TEMAJ AM BɅ TIʼ TEJCHIBAL | CHEʼ MI LAC CHɅMEL, ¿CHUQUI MI LAC CHAʼLEN?
¿Chuqui mi lac chaʼlen cheʼ mi lac chʌmel?
«Tsaʼ c ñaʼta chaʼan an uxchajp chuqui miʼ mejlel lac chaʼlen cheʼ mi lac chʌmel: Mi lac majlel ti panchan, ti infierno o ti purgatorio. Tsaʼ c ñaʼta chaʼan mach cʌlʌx tojoñic chaʼan mic majlel ti panchan, i mach cʌlʌx jontoloñic chaʼan mic majlel ti infierno. Pero maʼañic bʌ tsaʼ c wen ñaʼta jiñʌch chuquiyes jiñi purgatorio. Cojach ubibil c chaʼan muʼ bʌ i yʌl quixtañu, maʼañic wis pejcʌbil c chaʼan muʼ bʌ i yʌl jiñi Biblia.» (Lionel.)
«Tsiʼ cʌntesayoñob chaʼan mi lac majlel ti panchan ti lac pejtelel, pero maʼañic tsaʼ c wen ñopo mi isujmʌch. Tsaʼ c ñopo chaʼan miʼ jilel tiʼ pejtelel cheʼ mi lac chʌmel.» (Fernando.)
¿Am ba a cʼajtibe a bʌ chuqui mi lac chaʼlen cheʼ bʌ mi lac chʌmel? ¿Am ba baqui woliʼ yilañob wocol jiñi laj cʌñʌyoʼ bʌ tsaʼix bʌ chʌmiyob? ¿Muʼ ba caj lac chaʼ qʼuelob? ¿Bajcheʼ miʼ mejlel lac ñaʼtan chaʼan mucʼʌch caj i chaʼ tejchel jiñi chʌmeñoʼ bʌ? Chaʼan mi lac tajben i jacʼbal ili cʼajtiya tac, ¿bajcheʼ yilal maʼ qʼuel cheʼ mi lac tsajin muʼ bʌ i yʌl jiñi Biblia? Laʼ lac ñaxan tsajin chuqui miʼ yʌl chaʼan jiñi chʌmel, i cheʼ jiñi mi caj laj qʼuel i jacʼbal jiñi uxpʼejl cʼajtiya.
¿Bajcheʼ yilal añob jiñi chʌmeñoʼ bʌ?
I JACʼBAL JIÑI BIBLIA: «Yujilob jiñi cuxuloʼ bʌ miʼ cajelob ti chʌmel, pero maʼañix chuqui yujilob jiñi chʌmeñobix bʌ. Tsaʼix ñumi i yorajlel chaʼan miʼ sujbelob ti ñuc. Maʼañix miʼ chʌn ñaʼtʌntelob. Ti pejtelel chuqui maʼ mel, mele bajcheʼ yom melol, come maʼañix eʼtel baʼ maʼ majlel. Maʼañix chuqui maʼ wis ñaʼtan a mel.» (Eclesiastés 9:5, 10.) a
Jiñi tʼan «baʼ maʼ majlel» woliʼ taj ti tʼan jiñi mucoñibʌl, yaʼ baqui miʼ majlelob jiñi quixtañu cheʼ miʼ chʌmelob. Ili jiñʌch jumpʼejl ajñibʌl símbolo jach bʌ baqui maʼañix chuqui mi lac ñaʼtan yicʼot chuqui miʼ mejlel lac mel. Jumpʼejl ejemplo, ñaʼtancu bajcheʼ tsiʼ chʼʌmbe isujm jiñi xucʼul bʌ Job chaʼan jiñi mucoñibʌl cheʼ bʌ tsiʼ taja tac ti tʼan. Ti jumpʼejl jach qʼuin tsiʼ sʌtʌ tiʼ pejtelel i yalobilob yicʼot i chubʌʼan. Ti wiʼil tsaʼ pujqui wen cʼux bʌ lojweñal tiʼ pejtelel i bʌcʼtal. Cheʼ jiñi tsiʼ cʼajtibe Dios: «Utsʼat muqʼuic a mucon yicʼot jiñi chʌmeñoʼ bʌ [o cheʼ bajcheʼ miʼ yʌl jiñi La Sagrada Biblia, i chaʼan Guillermo Jünemann, yaʼ ti «infierno»] baʼ maʼañic c ticʼlʌntel» (Job 1:13-19; 2:7; 14:13). Tiʼ tojlel Job, jiñi «mucoñibʌl» o infierno mach jiñic jumpʼejl ajñibʌl baqui an cʼajc, baqui mi caj i wen ilan wocol. Jiñʌch jumpʼejl ajñibʌl chaʼan cʼaj o, baqui maʼañic mi caj i chʌn qʼuel wocol.
