Alona miʼ yʌl: «Cheʼ bʌ mi cubin jiñi alarma chaʼan guerra, toj bʌcʼñejelon tic pusicʼal i mic majlel ti putsʼel ti jiñi chʼen melbil bʌ chaʼan maʼañic miʼ tajon lojon jiñi bomba cheʼ bʌ miʼ choc jubel jiñi avión tac. Pero chʌn anto c bʌqʼuen anquese yaʼix añon yaʼi. I ñumento mi mach yaʼic añon ti cotot ti jiñi bʌ ora come maʼañic baqui mic mujcun c bʌ. Jumpʼejl bʌ qʼuin woli (choncol) c xʌn majlel ti calle, tsaʼ caji i sub i bʌ jiñi alarma. Tsaʼ cajiyon ti uqʼuel i wocol tsaʼ caji c jap icʼ. Tsaʼ wen ñumi ora chaʼan tijicña tsaʼ chaʼ caji cubin c bʌ. Pero tsiʼ chaʼ subu i bʌ jiñi alarma».

Mach cojach jiñi chumuloʼ bʌ baqui miʼ wen ujtel guerra miʼ yubiñob i bʌ bajcheʼ jiñi. Jumpʼejl ejemplo, cheʼ bʌ miʼ subentel juntiquil lac familia o la camigo chaʼan an tsʌts bʌ i cʼamʌjel, lajal bajcheʼ jumpʼejl bomba mi lac chocbentel come toj sajtel lac pusicʼal. Yañoʼ bʌ miʼ chaʼleñob cʼojol (pensal) chaʼan jiñi talto bʌ qʼuin, tajol miʼ cʼajtibeñob i bʌ: «¿Bajcheʼ yilal bʌ pañimil (mulawil) baqui miʼ cajelob ti chumtʌl jiñi la calobil yicʼot lac buts (mam)? ¿Jumpʼejl ba pañimil sʌc bʌ, baqui maʼañix guerra yicʼot cʼamʌjel?». Cheʼ jiñi, ¿chuqui yom mi lac mel cheʼ bʌ an chuqui woli (yʌquel) laj cʼojoʼtan?

Jiñi Biblia miʼ yʌl: «Jiñi cʌntesʌbil bʌ miʼ ñaʼtan chuqui bʌbʌqʼuen miʼ yujtel. Miʼ chajpan i bʌ» (Proverbios 27:12). Jiñʌch wem bʌ ticʼojel, ¿mach ba cheʼiqui? Yom mi laj cʌntan lac jol jaʼel yicʼot bajcheʼ yubil mi laj cubin, lajal bajcheʼ mi laj cʌntan laj cuxtʌlel. Jiñi jontol tac bʌ ñusaqʼuin yicʼot noticia tac baqui miʼ pʌstʌl bʌbʌqʼuen jax bʌ, miʼ ñumen  aqʼueñonla laj cʼojoʼtan lac bʌ yicʼot laj calobilob. Cheʼ mach la comic laj qʼuel cheʼ tac bʌ bajcheʼ jiñi, mach yomic i yʌl chaʼan maʼañic chuqui woli ti ujtel, woli jach laj cʌntan lac bʌ. Dios maʼañic tsiʼ mele lac pensar chaʼan mi laj cotsan chuqui bibiʼ bʌ, tsiʼ melbeyonla chaʼan mi laj cotsan chuqui toj bʌ, sʌc bʌ yicʼot chuqui uts bʌ. Mi cheʼʌch mi lac mel, Dios mi caj i «yʌqʼueñonla i ñʌchʼtʌlel lac pusicʼal» (Filipenses 4:8, 9).

Tsaʼix laj cʌñʌ, jiñi isujm bʌ lac ñopoñel (chʼujbiya) ti Dios miʼ coltañonla lac lajmesan chuqui mi laj cʼojoʼtan. Jiñi Biblia miʼ cʌntesañonla chaʼan mach yomic mi laj cʌy lac mel oración cheʼ woli lac ñusan jumpʼejl wocol (1 Pedro 4:7). Yom mi lac chʌn suben chaʼan miʼ coltañonla, chaʼan miʼ yʌqʼueñonla lac ñaʼtʌbal yicʼot miʼ yʌqʼueñonla lac chʼejlel tiʼ melol chuqui wem bʌ, i laj cujilix chaʼan mucʼʌch caj i jacʼbeñonla «chuqui jach mi laj cʼajtiben» (1 Juan 5:15).

