An muʼ bʌ mejlel i ñaʼtañob chaʼan mach yomic mi lac ñop chaʼan jiñi chaʼ chʼojyel. Jiñi apóstol Pablo mach cheʼic tsiʼ ñaʼta come tsiʼ yʌlʌ: «Mi wʌʼ jach ti pañimil miʼ poj coltañonla Cristo, ñumen pʼumpʼuñonla bajcheʼ yañoʼ bʌ wiñicob. Pero isujm tsaʼix tejchi chʼojyel Cristo baʼan chʌmeñoʼ bʌ. Jiñʌch ñaxan bʌ tsaʼ bʌ chʼojyi» (1 Corintios 15:19, 20). Pablo tsiʼ ñopo chaʼan isujmʌch cheʼ mi caj i chaʼ chʼojyel jiñi chʌmeñoʼ bʌ. ¿Chucoch tsaʼʌch i wen ñopo? Tsaʼ bʌ i colta, jin cheʼ Jesús tsaʼʌch chaʼ tejchi (Hechos 17:31). Jin chaʼan, Pablo tsiʼ yʌlʌ chaʼan Jesús jiñʌch jiñi «ñaxan bʌ» tsaʼ chʼojyi chaʼan miʼ chumtʌl tiʼ pejtelel ora. Mi Jesús jiñʌch jiñi ñaxam bʌ tsaʼ chaʼ chʼojyi, miʼ yʌqʼueñonla lac ñaʼtan chaʼan miʼ cajel yambʌ chaʼ chʼojyel.

An yambʌ chucoch miʼ mejlel lac ñop chaʼan mucʼʌch i cajel jiñi chʼojyel: Jehová, juntiquil Dios isujm bʌ, «mach [...] yujilic lot» (Tito 1:2). Maʼañic an i chaʼle lot i maʼañic baqui ora miʼ cajel ti lot. Jin chaʼan, ¿muʼ ba caj i toʼol acʼ i tʼan Dios maʼ wʌl chaʼan mi caj i chaʼ chʼojyesan chʌmeñoʼ bʌ, miʼ lon pʌs chaʼan an i pʼʌtʌlel, pero maʼañic miʼ tsʼʌctesan i tʼan? Maʼañic miʼ mejlel lac ñop bajcheʼ jiñi.

Chaʼan i cʼuxbiya Jehová, tsaʼix i ñaʼta i chaʼ chʼojyesan jiñi chʌmeñoʼ bʌ. Job tsiʼ cʼajtibe: «Cheʼ mic chʌmel [...] ¿muʼ ba caj c chaʼ cuxtʌyel? [...] Mi cheʼʌch, mi caj c jacʼ baʼ ora maʼ pʌyon, come tiʼ yutslel a pusicʼal mi caj a cʼajtesan a wiñic tsaʼ bʌ a mele» (Job 14:14, 15). Job tsiʼ ñopo tiʼ pusicʼal chaʼan jiñi i Tat am bʌ ti panchan wen yomʌch i chaʼ tejchesan. ¿Chʌn cheʼʌch ba yom Dios bajcheʼ jiñi? Jiñi Biblia miʼ yʌl: «Joñon laʼ Yumon [Jehová]. Maʼañic miʼ qʼuextʌyel c pusicʼal» (Malaquías 3:6). Cheʼʌchi, Dios chʌn yomʌch i tejchesan jiñi chʌmeñoʼ bʌ chaʼan miʼ chumtʌlob ti tijicña. Jiñʌch yom bʌ juntiquil tatʌl tiʼ tojlel juntiquil i yalobil sajtem bʌ i chaʼan. Pero Dios mach cojach yom i mel jiñi, añʌch i pʼʌtʌlel chaʼan miʼ mel (Salmo 135:6).

 Jehová mi caj i yʌqʼuen i pʼʌtʌlel i yalobil chaʼan miʼ tejchesan jiñi chʌmeñoʼ bʌ, i jiñi mi caj i wen tijicñesan jiñi am bʌ i sʌtʌyob majqui wen cʼuxbibil i chaʼañob. I miʼ wen aqʼuen i tijicñʌyel Jesús jaʼel. ¿Bajcheʼ mi lac ñaʼtan jiñi? Cheʼ bʌ maxto i chaʼ chʼojyesa Lázaro, Jesús «tsiʼ chaʼle uqʼuel» cheʼ bʌ tsiʼ qʼuele i chʼijiyemlel woli bʌ i ñusan i chichob yicʼot i yamigojob (Juan 11:35). Ti yambʌ ora, cheʼ bʌ tsiʼ qʼuele juntiquil mebaʼ xʼixic tsaʼ bʌ chʌmi cojach bʌ i yalobil, Jesús «tsiʼ pʼunta, [...]. Tsiʼ sube: ‹Mach maʼ chaʼlen uqʼuel›». Ti ora tsiʼ chaʼ chʼojyesa jiñi alob (Lucas 7:13). Ti ili muʼ bʌ i yʌjlel ti Biblia miʼ mejlel laj cʌn chaʼan Jesús cʼux miʼ yubin jiñi wocol muʼ bʌ lac ñusan tiʼ caj jiñi chʌmel. Jin chaʼan, ¡wen tijicña mi caj i yubin cheʼ bʌ miʼ sujtesan jiñi chʼijiyemlel ti tijicñʌyel cheʼ bʌ miʼ chaʼ tejchesan jiñi chʌmeñoʼ bʌ!

¿Am ba sajtem juntiquil muʼ bʌ a wen cʼuxbin? Tajol maʼ ñaʼtan chaʼan jiñi chʌmel jiñʌch jumpʼejl wocol maʼañic bʌ miʼ mejlel ti tojʼesʌntel. Pero añʌch: Dios mi caj i chaʼ chʼojyesan jiñi chʌmeñoʼ bʌ, i tsiʼ yʌqʼue tiʼ wenta i Yalobil chaʼan miʼ mel. Yom cʼajal a chaʼan: Dios yom chaʼan yaʼañet ti jiñi bʌ ora chaʼan maʼ pejcan jiñi a piʼʌlob muʼ bʌ a wen cʼuxbiñob. Ñaʼtancu chaʼan woli laʼ temel al muʼ bʌ caj laʼ mel ti talto bʌ qʼuin, baqui maʼañix mi caj laʼ chʌn suben laʼ bʌ: Yan to bʌ ora.

Lionel, tsaʼ bʌ ajli yaʼ ti ñaxam bʌ temaj, miʼ yʌl: «Maʼañic tsaʼ mejli c ñop mi isujmʌch cheʼ bʌ tsiʼ subeyoñob chaʼan jiñi chaʼ chʼojyel, i tsaʼ c ñaʼta chaʼan woli jach i lotiñoñob. Pero tsaʼ j qʼuele yaʼ ti Biblia chaʼan isujmʌch. ¡Comix c chaʼ qʼuel jiñi c tatuch (yum)!».

¿A wom baʼ ñumen cʌn? Jiñi i testigojob Jehová wen tijicña mi caj i yubiñob cheʼ miʼ pʌsbeñetob yaʼ ti Biblia chucoch miʼ ñopob chaʼan jiñi chʌmeñoʼ bʌ mi caj i chaʼ tejchelob. a