1, 2. a) ¿Chuqui maʼ mulan a mel yaʼ ti Paraíso? (Qʼuele jiñi dibujo am bʌ tiʼ tejchibal.) b) ¿Chuqui mi caj i ñumen aqʼueñonla lac tijicñʌyel yaʼ ti Paraíso?

 JIÑI apóstol Pablo tsiʼ yʌlʌ chaʼan yom mi lac chaʼlen wersa chaʼan mi lac taj jiñi cuxtʌlel maʼañic bʌ miʼ jilel (pejcan 1 Timoteo 6:12, 19). Jiñi cuxtʌlel yaʼ ti Paraíso chaʼan i wiñicob Dios wʌʼʌch miʼ cajel ti Pañimil. Mi cheʼ miʼ cajel ti a tojlel, tajol woliyʌch (choncolʌch) a wen pijtan chumtʌl yaʼi. ¿Muʼ ba i tilel ti a pensar bajcheʼ yilal cheʼ ti jujumpʼejl sʌcʼan tijicñayet mi caj a tejchel, ti a cʼocʼlel yicʼot a ñʌchʼtʌlel? (Isaías 35:5, 6.) Ñaʼtancu bajcheʼ yilal miʼ cajel cheʼ yaʼañet a wicʼot a familia, a wamigojob yicʼot jiñi muʼ bʌ caj i chaʼ chʼojyelob (Juan 5:28, 29; Hechos 24:15). Cheʼ jaʼel, muʼto caj a tajben i yorajlel chaʼan maʼ cʌn chuqui tac jach a wom. Jumpʼejl ejemplo, miʼ mejlel a ñumen cʌn chaʼan ciencia yicʼot chaʼan maʼ cʼʌn jiñi eʼtijibʌl chaʼan música o yan tac bʌ yicʼot chaʼan miʼ mejlel a bajñel mel a wotot.

² Pero anto yambʌ muʼ bʌ i mejlel i ñumen aqʼueñonla lac tijicñʌyel. ¿Baqui tac bʌ? Junchajp mi caj i qʼuelob ti ñuc jiñi chʼujul bʌ i cʼabaʼ Jehová yicʼot cojach mi caj i jacʼbeñob i tʼan tiʼ pejtelel wiñicob xʼixicob (quixtañujob) (Mateo 6:9, 10). Yambʌ mi caj i bujtʼel ili Pañimil ti toj bʌ quixtañujob cheʼ bajcheʼ yom Jehová ti ñaxan. Cheʼ jaʼel, xucʼu  xucʼul mi caj lac sujtel majlel ti toj bʌ yicʼot mi caj i ñumen pʼʌtʼan majlel laj cʼuxbiya ti Jehová (Salmo 73:28; Santiago 4:8).

3. ¿Chucoch yom mi lac chajpan lac bʌ ili ora?

³ Mi lac ñop chaʼan tiʼ pejtelel iliyi mucʼʌch caj i tsʼʌctesan Jehová. ¿Chucoch? Come jiñi Biblia miʼ yʌl: «Pero Dios mi mejlel i mel ti pejtelel» (Mateo 19:25, 26). Pablo tsiʼ yʌlʌ chaʼan mi lac taj jiñi laj cuxtʌlel mach bʌ añic miʼ jilel yom mi lac chaʼlen wersa. Jin chaʼan, mi mucʼʌch lac ñop chaʼan tal i jilibal ti baqui jach bʌ ora yom mi lac pʌs ti bajcheʼ yilal chumulonla. Yom mi lac chajpan lac bʌ ti ili ora mi la com chumtʌl ti Paraíso. Mi caj laj qʼuel bajcheʼ.

4. Acʼʌ jumpʼejl ejemplo bajcheʼ miʼ mejlel lac chajpan lac bʌ chaʼan mi lac chumtʌl yaʼ ti Paraíso.

⁴ ¿Bajcheʼ miʼ mejlel lac chajpan lac bʌ ti ili ora chaʼan mi lac chumtʌl yaʼ ti Paraíso? Ñaʼtancu ili ejemplo. Cheʼ bʌ juntiquil mi caj i majlel ti chumtʌl ti yambʌ país, ¿bajcheʼ mi caj i chajpan majlel i bʌ? Mi caj i tech i mel majlel lajal bajcheʼ yaʼix chumul. Jumpʼejl ejemplo, tajol mi caj i tech i cʌn majlel jiñi tʼan yujiloʼ bʌ yaʼi yicʼot jiñi costumbre tac. Cheʼ jaʼel, miʼ tech i ñop i cʼux jiñi bʌlñʌcʼʌl. Cheʼ lajal jaʼel, chaʼan mi lac chumtʌl yaʼ ti Paraíso miʼ mejlel lac chajpan lac bʌ cheʼ mi lac mel chuqui yom bʌ melol lajal bajcheʼ yaʼix añonla. Mi caj laj qʼuel chaʼpʼejl uxpʼejl muʼ bʌ i mejlel lac mel.

