1, 2. a) ¿Chucoch maʼ ñop chaʼan Jehová mucʼʌch i cʼuxbin i wiñicob? b) ¿Chuqui i cʼʌjñibal lac chaʼan ti lac pejtelel?

 ¿MUʼ baʼ ñop ti a pusicʼal chaʼan Jehová miʼ cʼuxbin i wiñicob? Ñaʼtan ili ejemplo tac. Juntiquil hermana i cʼabaʼ Taylene wen tsʌts jax miʼ mel i bʌ tiʼ tojlel cheʼ an chuqui yom, i cheʼ bʌ maʼañic miʼ mejlel, miʼ taj i chʼijiyemlel. Jiñi hermanojob cabʌl jabil tsiʼ coltayob yicʼot cʼuxbiya chaʼan mach wen tsʌtsic yom miʼ mel i bʌ tiʼ tojlel. Miʼ yʌl chaʼan machic miʼ cʼuxbin Jehová, maʼañic miʼ yʌqʼuen i tijicñʌyel i pusicʼal yicʼot ticʼojel. Yambʌ hermana i cʼabaʼ Brigitte tsaʼ mebaʼ cʌyle yicʼot chaʼtiquil i yalobil. Miʼ yʌl chaʼan i cosʌntel alʌlob ti ili pañimil (mulawil) jiñʌch junchajp wen wocol bʌ, ñumento tiʼ tojlel jiñi tatʌl o ñaʼʌl i bajñel jach bʌ. Pero yujil chaʼan Jehová miʼ cʼuxbin come coltʌbil i chaʼan tiʼ ñusʌntel i cʼuxel jiñi wocol tac yicʼot i chʼijiyemlel, i maʼañic an i cʌyʌ chaʼan miʼ yilan wocol mach bʌ mejlic i cuch (1 Corintios 10:13). Yambʌ hermana i cʼabaʼ Sandra, an jumpʼejl i cʼamʌjel maʼañic bʌ i tsʼʌcal. Ti jumpʼejl colem tempa bʌ, tsiʼ lʌcʼtesa i bʌ juntiquil hermana mach bʌ i cʌñʌyic chaʼan miʼ pejcan yaʼ baqui an. I ñoxiʼal Sandra miʼ yʌl chaʼan tsiʼ wen ñijcʌbe i pusicʼal. Miʼ yʌl chaʼan jinto ti jiñi mach bʌ wen ñuquic chuqui miʼ mel jiñi hermanojob tiʼ tojlelob miʼ yubiben i cʼuxbiya Jehová.

 ² Ti lac pejtelel com laj cʼuxbintel yicʼot yom mi lac pʌs jaʼel come cheʼʌch tsiʼ meleyonla Jehová. Pero mi cʼamonla, an lac wocol chaʼan taqʼuin o maʼañic majqui miʼ ñʌchʼtañonla ti subtʼan, miʼ mejlel lac taj lac chʼijiyemlel yicʼot muʼto i mejlel lac ñaʼtan chaʼan Jehová maʼañix miʼ cʼuxbiñonla. Mi cheʼ mi la cubin yom mi laj cʼajtesan chaʼan mucʼʌch i chʼʌmonla ti ñuc yicʼot yom i coltañonla. Mi xucʼulonla tiʼ tojlel maʼañic baqui ora mi caj i cʌyonla (Isaías 41:13; 49:15).

3. ¿Chuqui mi caj i yʌqʼueñonla lac ñaʼtan chaʼan mucʼʌch i cʼuxbiñonla Jehová?

³ Jiñi hermanojob tsaʼ bʌ la cʌlʌ, wen yujilob tiʼ pusicʼal chaʼan Dios tsiʼ coltayob ti tsʌts tac bʌ wocol. Joñonla jaʼel miʼ mejlel lac ñop chaʼan yomʌch i coltañonla Jehová (Salmo 118:6, 7). Cheʼ mi lac ñaʼtan tiʼ pejtelel chuqui wem bʌ aqʼuebil i chaʼañonla, ñumen mi caj lac ñop chaʼan mucʼʌch i cʼuxbiñonla (pejcan Salmo 77:11, 12). Ti ili temaj mi caj laj qʼuel chʌnchajp aqʼuebil bʌ i chaʼañonla yicʼot bajcheʼ mi la cʌqʼuen wocolix i yʌlʌ: Jiñi melbil tac bʌ i chaʼan, jiñi Biblia, jiñi oración yicʼot i tojol jiñi mulil (qʼuele jiñi recuadro «¿Chuqui yom i yʌl?»).

