1, 2. a) ¿Majqui tsiʼ yʌqʼueyonla laj conciencia? b) ¿Chucoch tijicñayonla cheʼ tsaʼ aqʼuentiyonla?

JEHOVÁ tsiʼ meleyonla chaʼan joñon mi lac yajcan chuqui com lac mel. Chaʼan miʼ coltañonla lac yajcan chuqui wem bʌ, tsiʼ yʌqʼueyonla laj conciencia. ¿Chuquiyes jiñi conciencia? Jiñʌch am bʌ ti lac tojlel muʼ bʌ i subeñonla chuqui wen yicʼot mach bʌ weñic (qʼuele jiñi recuadro «¿Chuqui yom i yʌl?»). Mi wen cʌntesʌbil lac chaʼan, mi caj i coltañonla lac mel chuqui wem bʌ yicʼot chaʼan maʼañic mi lac mel mach bʌ weñic. Jehová tsiʼ pʌsʌ chaʼan miʼ cʼuxbiñonla yicʼot chaʼan yom tijicñayonla cheʼ bʌ tsiʼ yʌqʼueyonla laj conciencia.

² An wiñicob xʼixicob (quixtañujob) mach bʌ i cʌñʌyobic jiñi mandar tac am bʌ ti Biblia pero miʼ melob chuqui wen (pejcan Romanos 2:14, 15). ¿Chucoch? Come miʼ subentelob tiʼ conciencia chuqui wen yicʼot mach bʌ weñic. Cheʼ machic an i conciencia jiñi quixtañujob, ñumen lecoj to an ili pañimil cheʼ bajcheʼ ili ora. Jin chaʼan, yom mi laj cʌqʼuen wocolix i yʌlʌ Jehová cheʼ ti lac pejtelel tsiʼ yʌqʼueyonla laj conciencia.

3. ¿Bajcheʼ mi caj i coltan jiñi congregación cheʼ weñʌch mi laj cʌntesan laj conciencia?

³ Yonlel quixtañu maʼañic miʼ cʌntesañob i conciencia. Pero  joñonla la com lac ñaʼtan chuqui wem bʌ yicʼot mach bʌ weñic, jin chaʼan mi laj cʌntesan. Chaʼan miʼ mejlel, yom mi lac tsajin jiñi Biblia yicʼot mi laj cʌn chuqui miʼ yʌl. Pero mach cojach jiñi. Yom mi laj cʼuxbin i mandar Dios yicʼot mi lac ñop chaʼan i cʼʌjñibalʌch chaʼañonla. Jin chaʼan Pablo tiʼ tsʼijbu: «Com miʼ ñopob cʼuxbiya muʼ bʌ i pʼojlel cheʼ sʌc lac pusicʼal cheʼ maʼañic woli ti tʼan, cheʼ woli lac ñop Dios ti jumpʼejl lac pusicʼal» (1 Timoteo 1:5). Cheʼ weñʌch mi laj cʌntesan laj conciencia yicʼot mi lac jacʼ chuqui miʼ subeñonla, mi caj laj coltan jiñi congregación chaʼan temel miʼ yajñel jiñi hermanojob. Mi caj laj cʼuxbin Jehová jeʼel yicʼot mi caj lac ñumen acʼ lac ñopoñel (chʼujbiya) tiʼ tojlel. Cheʼ jaʼel, mi caj lac pʌs chaʼan wem bʌ i yamigojonla yicʼot chaʼan com la cʌqʼuen i tijicñʌyel. Cheʼʌch mi caj i qʼuel bajcheʼ yilalonla tiʼ sujmlel.

4. ¿Chuqui yom mi lac mel mi com laj cʌntesan laj conciencia?

