1. ¿Chuqui ti qʼuin chumulonla ili ora?

 WEN wocol chumulonla ili ora. Ti 1914 tsaʼ tejchi jiñi «cojix bʌ qʼuin» ti ili pañimil (mulawil). Cʼʌlʌ ti jiñi ora ñumen pʼojlem tilel wocol (2 Timoteo 3:1-5). La cujilix chaʼan muʼto caj i ñumen tsʌtsʼan tilel jiñi wocol come jiñi Biblia tsiʼ wʌn alʌ chaʼan jiñi wiñicob xʼixicob (quixtañujob) ñumen jontol miʼ cajelob ili ora (2 Timoteo 3:13).

2. ¿Chuqui miʼ melob jiñi quixtañu ili ora chaʼan miʼ tijicñesañob i bʌ? (Qʼuele jiñi foto tac am bʌ tiʼ tejchibal.)

² Ili ora, yonlel quixtañu miʼ tajob i tijicñʌyel tiʼ melol muʼ bʌ i tsʼaʼlen Jehová, bajcheʼ jiñi jatsʼ, tsʼiʼlel yicʼot tiʼ melol magia baqui ochem jiñi xibajob. Wen utsʼatax yilal cheʼ miʼ qʼuejlel yaʼ ti Internet, ti televisión, ti cine, o miʼ pejcʌntel yaʼ ti libro yicʼot ti revista tac. An país tac baqui an i yʌlʌyob chaʼan yomix miʼ qʼuejlel ti wen ili ora jiñi mach bʌ weñic miʼ qʼuejlel ti wajali. Pero i mandar Jehová maʼañic qʼuextʌyem, woli (choncol) i chʌn tsʼaʼlen jiñi jontolil (pejcan Romanos 1:28-32).

3. ¿Chuqui miʼ ñaʼtan yonlel quixtañu chaʼan jiñi muʼ bʌ i jacʼbeñob i mandar Dios?

³ Cheʼ tiʼ yorajlel jiñi ñaxam bʌ xñoptʼañob, i ñusaqʼuin jiñi quixtañujob  jiñʌch i melol jontolil yicʼot tsʼiʼlel. Pero jiñi xñoptʼañob mach cheʼic tsiʼ meleyob come tsiʼ jacʼbeyob i mandar Dios. Jin chaʼan, tsiʼ tajayob wajlentel yicʼot ticʼlʌntel come tsaʼ qʼuejli chaʼan yʌñʌlob (1 Pedro 4:4). Ili ora jaʼel mi lac jacʼben i mandar Dios. Jin chaʼan yonlel quixtañu miʼ ñaʼtañob chaʼan yʌñʌlonla. Jiñi Biblia miʼ subeñonla chaʼan mi caj i ticʼlʌntel jiñi woli (yʌquel) bʌ i tsajcañob majlel Cristo (2 Timoteo 3:12).

4. ¿Chuqui mach bʌ yomic mi lac mel mi com lac jacʼben i mandar Dios?

⁴ Mi com lac jacʼben i mandar Dios, maʼañic miʼ mejlel laj «cʼuxbin i chaʼan bʌ pañimil mi chuqui an ti pañimil» (pejcan 1 Juan 2:15, 16). Jiñi Biblia miʼ yʌl chaʼan ili pañimil an tiʼ cʼʌb Satanás. Chaʼan miʼ lotin jiñi quixtañujob miʼ cʼʌn jiñi ñopbalʌl tac, yumʌlob ti pañimil, jiñi cabʌl choñoñel o jiñi muʼ bʌ i ñumel ti televisión o ti yan tac bʌ (2 Corintios 4:4; 1 Juan 5:19). Yom mi laj qʼuel majqui mi lac tsajcan ti xʌmbal mi mach la comic chaʼan ili pañimil miʼ lotiñonla. Jin chaʼan, jiñi Biblia miʼ subeñonla chaʼan mach la cʌcʼ lac bʌ ti lotintel, «jiñi jontoloʼ bʌ lac piʼʌlob miʼ bibʼesañob lac pusicʼal» (1 Corintios 15:33). (Qʼuele jiñi recuadro «¿Chuqui yom i yʌl?».)

5, 6. a) ¿Majqui mach bʌ yomic mi lac pʌy ti la camigo? b) ¿Chucoch mach yomic mi lac pʌy ti la camigo jiñi muʼ bʌ i mel jontolil?

