Paul, am bʌ i yijñam yicʼot chaʼtiquil i yalobil, tsiʼ yʌlʌ: «Cheʼ tsaʼ wen cʼʌjqui i tojol tiʼ pejtelel chuqui an yaʼ tic país, maʼañix cabʌl bʌlñʌcʼʌl i tsaʼ ñumen cʼʌjqui i tojol. Lʌcʼʌl tiʼ pejtelel ora mic jalijel cheʼ mic majlel ti mʌñoñel, mic tsoleʼ lon c bʌ chaʼan mic pijtan, i cheʼ miʼ cʼotel i yorajlel, tsaʼix jili. Jiñi wiñicob xʼixicob (quixtañujob) miʼ pucʼ pucʼ yajlelob ti calle tiʼ caj jiñi wiʼñal. Ti ora tsaʼ caji ti wen cʼʌjquel i tojol jiñi i cʼʌjñibal tac bʌ lac chaʼan, ti wiʼil tsaʼ to ñumen cʼʌjqui jinto maʼañix i cʼʌjñibal tsaʼ cʌyle jiñi taqʼuin muʼ bʌ i cʼʌjñel yaʼi. Jiñi c taqʼuin am bʌ yaʼ ti banco, jiñi c seguro yicʼot jiñi c pensión, tsac sʌtʌ tiʼ pejtelel».

Paul yom miʼ wen ñaʼtan chuqui mi caj i mel chaʼan jiñi i familia miʼ lʌtʼ jiñi wocol (Proverbios 3:21). Tsiʼ yʌlʌ: «Cujil eʼtel chaʼan luz. Pero tsaʼ caji c mel baqui jach bʌ eʼtel (troñel) mic subentel anquese mach letsic mic tojtʌl. An muʼ bʌ i yʌqʼueñoñob bʌlñʌcʼʌl o chuqui jach tac miʼ cʼʌjñel ti otot chaʼan miʼ tojoñob. Cheʼ miʼ yʌqʼueñoñob chʌmpʼejl xapom (xapun), mic chʼʌm cʌytʌl chaʼpʼejl i mic chon jiñi yambʌ. Xucʼu xucʼul tsaʼ c tempa 40 alʌ mut i tsaʼ j cosa. Tsaʼ c choño cheʼ bʌ tsaʼ coli tiʼ pejtelel i tsaʼ c mʌñʌ yambʌ 300. Ti wiʼil, tsaʼ j qʼuexe 50 mut ti chaʼcujch harina melbil bʌ ti ixim am bʌ 50 kilo ti jujuncujch. Jiñi chaʼcujch harina cabʌl ora tsiʼ yʌcʼʌ chaʼan miʼ mejlel cʌqʼuen i bʌl i ñʌcʼ c familia yicʼot yañoʼ bʌ».

Paul yujil jaʼel chaʼan jiñi ñumen wem bʌ jiñʌch cheʼ miʼ ñop ti Dios. Cheʼ bʌ mi lac jacʼben i tʼan, miʼ coltañonla. Jesucristo tsiʼ yʌlʌ chaʼan mach yomic mi laj cʼojoʼtan (pensalin) chaʼan bajcheʼ mi caj lac taj i cʼʌjñibal bʌ lac chaʼan. Miʼ subeñonla: «Yujil laʼ Tat pejtelel chuqui tac yom laʼ chaʼan» (Lucas 12:29-31).

Pero Satanás, jiñi ñumen ñuc bʌ i contra Dios, an i yʌqʼue i ñaʼtan jiñi quixtañujob chaʼan jiñi chubʌʼañʌl tac jiñʌch ñumen i cʼʌjñibal bʌ. Jiñi quixtañujob maʼañix miʼ ñaʼtañob chuqui yom miʼ melob  chaʼan miʼ tajob chuqui yom, i miʼ jisañob i bʌ tiʼ tajol jiñi mach bʌ wen añic i cʼʌjñibal. An muʼ bʌ i chaʼleñob cabʌl bet i cheʼʌch miʼ cʼotel i cʌñob chaʼan «jiñi xbeta taqʼuin miʼ yochel ti toʼol eʼtel yaʼ baʼ tsiʼ beta taqʼuin» (Proverbios 22:7).

