1, 2. ¿Bajcheʼ tsiʼ cʌntesayonla Jehová chaʼan mi lac pʌs cʼuxbiya?

JUNTIQUIL wem bʌ tatʌl miʼ cʌntesan i yalobil tiʼ ejemplo. Woli (choncol) i cʌntesañob i pʌs cʼuxbiya cheʼ bʌ miʼ pʌsbeñob i cʼuxbiya jaʼel. Cheʼʌch miʼ mel Jehová ti lac tojlel. Cojach jiñi muʼ bʌ i ñumen cʼuxbiñonla. Jiñi Biblia miʼ yʌl chaʼan «ñaxan tsiʼ cʼuxbiyonla» (1 Juan 4:19). Cheʼ miʼ pʌsbeñonla i cʼuxbiya Jehová, woli (yʌquel) i cʌntesañonla ti cʼuxbiya jeʼel.

² ¿Chucoch miʼ yʌl jiñi Biblia chaʼan ñaxan tsiʼ cʼuxbiyonla Jehová? Come tsiʼ choco tilel chaʼan miʼ yʌcʼ i cuxtʌlel i Yalobil ti laj caj «cheʼ xmulilontola» (Romanos 5:8). Jehová tsiʼ mele jiñi chaʼan miʼ locʼsañonla ti mulil yicʼot chʌmel. Cheʼʌch tsiʼ yʌqʼueyonla wem bʌ ejemplo i chaʼan mi lac pʌs laj cʼuxbiya yicʼot la cutslel (1 Juan 4:10). Cheʼ jaʼel, tiʼ cuxtʌlel i yalobil miʼ mejlel lac sujtel tiʼ yamigo yicʼot lac pʌsben laj cʼuxbiya.

3, 4. ¿Bajcheʼ mi lac pʌs chaʼan mi laj cʼuxbin Jehová?

³ Jiñi cʼuxbiya jiñʌch ñumen ñuc bʌ am bʌ i chaʼan Jehová. Jin chaʼan, Jesús tsiʼ yʌlʌ chaʼan jiñi ñumen ñuc bʌ mandar jiñʌch: «Cʼuxbin a Yum Dios ti pejtelel a pusicʼal, ti pejtelel a chʼujlel [cuxtʌlel], ti pejtelel a ñaʼtʌbal, ti pejtelel a pʼʌtʌlel.  Jiñʌch jiñi ñumen ñuc bʌ mandar» (Marcos 12:30). Jehová yom chaʼan tiʼ pejtelel lac pusicʼal mi laj cʼuxbin. Maʼañic miʼ mulan cheʼ yambʌ majqui mi lac ñumen cʼuxbin o cheʼ chuqui jach, i mach jiñic. Pero jiñi cʼuxbiya mach cojach cheʼ mi la cubin ti lac pusicʼal. Yom mi laj cʼuxbin tiʼ pejtelel lac ñaʼtʌbal yicʼot lac pʼʌtʌlel, yom i yʌl ti chuqui mi lac ñaʼtan yicʼot mi lac mel (pejcan Miqueas 6:8).

⁴ Jin chaʼan yom mi laj cʼuxbin Jehová tiʼ pejtelel bajcheʼ yilalonla yicʼot tiʼ pejtelel chuqui an lac chaʼan. Mi mucʼʌch laj cʼuxbin tiʼ sujmlel, jiñʌch mi caj lac ñumen acʼ ti ñuc ti laj cuxtʌlel. Yaʼ ti yambʌ temaj tsaʼix bʌ laj qʼuele, tsaʼ laj cʌñʌ chʌnchajp bajcheʼ miʼ pʌsbeñonla i cʼuxbiya Jehová. Ti ili temaj mi caj laj qʼuel bajcheʼ miʼ mejlel lac ñumen cʼuxbin Jehová yicʼot mi lac pʌsben.

5. ¿Chuqui com lac mel cheʼ mi lac ñaʼtan tiʼ pejtelel muʼ bʌ i yʌqʼueñonla Jehová?

⁵ Cheʼ an majqui miʼ yʌqʼueñonla jumpʼejl majtañʌl, mi lac pʌsben chaʼan mucʼʌch laj qʼuel ti ñuc. Cheʼ mi laj cʼʌn jiñi tsaʼ bʌ i yʌqʼueyonla jiñʌch junchajp bajcheʼ mi lac pʌsben wocolix i yʌlʌ. Jiñi apóstol Santiago tsiʼ yʌlʌ chaʼan Jehová cabʌl chuqui wem bʌ miʼ yʌqʼueñonla (Santiago 1:17). Miʼ yʌqʼueñonla tiʼ pejtelel chuqui la com chaʼan mi lac chumtʌl yicʼot tijicñayonla. Mi lac wen aqʼuen wocolix i yʌlʌ chaʼan jiñi. Miʼ cʼotel laj cʌn chaʼan miʼ wen cʼuxbiñonla i com lac pʌsben chaʼan mi laj cʼuxbin jeʼel. ¿Cheʼ ba maʼ wubin?