4. Cheʼ bʌ mi laj qʼuel tiʼ pejtelel chuqui melbil, ¿chuqui miʼ cʼotel laj cʌn?

⁴ Cheʼ mi laj qʼuel jiñi melbil tac bʌ i chaʼan Jehová, miʼ cʼotel lac ñaʼtan chaʼan miʼ wen cʼuxbiñonla (Romanos 1:20). Tsiʼ yʌcʼʌ pejtelel chuqui i cʼʌjñibal lac chaʼan wʌʼ ti Pañimil chaʼan tijicña mi lac chumtʌl. Cheʼ jaʼel, tsiʼ mele ti chajp ti chajp bʌlñʌcʼʌl chaʼan sumuc chuqui mi laj cʼux (Eclesiastés 9:7). Juntiquil hermana i cʼabaʼ Catherine yaʼ ti Canadá miʼ yʌl chaʼan wen utsʼatax miʼ qʼuel bajcheʼ miʼ chaʼ cuxtʌyel tiʼ pejtelel chuqui an cheʼ miʼ cʼotel i yorajlel jiñi jajmeñal. Miʼ mulan i qʼuel bajcheʼ miʼ chaʼ colel i ñichteʼ tac yicʼot bajcheʼ miʼ chaʼ sujtel jiñi teʼlemut tsaʼ bʌ putsʼiyob tiʼ caj tsʌñal. I wen utsʼat miʼ qʼuel jaʼel cheʼ bʌ juncojt xtsʼuñun miʼ cʼotel i cʼux muʼ bʌ i cʌyben yaʼ ti ventana am bʌ tiʼ cocina. Jiñi hermana miʼ yʌl chaʼan Jehová miʼ yʌqʼueñonla cabʌl chuqui utsʼatax bʌ come mucʼʌch i wen cʼuxbiñonla. Jiñi lac Tat wen tijicña miʼ yubin i bʌ cheʼ bʌ miʼ qʼuel tiʼ pejtelel tsaʼ bʌ i mele i yom chaʼan cheʼʌch mi la cubin jaʼel cheʼ mi laj qʼuel tsaʼ bʌ i mele (Hechos 14:16, 17).

5. ¿Chuqui yambʌ miʼ pʌsbeñonla chaʼan mucʼʌch i cʼuxbiñonla Jehová?

⁵ Yambʌ muʼ bʌ i pʌs chaʼan mucʼʌch i cʼuxbiñonla Jehová jiñʌch bajcheʼ yilal tsiʼ meleyonla. Tsiʼ meleyonla chaʼan miʼ mejlel lac mel chuqui tac miʼ tijicñesañonla yicʼot muʼ bʌ i yʌqʼueñonla laj cubin chaʼan añʌch laj cʼʌjñibal (Eclesiastés 2:24). Tsiʼ yʌqʼueyonla ili Pañimil chaʼan mi lac bujtʼesan ti wiñicob xʼixicob (quixtañujob), chaʼan mi laj cʼʌn ti eʼtel (troñel), i chaʼan mi laj cʌntan jiñi añimal tac yicʼot tiʼ pejtelel chuqui cuxul (Génesis 1:26-28). Cheʼ jaʼel, tsiʼ meleyonla chaʼan miʼ mejlel lac lajiben jiñi wen tac bʌ i melbal (Efesios 5:1).

6. ¿Chucoch yom tijicñayonla cheʼ an lac chaʼan jiñi Biblia?

