I JACʼBAL JIÑI BIBLIA: «Tal i yorajlel cheʼ mi caj i yubibeñob i tʼan [Jesús] i Yalobil Wiñic jiñi añoʼ bʌ ti mucoñibʌl. [...] mi caj i chʼojyelob loqʼuel» (Juan 5:28, 29).

Jesucristo tsiʼ wʌn alʌ chaʼan cheʼ bʌ miʼ cajel ti yumʌntel mi caj i jochtesan jiñi mucoñibʌl tac cheʼ ti talto bʌ qʼuin. Fernando, tsaʼ bʌ ajli yaʼ ti ñaxam bʌ temaj, tsiʼ cʼajtesa: «Toj sajtel c pusicʼal cheʼ bʌ tsac pejca Juan 5:28, 29. Jiñʌch jumpʼejl pijtaya wen tsiquil bʌ, i ñumen utsʼatix bajcheʼ tsaʼ caji j qʼuel jiñi talto bʌ qʼuin».

Jiñi xucʼul bʌ Job tsiʼ ñopo chaʼan mucʼʌch caj i cʼotel i yorajlel chaʼan Dios mi caj i chaʼ aqʼuen i cuxtʌlel. Job tsiʼ cʼajti: «Cheʼ mic chʌmel [...], ¿muʼ ba caj c chaʼ cuxtʌyel?». Cheʼ jiñi tsiʼ yʌlʌ tiʼ pejtelel i pusicʼal: «Mi mejlel j cuch wocol cʼʌlʌl miʼ joloñel anquese jal to mi cʼotel i yorajlel. [...] Mi caj c jacʼ baʼ ora maʼ pʌyon» (Job 14:14, 15).

Marta, i chich jiñi Lázaro, wen i cʌñʌyʌch jiñi pijtaya chaʼan bʌ chaʼ chʼojyel. Cheʼ bʌ Lázaro tsaʼ chʌmi (sajti), Jesús tsiʼ sube Marta: «Mi caj i chaʼ chʼojyel a wʌscun». Marta tsiʼ jacʼʌ: «Cujil mi caj i chaʼ chʼojyel ti jiñi cojix bʌ qʼuin». Cheʼ jiñi Jesús tsiʼ sube: «Joñon Xtech Chʼujlelʌlon [o chʌmeñoʼ bʌ], i cuxtʌlelon jiñi añoʼ bʌ ti pañimil. Jiñi muʼ bʌ i ñopon, anquese miʼ chʌmel, mi caj i chaʼ cuxtʌyel» (Juan 11:23-25). Ti wiʼil, Jesús tsiʼ chaʼ chʼojyesa Lázaro. Ili miʼ yʌqʼueñonla lac ñaʼtan chuqui miʼ cajel ti talto bʌ qʼuin. ¡Wen tijicña jax cheʼ mi caj laj qʼuel chaʼan tiʼ pejtelel pañimil (mulawil) miʼ chaʼ chʼojyel cabʌl millón wiñicob xʼixicob (quixtañujob)!

I JACʼBAL JIÑI BIBLIA: Jiñi i Tʼan Dios miʼ pʌs chaʼan bajcheʼ tsaʼ chʼojyi Jesús mach lajalic bajcheʼ jiñi yambʌ 8 muʼ bʌ i yʌjlel. ¿Chucoch? Come jiñi 8 quixtañujob wʌʼ tsaʼ chʼojyiyob ila ti Pañimil. Pero jiñi Biblia miʼ yʌl bajcheʼ tsaʼ chaʼ chʼojyi Jesucristo: «Tsaʼix majli ti panchan yaʼ tiʼ ñoj Dios» (1 Pedro 3:21, 22). ¿I bajñel ba tsaʼ chʼojyi Jesús chaʼan miʼ chumtʌl ti panchan? Maʼañic, come tsaʼix i wʌn sube jiñi xcʌntʼañob i chaʼan: «Mi tsaʼix majli c chajpan laʼ wajñib, chaʼ talon c pʌyetla majlel baʼ añon, chaʼan yaʼ baʼ añon, yaʼ añetla jaʼel» (Juan 14:3).

Jesucristo tsaʼ majli ti panchan, i tsaʼ caji i chajpan bajcheʼ miʼ cʼotel jiñi xcʌntʼañob i chaʼan. Jiñi Biblia miʼ yʌl chaʼan muʼ bʌ caj i majlelob ti  panchan jiñobʌch 144,000 (Apocalipsis [Revelación] 14:1, 3). Pero ¿chuqui mi caj i melob yaʼi?