5, 6. ¿Chucoch ili ora yom mi lac ñʌntesan lac bʌ lac jacʼben i yorganización Jehová?

⁵ Chumulonla ti jumpʼejl pañimil (mulawil) woli jach bʌ i sajcan i ñaʼtʌbal Satanás. Jumpʼejl ejemplo, yonlel miʼ ñaʼtañob chaʼan mach i cʼʌjñibalic miʼ jacʼbeñob i tʼan Dios yicʼot miʼ mejlel i melob chuqui jach yomob. ¿Chuqui ujtem chaʼan jiñi? Jiñi quixtañu añob ti wocol yicʼot mach tijicñayobic (Jeremías 10:23). Pero joñonla laj cujil chaʼan Jehová juntiquilʌch yumʌl am bʌ i cʼuxbiya. Jin chaʼan mi lac jacʼben i tʼan. Ñumen wen mi caj laj cajñel yaʼ ti Paraíso come tiʼ pejtelel jiñi quixtañu mi caj i jacʼbeñob i tʼan Dios.

⁶ Ili ora yom mi lac ñʌntesan lac bʌ ti jacʼol chuqui miʼ subeñonla i yorganización Jehová mi com lac chajpan lac bʌ chaʼan chumtʌl yaʼ ti Paraíso. ¿Chucoch? Come mi caj lac subentel chuqui yom mi lac mel yaʼ ti Paraíso chaʼan mi lac sujtesan ili Pañimil ti jumpʼejl i tʼojol jax bʌ pʌcʼʌbʌl yicʼot mi caj laj coltan i cʌñob Jehová jiñi muʼ bʌ caj i chaʼ tejchelob. Cabʌl eʼtel (troñel) mi caj lac mel. Jin chaʼan yom mi laj cʼajtiben lac bʌ: «Muqʼuic i subeñon i yorganización Jehová ti jiñi bʌ  ora chaʼan mic mel maʼañic bʌ mic mulan, ¿muʼ ba cac jacʼ yicʼot mi caj c mel tic tijicñʌyel?».

7, 8. a) ¿Chucoch yom mi lac jacʼ ti wen ili ora chuqui miʼ subeñonla jiñi organización? b) ¿Chuqui an i meleyob chaʼtiquil uxtiquil hermanojob? c) ¿Bajcheʼ yubil mi caj laj cubin lac bʌ yaʼ ti Paraíso?

⁷ Chaʼan mi lac chajpan lac bʌ ti chumtʌl yaʼ ti Paraíso, yom tijicñayonla chaʼan jiñi muʼ bʌ laj cʌqʼuentel lac mel i mi laj cʌn lac chaʼlen eʼtel yicʼot yañoʼ bʌ. Jumpʼejl ejemplo, mi lac chaʼlen wersa lac mel ti wen yicʼot lac tijicñʌyel cheʼ bʌ mi la cʌqʼuentel yambʌ eʼtel. Mi woli (yʌquel) laj cʌn lac mel ili ora bajcheʼ jiñi, mach wocolic mi caj lac mel yaʼ ti Paraíso (pejcan Hebreos 13:17). Laʼ lac ñaʼtan tsaʼ bʌ ujti cheʼ bʌ jiñi israelob tsaʼ cʼotiyob ti jiñi Lum tsaʼ bʌ wʌn Subentiyob. Mach jiñic tsiʼ yajcayob baqui mi caj i chumtʌlob. Tsaʼ subentiyob baqui (Números 26:52-56; Josué 14:1, 2). Tajol jaʼel yaʼ ti Paraíso maʼañic mi caj lac yajcan baqui mi caj lac chumtʌl. Pero mi tsaʼix laj cʌñʌ lac jacʼben i yorganización Jehová, mi caj lac melben i yeʼtel ti tijicña yaʼ ti Paraíso anquese baqui jach mi la cʌqʼuentel chaʼan mi lac chumtʌl.

