Ti jiñi tejclum i cʼabaʼ Alicante am bʌ tiʼ tʼejl jiñi mar Mediterráneo jiñʌch baqui tsaʼ coliyon. Cabʌl wocol ti cotot, jin chaʼan tiʼ pejtelel ora añon jach ti calle. Juntiquil muʼ bʌ ti eʼtel (troñel) yaʼ baqui miʼ tojʼesʌntel llanta chaʼan carro lʌcʼʌl bʌ an ti cotot, i cʼabaʼ José María, tsaʼ sujti ti camigo. Wen uts yicʼot miʼ wen cʌntañon, jiñi c familia maʼañic baqui ora melbil i chaʼan tic tojlel bajcheʼ jiñi. Anquese mach lajalix i jabilel bajcheʼ joñon, añix 20 i ñumelal, juntiquilʌch isujm bʌ camigo come cheʼʌch bajcheʼ queran tsiʼ cʌntayon cheʼ an wocol.

José María woliʼ tsajin jiñi Biblia yicʼot i testigojob Jehová. Tsaʼ j qʼuele chaʼan miʼ mulan come an i tajol miʼ subeñon chuqui woliʼ cʌn. Anquese mij qʼuel ti ñuc chuqui miʼ subeñon, pero maʼañic mic mulan. Yambʌ tac jiñi muʼ bʌ c mulan come xcolelon to. Pero mach wen jalic tsaʼ qʼuextʌyi jiñi.

Maʼañic mic wen mulan cʌl chuqui tsac chaʼle, cojach mi caj cʌl chaʼan mach tsajiloñic yicʼot tontojon jax ti jiñi bʌ ora. Ti jumpʼejl bʌ qʼuin tsaʼ luʼ qʼuextʌyi. Ti ñaxan wen an c chʼejlel, pero ti wiʼil cheʼ jax totsʼol tsaʼ cʌleyon yaʼ ti hospital. Wocol tsac ñopo chuqui woli ti ujtel tic tojlel. Tsaʼ c chʌn cʼajtibe c bʌ chucoch chʌn cuxulon to.

Tsaʼ tili i qʼuelon José María, i ti jimbʌ ora tsiʼ sube i testigojoʼ bʌ Jehová lʌcʼʌl jach bʌ añob yaʼ ti hospital chaʼan miʼ julaʼtañoñob. Cheʼ tiʼ pejtelel ora tsaʼ caji i julaʼtañoñob, tsiʼ yʌqʼueyon c tijicñʌyel. Ti ora tsaʼ caji c tsajin jiñi Biblia cheʼ bʌ tsaʼ loqʼuiyon yaʼ baqui miʼ yʌjqʼuel jiñi wen cʼamoʼ bʌ yaʼ ti hospital. Tsaʼ cʼoti j cʌn chucoch miʼ yilan wocol yicʼot miʼ chʌmel jiñi wiñicob xʼixicob (quixtañujob), i chucoch maʼañic chuqui miʼ mel Dios. Tsaʼ j cʌñʌ jaʼel chaʼan jiñi albil bʌ i chaʼan Dios muʼ bʌ caj i mel, chaʼan ili Pañimil mi caj i bujtʼel ti quixtañu tojoʼ bʌ i «maʼañix mi juntiquilic muʼ bʌ caj i yʌl: Cʼamon» (Isaías 33:24). Jiñʌch baqui ora tsaʼ caji j qʼuel ti utsʼat jiñi talto bʌ.

Tsaʼ ñumen cʼʌjquiyon majlel tiʼ tsajintel jiñi Biblia cheʼ bʌ tsaʼ loqʼuiyon yaʼ ti hospital. An i tajol tsaʼ majliyon yicʼot i testigojob Jehová ti tempa bʌ tac yicʼot ti subtʼan ti jumpʼejl silla de rueda. Cheʼ ti 5 i chaʼan noviembre, 1988, cheʼ bʌ an jaxto 20 c jabilel tsac chaʼle chʼʌmjaʼ tiʼ jumpʼejl piscina chajpʌbil bʌ chaʼan añoʼ bʌ i wocol bajcheʼ joñon. Jehová tsiʼ coltayon chaʼan mij qʼuel chaʼan añʌch i cʼʌjñibal jiñi cuxtʌlel. ¿Bajcheʼ mic pʌs chaʼan mucʼʌch j qʼuel ti ñuc jiñi?