6. ¿Chuqui yom miʼ melob jiñi israelob chaʼan miʼ chʌn aqʼuentelob chuqui wem bʌ ti Jehová?

⁶ Jehová cabʌl chuqui wem bʌ tsiʼ yʌqʼue jiñi israelob. Cabʌl jab tsaʼ aqʼuentiyob chuqui yomob. Tsaʼ aqʼuentiyob mandar jaʼel chaʼan miʼ ñaʼtañob yom bʌ miʼ melob (Deuteronomio 4:7, 8). Jumpʼejl ejemplo, jiñi mandar tsiʼ yʌlʌ chaʼan ‹yom miʼ yʌcʼob jiñi ñaxam bʌ i wut pʌcʼʌb, jiñi yajcʌbil bʌ› (Éxodo 23:19). Mi yomob miʼ chʌn aqʼuentelob chuqui wem bʌ ti Jehová, yom miʼ jacʼbeñob i tʼan yicʼot miʼ yʌqʼueñob jiñi ñumen wem bʌ. Cheʼʌch miʼ mejlel i pʌsbeñob wocolix i yʌlʌ Jehová (pejcan Deuteronomio 8:7-11).

7. ¿Bajcheʼ miʼ mejlel la cʌcʼ lac chubʌʼan chaʼan mi lac pʌs mucʼʌch laj cʼuxbin Jehová?

⁷ Miʼ mejlel lac pʌsben chaʼan mucʼʌch laj cʼuxbin Jehová cheʼ mi la cʌqʼuen jiñi ñumen wem bʌ lac «chubʌʼan» (Proverbios 3:9). ¿Bajcheʼ miʼ mejlel lac mel? Junchajp jiñʌch cheʼ mi la cʌcʼ lac taqʼuin chaʼan mi laj coltan la quermañojob ti laj congregación yicʼot añoʼ bʌ tiʼ pejtelel pañimil (mulawil). Ti lac pejtelel miʼ mejlel lac pʌs chaʼan mucʼʌch laj cʼuxbin Jehová cheʼ mi la cʌcʼ lac chubʌʼan anquese mach ti lac pejtelelic an cabʌl lac chubʌʼan (2 Corintios 8:12). Pero mach cojach bajcheʼ iliyi. Mi caj laj qʼuel yambʌ.

8, 9. a) ¿Bajcheʼ yambʌ miʼ mejlel lac pʌsben laj cʼuxbiya Jehová? b) ¿Chuqui tsiʼ mele Mike yicʼot i familia?

⁸ Cheʼ mi lac ñop ti Jehová jiñʌch yambʌ bajcheʼ mi lac pʌsben laj cʼuxbiya. ¿Chucoch? Jesús tsiʼ yʌlʌ chaʼan mach yomic mi laj cʌlʌx cʼojoʼtan bajcheʼ mi caj lac taj chuqui i cʼʌjñibal bʌ lac chaʼan. Jehová miʼ yʌcʼ i tʼan chaʼan mi caj i yʌqʼueñonla jiñi, mi mucʼʌch la cʌcʼ laj cuxtʌlel tiʼ melol i yeʼtel (Mateo 6:31-33). Mi lac ñop chaʼan mi caj i tsʼʌctesan i tʼan come cheʼ an majqui mi laj cʼuxbin mi lac ñop muʼ bʌ i yʌl. Cheʼ mi lac ñumen ñop ti Jehová mi caj lac ñumen pʌsben laj cʼuxbiya (Salmo 143:8). Jin chaʼan yom mi laj cʼajtiben lac bʌ: «Cheʼ bajcheʼ mij cʼʌn jiñi ora am bʌ c chaʼan  yicʼot c pʼʌtʌlel, ¿muʼ ba c pʌsben chaʼan mij cʼuxbin Jehová? ¿Muʼ ba c pʌs tiʼ pejtelel qʼuin chaʼan mic ñop mi caj i yʌqʼueñon i cʼʌjñibal bʌ c chaʼan?».

