laj cʌn chaʼan miʼ qʼuelonla ti ñuc ti jujuntiquil. Pero mach jasʌlic miʼ tsʼitaʼ laj cʌñʌyix Dios. Yom miʼ cʼotel laj cʌn bajcheʼ juntiquil la camigo wen lʌcʼʌl bʌ la quicʼot. La cujil chaʼan mach ti orajic mi lac taj wem bʌ la camigo, chaʼan mi lac taj miʼ ñumel cabʌl ora. Cheʼ jaʼel, miʼ ñumen pʼʌtʼan jiñi lac ñopoñel ti Dios cheʼ mi lac ñumen cʌn majlel yicʼot mi lac mel muʼ bʌ i mulan, i jiñʌch baqui mi laj qʼuel chaʼan mucʼʌch i coltañonla (2 Corintios 10:15; Juan 8:29). Jiñʌch tsaʼ bʌ i colta Janet iliyi.

Janet tsiʼ yʌlʌ: «Cheʼ mij qʼuel bajcheʼ an i cʌntayon lojon Jehová miʼ ñumen colel jiñi c ñopoñel. Maʼañix c loqʼuib yilal ti jiñi toʼol ticʼlʌntel tsaʼ bʌ ujti tic tojlel lojon. Cheʼ miʼ yujtel c mel cabʌl oración, mij qʼuel bajcheʼ miʼ tojʼesan Jehová jiñi c wocol ti junchajp maʼañic bʌ ñaʼtʌbil c chaʼan. Cheʼ mic mel oración chaʼan mi cʌqʼuen wocolix i yʌlʌ, mij cʼajtesan chuqui melbil i chaʼan tic tojlel. An i tajol tiʼ yorajlel miʼ cʼotel i coltaya cheʼ añon ti wocol. Cheʼ jaʼel, an i yʌqʼueyon wem bʌ camigojob, isujm bʌ xñoptʼañob chajpʌbiloʼ bʌ chaʼan miʼ coltañoñob yicʼot miʼ pʌsbeñob wem bʌ ejemplo jiñi calobilob. *

«Wʌle cujilix chucoch miʼ yʌl Jehová yaʼ ti Malaquías 2:16 chaʼan miʼ tsʼaʼlen jiñi divorcio. Juntiquil muʼ bʌ i piʼlen yambʌ mach bʌ i piʼʌlic, woli (yʌquel) i ticʼlan jiñi i piʼʌl ñujpuñem bʌ yicʼot. Anquese ñumeñix cabʌl jabil, an i tajol mi cubin c chʼijiyemlel. Mi cheʼ mi cubin c bʌ bajcheʼ jiñi, mij coltan yañoʼ bʌ i miʼ ñajʌyel c chaʼan jiñi wocol.» Janet cheʼʌch tsiʼ mele bajcheʼ miʼ yʌl jiñi Biblia, maʼañic miʼ ñajtʼesan i bʌ ti yañoʼ bʌ (Proverbios 18:1). *

Janet tsiʼ chaʼ alʌ: «Muʼ bʌ i ñumen aqʼueñon c tijicñʌyel jiñʌch cheʼ miʼ cʼotel j cʌn chaʼan Dios ‹i tatʌch jiñi mebaʼ alʌlob. I yaj coltaya mebaʼ xʼixicob›. Jehová maʼañic baʼ ora mi caj i bajñel cʌyonla i mach lajalic bajcheʼ tsiʼ mele c ñoxiʼal» (Salmo 68:5). Janet yujil chaʼan maʼañic baqui ora mi caj i ñoponla Dios yicʼot jumpʼejl wocol, miʼ yʌqʼueñonla lac ñaʼtʌbal yicʼot «jiñi ñuc bʌ lac pʼʌtʌlel» chaʼan mi lac lʌtʼ jiñi laj cʼojol (Santiago 1:5, 13; 2 Corintios 4:7).

Pero ¿ixcu mi woli laj cʼojoʼtan chaʼan an ti wocol laj cuxtʌlel?