Chaʼan mic melben i yeʼtel Jehová jiñʌch bajcheʼ cʼamel mic mejlel, maʼañic tsaʼ j cʌcʼʌ chaʼan chuqui jach miʼ mʌctañon (1 Timoteo 4:15). Wocol tsaʼ cubi  ti ñaxan come jiñi c familia tiʼ tsʼaʼleyon chaʼan jiñi yambʌ c ñopbal. Pero jiñi lajal bʌ c ñopoñel quicʼotob tsiʼ coltayoñob. Tsiʼ chaʼleyob wersa chaʼan mi jumpʼejlic tempa bʌ yicʼot subtʼan mic sʌt.

Pero ti wiʼil tsaʼ j qʼuele chaʼan añix majqui yom miʼ coltañon ti qʼuiñil yicʼot ti acʼʌlel. Yaʼ ti tejclum Valencia, i ñajtlel 160 kilómetro yaʼ ti norte chaʼan Alicante, tsaʼ cʼoti c taj jumpʼejl otot baqui miʼ cʌntʌntel jiñi maʼañix bʌ miʼ mejlel ti xʌmbal. Cʼʌlʌl ti jiñi bʌ ora jiñʌch baqui chumulon.

Maʼañic mi caj j cʌy c melben i yeʼtel Jehová anquese maʼañix mic mejlel ti tejchel. Yicʼot jiñi taqʼuin muʼ bʌ cʌqʼuentel chaʼan maʼañix mic mejlel ti xʌmbal yicʼot jiñi yambʌ coltʌntel muʼ bʌ cʌqʼuentel, tsaʼ mejli c mʌn jumpʼejl alʌ computadora yicʼot jumpʼejl teléfono tsaʼ bʌ cʌcʼʌ tiʼ tʼejl c wʌyib. Ti jujumpʼejl sʌcʼan, jiñi xʼeʼtel miʼ tilel chaʼan miʼ tsʼʌy jiñi alʌ computadora yicʼot jiñi teléfono. Mij cʼʌn c xʌcʼtiʼ chaʼan mic petsʼ jiñi alʌ botón chʼʌmʌl bʌ tilel i chaʼan, i chaʼan mic petsʼ jiñi letra tac am bʌ yaʼ ti teclado mij cʼʌn jumpʼejl alʌ jʌlʌl bʌ teʼ muʼ bʌ c chuc ti quej.

¿Bajcheʼ coltʌbil i chaʼañon ili tecnología? Miʼ coltañon chaʼan mic mejlel ti ochel yaʼ ti página chaʼan Internet jw.org yicʼot yaʼ ti BIBLIOTECA EN LÍNEA Watchtower. Jumpʼejl wen ñuc bʌ eʼtijib chaʼañon iliyi. An i tajol tiʼ pejtelel ora mi cochel yaʼ ti Internet chaʼan mic pejcan jiñi jun tac loqʼuem bʌ ti Biblia i jiñʌch muʼ bʌ i coltañon chaʼan mic bej cʌn majlel Dios yicʼot jiñi utsʼatax bʌ i melbal. Jiñi cʌntesʌntel muʼ bʌ c taj yaʼi miʼ yʌqʼueñon c tijicñʌyel cheʼ c bajñel jach mi cubin c bʌ.

Chaʼan mic ñʌchʼtan jiñi tempa bʌ muʼ bʌ i mel i testigojob Jehová, mij cʼʌn jiñi alʌ computadora. Yaʼ tij cuarto mach cojach mic ñʌchʼtan jiñi cʌntesʌntel, miʼ mejlel j cʌcʼ j comentario, c chaʼlen oración, j cʌcʼ jumpʼejl discurso o mic pejcan tiʼ tojlel jiñi la quermañojob jumpʼejl temaj chaʼan jiñi Lac Tsictesʌbentel. Temel añon quicʼot jiñi congregación mi cubin anquese maʼañix mic majlel ti jiñi tempa bʌ.

Muʼ bʌ j cʼʌn chaʼan mic chaʼlen subtʼan tiʼ pejtelel ora jiñʌch jiñi teléfono yicʼot jiñi alʌ computadora. Anquese maʼañic mic majlel ti otot ti otot bajcheʼ miʼ melob yambʌ quermañojob, pero mucʼʌch c chaʼlen subtʼan. Jiñi teléfono yicʼot jiñi alʌ computadora miʼ coltañon chaʼan mic suben yambʌ quixtañujob jiñi c ñopoñel ti Dios. Mic wen mulan subtʼan ti teléfono, jin chaʼan, jiñi ancianojob, o añoʼ bʌ tiʼ wenta congregación, an i subeyoñob chaʼan mic chajpan cheʼ miʼ mejlel jiñi ñuc bʌ subtʼan ti teléfono. Tiʼ melol iliyi miʼ chaʼleñob subtʼan jaʼel hermanojob maʼañic bʌ miʼ mejlelob ti loqʼuel bajcheʼ joñon.

