Cʼajtiya tac chaʼan bʌ jiñi Biblia
¿Chucoch an jontolil?
¿Majqui tsaʼ bʌ i ñopo chaʼan Jesús miʼ mel chuqui mach bʌ weñic? (MATEO 4:8-10)
¿Am ba majqui yom sujtel ti jontol bʌ o ti juntiquil xlot? Maʼañic. Cheʼ jiñi, ¿chucoch cabʌl ticʼlʌntel yicʼot i melol jontolil? Chʼijiyemtic jax cheʼ mi laj qʼuel ti jujumpʼejl qʼuin yaʼ ti noticia mach bʌ wentaquic woli ti ujtel. ¿Majqui woliʼ ñijcan jiñi quixtañujob tiʼ melol jontolil? (Pejcan 1 Juan 5:19.)
¿Cheʼʌch ba tsiʼ meleyonla Dios chaʼan mi lac mel chuqui mach bʌ weñic? Maʼañic. Dios tsiʼ meleyonla tiʼ yejtal. Cheʼ tsiʼ meleyonla, tsiʼ yʌcʼʌ chaʼan miʼ mejlel lac pʌs jiñi cʼuxbiya am bʌ i chaʼan (Génesis 1:27; Job 34:10). Pero libre tsiʼ meleyonla jaʼel chaʼan mi lac yajcan chuqui laj com lac mel. Jiñi ñaxañoʼ bʌ lac tat tsiʼ meleyob chuqui mach bʌ weñic i maʼañic tsiʼ mulayob i lajin Dios. Ti jiñi bʌ ora tsaʼ sujtiyob ti xmulil. Cheʼ bʌ tsaʼ caji i yalobilob, wʌn cheʼix tsaʼ cʌyle tiʼ tojlelob jaʼel. (Pejcan Deuteronomio 32:4, 5.)
¿Tiʼ pejtelel ba ora miʼ cajel jontolil?
Dios yom chaʼan mi lac mʌlben jiñi mach bʌ weñic miʼ tilel ti lac tojlel (Proverbios 27:11). Miʼ pʌsbeñonla bajcheʼ yom chaʼan weñonla. Tijicña mi lac mejlel ti ajñel mi mucʼʌch lac jacʼ bajcheʼ miʼ subeñonla yicʼot mi lac lajiben i melbal. Anquese ili ora maʼañic miʼ mejlel lac lajin ti toj cheʼ bajcheʼ yom. ¿Cheʼ ba miʼ cajel tiʼ pejtelel ora? (Pejcan Salmo 32:8.)
Dios an i yʌcʼʌ cheʼ an jiñi jontolil chaʼan ti lac pejtelel mi laj qʼuelben jiñi i wocolel. Pero mach tiʼ pejtelelic ora mi caj i cʌyeʼ (2 Pedro 3:7-9). Mach jalix chaʼan miʼ cajel ti bujtʼel ili Pañimil ti quixtañujob muʼ bʌ i lajiñob Dios, weñoʼ bʌ yicʼot tijicñayoʼ bʌ. (Pejcan Salmo 37:9-11.)