⁵ Mi la com chaʼan chʌn i yamigojonla Dios, mach yomic mi lac pʌy ti la camigo jiñi muʼ bʌ i melob jontolil. Cheʼ jaʼel mach mejlic lac pʌy ti la camigo jiñi muʼ bʌ i yʌlob chaʼan miʼ melbeñob i yeʼtel (troñel) Dios pero maʼañic miʼ jacʼbeñob i mandar. Jin chaʼan, mi an juntiquil miʼ chaʼlen tsʌts bʌ mulil i maʼañic miʼ cʌy, maʼañix mi caj lac pejcan yicʼot lac tsajcan (Romanos 16:17, 18).

⁶ Mi juntiquil muʼ bʌ i mel jontolil mi lac sujtesan ti la camigo, tajol cheʼ mi caj lac mel jaʼel ti wiʼil. ¿Chucoch? Come jiñi wiñicob xʼixicob miʼ mulan i lajiñob jiñi i yamigojob chaʼan maʼañic chuqui miʼ subentelob. Jumpʼejl ejemplo, mi tsaʼ lac pʌyʌ ti la camigo muʼ bʌ i mel tsʼiʼlel, tajol ti wiʼil mi caj lac mel jaʼel. An cabʌl i testigojob Jehová cheʼ bʌ ujtemob bajcheʼ jiñi. An tsaʼ bʌ i cʌyʌyob i mul, pero an maʼañic bʌ tsiʼ cʌyʌyob i tsaʼ chaʼlentiyob ti expulsar yaʼ ti congregación (1 Corintios 5:11-13). Mi maʼañic miʼ cʌyob i mul, mi caj i yujtelob bajcheʼ miʼ yʌl 2 Pedro 2:20-22 (pejcan).

7. ¿Majqui yom mi lac sujtesan ti la camigo?

⁷ Tiʼ sujm yom mi lac pʌs laj cutslel tiʼ tojlel yañoʼ bʌ. Pero mach yomic lac sujtesan ti la camigo jiñi maʼañic bʌ miʼ jacʼben i mandar Dios. Jumpʼejl ejemplo, mach weñic cheʼ bʌ juntiquil i testigo Jehová miʼ yajcan tiʼ novio juntiquil maʼañic bʌ chʼʌmʌl i chaʼan jaʼ. Ñumen ñuc cheʼ i yamigojonla Dios, i mach jiñic cheʼ i yamigojonla jiñi maʼañic bʌ miʼ cʼuxbin Jehová. Cojach yom mi lac sujtesan ti la camigo jiñi chumuloʼ bʌ bajcheʼ yom Dios. Jesús tsiʼ yʌlʌ: «Majqui jach miʼ chaʼlen chuqui yom Dios, jiñʌch quijtsʼin» (Marcos 3:35).

8. ¿Chuqui tsiʼ chaʼle jiñi israelob chaʼan tsiʼ piʼleyob ti xʌmbal jiñi jontoloʼ bʌ?

⁸ Jiñi muʼ bʌ i piʼleñob ti xʌmbal jiñi jontoloʼ bʌ, mi yotsañob i bʌ ti tsʌts bʌ wocol. Jumpʼejl ejemplo, Jehová tsiʼ sube jiñi israelob cheʼ bʌ muʼto caj i cʼotelob ti jiñi Lum tsaʼ bʌ Wʌn subentiyob chaʼan maʼañic miʼ tem ajñelob yicʼot jiñi quixtañujob chumuloʼ bʌ yaʼi. Tsiʼ yʌlʌ: «Mach yomic mi laʼ chʼujutesan i diosteʼ tac. Mach yomic mi laʼ chaʼlibeñob i yeʼtel. Mach yomic mi laʼ mel cheʼ bajcheʼ i melbalob. Yom mi laʼ jisañob ti pejtelelob. Yom mi laʼ jem pejtelel i diosteʼ tac. Joñon a Yumon a Dioson. Yom mi laʼ melbeñon queʼtel» (Éxodo 23:24, 25). Pero lʌcʼʌl tiʼ pejtelel jiñi israelob maʼañic tsiʼ jacʼʌyob  i tsiʼ meleyob tsʌts bʌ mulil (Salmo 106:35-39). ¿Chuqui tsaʼ ujti ti wiʼil? Jehová tsiʼ yajca yambʌ i tejclum, jiñʌch jiñi congregación chaʼan xñoptʼañob i mach jiñix jiñi israelob (Mateo 23:38; Hechos 2:1-4).

9. ¿Chucoch an película, jun tac, cʼayʌl tac yicʼot página chaʼan Internet muʼ bʌ mejlel i yʌcʼonla ti wocol?

