1, 2. ¿Chuqui an i chʌn meleyob jiñi i wiñicob Jehová?

 CʼɅLɅL ti wajali, Jehová an chuqui albil tac i chaʼan muʼ bʌ i cajel ti ujtel. Jiñi i wiñicob an i chʌn pijtayob chaʼan miʼ tsʼʌctiyel tac jiñi. Jumpʼejl ejemplo, Jeremías tsiʼ wʌn alʌ chaʼan Judá mi caj i jisʌntel ti babiloniojob. Cheʼ ti jabil 607 cheʼ bʌ maxto tilem Cristo cheʼʌch tsaʼ ujti (Jeremías 25:8-11). Isaías tsiʼ wʌn alʌ chaʼan Jehová mi caj i coltan loqʼuel ti Babilonia jiñi judíojob chaʼan miʼ chaʼ sujtelob tiʼ tejclum. Tsiʼ yʌlʌ: «Tijicñayob pejtel muʼ bʌ i pijtañob lac Yum» (Isaías 30:18). Miqueas tsiʼ yʌlʌ jaʼel chaʼan jiñi profecía tac mucʼʌch caj i tsʼʌctiyel. Jin chaʼan tsiʼ yʌlʌ: «Mi caj c chʌn pijtan» (Miqueas 7:7). Jiñi i wiñicob Dios tsiʼ pijtayob cabʌl jabil chaʼan miʼ julel jiñi Mesías wʌn albil bʌ (Lucas 3:15; 1 Pedro 1:10-12). a

² Ili ora jeʼel, woli (choncol) lac chʌn pijtan chaʼan miʼ tsʼʌctiyel jiñi profecía tac chaʼan i Yumʌntel Dios. Jesús jiñʌch rey chaʼan jiñi Yumʌntel, i lʌcʼʌlix mi caj i coltañonla loqʼuel ti ili bʌbʌqʼuen bʌ pañimil (mulawil). Cheʼ bʌ miʼ tilel i jilibal, mi caj i jisan jiñi jontoloʼ  bʌ yicʼot tiʼ pejtelel muʼ bʌ i yʌcʼ ilaya wocol (1 Juan 5:19). Mach ñaʼtʌbilic jala mi caj i tilel i jilibal. Jin chaʼan, yom mi lac wen qʼuel mi chajpʌbiloñʌchla.

3. Mi wajalix i cajel lac pijtan i jilibal, ¿chuqui tajol an laj cʼajtibe lac bʌ?

³ Wen la comix chaʼan miʼ cʼotel i yorajlel chaʼan miʼ mejlel chuqui yom bʌ Dios wʌʼ ti Pañimil (Mateo 6:10). Pero mi cabʌlix jab i cajel lac pijtan, tajol mi laj cʼajtiben lac bʌ mi yom chʌn yʌxʌl laj co yicʼot mi chʌn chajpʌbil añonla.

4. ¿Chucoch yom chʌn yʌxʌl laj co yicʼot chajpʌbilonla?

⁴ ¿Chucoch yom chʌn yʌxʌl laj co yicʼot chajpʌbilonla? An cabʌl i sujmlel. Junchajp, come Jesús tsiʼ yʌlʌ chaʼan cheʼ yom mi la cajñel (Mateo 24:42; Lucas 21:34-36). Cheʼ jaʼel, jiñi i yorganización Jehová ti bele ora miʼ subeñonla chaʼan yom chʌn yʌxʌl laj co yicʼot chajpʌbilonla cheʼ ti i jilibal, i chaʼan yom mi lac chʌn cʼajtesan jiñi albil bʌ Paraíso (pejcan 2 Pedro 3:11-13).

5. ¿Chuqui yambʌ miʼ pʌs chaʼan wen i cʼʌjñibal cheʼ yom chajpʌbilonla chaʼan i jilibal?

⁵ Jiñi ñaxam bʌ xñoptʼañob tsaʼ ajli chaʼan yom chʌn yʌxʌlob i yo yicʼot chajpʌbilob chaʼan i qʼuiñilel Jehová. Pero wʌle ñumen i cʼʌjñibal cheʼ yom chajpʌbilonla. ¿Chucoch? Come Jesús tsiʼ teche yumʌntel ti 1914, i cʼʌlʌl ti jiñi bʌ ora chumuloñixla tiʼ yujtibal qʼuin. ¿Chucoch mucʼʌch lac ñop jiñi? Come wolix (yʌquelix) i tsʼʌctiyel tsaʼ bʌ i yʌlʌ Jesús chaʼan mi cajel tac ti ujtel. Mi laj qʼuel chaʼan ili pañimil woliʼ ñumen asiyel yicʼot chaʼan wolix i sujbel tiʼ pejtelel pañimil jiñi i Yumʌntel Dios. (Mateo 24:3, 7-14). Jesús maʼañic tsiʼ yʌlʌ bajcheʼ cʼamel mi caj i jalijel jiñi cojix bʌ qʼuin. Jin chaʼan, yom chajpʌbilonla come mach la cujilic baqui ora mi caj i waʼ julel i jilibal.