Yambʌ bajcheʼ miʼ mejlel lac ñaʼtan bajcheʼ an jiñi chʌmeñoʼ bʌ jiñʌch cheʼ mi lac pejcan jiñi relato tac am bʌ ti Biblia chaʼan jiñi tsaʼ bʌ chaʼ chʼojyiyob (qʼuele jiñi recuadro « Ocho relato muʼ bʌ i yʌl jiñi Biblia chaʼan tsaʼ bʌ chaʼ chʼojyiyob»).
Maʼañic majqui tsiʼ yʌlʌ chaʼan tsajñi ti jumpʼejl ajñibʌl wen i tʼojol jax bʌ mi ti jumpʼejlic ajñibʌl baqui an cabʌl ticʼlʌntel. Cheʼ tsajñiyobic, ¿mach ba i tʼojolic an chuqui tsiʼ yʌlʌyob? ¿Mach ba yomic tsaʼ tsʼijbunti cʌytʌl ti Biblia maʼ wʌl chaʼan miʼ ñaʼtʌntel baqui tsajñiyob? Jiñi Tsʼijbujel maʼañic chuqui miʼ yʌl chaʼan jiñi. Maʼañic chuqui tsiʼ tajayob i yʌl. Maʼañic chuqui wis yujilob, lajal bajcheʼ wen ochemob i wʌyel. Jiñi Biblia miʼ cʼʌn jiñi tʼan «wʌyel» chaʼan miʼ taj ti tʼan jaʼel jiñi chʌmel. Jumpʼejl ejemplo, cheʼ bʌ tsiʼ taja ti tʼan chaʼan i yixicʼal (yixicpʼeñal) Jairo yicʼot chaʼan Lázaro, jiñi Biblia miʼ yʌl chaʼan «wʌyʌl» tsaʼ ajñiyob (Lucas 8:52, 53; Juan 11:11, 13).
Cheʼ jiñi, ¿yaʼ ba miʼ jilel tiʼ pejtelel cheʼ mi lac chʌmel? ¿Muʼ ba lac mejlel ti chaʼ «chʼojyel» ti jiñi tam bʌ wʌyel?
a Yaʼ ti Biblia chʼol i cʼabaʼ I tʼan Dios, jiñi tʼan «baʼ maʼ majlel», «i yajñib chʌmeñoʼ bʌ» yicʼot «mucoñibʌl» miʼ cʼʌjñel chaʼan miʼ chaʼlentel ti traducir jiñi tʼan Seol, am bʌ ti hebreo, yicʼot Hades, am bʌ ti griego. An Biblia tac muʼ bʌ i tsʼijbun bajcheʼ «infierno» o «cʼajc», pero tiʼ sujm, jiñi muʼ bʌ i yʌjlel chaʼan jumpʼejl ajñibʌl baqui mi laj quilan wocol, yaʼ ti Biblia maʼañic miʼ yʌl bajcheʼ jiñi.