An muʼ bʌ i yajcañob i mel mach bʌ weñic. Paul tsiʼ yʌlʌ: «Yonlel j cʌñʌyoʼ bʌ tsiʼ cʌyʌyob i familia yicʼot i yamigojob chaʼan miʼ majlel i sʌclañob cabʌl i chubʌʼan ti yambʌ país. Maʼañic tsaʼ mejli i tajob i yeʼtel come maʼañobic i jun ti jiñi país. An i tajol miʼ wʌyelob ti calle o miʼ mujcuñob i bʌ chaʼan maʼañic miʼ chujquelob ti policía. Maʼañic tsiʼ cʌyʌyob i bʌ chaʼan miʼ coltʌntelob ti Dios. Pero yicʼot i coltaya Dios, juntemel tsaʼ c chaʼle wersa quicʼot c familia chaʼan mic ñusan lojon jiñi wocol».

Paul miʼ bej al: «Jesús tsiʼ yʌlʌ: ‹Mach mi laʼ mel laʼ pusicʼal chaʼan jiñi muʼto bʌ i yujtel ijcʼʌl. Yaʼto tsiquil chuqui miʼ yujtel ijcʼʌl. Jasʌl jach mi lac ñaʼtan ili wocol am bʌ wʌle›. Jin chaʼan, tiʼ pejtelel ora mij cʼajtiben Dios chaʼan miʼ yʌqʼueñon lojon chuqui mi lon j cʼux ti jiñi bʌ qʼuin. Dios tiʼ tsʼʌctesa i tʼan, cheʼ bajcheʼ tsiʼ yʌlʌ Jesús. Anquese mach tiʼ pejtelelic ora an muʼ bʌ c ñumen mulan lojon. Ti jumpʼejl bʌ qʼuin woli c tsoleʼ c bʌ yaʼ baqui an aj mʌñoñelob anquese mach cujilic chuqui woli (choncol) ti chojñel yaʼ ti tienda. Cheʼ bʌ tsaʼ j qʼuele, woli bʌ ti chojñel jiñʌch yogur. I joñon maʼañic mic wis mulan jiñi. Pero bʌlñʌcʼʌlʌch jaʼel, i jiñʌch tsaʼ bʌ j cʼuxu lon ti jiñi acʼʌlel. Mic wen aqʼuen wocolix i yʌlʌ Dios come jiñi c familia maʼañic baqui ora tsaʼ wʌyiyob yicʼot i wiʼñal». *

«Ili ora weñix chumulon lojon. Jiñi tsaʼ bʌ c ñusa lojon, tsiʼ pʌsbeyon lon chaʼan cheʼ mi lac ñop ti Jehová, miʼ coltañonla chaʼan maʼañic chuqui mi lac wen cʼojoʼtan. * Cheʼ mucʼʌch lac mel chuqui yom, tiʼ pejtelel ora mi caj i coltañonla. Tsaʼix j qʼuele lojon chaʼan i sujmʌch jiñi Salmo 34:8, muʼ bʌ i yʌl: ‹Ñopola utsʼat lac Yum. Ñaʼtanla, tijicña jiñi muʼ bʌ i taj i coltʌntel ti lac Yum›. Jin chaʼan, maʼañix mic wen cʼojoʼtan lojon mi tsaʼ c taja lon yambʌ wocol tiʼ caj taqʼuin.»

«I cʼʌjñibal bʌ i chaʼan jiñi wiñicob xʼixicob jiñʌch bʌlñʌcʼʌl, mach jiñic eʼtel yicʼot taqʼuin. Jin chaʼan, comix lojon miʼ cʼotel i yorajlel chaʼan miʼ tsʼʌctiyel ili tʼan: ‹Mi caj i yʌcʼ cabʌl i cuch jiñi cholel›. Ili ora, tijicña mi caj cajñel lojon cheʼ añʌch chuqui mi lon j cʼux yicʼot chuqui mi lon c xoj. Jiñi Biblia miʼ subeñonla: ‹Mach mi laʼ tsʌjyun taqʼuin. Yom tijicña mi laʼ wajñel yicʼot chuqui tac an laʼ chaʼan. Come Dios tsiʼ yʌlʌ: «Maʼañic mi caj a cʌytʌl ti mebaʼ. Maʼañic mi caj j cʌyet»›. * Ili tʼan miʼ wen coltañonla.»

Cheʼ bajcheʼ tsiʼ mele Paul yicʼot i familia, yom wen pʼʌtʌl lac ñopoñel (chʼujbiya) ti Dios yicʼot mi lac jacʼ bajcheʼ miʼ subeñonla (Génesis 6:9). Cheʼ mi lac ñusan jumpʼejl wocol chaʼan taqʼuin ili ora o ti jiñi talto bʌ qʼuin, cabʌl chuqui miʼ mejlel laj cʌn tiʼ tojlel jiñi Paul yicʼot chuqui tsiʼ mele chaʼan jiñi wocol.

Pero ¿ixcu mi lac familia woli (yaquel) bʌ laj cʼojoʼtan?