⁶ Jehová tsiʼ yʌqʼueyonla jiñi Biblia come miʼ cʼuxbiñonla. Yom tijicña mi la cubin lac bʌ chaʼan ili majtañʌl come miʼ coltañonla laj cʌn bajcheʼ yilal Dios yicʼot chuqui miʼ yubin tiʼ tojlel quixtañujob. Jumpʼejl ejemplo, jiñi Biblia miʼ tsictesʌbeñonla bajcheʼ yubil tsiʼ yubi Jehová cheʼ bʌ jiñi israelob miʼ ñusʌbeñob i mandar tac. Salmo 78:38 miʼ yʌl: «Dios tsiʼ pʼuntayob. Tsiʼ ñusʌbeyob i mul. Maʼañic tsiʼ laj jisayob. Cabʌl tsiʼ tiqʼui i bʌ cheʼ bʌ tsiʼ michʼleyob». Cheʼ mi laj cʼajtesan ili versículo, miʼ coltañonla lac ñop chaʼan Jehová miʼ wen cʼuxbiñonla yicʼot miʼ chʼʌmonla ti ñuc anquese an lac sajtemal (pejcan 1 Pedro 5:6, 7).

7. ¿Chucoch cheʼʌch bajcheʼ wen letsem bʌ i tojol jiñi Biblia?

⁷ Jiñi Biblia jiñʌch wen letsem bʌ i tojol chaʼañonla. ¿Chucoch? Come jiñʌch muʼ bʌ i cʼʌn Jehová chaʼan miʼ pejcañonla. Cheʼ bʌ juntiquil  tatʌl yicʼot i yalobil wen miʼ pejcañob i bʌ, ñumen mi caj i cʼuxbiñob i bʌ yicʼot mi caj i ñopbeñob i bʌ chuqui miʼ yʌlob. Jehová jiñʌch wen uts bʌ lac Tat. Anquese maʼañic miʼ mejlel laj qʼuel yicʼot lac ñʌchʼtan, miʼ cʼʌn jiñi Biblia chaʼan miʼ «pejcañonla». Jin chaʼan, yom mi lac chʼʌmben isujm chuqui miʼ subeñonla cheʼ mi lac pejcan (Isaías 30:20, 21). Cheʼ bajcheʼ jiñi, mi caj laj qʼuel chaʼan Jehová yom i tojʼesañonla yicʼot yom i cʌntañonla. Mi caj lac ñumen cʌn ti utsʼat yicʼot mi caj lac ñumen ñop (pejcan Salmo 19:7-11 yicʼot Proverbios 1:33).

8, 9. a) ¿Chuqui yom Jehová chaʼan mi lac ñaʼtan? b) Alʌ jumpʼejl ejemplo baqui miʼ pʌs chaʼan mach cojach lac sajtemal miʼ qʼuel Jehová.

⁸ Jehová yom mi lac ñaʼtan chaʼan mach yaʼic miʼ yʌcʼ i wut ti lac sajtemal tac, muʼ bʌ i qʼuel jiñʌch wen tac bʌ lac melbal (2 Crónicas 16:9). Laʼ laj qʼuel jiñi ejemplo i chaʼan Josafat (Jehosafat), rey bʌ ti Judá. Chaʼan miʼ contrajin jiñi siriojob, tsiʼ teme i bʌ yicʼot jiñi Acab, rey bʌ ti Israel. Acab tsaʼ subenti tiʼ tojlel 400 lot bʌ xʼaltʼañob chaʼan mi caj i mʌl jiñi guerra. Pero jiñi isujm bʌ xʼaltʼan Micaías (Micaya) tsiʼ sube Acab yicʼot Josafat chaʼan mi caj i sʌtob. Cheʼʌch tsaʼ ujti. Jiñi rey Acab tsaʼ chʌmi, i Josafat colelix i chʌmel jaʼel. Cheʼ jiñi, Jehová tsiʼ choco majlel Jehú chaʼan miʼ ticʼ Josafat chaʼan jiñi mach bʌ weñic tsiʼ mele, pero tsiʼ yʌlʌ chaʼan yom miʼ suben jaʼel: «An to i ñaʼtʌntel jiñi utsʼat bʌ a melbal» (2 Crónicas 18:4, 5, 14-22, 33, 34; 19:1-3).