6. ¿Bajcheʼ la cujil chan mi caj i ñumen ñijlel majlel ili pañimil?

⁶ Ti ili ora, jiñi pañimil mi caj i ñumen ñijlel majlel. ¿Bajcheʼ la cujil? Come jiñi Biblia miʼ yʌl chaʼan ñumen jontol miʼ cajel jiñi wiñicob xʼixicob (quixtañujob) cheʼ ti «cojix bʌ qʼuin tac» (2 Timoteo 3:1, 13; Mateo 24:21; Apocalipsis 12:12). Jin chaʼan, anquese mach chʌn utsʼatix woli tac bʌ ti ujtel, la cujil chaʼan ñumento miʼ cajel. Pero ¿yom ba i yʌl iliyi chaʼan cʌlʌx lecojax bajcheʼ miʼ wersa cajel ili pañimil chaʼan miʼ tilel i jilibal?

7. Cheʼ mi lac ñaʼtan muʼ bʌ i yʌl Mateo 24:37-39, ¿chuqui miʼ cʼotel lac chʼʌmben isujm?

⁷ An muʼ bʌ i ñaʼtañob chaʼan ñaxan miʼ cajel wiʼñal, cʼamʌjel yicʼot guerra tac tiʼ pejtelel país chaʼan miʼ tejchel jiñi «ñuc bʌ wocol» (Apocalipsis 7:14). Pero mach cheʼic mi caj i yujtel bajcheʼ jiñi. ¿Chucoch? Come tiʼ pejtelel quixtañu mi caj i ñaʼtañob chaʼan wolix i tsʼʌctiyel jiñi profecía tac mi cheʼ miʼ yujtel bajcheʼ jiñi. Jinto mi caj i ñaʼtañob jiñi maʼañic bʌ miʼ chʼujbiñob chuqui miʼ yʌl jiñi Biblia. Pero Jesús tsiʼ yʌlʌ chaʼan lʌcʼʌl tiʼ pejtelel jiñi quixtañu maʼañic mi caj i ñaʼtañob chaʼan chumuloñixla ti cojix bʌ qʼuin. Tsiʼ yʌlʌ chaʼan mach yʌxʌlobic i yo cheʼ mi caj i tilel i jilibal come lajal bajcheʼ maʼañic chuqui miʼ caj ti ujtel yilal mi caj i qʼuelob (pejcan Mateo 24:37-39). Cheʼ mi lac ñaʼtan tsaʼ bʌ i yʌlʌ Jesús, ¿chuqui miʼ cʼotel lac chʼʌmben isujm? Chaʼan cheʼ lʌcʼʌlix mi caj i tejchel jiñi ñuc bʌ wocol maʼañic mi caj lac pijtan chaʼan cʌlʌx ñumen lecojax bajcheʼ miʼ cajel ili pañimil i miʼ ñaʼtan jiñi quixtañu chaʼan tsaʼix cʼoti i yorajlel i jilibal (Lucas 17:20; 2 Pedro 3:3, 4).

8. ¿Chuqui la cujil jiñi i wiñiconbʌla Dios?

⁸ Jesús tsiʼ yʌlʌ jiñi profecía chaʼan cojix bʌ qʼuin chaʼan cojach jiñi chʌn yʌxʌloʼ bʌ i yo miʼ ñaʼtañob tsaʼix cʼoti i yorajlel i jilibal. Jiñi i wiñiconbʌla Dios yʌxʌl laj co añonla (Mateo 24:27, 42). Jin chaʼan, an laj qʼuele bajcheʼ tsʼʌctiyem ti chajp ti chajp jiñi profecía cʼʌlʌl cheʼ  ti 1914 tilel. La cujil chaʼan chumuloñixla ti jiñi cojix bʌ qʼuin i chaʼan ti ili jontol bʌ pañimil. Jehová ñaʼtʌbilix i chaʼan jala mi caj i jisan.