⁴ Mi com laj cʌntesan laj conciencia, mach cojach yom mi lac pejcan jiñi Biblia chaʼan mi laj cʌy ti lac jol chuqui mi lac pejcan yicʼot jiñi mandar tac. Ti bele ora yom mi lac tsajin jiñi Biblia, mi lac wen ñaʼtan chuqui mi lac pejcan yicʼot mi laj cʼajtiben Jehová chaʼan miʼ coltañonla lac mel bajcheʼ woli laj cʌn. Cheʼ bʌ mi lac tsajin, chaʼañʌch com lac ñumen cʌn bajcheʼ yilal Jehová, chuqui miʼ mulan yicʼot maʼañic bʌ miʼ mulan. Cheʼ mi lac ñumen cʌntesan laj conciencia, ñumen lajal chuqui mi caj lac ñaʼtan cheʼ bajcheʼ muʼ bʌ i ñaʼtan Dios.

5. ¿Chuqui mi caj laj qʼuel ti ili temaj?

⁵ Tajol mi laj cʼajtiben lac bʌ: «¿Bajcheʼ miʼ coltañonla chaʼan wen chuqui miʼ cʼotel lac ñaʼtan jiñi laj conciencia? ¿Bajcheʼ miʼ mejlel lac pʌs chaʼan mi laj qʼuelben ti ñuc i conciencia yambʌ hermanojob? ¿Bajcheʼ miʼ coltañonla tiʼ melol chuqui wem bʌ jiñi laj conciencia?». Ti ili temaj mi caj laj qʼuel uxchajp bajcheʼ miʼ mejlel i coltañonla cheʼ wen cʌntesʌbil laj conciencia. Ñaxam bʌ, cheʼ tiʼ cʌntʌntel jiñi laj cʼocʼlel. I chaʼchajplel, tiʼ yajcʌntel chuqui ti alas o ñusaqʼuin mi caj lac mel. I yuxchajplel, cheʼ mi laj cʌl chaʼan bʌ lac ñopbal.

6. ¿Chuqui tajol yom mi caj lac mel mi cʼamonla?

⁶ Jiñi Biblia miʼ yʌqʼueñonla ticʼojel muʼ bʌ i coltañonla chaʼan ti laj cʼocʼlel. Miʼ subeñonla chaʼan maʼañic mi lac mel muʼ bʌ mejlel i cʼamʼesañonla yicʼot chaʼan pʼisbil jach yom chuqui mi laj cʼux yicʼot lac jap (Proverbios 23:20; 2 Corintios 7:1). Isujm chaʼan muʼto caj lac chʌn cʼamʼan yicʼot ñoxʼan anquese mucʼʌch lac jacʼ jiñi ticʼojel tac am bʌ ti Biblia. Jin chaʼan, tajol yom mi caj lac ñaʼtan chuqui ti tsʼac mi caj lac chʼʌm mi cʼamonla. An país tac baqui jiñi hermanojob miʼ mejlel i yajcañob mi an tsʼac yom bʌ miʼ chʼʌmob. Yonlel hermanojob miʼ tsʼijbuñob majlel yaʼ ti sucursal tac chaʼan miʼ cʼajtiñob mi jiñi i testigojob Jehová miʼ mejlel i chʼʌmob yajcʌbil jach bʌ tsʼac tac o maʼañic.

7. ¿Chuqui miʼ mejlel i coltañonla chaʼan wen chuqui miʼ cʼotel lac ñaʼtan chaʼan jiñi chʼichʼ?

⁷ Anquese mi laj cʼajtin yaʼ ti sucursal tac yicʼot ti ancianojob ti congregación, maʼañobic tiʼ wenta chaʼan miʼ subeñoñobla baqui bʌ tsʼac yom mi lac chʼʌm (Gálatas 6:5). Isujm, jiñi ancianojob mucʼʌch mejlel i coltañoñobla chaʼan wen chuqui miʼ cʼotel lac ñaʼtan ti lac bajñelil. ¿Bajcheʼ? Miʼ chʌn cʼajtesʌbeñoñobla chuqui miʼ subeñonla Dios yaʼ ti Biblia. Jumpʼejl ejemplo, miʼ coltañoñobla laj cʼajtesan chaʼan Dios miʼ suben i wiñicob chaʼan miʼ ‹cʌyob i cʼux› jiñi chʼichʼ (Hechos 15:29). Chaʼan ili mandar, la cujilix chaʼan mach mejlic lac chʼʌm tsʼac tac am bʌ i chaʼan chʼichʼ o chʼʌmʌl bʌ tilel i chaʼan jiñi chʌnchajp am bʌ i chaʼan. Ixcu jiñi tsʼitaʼ loqʼuem tac bʌ ti jiñi chʌnchajp am bʌ i chaʼan jiñi chʼichʼ, ¿muʼ ba i mejlel lac chʼʌm? Ti jujuntiquil yom miʼ ñaʼtan cheʼ bajcheʼ miʼ suben i  conciencia. An muʼ bʌ i subentelob tiʼ conciencia chaʼan mucʼʌch i mejlel i chʼʌmob, pero an muʼ bʌ i subentelob tiʼ conciencia chaʼan maʼañic. * ¿Baqui bʌ yambʌ texto tac yaʼ ti Biblia miʼ coltañonla lac ñaʼtan baqui bʌ tsʼac yom bʌ mi lac chʼʌm?