⁸ Cheʼ mi lac melben i yeʼtel Dios yaʼ ti Paraíso cheʼ jiñix yumʌl jiñʌch jumpʼejl ñuc bʌ majtañʌl. Jin chaʼan, ili ora mi lac jacʼ ti wen muʼ bʌ lac subentel tiʼ yorganización. Pero tajol mi lac subentel majlel ti yambʌ tejclum chaʼan mi lac melben i yeʼtel Jehová. Jumpʼejl ejemplo, jiñi hermanojob woliyoʼ bʌ ti eʼtel wajali yaʼ ti sucursal i chaʼan Estados Unidos tsaʼ subentiyob chaʼan miʼ majlelob ti eʼtel ti yambʌ parte. I an superintendentejob i chaʼan circuito tsaʼ bʌ chojquiyob majlel jaʼel bajcheʼ precursor especial chaʼan añobix i jabilel o ti caj yambʌ i sujmlel. Ili hermanojob tiʼ pejtelel wen tijicña woliʼ melob i yeʼtel, i Jehová woliʼ yʌqʼueñob cabʌl bendición. Mi la com chaʼan Jehová miʼ yʌqʼueñonla i bendición yicʼot chaʼan tijicña mi lac chumtʌl, ¿chuqui yom mi lac mel? Yom mi laj cʼajtin laj coltaya ti Jehová, yom mi lac chaʼlen wersa tiʼ melol cheʼ bajcheʼ miʼ cʼajtibeñonla yicʼot yom tijicñayonla ti baqui jach bʌ eʼtel mi laj cʌqʼuentel (pejcan Proverbios 10:22). ¿Ixcu mi yaʼ ti Paraíso an baqui mi lac lon mulan chumtʌl pero jiñi organización yambʌ baqui mi lac subentel majlel? Mach jiñic mi caj la cʌcʼ ti ñuc baqui mi caj lac chumtʌl o jiñi eʼtel muʼ bʌ caj lac mel. Mi caj la cʌqʼuen wocolix i yʌlʌ Jehová chaʼan miʼ yʌcʼonla chumtʌl yaʼ ti Paraíso (Nehemías 8:10).

9, 10. a) ¿Chucoch tajol mi caj lac chaʼlen pijt yaʼ ti Paraíso? b) ¿Bajcheʼ mi lac pʌs chaʼan la cujil pijt ili ora?

⁹ Tajol mi caj lac chaʼlen pijt yaʼ ti Paraíso.  Jumpʼejl ejemplo, tajol mi caj laj qʼuel yañoʼ bʌ chaʼan wen tijicñayob cheʼ bʌ miʼ tejchelob i familia yicʼot i yamigojob. Pero tajol joñonla mi caj lac pijtan chaʼan miʼ tejchelob jiñi lac familia. Mi cheʼ miʼ yujtel ti lac tojlel, ¿tijicña ba la quicʼot yañoʼ bʌ i mi lac chaʼlen pijt? (Romanos 12:15.) Mi maʼañic mi lac lujbʼan lac pijtan chaʼan miʼ tsʼʌctesan jiñi albil bʌ i chaʼan Jehová ili ora, cheʼʌch mi caj lac mel jaʼel ti talto bʌ qʼuin (Eclesiastés 7:8).

¹⁰ Cheʼ bʌ miʼ ñumen tsictesʌntel jiñi i sujmlel am bʌ ti Biblia yom la cujil pijt, mi cheʼʌch mi lac mel bajcheʼ jiñi chajpʌbiloñixla chaʼan chumtʌl yaʼ ti Paraíso. ¿Woli ba lac wen tsajin ili tsictesʌbentel? Cheʼ bʌ maʼañic mi lac chʼʌmben isujm tiʼ pejtelel, ¿muʼ ba lac pʌs chaʼan añʌch lac pijt? Mi la cujilʌch pijt ili ora, mach wocolic mi caj la cubin chaʼan mi lac pʌs cheʼ bʌ an chuqui tsijib tac bʌ mi caj i subeñonla Jehová yaʼ ti Paraíso (Proverbios 4:18; Juan 16:12).

11. a) ¿Chucoch yom mi laj cʌn lac ñusʌben lac bʌ lac mul ili ora?

¹¹ Cheʼ bʌ mi lac ñusʌben i mul yañoʼ bʌ woliʼ chajpañonla chumtʌl yaʼ ti Paraíso. Ti jiñi 1,000 jab cheʼ miʼ cajel ti yumʌntel Cristo, xucʼu xucʼul mi caj lac sujtel majlel ti toj bʌ, yicʼot to jiñi muʼ bʌ caj i chaʼ tejchelob (Hechos 24:15). ¿Muʼ ba caj lac ñusʌben i mul yañoʼ bʌ yicʼot mi laj qʼuel yicʼot cʼuxbiya cheʼ bʌ miʼ melob chuqui mach bʌ weñic? Mi woli lac mel ili ora, mach wocolic mi caj lac mejlel ti tem ajñel yicʼot yañoʼ bʌ yaʼ ti Paraíso (pejcan Colosenses 3:12-14).