⁹ Laʼ laj qʼuel tsaʼ bʌ ujti tiʼ tojlel jiñi hermano Mike yicʼot i familia. Cheʼ bʌ xcolel to tsiʼ wen ñaʼta majlel i coltan jiñi hermanojob ti yambʌ país ti subtʼan. Jiñʌch chʌn yom bʌ i mel anquese tsaʼ ñujpuñi i tsiʼ taja chaʼtiquil i yalobil. Yicʼot i familia tsiʼ wen pejcayob temaj tac chaʼan hermanojob tsaʼ bʌ majliyob ti coltaya ti subtʼan ti yambʌ tejclum tac. Jin chaʼan, tsaʼ caji i ñumen acʼob i ñaʼtʌbal tiʼ chaʼan bʌ Jehová. Tsiʼ choñoyob i yotot i ñumen chʼoʼchʼoc (chut) baqui tsaʼ majliyob ti chumtʌl. Mike maʼañix cabʌl tsaʼ caji ti eʼtel (troñel). Wʌle tijicña woliyob ti eʼtel ti yambʌ país yicʼot i familia. Qʼuelbil i chaʼan bajcheʼ miʼ tsʼʌctiyel jiñi tʼan tsaʼ bʌ i yʌlʌ Jesús yaʼ ti Mateo 6:33.

10. ¿Chucoch yom mi lac mel bajcheʼ tsiʼ mele David yicʼot mi lac ñaʼtan muʼ bʌ i cʌntesañonla Jehová?

¹⁰ Jiñi rey David miʼ yʌqʼuen i yorajlel i ñaʼtan muʼ bʌ i yʌl jiñi mandar tac yicʼot jiñi melbil bʌ i chaʼan Jehová. Jin chaʼan tsiʼ yʌlʌ: «Jiñi panchan miʼ pʌs i ñuclel Dios». Tsiʼ yʌlʌ chaʼan tojʌch yicʼot miʼ mejlel lac ñop «i cʌntesʌbal lac Yum», miʼ yʌqʼueñonla lac pʼʌtʌlel yicʼot lac taj lac ñaʼtʌbal. Cheʼ bʌ David tsiʼ ñaʼta iliyi, tsiʼ mulaj i ñumen pʌsben i cʼuxbiya Dios. Jin chaʼan, tsiʼ yʌlʌ chaʼan yom utsʼat miʼ qʼuel Jehová chuqui miʼ ñaʼtan yicʼot miʼ mel (Salmo 19:1, 7, 14). Bajcheʼ David, yom mi lac ñaʼtan chuqui melbil tac i chaʼan Jehová yicʼot muʼ bʌ i cʌntesañonla ti Biblia. Cheʼʌch mi caj lac sujtel ti wem bʌ i yamigo Dios yicʼot mi caj lac pʌsben chaʼan mi laj cʼuxbin.

11. ¿Bajcheʼ miʼ mejlel laj cʼʌn muʼ bʌ i cʌntesañonla Jehová chaʼan mi lac pʌsben mi laj cʼuxbin? (Qʼuele jiñi foto am bʌ tiʼ tejchibal.)

¹¹ Ili ora, cabʌl chuqui miʼ cʌntesañonla Jehová chaʼan tiʼ tojlel, chaʼan chuqui melbil tac i chaʼan, jiñi albil tac bʌ i chaʼan yicʼot jiñi Biblia. Ili pañimil miʼ pʌy chaʼan jiñi wiñicob xʼixicob (quixtañujob) miʼ cʌñob chuqui an ti universidad, pero cojach miʼ yʌqʼueñob i sʌt i cʼuxbiya ti Dios. Jehová mach cojach yom chaʼan cabʌl chuqui mi laj cʌn. Yom chaʼan wen chuqui mi lac yajcan lac mel. Yom jaʼel chaʼan mi laj cʼʌn jiñi muʼ bʌ i cʌntesañonla chaʼan lac wenlel yicʼot i wenlel yañoʼ bʌ (Proverbios 4:5-7). ¿Bajcheʼ mi lac mel? Junchajp jiñʌch cheʼ mi laj coltan yañoʼ bʌ chaʼan «miʼ cʌñob i sujmlel» yicʼot miʼ tajob i coltʌntel (1 Timoteo 2:4). Cheʼ mi laj  cʌntesan cabʌl quixtañu chaʼan muʼ bʌ caj i mel i yumʌntel Dios ti lac tojlel, woli lac pʌs chaʼan mi laj cʼuxbin Jehová yicʼot jiñiyob (pejcan Salmo 66:16, 17).

12. ¿Chuqui tsiʼ yʌlʌ juntiquil hermana chaʼan tsaʼ bʌ i yʌqʼue Jehová?