⁹ ¿Chuqui utsʼat bʌ tsiʼ mele ti ñaxan jiñi rey Josafat? Tsiʼ sube jiñi añoʼ bʌ i yeʼtel, jiñi levíjob yicʼot xmotomajob chaʼan miʼ cʌntesan tiʼ pejtelel  jiñi añoʼ bʌ yaʼ ti Judá chaʼan i mandar tac Dios. Chaʼan ili tsaʼ bʌ i mele, cabʌl ñajt bʌ chʼoyolob tsaʼ cʼoti i cʌñob i chaʼan bʌ Jehová (2 Crónicas 17:3-10). Anquese mach weñic tsaʼ bʌ i mele Josafat ti wiʼil, Jehová maʼañic tsaʼ ñajʌyi i chaʼan chuqui wen tac bʌ tsiʼ mele. ¿Chuqui mi laj cʌn chaʼan iliyi? Chaʼan Jehová mi caj i chʌn cʼuxbiñonla yicʼot maʼañic mi caj i ñajʌyel i chaʼan chuqui tac wem bʌ mi lac mel mi mucʼʌch lac chaʼlen wersa lac melben i yeʼtel anquese mi lac taj lac sajtemal.

10, 11. a) ¿Chucoch mi la cʌl chaʼan jumpʼejlʌch majtañʌl tilem bʌ ti Jehová jiñi oración? b) ¿Bajcheʼ miʼ jacʼ la coración tac Jehová? (Qʼuele jiñi foto am bʌ tiʼ tejchibal.)

¹⁰ Cheʼ bʌ juntiquil wem bʌ tatʌl yom tʼan yicʼot i yalobil, ¿chuqui miʼ mel? Miʼ tʼoxben i yorajlel chaʼan miʼ ñʌchʼtan yicʼot chaʼan miʼ ñaʼtan bajcheʼ yubil miʼ yubin come miʼ chʼʌm ti ñuc. Jehová jiñʌch lac Tat, i miʼ wen chʼʌmonla ti ñuc. Jin chaʼan, cheʼ mi lac pejcan ti oración, miʼ ñʌchʼtañonla. Jiñʌch ñuc bʌ lac majtan cheʼ miʼ mejlel lac pejcan Jehová.

¹¹ Jiñi oración jumpʼejlʌch lac majtan tilem bʌ ti Jehová. ¿Chucoch? Come jiñʌch bajcheʼ mi lac mejlel ti tʼan la quicʼot baqui jach ora la com. Jehová la camigojʌch i tiʼ pejtelel ora miʼ mejlel i ñʌchʼtañonla. Yaʼ ti ñaxam bʌ párrafo tsaʼ lac taja ti tʼan jiñi hermana Taylene. Tsiʼ yʌlʌ chaʼan miʼ mejlel lac suben Jehová tiʼ pejtelel chuqui la com. Dios cabʌl bajcheʼ miʼ jacʼbeñonla cheʼ mi lac suben bajcheʼ yubil mi la cubin. Miʼ jacʼbeñonla ti jumpʼejl versículo am bʌ ti Biblia, ti lac jun tac o tiʼ tʼan juntiquil hermano. Jehová miʼ ñʌchʼtañonla i miʼ chʼʌmben isujm woli (choncol) bʌ lac ñusan anquese jiñi yañoʼ bʌ maʼañic. Cheʼ miʼ jacʼ la coración tac jiñʌch yambʌ bajcheʼ miʼ pʌs chaʼan miʼ wen cʼuxbiñonla.

12. ¿Chucoch utsʼatʌch mi lac tsajin jiñi oración tac am bʌ ti Biblia? ¿Baqui tac bʌ jiñi?