9. ¿Chucoch yom chʌn yʌxʌl laj co yicʼot chajpʌbilonla?

⁹ Tsaʼix laj qʼuele chaʼan yom chʌn yʌxʌl laj co yicʼot chajpʌbilonla. ¿Chucoch? Ti ñaxan, come la com lac jacʼben i tʼan Cristo. I chaʼpʼejlel, come mi lac ñop chaʼan wolix i tsʼʌctiyel jiñi profecía chaʼan jiñi cojix bʌ qʼuin. ¿Chucoch mi lac ñop jiñi? Mach chaʼañic chuqui jach mi lac ñop. Come añʌch chuqui miʼ pʌs chaʼan woliyʌch i tsʼʌctiyel jiñi profecía tac am bʌ ti Biblia.

10, 11. a) ¿Chucoch tsiʼ sube Jesús chaʼan yom chʌn yʌxʌlob i yo jiñi xcʌntʼañob i chaʼan? b) ¿Chuqui yom mi lac mel mi maʼañic miʼ cʼotel i yorajlel i jilibal bajcheʼ woli lac pijtan? (Qʼuele jiñi dibujo am bʌ tiʼ tejchibal.)

¹⁰ Yonlel i testigojob Jehová cabʌlix jab i cajel i pijtañob miʼ tilel i jilibal. Pero yom chʌn yʌxʌl laj co yicʼot chajpʌbilonla, mach yʌlʌyic jaypʼejlix ora caj lac melben i yeʼtel Dios. Cheʼ bʌ Jesús miʼ tilel i jisʌben i pañimil Satanás, yom chajpʌbilonla. Yom mi laj cʼajtesan chaʼan Jesús tsiʼ sube chaʼan yom chʌn yʌxʌlob i yo jiñi xcʌntʼañob i chaʼan come mach i ñaʼtayobic jala mi caj i tilel i jilibal. Tsiʼ subeyob jaʼel: «Lajalʌch bajcheʼ wiñic tsaʼ bʌ majli ti ñajtʌl. Cheʼ bʌ tsiʼ cʌyʌ i yotot tsiʼ yʌqʼueyob i yeʼtel i wiñicob. Ti jujuntiquil tsiʼ subeyob chuqui yom miʼ melob. Tsiʼ sube xcʌntaya chaʼan miʼ qʼuel i tiʼ otot. Yom yʌxʌl la wo, cheʼ jiñi, come mach laʼ wujilic baqui ora tal i yum otot, mi ti icʼajel, mi ti ojlil acʼʌlel, mi cheʼ wolix ti uqʼuel mut, mi ti sʌcʼajel. Ame bʌcʼ julic i tajetla cheʼ wʌyʌletla. Jiñi muʼ bʌ c subeñetla mic subeñob ti pejtelelob. Yom yʌxʌl laʼ wo» (Marcos 13:33-37).

¹¹ Cheʼ bʌ jiñi xcʌntʼañob tsiʼ chʼʌmbeyob isujm chaʼan Jesús tsiʼ teche yumʌntel ti 1914, tsiʼ ñaʼtayob chaʼan baqui jach bʌ ora miʼ mejlel ti tilel i jilibal. Tsiʼ chajpayob i bʌ. ¿Bajcheʼ? Tsaʼ cajiyob ti ñumen subtʼan. Ti Marcos 13, Jesús tsiʼ yʌlʌ chaʼan juntiquil i yum otot tajol mach ti orajic miʼ cʼotel cheʼ bajcheʼ miʼ lon ñaʼtan jiñi xyaj eʼtelob. Yom chʌn yʌxʌlob i yo, anquese mach ñaʼtʌbilic bajcheʼ ora mi caj i cʼotel. Ili miʼ pʌsbeñonla anquese añix cabʌl ora caj lac pijtan jiñi i jilibal, mach yomic i yʌl jalto mach tal o maʼañix cuxulonla mi caj i tilel. Yom chʌn yʌxʌl la co.

12. a) ¿Chuqui ti cʼajtiya tsiʼ mele Habacuc ti Jehová? b) ¿Chuqui tsiʼ jacʼbe Jehová?