¹² Jiñi xcolelob miʼ mejlel i ñaʼtañob jaʼel muʼ bʌ i yʌqʼuentelob yicʼot miʼ cʌntesʌntelob ti Jehová. Jumpʼejl ejemplo, juntiquil hermana i cʼabaʼ Shannon miʼ cʼajtesan bajcheʼ tsiʼ yubi i bʌ ti uxpʼejl bʌ qʼuin colem tempa bʌ i cʼabaʼ «Devoción piadosa» («Xucʼul bʌ i chʼujutesʌntel Dios»). 11 jaxto i jabilel ti jiñi bʌ ora i jiñi i yijtsʼin 10 i jabilel. Ti jiñi bʌ ora tsaʼ subenti jiñi xcolelob chaʼan an yajcʌbil baqui mi caj i buchtʌlob. Shannon yaʼ tsaʼ buchle. Ñaxan tiʼ tsʼitaʼ ñaʼta, pero cheʼ tsaʼ aqʼuentiyob jiñi libro Los jóvenes preguntan wen tijicña tsiʼ yubi. Miʼ yʌl chaʼan jiñi majtañʌl tsiʼ yʌqʼue i qʼuel chaʼan Jehová miʼ wen cʼuxbin yicʼot chaʼan cuxulʌch. Miʼ wen aqʼuen wocolix i yʌlʌ Dios chaʼan jiñi utsʼatax bʌ majtañʌl tac miʼ yʌqʼueñonla.

13, 14. ¿Chuqui yom mi lac mel cheʼ bʌ miʼ ticʼonla Jehová?

¹³ Jiñi Biblia miʼ yʌl chaʼan Jehová «miʼ ticʼ jiñi cʼuxbibil bʌ i chaʼan cheʼ bajcheʼ i tat [juntiquil] chʼiton miʼ juʼsʌben i pusicʼal [o miʼ ticʼ] i yalobil» (Proverbios 3:12). ¿Chuqui yom mi lac mel cheʼ bʌ miʼ ticʼonla Jehová? Tajol chʼijiyem mi caj la cubin. Pero yom mi lac chʌn jacʼ i ticʼojel Jehová. Cheʼʌch mi caj laj cʌn lac mel chuqui wen yicʼot mi lac taj lac ñʌchʼtilel (Hebreos 12:11). Mach lac ñusan ti pʼis jiñi ticʼojel o mi lac michʼan mi maʼañic mi lac mulan. Mi caj lac pʌsben chaʼan mi laj cʼuxbin Jehová cheʼ mi lac ñʌchʼtʌben i tʼan yicʼot mi laj qʼuextan lac melbal.

¹⁴ Tiʼ yorajlel jiñi xʼaltʼan Malaquías, jiñi judíojob tsiʼ yʌqʼueyob mach bʌ weñic tsʌnsʌbil bʌ majtañʌl Jehová. Jin chaʼan Jehová tsiʼ yʌqʼueyob tsʌts bʌ ticʼojel (pejcan Malaquías 1:12, 13). Mach junyajl jach tsiʼ mele, pero maʼañic tsiʼ jacʼʌyob. Ti wiʼil, Jehová tsiʼ yʌqʼueyob i toj i mul (Malaquías 2:1, 2). ¿Chuqui miʼ cʌntesañonla? Mi maʼañic mi lac jacʼ o mi lac ñaʼtan chaʼan maʼañic i cʼʌjñibal i ticʼojel Jehová, mi caj i cʌy i qʼuelonla tiʼ yamigo.

15. ¿Chuqui mach bʌ yomic mi lac mel?

¹⁵ Yonlel quixtañu miʼ chanʼesañob i bʌ yicʼot cojach miʼ bajñel ñaʼtañob i bʌ. An cabʌl maʼañic bʌ miʼ mulañob i tojʼesʌntel  o chaʼan miʼ subentelob chuqui miʼ melob. An mucʼʌch bʌ i jacʼob, pero mach tiʼ pejtelelobic i pusicʼal. Jiñi Biblia miʼ yʌl chaʼan mach cheʼic yomonla jiñi. Yom mi laj cʌn chuqui yom Jehová mi lac mel yicʼot mi lac jacʼ (Romanos 12:2). Miʼ cʼʌn i yorganización chaʼan miʼ ticʼonla. Jumpʼejl ejemplo, miʼ yʌl bajcheʼ yom mi laj qʼuel juntiquil wiñic o xʼixic, bajcheʼ mi lac yajcan wem bʌ amigojob yicʼot lac ñusaqʼuin. Cheʼ mi lac jacʼ i ticʼojel Jehová yicʼot mi laj qʼuextan lac melbal, mi lac pʌsben wocolix i yʌlʌ chaʼan jiñi ticʼojel yicʼot chaʼan mi laj cʼuxbin (Juan 14:31; Romanos 6:17).