¹² Jiñi oración tac am bʌ ti Biblia cabʌl chuqui miʼ mejlel i cʌntesañonla. Jin chaʼan, utsʼat cheʼ muqʼuic lac tsajin ti lac chʼujutesaya ti familia ti bixel tic. Jumpʼejl ejemplo, miʼ mejlel lac tsajin jiñi oración tsaʼ bʌ i mele Jonás tiʼ pecʼlel yaʼ tiʼ mal i ñʌcʼ jiñi chʌy (Jonás 1:17–2:10). Miʼ mejlel lac tsajin jaʼel jiñi oración loqʼuem bʌ tiʼ pusicʼal tsiʼ mele Salomón cheʼ bʌ tsaʼ ujti ti mejlel jiñi templo (1 Reyes 8:22-53). Yicʼot jaʼel miʼ mejlel lac ñaʼtan jiñi oración tsaʼ bʌ i pʌsʌ Jesús (Mateo 6:9-13). Cheʼ mi lac tʼoxben i yorajlel mi lac ñaʼtan cheʼ tac bʌ oración bajcheʼ ili, mi caj lac ñumen cʌn lac mel oración. Pero mach yomic mi lac ñajʌyel, i cʼʌjñibal mi lac chaʼlen oración tiʼ pejtelel ora. Cheʼ jiñi, «i ñʌchʼtʌlel [lac] pusicʼal chʼoyol bʌ ti Dios» mi caj i cʌntan lac pensal yicʼot lac pusicʼal. Mi ti bele ora mi lac mel oración, ñumen mi caj la cʌqʼuen wocolix i yʌlʌ Jehová chaʼan i cʼuxbiya (Filipenses 4:6, 7).

13. ¿Chuqui miʼ mejlel lac taj chaʼan i tojol jiñi mulil?

¹³ I tojol jiñi mulil jiñʌch yambʌ bajcheʼ miʼ pʌsbeñonla i cʼuxbiya Jehová. Tsiʼ melbeyonla ili majtañʌl «chaʼan mi lac taj laj cuxtʌlel» (1 Juan 4:9). Jiñi apóstol Pablo tiʼ tsictesa chaʼan maʼañic juntiquil muʼ bʌ i yʌcʼ i cuxtʌlel chaʼan miʼ coltan «juntiquil toj bʌ», i tajol chaʼtiquil uxtiquil jach muʼ bʌ i yʌcʼ i cuxtʌlel chaʼan «juntiquil uts bʌ». Pero tsiʼ yʌlʌ jaʼel chaʼan Dios tsiʼ pʌsʌ chaʼan miʼ wen cʼuxbiñonla cheʼ tsiʼ choco tilel i Yalobil ti chʌmel chaʼan ti laj caj «cheʼ xmulilon tola» (Romanos 5:6-8). I tojol jiñi mulil miʼ yʌcʼ chaʼan mi lac sujtel tiʼ yamigo Dios i jiñʌch ñumen ñuc bʌ bajcheʼ tsiʼ pʌsʌ chaʼan miʼ cʼuxbiñonla.

14, 15. a) ¿Bajcheʼ miʼ yʌqʼuen i wenlel jiñi xñoptʼañob bombiloʼ bʌ i tojol jiñi mulil? b) ¿Ixcu jiñi xñoptʼañob mach bʌ bombilobic?

¹⁴ ¿Bajcheʼ miʼ yʌqʼueñob i wenlel jiñi xñoptʼañob bombiloʼ bʌ i tojol jiñi mulil? Jiñi alʌ junmojt xñoptʼañob wen qʼuexel bajcheʼ miʼ yubibeñob i cʼuxbiya Jehová (Juan 1:12, 13; 3:5-7). Dios tsiʼ yajca ti chʼujul bʌ i yespíritu, jin chaʼan i  yalobilobix (Romanos 8:15, 16). Pablo tsiʼ yʌlʌ chaʼan tiʼ pejtelel buchulob «ti panchan [yicʼotob] Cristo» (Efesios 2:6). Pero mi wʌʼ ti Pañimil añob to jiñi bombiloʼ bʌ, ¿chuqui tsiʼ taja ti tʼan jiñi Pablo? Chaʼan Jehová tsaʼix i yʌqʼueyob i pijtaya chaʼan miʼ chumtʌlob yaʼ ti panchan tiʼ pejtelel ora (Efesios 1:13, 14; Colosenses 1:5).