8. ¿Bajcheʼ miʼ coltañonla lac ñaʼtan chuqui yom bʌ mi lac mel chaʼan laj cʼocʼlel jiñi Filipenses 4:5?

⁸ Ili ora an cʼamʌjel tac mach bʌ cʌmbilic i tsʼʌcal. Pero tajol an muʼ bʌ i yʌlob chaʼan yujilob baqui bʌ tsʼac miʼ mejlel i lajmesan jiñi cʼamʌjel. Yom tsajilonla. Ti Proverbios 14:15 miʼ yʌl chaʼan jiñi cʌntesʌbil bʌ maʼañic miʼ ñop tiʼ pejtelel muʼ bʌ i subentel, ñaxan miʼ wen ñaʼtan chuqui miʼ mel. Yambʌ tsaʼ bʌ i yʌlʌ Pablo jin cheʼ jiñi xñoptʼañob yom miʼ chʼʌmbeñob isujm (Filipenses 4:5, TNM). Mi mucʼʌch lac jacʼ ili ticʼojel, maʼañic mi caj lac ñaʼtan chaʼan ñumen ñuc bʌ ti laj cuxtʌlel jiñʌch jiñi cʼamʌjel. Mach la comic sujtel ti juntiquil cojach bʌ miʼ bajñel ñaʼtan i bʌ (Filipenses 2:4). La cujil chaʼan muʼto caj lac chʌn cʼamʼan come xmulilontola. Jin chaʼan, yom mi laj qʼuel chaʼan jiñi ñumen ñuc bʌ ti laj cuxtʌlel jiñʌch i melol i yeʼtel Jehová (pejcan Filipenses 1:10).

9. a) ¿Bajcheʼ miʼ coltañonla Romanos 14:13, 19 chaʼan mi lac ñaʼtan chuqui yom bʌ mi lac mel chaʼan laj cʼocʼlel? b) Mi maʼañic mi lac jacʼ i ticʼojel jiñi Pablo, ¿chuqui miʼ mejlel ti ujtel?

