Ti jujumpʼejl jab mic chaʼlen lon ti imprimir yicʼot mic puc lojon yonlel Biblia yicʼot jun tac loqʼuem yaʼi. Mic mel lojon sucursal tac yicʼot an imprenta tac woli (choncol) bʌ ti eʼtel tiʼ pejtelel pañimil. Tʼoxbilon lojon ti cabʌl mil congregación, yaʼ baqui mic tempan lon c bʌ i cʼabaʼ i Yotlel Tempa bʌ, i wen jach bajcheʼ yilal. ¿Baqui miʼ tilel jiñi taqʼuin?

Tiʼ pejtelel jiñi eʼtel (troñel) chucul ti taqʼuin loqʼuem bʌ tiʼ pusicʼal wiñicob xʼixicob (quixtañujob) (2 Corintios 9:7). Jiñi i chaʼpʼejlel revista tsaʼ bʌ mejli ti 1879, i cʼabaʼ Zion’s Watch Tower (La Torre del Vigía de Sión) tsiʼ yʌlʌ: «Mic ñop lojon chaʼan jiñʌch JEHOVÁ an tiʼ wenta [ili revista], i maʼañic baqui ora mi caj i cʼajtiben ñumel i coltaya quixtañujob». Cheʼʌch mi lon c ñop cʼʌlʌl ili ora.

Jiñi taqʼuin miʼ mejlel ti chojquel majlel cʼʌlʌl ti sucursal o miʼ yotsʌntel ti caja tac am bʌ yaʼ tiʼ yotlel tac tempa bʌ. Maʼañic mij cʼajtin lojon diezmo o taqʼuin, mi jiñic i tojol muʼ bʌ lon c mel o chaʼan lon c jun tac. Maʼañic mic tojtʌl lon ti subtʼan, chaʼan cʌntesa ti congregación o tiʼ melol i Yotlel Tempa bʌ tac. Jesús tsiʼ yʌlʌ: «Majtan jach tsaʼ aqʼuentiyetla. I majtan jach mi laʼ wʌqʼueñob jaʼel» (Mateo 10:8). Jiñi mucʼoʼ bʌ ti troñel ti sucursal tac tiʼ pejtelel pañimil (mulawil) maʼañic miʼ tojtʌlob, mi jiñic jiñi Junmojt muʼ bʌ i pʌsob bij i chaʼan i testigojob Jehová.

Jiñi taqʼuin miʼ cʼʌjñel chaʼan miʼ coltʌntel jaʼel añoʼ bʌ ti wocol. Jiñi xñoptʼañob ti ñaxam bʌ siglo tsiʼ coltayob tsaʼ bʌ i ñusayob wocol (Romanos 15:26). Ili ora jaʼel, mij coltan lon muʼ bʌ i tajtʌlob ti icʼ jaʼal o yan tac bʌ, tiʼ melbentelob i yotot, tiʼ bʌl i ñʌcʼob, tiʼ pislelob o tsʼac tac. Mi lon c tojʼesan muʼ bʌ i jejmel i Yotlel Tempa bʌ tac jaʼel yaʼi.