Añʌch cabʌl chuqui mi caj i melob. Jiñi Biblia miʼ yʌl: «Tijicñayob muʼ bʌ i tejchelob chʼojyel ti ñaxan. Chʼujulob. Maʼañic mi caj i chʌmelob tiʼ chaʼyajlel. Mi caj i yochelob ti motomaj tiʼ tojlel Dios yicʼot tiʼ tojlel Cristo. Mi caj i tem chaʼleñob yumʌl yicʼot Cristo lujuncʼal i yuxbajcʼ jab» (Apocalipsis 20:6). Yumʌlob yicʼot xmotomaj miʼ cajelob tiʼ pejtelel, i temel miʼ cajelob ti yumʌntel yicʼot Jesús wʌʼ ti Pañimil.

I JACʼBAL JIÑI BIBLIA: Jiñi Tsʼijbujel miʼ yʌl ili tsaʼ bʌ i yʌlʌ Pablo: «Añʌch c pijtaya ti Dios, jiñi jach muʼ bʌ i ñopob jaʼel, come tal i yorajlel cheʼ mi caj i chʼojyelob jiñi chʌmeñoʼ bʌ, jiñi tojoʼ bʌ yicʼot jiñi mach bʌ tojobic» (Hechos 24:15).

¿Majqui jiñi «tojoʼ bʌ» tsaʼ bʌ i yʌlʌ Pablo? Laʼ lac ñaʼtan chaʼan jiñi Daniel. Ili xucʼul bʌ xʼaltʼan, tsaʼ subenti ti Dios cheʼ bʌ lʌcʼʌlix mi caj i chʌmel: «Cʼaja a wo. Ti cojix bʌ qʼuin mi caj a tejchel chaʼan maʼ chʼʌm a chobejtʌbal» (Daniel 12:13). ¿Baqui mi caj i chaʼ tejchel Daniel? Jiñi Biblia miʼ yʌl: «Mi caj i yʌqʼuentelob jiñi pañimil jiñi tojoʼ bʌ. Mi caj i yajñelob ti pejtelel ora» (Salmo 37:29). Cheʼ jaʼel, Jesús tsiʼ wʌn alʌ: «Tijicñayob jiñi pecʼ bʌ miʼ melob i bʌ, come mi caj i yʌqʼuentelob pañimil» (Mateo 5:5). Daniel yicʼot yambʌ xucʼul bʌ i wiñicob Dios mi caj i tejchelob chaʼan miʼ chumtʌlob wʌʼ ti Pañimil yicʼot chaʼan miʼ mejlel i tajob i cuxtʌlel maʼañic bʌ miʼ jilel.

¿I majqui jiñi «mach bʌ tojobic»? Jiñʌch jiñi cabʌl millón chʌmeñoʼ bʌ maʼañic bʌ tsaʼ mejli i cʌñob jiñi cʌntesʌntel tac am bʌ ti Biblia yicʼot maʼañic bʌ tsaʼ mejli i chumtañob. Cheʼ bʌ miʼ chaʼ tejchelob mi caj i cʌñob majqui Jehová a yicʼot Jesucristo, i mi caj i mejlel i cʼuxbiñob (Juan 17:3). Jiñi muʼ bʌ i yajcañob i melben i yeʼtel Jehová mi caj i chumtʌlob tiʼ pejtelel ora.

I JACʼBAL JIÑI BIBLIA: Dios «mi caj i sujcubeñob i yaʼlel i wut. Maʼañix majch miʼ caj ti chʌmel. Maʼañix ucʼtaya mi uqʼuel mi wocol ti pejtelel ora» (Apocalipsis 21:4). «Wiñicob mi caj i waʼchocoñob i yotot. Yaʼi mi caj i chumtʌlob. [...] Cheʼ miʼ pʌcʼob tsʼusubil, mi caj i cʼuxbeñob i wut.» (Isaías 65:21.)

¡Ñaʼtancu cheʼ yaʼañet yicʼot a piʼʌlob muʼ bʌ a wen cʼuxbiñob ti jumpʼejl Pañimil bajcheʼ jiñi! Pero anto jumpʼejl cʼajtiya: ¿Chucoch miʼ mejlel lac ñop chaʼan mucʼʌch caj i chaʼ tejchel jiñi chʌmeñoʼ bʌ?