⁹ Ti wajali yaʼ ti Roma, an xñoptʼañob tsaʼ bʌ i chaʼleyob tʼan tiʼ tojlel yañoʼ bʌ come mach lajalic chuqui miʼ ñaʼtañob chaʼan uchʼibʌl tac yicʼot qʼuiñijel. Pero jiñi, tsaʼ jach caji i tech i yotsan ti wocol i muchʼtʌlel jiñi congregación. Jin chaʼan, Pablo tsiʼ subeyob: «An wiñic ñumen ñuc bʌ miʼ qʼuel jumpʼejl qʼuin bajcheʼ yambʌ. Yambʌ wiñic junlajal miʼ qʼuel pejtelel qʼuin. Ti jujuntiquil laʼ i ñaʼtan ti jumpʼejl i pusicʼal bajcheʼ yom» (pejcan Romanos 14:5, 13, 15, 19, 20). Ili miʼ cʌntesañonla chaʼan yom mi lac chʼʌmben isujm yicʼot mi laj qʼuel ti ñuc bajcheʼ miʼ ñaʼtan jiñi yañoʼ bʌ i maʼañic mi lac wersa al chaʼan jin yom miʼ ñopob bajcheʼ mi lac ñaʼtan joñonla. Mi maʼañic mi lac jacʼ i ticʼojel Pablo, ¿chuqui miʼ mejlel ti ujtel? Miʼ mejlel la cʌcʼ ti michʼan la quermañojob yicʼot la cʌcʼ ti wocol i muchʼtʌlel jiñi congregación. Jumpʼejl xñujpuñel ti jumpʼejl país tsiʼ ñopo i wersa suben jiñi yambʌ hermanojob chaʼan miʼ mʌñob tsʼac ti pastilla yicʼot chaʼan pʼisbil jach chuqui yom miʼ cʼuxob. An tsaʼʌch bʌ i jacʼʌyob, pero an maʼañic bʌ. Ti wiʼil, maʼañic tsiʼ mele i yeʼtel cheʼ bajcheʼ tsaʼ subentiyob, i cabʌl hermano tsaʼ michʼayob. ¿Chucoch tsaʼ ujti bajcheʼ jiñi? Come jiñi xñujpuñelob maʼañic tsiʼ wen ñaʼtayob tsaʼ bʌ i meleyob. Jiñi yambʌ hermanojob añob tiʼ wenta mi yomob i mel bajcheʼ woliʼ subentelob. Pero tiʼ caj chaʼan tsiʼ ñopo i wersa suben jaʼel jiñi yañoʼ bʌ, tsiʼ yʌcʼʌyob ti wocol i muchʼtʌlel jiñi congregación.

10. ¿Chucoch yom mi lac chʼʌm ti ñuc muʼ bʌ i ñaʼtan jiñi yañoʼ bʌ? (Qʼuele jiñi dibujo am bʌ tiʼ tejchibal.)

¹⁰ Tajol maʼañic mi lac mulan cheʼ bʌ juntiquil hermano an chuqui miʼ ñaʼtan i mel chaʼan  i cʼocʼlel jiñʌch bʌ an tiʼ wenta miʼ ñaʼtan. Pero mach yomic mi lac tech tʼan tiʼ tojlel i mi lac ñop laj qʼuextʌben bajcheʼ miʼ ñaʼtan. Tajol yom to miʼ ñumen cʌntesan i conciencia (1 Corintios 8:11, 12). O tajol joñonla yom to bʌ mi lac ñumen cʌntesan ti wen laj conciencia. Ti jujuntiquil yom miʼ ñaʼtan chuqui yom bʌ miʼ mel, i mi an i wocolel ti wiʼil yom miʼ lʌtʼ.

11, 12. ¿Bajcheʼ miʼ coltañonla Eclesiastés 3:4 yicʼot Gálatas 5:19-21 chaʼan wen chuqui mi lac yajcan ti lac ñusaqʼuin?

¹¹ Ti lac pejtelel mi lac mulan tseʼñal yicʼot alas come Jehová cheʼʌch tsiʼ meleyonla (Eclesiastés 3:4). Pero mi la com miʼ yʌqʼueñonla lac wenlel jiñi ñusaqʼuin, yom mi laj qʼuel baqui bʌ mi caj lac yajcan yicʼot bajcheʼ jalel caj la cʌqʼuen i yorajlel. ¿Bajcheʼ miʼ coltañonla lac yajcan chuqui wem bʌ jiñi laj conciencia?

¹² Jiñi Biblia miʼ subeñonla chaʼan mach wis yomic mi lac mel mach bʌ weñic, bajcheʼ jiñi tsʼiʼlel, i chʼujutesʌntel dios teʼ tac, jiñi wujt, jiñi jatsʼ, mi lac majlel ti qʼuiñijel tac ñumeñix bʌ ti pʼis yicʼot cʌlʌx jap lembal. Pablo tsiʼ yʌlʌ chaʼan «jiñi muʼ bʌ i chaʼlen cheʼ bajcheʼ jiñi, maʼañic mi caj i yochel tiʼ yumʌntel Dios» (Gálatas 5:19-21). Jin chaʼan, laʼ laj cʼajtiben lac bʌ: «¿Muʼ ba i yʌcʼon jiñi j conciencia chaʼan mij cotsan c bʌ ti ñusaqʼuin tac baqui miʼ pʌstʌl jatsʼ yicʼot tsʌnsa, chaʼan miʼ wen cʼuxbintel jumpʼejl país o jontol bʌ miʼ sujtesañon jaʼel? ¿Maʼañic ba chuqui miʼ subeñon cheʼ bʌ mij qʼuel película tac baqui miʼ pʌstʌl tsʼiʼlel, yʌcʼʌjel (qʼuixñijel) o miʼ pʌstʌl chaʼan utsʼatʌch jiñi wujt?».