16, 17. a) ¿Chucoch yom mi lac chaʼlen wersa lac ñaʼtan bajcheʼ miʼ ñaʼtan Jehová cheʼ an chuqui com lac mel? b) Cheʼ maʼañic tsiʼ ñopoyob ti Jehová jiñi israelob, ¿chuqui tsiʼ meleyob?

¹⁶ Jiñi xbiʼtalob miʼ cʼajtibeñob i tat i ñaʼ chaʼan miʼ coltañob yicʼot miʼ cʌntañob. Jinto jiñi ñucobix bʌ miʼ cʼajtibeñob i coltaya jaʼel. ¿Chucoch? Come yujilob chaʼan jiñi tatʌlob miʼ mejlel i yʌqʼueñob wem bʌ ticʼojel, anquese mejlix i bajñel ñaʼtañob. Cheʼʌch miʼ yujtel tiʼ tojlel Jehová. Miʼ yʌqʼueñonla lac ñaʼtan ti lac bajñelil chuqui com lac mel. Pero mi lac chʌn cʼajtiben i coltaya come mi lac ñop yicʼot mi laj cʼuxbin. Mi lac chaʼlen wersa lac ñaʼtan bajcheʼ miʼ ñaʼtan cheʼ an chuqui com lac mel. Cheʼ mi laj cʼajtiben i coltaya, miʼ yʌqʼueñonla i yespíritu chaʼan mi lac ñaʼtan chuqui toj bʌ (Filipenses 2:13).

¹⁷ Cheʼ tiʼ yorajlel Samuel, jiñi israelob tsaʼ caji i sʌtob jumpʼejl guerra tiʼ contra filisteojob. Maʼañic tsiʼ ñopoyob ti Jehová yicʼot maʼañic tsiʼ cʼajtibeyob chuqui yom miʼ melob, i tsiʼ chʼʌmʌyob majlel jiñi arca chaʼan trato baqui woli jiñi guerra. Tsiʼ ñaʼtayob chaʼan cheʼʌch mi caj i coltʌntelob ti Jehová. Pero maʼañic tsiʼ ñaʼtayob bajcheʼ miʼ ñaʼtan Jehová. Tsiʼ meleyob cheʼ jach bajcheʼ wen tsiʼ qʼueleyob. ¿Chuqui tsaʼ ujti? Tsaʼ chʌmi 30,000 israelob. I jiñi filisteojob tsiʼ chʼʌmʌyob jiñi arca (1 Samuel 4:2-4, 10, 11; pejcan Proverbios 14:12).

18. Cheʼ bajcheʼ miʼ yʌl Salmo 42:5, 6 yicʼot Proverbios 3:5, 6, ¿chuqui yom mi lac mel?

¹⁸ Juntiquil wiñic tsaʼ bʌ i wen cʼuxbi Jehová tiʼ tsʼijbu chaʼan tsiʼ ñopo chaʼan mi caj i coltan Dios cheʼ bʌ an tsʌts tac bʌ i wocol (Salmo 42:5, 6). ¿Cheʼ ba maʼ wubin bajcheʼ jiñi? Tajol mucʼʌch a ñop ti Jehová. Pero ti lac pejtelel miʼ mejlel laj cʌn lac ñumen ñop. Jiñi Biblia miʼ yʌl: «Ñopo lac Yum ti pejtelel a pusicʼal. Mach a bajñel ñaʼtan bajcheʼ jach a wom maʼ mel. Ti pejtelel chuqui maʼ mel ñaʼtan lac Yum. Cheʼ jiñi mux caj i chajpʌbeñet a bijlel» (Proverbios 3:5, 6).

19. ¿Bajcheʼ mi caj a pʌsben Jehová chaʼan maʼ cʼuxbin?

¹⁹ Cheʼ bajcheʼ tsaʼix laj qʼuele, Jehová tsiʼ ñaxan cʼuxbiyonla. Cheʼʌch tsiʼ cʌntesayonla laj cʼuxbin. Yom mi lac ñaʼtan tiʼ pejtelel ora chuqui melbil i chaʼan ti lac tojlel yicʼot chaʼan miʼ wen cʼuxbiñonla. Laʼ lac pʌsben chaʼan mi laj cʼuxbin tiʼ pejtelel lac pusicʼal, laj cuxtʌlel, lac ñaʼtʌbal yicʼot lac pʼʌtʌlel (Marcos 12:30).