Jiñi Biblia miʼ subeñonla chaʼan «i yum jiñi pañimil» jiñʌch Satanás, i mach jiñic Dios (Juan 12:31; 1 Juan 5:19). Cheʼ bʌ Jesús tsiʼ taja ti tʼan jiñi Diablo, isujmʌch chuqui tsiʼ yʌlʌ cheʼ bʌ tsiʼ subeyonla chaʼan yom mi laj cʼajtin: «Cʌntañon lojon ame yajlicon lojon ti jontolil» (Mateo 6:13). Jiñi oración miʼ mejlel i yʌqʼueñonla lac ñʌchʼtilel. Alona tsiʼ yʌlʌ: «Cheʼ bʌ mic chaʼ ubin jiñi alarma, mij cʼajtiben Dios chaʼan mic taj c ñʌchʼtilel. Cheʼ jaʼel, jiñi c ñoxiʼal miʼ pejcañon ti teléfono i mic tem chaʼlen lojon oración. Miʼ yʌqʼueñon c tijicñʌyel jiñi». Jin chaʼan jiñi Biblia miʼ yʌl: «Lʌcʼʌl an lac Yum tiʼ tojlel muʼ bʌ i pejcañob», cheʼʌch miʼ yujtel tiʼ tojlel jiñi muʼ bʌ i cʼajtibeñob i coltaya (Salmo 145:18).

Yaʼ ti Bujtʌl, Jesús tsiʼ sube jiñi xcʌntʼañob i chaʼan, yom miʼ cʼajtiñob: «Laʼ tilic a yumʌntel» (Mateo 6:10). I Yumʌntel Dios mi caj i jisan tiʼ pejtelel ora muʼ bʌ i yʌcʼonla ti cʼojol. Jesucristo, jiñi «Xlajmesa leto» tsaʼ bʌ yajcʌnti ti Dios, mi caj i «yujtesan guerra cʼʌlʌl tiʼ pejtelel pañimil» (Isaías 9:6; Salmo 46:9). Dios «mi caj i mel wiñicob tilemoʼ bʌ ti cabʌl lum [...]. Maʼañix mi caj i chʌn chaʼlen guerra jumpʼejl tejclum tiʼ contra yambʌ tejclum. Maʼañic mi caj i chʌn ñop guerra wiñicob». Cheʼ jaʼel, «maʼañic majch mi caj i bʌcʼtesan» (Miqueas 4:3, 4). Jiñi familia tac «mi caj i waʼchocoñob i yotot. Yaʼi mi caj i chumtʌlob. Maʼañic majch mi caj i chilbeñob. Cheʼ mi pʌcʼob tsʼusubil, mi caj i cʼuxbeñob i wut» (Isaías 65:21). Anto chuqui yambʌ miʼ cajel, «maʼañix mi juntiquil mi caj i yʌl: ‹Cʼamon›» (Isaías 33:24).

Anquese wen tsajilonla, pero an maʼañic bʌ miʼ mejlel lac mʌctan chaʼan miʼ yujtel (Eclesiastés 9:12). Tajol añonla baqui mach i wentʌlel yaʼañonla. Cheʼ bajcheʼ an laj qʼuele, tiʼ caj guerra, tiʼ caj jontolil yicʼot tiʼ caj cʼamʌjel, an chʌmeñob wiñicob xʼixicob (quixtañujob) mach bʌ añobic i mul. Pero ¿mach ba toʼol ticʼlʌntelic jiñi?

Anquese mach la cujilic jaytiquil jiñi quixtañu chʌmeñoʼ bʌ, Dios yujilʌch i mi caj i chaʼ tejchesan. Ili ora «jiñi añoʼ bʌ ti mucoñibʌl» woliʼ cʼajob i yo i añob tiʼ ñaʼtʌbal Jehová, woliʼ pijtañob chaʼan miʼ chaʼ chʼojyelob (Juan 5:28, 29). Jiñi Biblia miʼ yʌl: «Jiñi lac pijtaya, jiñʌch muʼ bʌ i tsʌts xucʼchoconla» (Hebreos 6:19). Dios tiʼ «tsictesʌbeyonla cheʼ bʌ tsiʼ teche chʼojyel Jesús» (Hechos 17:31).

Ili ora, muʼ bʌ i chaʼleñob wersa i melbeñob i yeʼtel (troñel) Dios miʼ tajob i cʼojol jaʼel. Tsaʼ bʌ i colta i lajmesañob i cʼojol jiñi Paul, Janet yicʼot Alona jiñʌch cheʼ tsiʼ sʌclayob chuqui yom bʌ melol, i coltaya Dios ti oración i cheʼ jaʼel tsiʼ ñopoyob chaʼan jiñi muʼ bʌ caj i mel ti talto bʌ qʼuin. Cheʼʌch miʼ mejlel ti ujtel ti lac tojlel, come jiñi Biblia miʼ yʌl: «Jiñi Dios muʼ bʌ i yʌqʼueñonla lac pijtaya cheʼ mi lac ñop, laʼ i bujtʼesan laʼ pusicʼal tiʼ tijicñʌyel yicʼot i ñʌchʼtilel» (Romanos 15:13).