¹² Laʼ lac ñaʼtan jiñi ejemplo i chaʼan jiñi xʼaltʼan Habacuc. Tsiʼ chʌn chaʼle pijt cheʼ bʌ tiʼ tsictesa chaʼan mi caj i jisʌntel Jerusalén. Cabʌl jab cheʼ bʌ maxto xʼaltʼañic, an yambʌ xʼaltʼañob tsaʼ bʌ i subuyob jaʼel jiñi tʼan tsaʼ bʌ i tsictesa Habacuc. Tsiʼ qʼuele chaʼan ñumen jontol jiñi quixtañujob. Jin chaʼan tsiʼ cʼajtibe i coltaya Jehová. Tsiʼ yʌlʌ: «¿Jaypʼejl to ora yom mic pejcañet c Yum, jinto maʼ wubibeñon c tʼan?». Anquese maʼañic tsiʼ sube Jehová jala mi caj i jisʌntel Jerusalén, pero tsiʼ sube chaʼan  yom chʌn yʌxʌl i yo yicʼot tsiʼ sube: «Mi caj i bʌcʼ tilel cheʼ tiʼ yorajlel» (pejcan Habacuc 1:1-4 yicʼot 2:3).

13. a) ¿Chuqui tsaʼic bʌ mejli i ñaʼtan Habacuc i wentʌlel? b) ¿Chuqui tsiʼ chaʼle cheʼ tsaʼic i ñaʼta bajcheʼ jiñi?

¹³ Ñaʼtancu cheʼ tsaʼic lujbʼa i pijtan yicʼot cheʼ tsaʼic caji i ñaʼtan jiñi Habacuc: «Wajalix i cajel c pijtan chaʼan miʼ jisʌntel Jerusalén. Tajol anto cabʌl ora yom, i maʼañic i cʼʌjñibal cheʼ mic chʌn chaʼlen subtʼan. Laʼ to i mel yañoʼ bʌ». ¿Chuqui tsiʼ chaʼle cheʼ tsaʼic i ñaʼta bajcheʼ jiñi? Tajol tsiʼ ñajtʼesa i bʌ ti Dios. Cheʼ jaʼel, tsaʼic cʼoti i jilibal cheʼ mach chajpʌbilic, tajol tsaʼ chʌmi.

14. ¿Bajcheʼ yubil mi caj la cubin yaʼ ti Paraíso?

¹⁴ Cheʼ bʌ yaʼix añonla yaʼ ti Paraíso, mi caj laj qʼuel ti tsʼʌctiyel tiʼ pejtelel tsaʼ bʌ i yʌlʌ Jehová chaʼan miʼ cajel ti ujtel ti jiñi cojix bʌ qʼuin. ¿Bajcheʼ yubil mi caj la cubin cheʼ jiñi? Mi caj lac ñumen chʼujbin Jehová yicʼot chaʼan mucʼʌch caj i tsʼʌctesan jiñi yambʌ albil tac bʌ i chaʼan (pejcan Josué 23:14). Mi caj la cʌqʼuen wocolix i yʌlʌ Jehová come wen jach i yorajlel bajcheʼ tsiʼ choco tilel i jilibal jiñi jontolil, cheʼ jeʼel tsiʼ sube i wiñicob chaʼan yom yʌxʌlob i yo yicʼot chajpʌbilob (Hechos 1:7; 1 Pedro 4:7).

15, 16. ¿Chucoch yaʼ yom mi laj cʌcʼ lac pusicʼal ti subtʼan?

¹⁵ Jiñi i yorganización Jehová mi caj i chʌn subeñonla chaʼan ñumen ñuc bʌ yom ti laj cuxtʌlel jiñʌch cheʼ mi lac melben i yeʼtel. Jiñʌch mi caj i coltañonla lac chʌn melben i yeʼtel, pero mi caj i ñumen coltañonla laj cʼajtesan chaʼan ti orajach yom mi lac sub jiñi tʼan yom bʌ tsictesʌntel. Wen la cujil chaʼan choncolix i tsʼʌctiyel jiñi profecía tsaʼ bʌ i yʌlʌ Jesús chaʼan jiñi cojix bʌ qʼuin, i chaʼan tsʼitaʼ jax yom chaʼan miʼ tilel i jilibal. Jin chaʼan, ñumen ñuc bʌ chaʼañonla jiñʌch mi lac melben i yeʼtel Jehová i mi lac sub jiñi wen tʼan chaʼan Yumʌntel (Mateo 6:33; Marcos 13:10).