⁹ An cabʌl película, revista, programa muʼ i qʼuejlel ti televisión, música tac yicʼot página chaʼan Internet yom bʌ mi lac wen tsajin, come miʼ mejlel i jisan majlel laj cʼuxbiya ti Dios. Lajal bajcheʼ jiñi jontoloʼ bʌ, miʼ mejlel i yʌqʼueñonla lac ñaʼtan chaʼan lac pijtaya yaʼʌch an tiʼ pañimil Satanás i mach ti Jehová. Jin chaʼan yom mi lac wen cʌntan lac bʌ. Maʼañic baqui ora yom mi laj qʼuel o mi lac ñʌchʼtan muʼ bʌ i mejlel i yʌqʼueñonla lac mulan chuqui am bʌ ti pañimil (Tito 2:12).

10. ¿Chuqui mi caj i chaʼlen jiñi película tac, jun tac, cʼayʌl tac yicʼot página chaʼan Internet muʼ bʌ i pʌs jontolil?

¹⁰ Mach jalix mi caj i jisʌntel i pañimil Satanás yicʼot maʼañix miʼ cajel película tac, jun tac yicʼot página chaʼan Internet muʼ bʌ i pʌs jontolil. Jiñi Biblia miʼ yʌl chaʼan mi caj i jisʌntel ili pañimil, pero mi caj i yajñel tiʼ pejtelel ora jiñi muʼ bʌ i melob chuqui yom Dios (1 Juan 2:17). Jiñi Salmos miʼ yʌl chaʼan mi caj i jisʌntel jiñi jontoloʼ bʌ, pero mi caj i chʌn chumtʌlob wʌʼ ti Pañimil tiʼ tijicñʌyel yicʼot tiʼ ñʌchʼtʌlel jiñi mach bʌ jontolobic (Salmo 37:9, 11, 29).

11. ¿Bajcheʼ miʼ coltañonla Jehová chaʼan chʌn xucʼul mi laj cajñel?

¹¹ Jesús tsiʼ yʌlʌ ti jumpʼejl oración chaʼan yom mi lac ñumen cʌn Jehová yicʼot i Yalobil mi la com chumtʌl tiʼ pejtelel ora (Juan 17:3). Dios mi caj i coltañonla chaʼan mi laj cʌn yicʼot chaʼan chʌn xucʼul mi laj cajñel. ¿Bajcheʼ? Tiʼ tojlel i yorganización. Miʼ chajpan jun tac, video tac yicʼot página chaʼan Internet chaʼan miʼ cʌntesañonla chuqui yom bʌ mi lac mel chaʼan mi lac chumtʌl tiʼ pejtelel ora, i mach lajalic chuqui miʼ mel i pañimil Satanás. Cheʼ jaʼel, jiñi organización miʼ cʌntesañonla ti jiñi tempa bʌ tac muʼ bʌ i mejlel ñumen ti 110 mil congregación tiʼ pejtelel pañimil. Muʼ bʌ laj cʌn yaʼ ti tempa bʌ yicʼot ti jiñi colem tempa bʌ tac miʼ coltañonla lac ñumen ñop ti Jehová yicʼot jiñi albil bʌ i chaʼan (Hebreos 10:24, 25).

12. ¿Chuqui i sujmlel cheʼ cojach yom mi lac ñujpuñel «ti lac Yum»?

¹² Mi comixla ñujpuñel, yom mi laj qʼuel majqui la quicʼot. Jiñi Biblia miʼ subeñonla chaʼan mach yomic mi lac tech laj cʌn juntiquil maʼañic bʌ miʼ melben i yeʼtel Dios come mach lajaloñicla, lajal bajcheʼ i sʌclel pañimil yicʼot jiñi icʼyochʼan bʌ (2 Corintios 6:14). Cheʼ jaʼel, miʼ subeñonla chaʼan cojach yom mi lac ñujpuñel «ti lac Yum» (1 Corintios 7:39). Ili yom i yʌl chaʼan mi caj lac ñujpuñel la quicʼot juntiquil i testigojix bʌ Jehová muʼ bʌ i qʼuel ti ñuc i mandar Dios. Cheʼ mi lac ñujpuñel la quicʼot juntiquil muʼ bʌ i cʼuxbin Jehová, mi caj i coltañonla chaʼan chʌn xucʼul mi la cajñel yicʼot Dios.

13. ¿Chuqui tsaʼ subenti jiñi israelob ti Jehová?