12. ¿Chucoch yom mi lac pʌs ili ora chaʼan cheʼʌch mi lac mel bajcheʼ miʼ cʌntesañonla Jehová?

¹² Jiñi woli bʌ i pʌsbeñonla Jehová ili ora jiñʌch yom bʌ mi lac pʌs jaʼel yaʼ ti Paraíso. ¿Chucoch? Come tajol mach tiʼ pejtelel chuqui la com mi caj lac taj yaʼ ti Paraíso. Tajol chaʼan mi lac taj yom mi lac pijtan. Yom tijicñayonla chaʼan bajcheʼ añonla i mi la cʌqʼuen wocolix i yʌlʌ Jehová. Mi choʼoñʌchla bajcheʼ jiñi, mi lac pʌs chaʼan woli lac chajpan lac bʌ chaʼan mi lac chumtʌl yaʼ ti Paraíso yicʼot chaʼan la comʌch chumtʌl yaʼ ti pañimil baqui mi caj i jacʼbentel i tʼan Jehová (Hebreos 2:5; 11:1).

13. ¿Chuqui ñumen i cʼʌjñibal bʌ lac chaʼan miʼ cajel yaʼ ti Paraíso?

¹³ Yaʼ ti Paraíso mi caj lac taj tiʼ pejtelel chuqui la com chaʼan tijicñayonla. Pero muʼ bʌ caj i ñumen aqʼueñonla lac tijicñʌyel jin cheʼ an ti la camigo Jehová (Mateo 5:3, TNM). Ñumen i cʼʌjñibal bʌ miʼ cajel chaʼañonla jiñʌch tiʼ melol i yeʼtel Jehová i mi caj i wen aqʼueñonla lac tijicñʌyel cheʼ mi lac mel (Salmo 37:4). Jin chaʼan, yom mi lac ñumen acʼ ti ñuc i melbentel i yeʼtel Jehová ili ora mi com lac chajpan lac bʌ chaʼan mi lac chumtʌl yaʼ ti Paraíso (pejcan Mateo 6:19-21).

14. ¿Chuqui miʼ mejlel i ñaʼtañob i mel jiñi xcolelob?

¹⁴ ¿Bajcheʼ miʼ mejlel lac ñumen taj lac tijicñʌyel tiʼ melol i yeʼtel Jehová? Junchajp jiñʌch cheʼ mi lac ñaʼtan chuqui com bʌ lac mel. Mi xcolelet, ñaʼtan bajcheʼ yom a cʼʌn a cuxtʌlel tiʼ melol i yeʼtel Dios. Tajol maʼ mejlel a wʌcʼ a bʌ tiʼ melol jiñi eʼtel chaʼan subtʼan tiʼ pejtelel bʌ ora. Miʼ mejlel a taj ti chajp ti chajp bajcheʼ yom melol yaʼ ti lac jun tac loqʼuem bʌ ti Biblia. a Maʼ mejlel ti tʼan jaʼel a wicʼot jiñi hermanojob am bʌ i chaʼleyob eʼtel cabʌl jabil bajcheʼ jiñi. Cheʼ maʼ cʼʌn a cuxtʌlel tiʼ melol i yeʼtel Jehová, cabʌl chuqui mi caj a cʌn muʼ bʌ caj i chajpañet chaʼan maʼ chumtʌl yaʼ ti Paraíso.

15. ¿Chuqui tac yambʌ miʼ mejlel lac mel chaʼan ñumen wen mi lac melben i yeʼtel Dios?

¹⁵ Miʼ mejlel lac ñaʼtan chuqui yom bʌ mi lac mel ti lac pejtelel chaʼan ñumen wen mi lac melben i yeʼtel Dios. Jumpʼejl ejemplo, miʼ mejlel laj cʌn yan tac bʌ bajcheʼ yom mi lac chaʼlen subtʼan. Miʼ mejlel lac ñaʼtan jaʼel bajcheʼ yom mi lac  jacʼ ti ñumen wen jiñi ticʼojel tac am bʌ ti Biblia ti laj cuxtʌlel. Miʼ mejlel lac ñop lac ñumen tojʼesan bajcheʼ mi lac pejcan ti cʼam bʌ tʼan jiñi jun, jiñi laj comentario yicʼot jiñi asignación muʼ bʌ lac taj ti tempa bʌ tac. Laʼ laj cʼajtesan mi cheʼʌch mi lac mel mi caj i coltañonla tiʼ melol i yeʼtel Dios ti lac chʼejlel yicʼot chaʼan mi lac chajpan lac bʌ chaʼan mi lac chumtʌl yaʼ ti Paraíso.