¹⁶ Mach jalix mi caj i jisʌntel jiñi i pañimil Satanás. Mi laj coltan jiñi quixtañujob cheʼ bʌ mi lac chaʼlen subtʼan. Laʼ laj qʼuel jumpʼejl ejemplo baqui miʼ pʌs chaʼan ñumen i cʼʌjñibal cheʼ mi laj cʌcʼ lac pusicʼal tiʼ coltʌntel jiñi quixtañujob. Ti 1945, tsaʼ sujpʼij jumpʼejl barco yaʼ ti Alemania, i cabʌl mil tsaʼ chʌmiyob. Jumpʼejl xñujpuñel tsaʼ bʌ ochiyob bajcheʼ i testigojob  Jehová ti wiʼil, cuxul tsaʼ loqʼuiyob. Jiñi hermana cʼajal i chaʼan cheʼ bʌ juntiquil xʼixic yʌquel ti tsʌts bʌ tʼan cheʼ bʌ woliʼ sujpʼel jiñi barco come jiñi i cuch tac yicʼot jiñi wen letsem tac bʌ i tojol i chaʼan yaʼ woliʼ sujpʼel majlel jeʼel. Pero jiñi yambʌ yaʼ bʌ majlelob ti barco wen yujilob chaʼan ti ora bʌ yom miʼ mejlel jiñʌch miʼ coltʌntel yañoʼ bʌ. Ili ora jeʼel, an cabʌl quixtañu yom bʌ coltʌntel. Jin chaʼan, yom mi laj cʌcʼ lac pusicʼal ti jiñi subtʼan come la cujil chaʼan jiñi quixtañujob miʼ mejlel i tajob i coltʌntel. Com lac chaʼlen wersa chaʼan mi laj coltan jiñi quixtañujob.

17. ¿Bajcheʼ la cujil chaʼan ti bajcheʼic jach ora miʼ mejlel ti julel i jilibal?

¹⁷ Wen tsiquilʌch chaʼan jiñi profecía tac am bʌ ti Biblia woliʼ tsʼʌctiyel yicʼot chaʼan ti bajcheʼ jach ora miʼ mejlel ti tilel i jilibal. Jiñi Organización de las Naciones Unidas yicʼot jiñi yumʌlob muʼ bʌ i coltañob tsʼitaʼ jax yom chaʼan mi caj i jisan jiñi ñopbalʌl tac mach bʌ isujmic (Apocalipsis 17:16). ¿Cabʌl ba ora yom chaʼan miʼ mejlel jiñi? Maʼañic. Yom cʼajal lac chaʼan, Dios mi caj i mel chaʼan jiñi yumʌlob miʼ jisañob jiñi ñopbalʌl tac. Ti ora jach miʼ mejlel i mel Jehová jiñi, i ti baqui jach bʌ ora (Apocalipsis 17:17). Mach jalix mi caj i tilel i jilibal i pañimil Satanás. Jin chaʼan, laʼ lac chʌn jacʼ i ticʼojel Jesús: «Chʌcʌ qʼuele laʼ bʌ ame tsʌtsʼac laʼ pusicʼal chaʼan laʼ woʼlel yicʼot yʌcʼʌjel cheʼ mi laʼ cʼojoʼtan chuqui tac an ti pañimil, ame i bʌcʼ tajetla ili qʼuin» (Lucas 21:34, 35; Apocalipsis 16:15). Yom chʌn yʌxʌl laj co yicʼot mi laj cʌcʼ lac pusicʼal tiʼ melol i yeʼtel Jehová. Yom mi lac ñop chaʼan mucʼʌch caj i coltan jiñi chʌn yʌxʌloʼ bʌ i yo yicʼot chajpʌbiloʼ bʌ (Isaías 64:4).

18. ¿Baqui bʌ cʼajtiya mi caj lac jacʼ yaʼ ti yambʌ temaj?

¹⁸ Cheʼ wolito lac pijtan chaʼan miʼ tilel i jilibal, laʼ lac chʌn jacʼ jiñi ticʼojel tsaʼ bʌ i yʌcʼʌ jiñi xcʌntʼan Judas. Tsiʼ yʌlʌ chaʼan cheʼ choncol to lac pijtan jiñi qʼuin chaʼan miʼ yʌqʼueñonla laj cuxtʌlel, yom mi lac ñumen pʼʌtʼesan jiñi lac ñopoñel (chʼujbiya) ti Dios, mi lac chʌn mel oración yicʼot mi laj cʌntan bajcheʼ añonla la quicʼot Dios (Judas 20, 21). ¿Bajcheʼ miʼ mejlel lac pʌs chaʼan woliyʌch lac pijtan chumtʌl yaʼ ti Paraíso? Yaʼ ti yambʌ temaj mi caj laj qʼuel.