¹³ Jehová yujil chuqui ñumen wem bʌ chaʼañonla. Miʼ chʌn suben i wiñicob chaʼan cojach yom miʼ ñujpuñelob yicʼot muʼ bʌ i melbeñob i yeʼtel. Jumpʼejl ejemplo, Jehová tsiʼ sube jiñi israelob chaʼan maʼañic miʼ ñujpuñelob yicʼot jiñi muʼ bʌ i chʼujutesañob yan tac bʌ dios. ¿Chucoch? Come mi caj i melob chaʼan jiñi israelob miʼ chʼujutesañob yan tac bʌ dios. Cheʼ jaʼel, tsaʼ wʌn subentiyob chaʼan mi maʼañic miʼ jacʼbeñob i tʼan Jehová mi caj i michʼan yicʼot mi caj i jisañob (Deuteronomio 7:3, 4).

14, 15. ¿Chuqui tsaʼ ujti tiʼ tojel Salomón cheʼ tsiʼ ñusa ti pʼis i mandar Jehová?

¹⁴ Cheʼ bʌ tsaʼ sujti Salomón ti rey chaʼan  Israel, tsiʼ cʼajtibe Jehová chaʼan miʼ yʌqʼuen cabʌl i ñaʼtʌbal. Jehová tsiʼ jacʼbe i yoración, tsiʼ yʌqʼue cabʌl i ñaʼtʌbal yicʼot cabʌl i chubʌʼan i tsaʼ wen cʼoti ti cʌjñel. Jiñi Biblia miʼ yʌl cheʼ bʌ juntiquil yumʌl bʌ xʼixic tilem bʌ ti yambʌ país tsaʼ subenti chaʼan Salomón cabʌl i ñaʼtʌbal yicʼot i chubʌʼan, jin chaʼan tsaʼ majli i qʼuel. Cheʼ bʌ tsaʼ cʼoti i cʌn, toj sajtel i pusicʼal (1 Reyes 10:7). Anquese Salomón tsaʼ cʌjñi bajcheʼ jiñi, ti wiʼil an chuqui tsiʼ mele muʼ bʌ i pʌsbeñonla chuqui miʼ mejlel ti ujtel mi maʼañic mi lac jacʼ i tʼan Dios, i mi lac ñujpuñel la quicʼot maʼañic bʌ miʼ melben i yeʼtel (Eclesiastés 4:13).

¹⁵ Anquese Jehová tsiʼ yʌqʼue cabʌl i chubʌʼan Salomón, maʼañic tsiʼ jacʼbe i tʼan, i tsiʼ «chaʼle ñujpuñel yicʼot yañoʼ bʌ». ¡Tsaʼ cʼoti i pʌy 1,000 xʼixicob! ¿Chuqui tsiʼ chaʼle cheʼ bʌ tsiʼ ñusʌbe ti pʼis i mandar Jehová? Jiñi xʼixicob tsiʼ yʌcʼʌyob chaʼan Salomón miʼ cʌy i melben i yeʼtel Jehová tiʼ xucʼtʌlel cheʼ bʌ tsaʼ ñoxʼa (1 Reyes 11:1-6). Mi cheʼ tsaʼ ujti tiʼ tojlel Salomón wen am bʌ i ñaʼtʌbal, miʼ mejlel ti ujtel ti lac tojlel jaʼel. Jin chaʼan, mach yomic mi lac tsʼitaʼ ñaʼtan ñujpuñel la quicʼot juntiquil mach bʌ añic miʼ cʼuxbin Jehová.

16. ¿Chuqui yom miʼ mel juntiquil ñujpuñem bʌ yicʼot mach bʌ i testigojic Jehová?

¹⁶ ¿Chuqui miʼ mejlel ti ujtel mi juntiquil miʼ sujtel tiʼ testigo Jehová, pero ñujpuñem yicʼot mach bʌ Testigojic? Jiñi Biblia miʼ suben jiñi xʼixicob: «Yom mi laʼ wʌcʼ laʼ bʌ ti utsʼat tiʼ wenta laʼ ñoxiʼal. Cheʼ jiñi, mi maʼañic miʼ ñopob laʼ ñoxiʼal, mi caj i ñopob chaʼan utsʼat bʌ laʼ melbal, mach chaʼañic laʼ tʼan» (1 Pedro 3:1). ¿Chuqui yom i yʌl iliyi? Mi jiñi xʼixic woliʼ chaʼlen wersa i mel ti wen i yeʼtel yicʼot miʼ jacʼ jiñi ticʼojel am bʌ ti Biblia, tajol mi caj i qʼuejlel tiʼ ñoxiʼal chaʼan ñumen wen woliʼ mel i yeʼtel i ti wiʼil miʼ sujtel ti juntiquil i testigo Jehová jiñi i ñoxiʼal. Cabʌl ñujpuñemoʼ bʌ an ujtemob bajcheʼ iliyi.  Cheʼ jaʼel, jiñi ticʼojel am bʌ ti 1 Pedro 3:1 miʼ cʼʌjñibʌyel i chaʼan jiñi hermanojob ñujpuñemoʼ bʌ yicʼot juntiquil mach bʌ i testigojic Jehová.