13. ¿Bajcheʼ miʼ coltañonla 1 Timoteo 4:8 yicʼot Proverbios 13:20 chaʼan wen chuqui mi lac yajcan ti lac ñusaqʼuin?

¹³ Laʼ laj qʼuel yambʌ texto tac muʼ bʌ mejlel i coltañonla chaʼan wen chuqui mi lac yajcan ti lac ñusaqʼuin. Jumpʼejl ejemplo, 1 Timoteo 4:8 (TNM) miʼ tsictesan chaʼan jiñi ejercicio utsʼat chaʼan lac bʌcʼtal. Tiʼ sujm, cheʼ mi lac chaʼlen alas miʼ mejlel i coltañonla. Pero mach yomic yʌl chaʼan mi caj lac chaʼlen alas la quicʼot majqui jach. Proverbios 13:20 miʼ yʌl: «Jiñi muʼ bʌ i piʼleñob majlel jiñi weñoʼ bʌ i pusicʼal mucʼʌch i tajob i ñaʼtʌbal. Jiñi muʼ bʌ i piʼleñob majlel jiñi mach bʌ weñobic i pusicʼal miʼ yutsi pʼojlel i mul». Mi la com chaʼan wen chuqui mi lac yajcan ti lac ñusaqʼuin yom mi laj cʌntesan laj conciencia ti jiñi loqʼuem bʌ ti Biblia.

14. ¿Bajcheʼ tsiʼ colta jumpʼejl familia jiñi ticʼojel am bʌ ti Romanos 14:2-4?

¹⁴ Laʼ laj qʼuel chuqui tsaʼ ujti tiʼ tojlel jumpʼejl xñujpuñel i cʼabaʼob Christian yicʼot Daniela. Christian tiʼ tsictesa chaʼan cheʼ bʌ tsiʼ meleyob jiñi chʼujutesaya ti familia tsiʼ yʌlʌyob yicʼot jiñi chaʼtiquil xchʼoc bʌ i yalobilob chaʼan jiñi ñusaqʼuin. Tsiʼ yʌlʌyob chaʼan an ñusaqʼuin  wem bʌ yicʼot mach bʌ weñic. Cheʼ jaʼel tsiʼ yʌlʌyob chaʼan majqui jiñi wem bʌ amigojob. Pero juntiquil i yixicpʼeñal tsiʼ yʌlʌ chaʼan an chaʼtiquil uxtiquil Testigojob yaʼ ti escuela miʼ melob mach bʌ weñic miʼ qʼuel. Tsiʼ ñopo i xicʼob chaʼan cheʼ miʼ mel jaʼel. Jiñi i tatob tiʼ tsictesʌbeyob chaʼan jujuntiquil yom miʼ cʼʌn i conciencia chaʼan miʼ ñaʼtan chuqui miʼ mel i majqui yicʼot miʼ mel (pejcan Romanos 14:2-4).

15. ¿Bajcheʼ miʼ coltañonla Mateo 6:33 chaʼan mi lac ñaʼtan bajcheʼ mi caj laj cʼʌn jiñi ora am bʌ lac chaʼan?