16. ¿Bajcheʼ la cujil chaʼan jiñʌch ñumen wem bʌ ti laj cuxtʌlel i melol i yeʼtel Jehová?

¹⁶ Mi woli laj cʼʌn laj cuxtʌlel chaʼan mi lac chajpan lac bʌ chaʼan mi lac chumtʌl yaʼ ti Paraíso, ¿am ba chuqui ñumen wem bʌ woli lac sʌt ili ora? Maʼañic. Tiʼ melol i yeʼtel Jehová jiñʌch jiñi ñumen wem bʌ. Mach cojach mi lac mel tiʼ caj an majqui woliʼ wersa xicʼonla o chaʼan mach la comic jilel cheʼ tiʼ jilibal ili pañimil. Mi lac ñumen tojʼan ti laj cuxtʌlel yicʼot ñumen tijicñayonla cheʼ mi lac melben i yeʼtel Dios yicʼot cheʼ i yamigojonla. Cheʼʌch tsiʼ meleyonla Jehová. Jiñi ñumen wem bʌ jiñʌch i cʼuxbiya yicʼot bajcheʼ miʼ tojʼesañonla (pejcan Salmo 63:1-3). Mi tiʼ pejtelel lac pusicʼal mi lac chʼujutesan Jehová, wen tijicñayonla. Jiñi cabʌlix bʌ jab cajel i melbeñob i yeʼtel Jehová yujilob chaʼan jiñʌch ñumen wem bʌ chaʼan laj cuxtʌlel (Salmo 1:1-3; Isaías 58:13, 14).

17. Tsictesan mi mucʼʌch caj i mejlel lac ñusan lac bʌ yicʼot laj cʼaj la co yaʼ ti Paraíso.

¹⁷ ¿Muʼ ba caj i mejlel lac ñusan lac bʌ yaʼ ti Paraíso yicʼot laj cʼaj la co? Mucʼʌch. Jehová tsiʼ meleyonla chaʼan mi lac mulan lac ñusan lac bʌ ti laj cuxtʌlel. Miʼ yʌcʼ i tʼan chaʼan mi caj i yʌqʼueñonla tiʼ pejtelel chuqui la com (Salmo 145:16; Eclesiastés 2:24). Pero laʼ laj cʼajtesan chaʼan mi jiñʌch mi lac ñumen acʼ ti ñuc cheʼ i yamigojonla Jehová, ñumen wen mi caj lac ñusan lac bʌ. Jin chaʼan mi caj i mejlel laj cʼaj la co yicʼot lac ñusan lac bʌ yaʼ ti Paraíso, pero tiʼ melol i yeʼtel Jehová jiñʌch ñumen i cʼʌjñibal bʌ lac chaʼan. Laʼ chumleconla ili ora bajcheʼ jiñi yicʼot laʼ laj cʌcʼ lac pusicʼal tiʼ pejtelel chuqui wem bʌ tajbil lac chaʼan tiʼ melol i yeʼtel Dios (Mateo 6:33).

18. ¿Bajcheʼ mi lac pʌs chaʼan wolʌch lac chajpan lac bʌ chaʼan mi lac chumtʌl yaʼ ti Paraíso?

¹⁸ Yaʼ ti Paraíso, ñumen wen miʼ cajel jiñi laj cuxtʌlel. Laʼ lac pʌs chaʼan la comʌch ajñel yaʼi cheʼ mi lac chajpan lac bʌ ili ora. ¿Bajcheʼ? Cheʼ mi lac pʌs lac melbal cheʼ bajcheʼ miʼ cʌntesañonla Jehová yicʼot mi lac chaʼlen subtʼan ti lac chʼejlel. Laʼ lac ñusan lac bʌ tiʼ melol i yeʼtel Jehová tiʼ pejtelel lac pʼʌtʌlel. Miʼ mejlel lac ñop chaʼan Jehová mi caj i tsʼʌctesan tiʼ pejtelel albil bʌ i chaʼan yaʼ ti Paraíso. Jin chaʼan, ili ora laʼ chumleconla cheʼ bajcheʼ yaʼix añonla yubil yaʼi.