17, 18. a) ¿Chuqui tsiʼ colta Noé chaʼan maʼañic miʼ chʌmel ti jiñi Colem Butʼjaʼ? b) ¿Chuqui tsiʼ colta chaʼan maʼañic miʼ chʌmelob jiñi ñaxam bʌ xñoptʼañob cheʼ bʌ tsaʼ jisʌnti Jerusalén?

¹⁷ Cheʼ mi lac tsajcan jiñi mach bʌ weñobic ti la camigo miʼ mejlel i ñajtʼesañoñobla ti Jehová. Pero jiñi wem bʌ la camigojob, miʼ coltañoñobla ti chʌn ajñel ti xucʼul. Laʼ lac ñaʼtan tiʼ tojlel Noé. Ti jiñi bʌ ora, jiñi quixtañujob cojach miʼ ñaʼtañob tiʼ melol chuqui jontol bʌ tiʼ pejtelel ora (Génesis 6:5). Jiñi wiñicob xʼixicob wen jontolob, jin chaʼan Jehová tsiʼ yʌlʌ chaʼan miʼ jisan tiʼ pejtelelob. Pero jiñi Biblia miʼ yʌl chaʼan Noé juntiquilʌch wiñic toj bʌ yicʼot tsaʼ bʌ i jacʼbe i tʼan Jehová tiʼ pejtelel ora (Génesis 6:7-9). ¿Bajcheʼ tsaʼ mejli ti ajñel ti chʌn xucʼul?

¹⁸ Noé maʼañic baqui ora tsiʼ piʼle ti xʌmbal jiñi maʼañic bʌ miʼ cʼuxbiñob Jehová. Tsaʼ bʌ i mele, tsaʼ chʌn ajñi yicʼot i yijñam, i yalobilob yicʼot yʌʼlibob, i temel tsaʼ caji i melob jiñi arca yicʼot subtʼan (2 Pedro 2:5). Jiñʌch tsaʼ bʌ i coltayob chaʼan maʼañic miʼ chʌmelob ti jiñi Colem Butʼjaʼ. Ti lac pejtelel tilemonla ti Noé yicʼot tiʼ familia. Jin chaʼan, yom mi la cʌqʼueñob wocolix i yʌlʌ chaʼan tsiʼ jacʼbeyob i tʼan Dios i maʼañic tiʼ tsajcayob ti xʌmbal jiñi mach bʌ weñobic ti la camigo. Cheʼ jaʼel, jiñi ñaxam bʌ xñoptʼañob maʼañic tsiʼ piʼleyob ti xʌmbal jaʼel jiñi maʼañic bʌ miʼ cʼuxbiñob Jehová come tsiʼ jacʼbeyob i tʼan Dios. Jiñʌch tsaʼ bʌ i coltayob chaʼan maʼañic miʼ chʌmelob cheʼ bʌ Jerusalén tsaʼ jisʌnti cheʼ ti jabil 70 (Lucas 21:20-22).

19. ¿Chuqui yom mi lac mel mi chʌn xucʼul la com ajñel yicʼot Jehová?

¹⁹ ¿Chuqui yom mi lac mel mi chʌn xucʼul la com ajñel yicʼot Jehová ti ili cojix bʌ qʼuin? (1 Corintios 16:13; Proverbios 13:20.) Yom mi lac mel cheʼ bajcheʼ tsiʼ mele Noé, i familia yicʼot jiñi ñaxam bʌ xñoptʼañob. Maʼañic baʼ ora yom mi lac pʌy ti la camigo jiñi maʼañic bʌ miʼ cʼuxbiñob Jehová. Yom cʼajal lac chaʼan, an yonlel xucʼuloʼ bʌ la quermañojob muʼ bʌ i mejlelob ti sujtel ti la camigo. Miʼ coltañoñobla chaʼan chʌn xucʼul mi la cajñel i maʼañic chuqui mi lac chaʼlen cheʼ bʌ miʼ jisʌntel jiñi pañimil i mi lac chumtʌl yaʼ ti Paraíso. Jin chaʼan, ti ili cojix bʌ qʼuin laʼ lac yajcan wem bʌ la camigojob.