¹⁵ ¿Chuqui ñumen i cʼʌjñibal chaʼan jatet? ¿Jimba maʼ majlel ti tempa bʌ, maʼ majlel ti subtʼan yicʼot cheʼ maʼ tsajin jiñi Biblia? ¿O jimba ñusaqʼuin? Jesús tsiʼ yʌcʼʌ jumpʼejl ticʼojel muʼ bʌ mejlel i coltañonla laj qʼuel bajcheʼ jalel caj la cʌqʼuen i yorajlel jiñi ñusaqʼuin tac. Tsiʼ yʌlʌ: «Ñaxan sajcanla i yumʌntel Dios yicʼot i tojel. Cheʼ jiñi mi caj laʼ wʌqʼuentel pejtelel chuqui tac anto yom laʼ chaʼan» (Mateo 6:33). Jiñi laj conciencia yom miʼ yʌqʼueñonla laj cʼajtesan ili i ticʼojel Jesús cheʼ woli lac ñaʼtan chuqui yom mi lac mel.

16. ¿Chuqui yom miʼ ñijcañonla lac mel jiñi laj conciencia?

¹⁶ Mi wen cʌntesʌbil laj conciencia, mach cojach mi caj i subeñonla chaʼan maʼañic mi lac mel mach bʌ weñic. Mi caj i subeñonla lac mel chuqui wem bʌ, bajcheʼ jiñi subtʼan. Mi caj i ñijcañonla jeʼel chaʼan mi lac subeñob i chaʼan bʌ Dios jiñi yañoʼ bʌ, tajol ti jujumpʼejl otot o jiñʌch baqui jach. Cheʼʌch tsaʼ ujti tiʼ tojlel Pablo. Tsiʼ yʌlʌ chaʼan mach mejlic i cʌy subtʼan come wen i cʼʌjñibalʌch (1 Corintios 9:16). Mi mucʼʌch lac lajin, woliyʌch lac tsʼʌctesan la queʼtel i ñʌchʼʌl mi caj i yajñel laj conciencia. Cheʼ jaʼel, cheʼ mi lac chaʼlen subtʼan, Pablo tsiʼ yʌlʌ chaʼan woli lac chaʼlen wersa chaʼan jiñi i conciencia yañoʼ bʌ miʼ jacʼob jiñi wen tʼan (2 Corintios 4:2).

17. ¿Chuqui tsiʼ mele juntiquil hermana wen cʌntesʌbil bʌ i chaʼan i conciencia?

¹⁷ Laʼ laj qʼuel tsaʼ bʌ ujti tiʼ tojlel jiñi hermana Jacqueline. Cheʼ bʌ an jaxto 16 i jabilel, tsaʼ caji ti ajlel chaʼan evolución yaʼ tiʼ clase. Miʼ wen mulan i yʌcʼ i jacʼbal chuqui miʼ yʌjlel ti clase, pero ti jiñi bʌ ora, jiñi i conciencia maʼañic tsiʼ cʌyʌ. ¿Chucoch? Come mach yomic i yotsan i bʌ. Jin chaʼan, ti tsictesʌbe i maestro chaʼan maʼañic miʼ ñop jiñi. Toj sajtel i pusicʼal cheʼ bʌ tsiʼ qʼuele chaʼan jiñi i maestro wen jach tsiʼ jacʼʌ i tsaʼ cʼajtibenti chaʼan miʼ tsictesʌben i piʼʌlob ti clase bajcheʼ tsaʼ mejliyonla. Tijicña tsiʼ yubi chaʼan jiñi i conciencia cʌntesʌbil ti Biblia tsiʼ colta i mel chuqui wem bʌ. ¿Cheʼ ba mucʼ ti eʼtel a conciencia bajcheʼ jiñi?

18. ¿Chucoch ñuc i cʼʌjñibal cheʼ wen cʌntesʌbil an laj conciencia?

¹⁸ Cheʼ mi lac tsajin jiñi Biblia, mi lac ñaʼtan yicʼot mi lac mel chuqui mi laj cʌn, wen cʌntesʌbil caj i yajñel laj conciencia. Wen ñuc i cʼʌjñibal iliyi come mi caj i coltañonla lac jacʼ jiñi mandar yicʼot muʼ bʌ i cʌntesañonla Jehová. ¿Mach ba la comic lac taj ti lac pejtelel jiñi?