Jiñi j cuxtʌlel mach yaʼic jach chucul ti jiñi tecnología. Ti jujumpʼejl qʼuin miʼ julaʼtañoñob jiñi camigojob. Miʼ tilelob yicʼot i cʌñʌyoʼ bʌ yicʼot yom bʌ i ñumen cʌñob jiñi Biblia. Lʌcʼʌl tiʼ pejtelel ora miʼ subeñoñob chaʼan joñon mic tech cʌl chaʼan jiñi Biblia. An i tajol miʼ tilel i julaʼtañoñob cabʌl familia chaʼan mic tem mel lojon jiñi estudio loqʼuem bʌ ti Biblia.  Utsʼatax mij qʼuel cheʼ bʌ jiñi xcolelob miʼ buchtʌlob tic wʌyib i miʼ subeñoñob chucoch miʼ wen cʼuxbiñob Jehová.

Cheʼ miʼ julaʼtañoñob yaʼ tij cuarto mi cʌqʼueñob wocolix i yʌlʌ come maʼañic miʼ bajñel cʌyoñob. Baqui jach tilemob jiñi camigo muʼ bʌ i julaʼtañoñob. Toj sajtelob i pusicʼal jiñi xʼeʼtelob ti jiñi otot cheʼ bʌ miʼ qʼuelob chaʼan cabʌl miʼ julaʼtañoñob. Mi cʌqʼuen wocolix i yʌlʌ Jehová chaʼan miʼ yʌcʼon ti ajñel tiʼ tejclum.

Cheʼ bʌ miʼ cʼajtibeñoñob bajcheʼ wolic ñusan, mic subeñob: «¡Wolic chaʼlen wersa!». Pero mach cojach joñon an c wocol. Jiñi xñoptʼañonbʌla ti lac pejtelel mi lac chaʼlen wersa chaʼan «jiñi wen bʌ guerra chaʼan chʌn xucʼul [mi lac] ñop», anquese cabʌl chuqui muʼ bʌ lac ñusan o muʼ bʌ i mejlel i mʌctañonla (1 Timoteo 6:12). ¿Chuqui an i coltayon chaʼan mic lʌtʼ iliyi? Tiʼ pejtelel ora mi cʌqʼuen wocolix i yʌlʌ Jehová come añʌch i sujmlel jiñi j cuxtʌlel. Mic chaʼlen wersa chaʼan maʼañic chuqui miʼ mʌctañon tiʼ melol i yeʼtel Dios i mic chʌn ñaʼtan jiñi albil bʌ i chaʼan Dios ti talto bʌ qʼuin.

Jiñi muʼ bʌ c chʌn ñaʼtan jiñʌch jiñi Paraíso muʼ bʌ i cajel wʌʼ ti Pañimil yicʼot chaʼan wen tijicña miʼ cajel cheʼ bʌ muqʼuix caj c mejlel ti tijpʼel yicʼot ti ajñel. An i tajol mic chaʼlen alas tʼan yicʼot jiñi camigo, José María, am bʌ i cʼamʌjel jaʼel cʌmbil bʌ bajcheʼ poliomielitis. Mij cʼajtiben chaʼan majqui mi caj i mʌl (jot) ajñel cheʼ muqʼuic lac chaʼlen ajñel. Miʼ jacʼbeñon: «Ñumen ñuc bʌ mach jiñic majqui mi caj i mʌl, jiñʌch cheʼ muqʼuix caj mejlel lac chaʼlen ajñel yaʼ ti Paraíso».

Wocol tsaʼ c ñopo chuqui tsaʼ bʌ ujti tic tojlel. Cheʼ bʌ alobonto lets tsaʼ c tojo chaʼan mach tsajalic chuqui tsac mele, jin chaʼan ili ora cheʼ añon bajcheʼ iliyi. Mi cʌqʼuen wocolix i yʌlʌ Jehová chaʼan maʼañic tsiʼ bajñel cʌyʌyon. An i yʌqʼueyon jumpʼejl pijtaya ti talto bʌ qʼuin, chaʼan mij coltan yañoʼ bʌ, cheʼ jaʼel tsiʼ yʌqʼueyon cabʌl quermañojob yicʼot chaʼan comʌch chumtʌl tiʼ pejtelel ora. Cheʼ muqʼuic cʌl ti tsʼitaʼ bʌ tʼan bajcheʼ yubil mij cubin, mi cʌl chaʼan ñumen on aqʼuebil i chaʼañon Jehová bajcheʼ mach cheʼix yom mic ñaʼtan.