¹⁵ ¿Bajcheʼ miʼ tajob i wenlel jaʼel jiñi mach bʌ yajcʌbilobic chaʼan miʼ majlelob ti panchan? Mi añobʌch i ñopoñel (chʼujbiya) tiʼ tojol jiñi mulil, miʼ mejlelob ti sujtel tiʼ yamigo Dios. Cheʼ jaʼel, mi caj i cʌjñelob bajcheʼ i yalobilob Dios ti jiñi talto bʌ qʼuin yicʼot mi caj i chumtʌlob wʌʼ ti Pañimil tiʼ pejtelel ora. Cheʼ bajcheʼ mi laj qʼuel, i tojol jiñi mulil miʼ pʌs chaʼan Jehová miʼ cʼuxbin tiʼ pejtelel quixtañujob (Juan 3:16). Miʼ yʌqʼueñonla lac tijicñʌyel cheʼ la cujil chaʼan Dios mi caj i yʌqʼueñonla jiñi wem bʌ laj cuxtʌlel yaʼ ti Paraíso mi xucʼulonla tiʼ tojlel. Tiʼ sujm, i tojol jiñi mulil jiñʌch wen ñuc bʌ bajcheʼ Jehová miʼ pʌs chaʼan miʼ cʼuxbiñonla. Jin chaʼan, laʼ lac chʌn pʌs chaʼan mucʼʌch laj qʼuel ti ñuc tiʼ pejtelel lac pusicʼal.

16. Cheʼ mi lac ñaʼtan bajcheʼ an i pʌsbeyonla i cʼuxbiya Jehová, ¿chuqui mi caj lac mel?

¹⁶ Cabʌl bajcheʼ miʼ wen pʌsbeñonla i cʼuxbiya Jehová. Jiñi rey David tsiʼ yʌlʌ: «Tic tojlel, ¡wen utsʼatax jiñi a ñaʼtʌbal! C Dios, ¡baqui to jaxʌl miʼ cʼotel i tsicol tiʼ pejtelel jiñi! Cheʼ muqʼuic c ñopeʼ c tsic, ñumen on bajcheʼ i tsicol jiñi jiʼ» (Salmo 139:17, 18). Cheʼ muqʼuic lac wen ñaʼtan bajcheʼ an i pʌsbeyonla i cʼuxbiya Jehová, mi caj lac ñumen cʼuxbin yicʼot ñumen wen mi caj lac melben i yeʼtel.

17, 18. ¿Bajcheʼ miʼ mejlel lac pʌsben Jehová chaʼan mucʼʌch laj cʼuxbin?

¹⁷ ¿Bajcheʼ miʼ mejlel lac pʌsben Jehová chaʼan mucʼʌch laj cʼuxbin? Junchajp jiñʌch cheʼ mi lac sub jiñi wen tʼan chaʼan Yumʌntel yicʼot lac chʼejlel (Mateo 24:14; 28:19, 20). Yambʌ jiñʌch cheʼ chʌn xucʼul mi la cajñel cheʼ an chuqui woli (yʌquel) lac ñusan muʼ bʌ i yotsan ti wocol lac ñopoñel ti Dios (pejcan Salmo 84:11 yicʼot Santiago 1:2-5). Jehová yujil chaʼan woli lac ñusan tsʌts bʌ wocol, i mi caj i coltañonla come miʼ wen cʼuxbiñonla (Salmo 56:8).

¹⁸ Ti ili temaj tsaʼ laj qʼuele yambʌ bajcheʼ tac miʼ mejlel lac pʌsben laj cʼuxbiya Jehová. Ñaxam bʌ, cheʼ mi lac ñaʼtan tiʼ pejtelel chuqui wen tac bʌ melbil i chaʼan. I chaʼpʼejlel jiñʌch cheʼ wen la cujil i tsajintel jiñi Biblia. I yuxpʼejlel jiñʌch cheʼ mi lac chʌn chaʼlen oración chaʼan mi lac ñumen pʼʌtʼan bajcheʼ i yamigo Jehová. I chʌmpʼejlel jiñʌch cheʼ mi lac chʌn ñaʼtan i tojol jiñi mulil, jiñi wen ñuc bʌ lac majtan (1 Juan 2:1, 2). Cheʼ mi lac mel bajcheʼ ili, ñumen mi caj lac ñop chaʼan Jehová mucʼʌch i cʼuxbiñonla yicʼot ñumen mi caj laj cʼuxbin ti jujumpʼejl qʼuin.