TEMAJ AM BΛ TIʼ TEJCHIBAL
¿Majquiyob jiñi i testigojob Jehová?
«Mike, i testigo Jehová, wajalix j cʌñʌ. Miʼ wen acʼon ti pensar chaʼan i ñopbal. ¿Majqui Jehová? ¿Chucoch maʼañic miʼ melob qʼuiñijel jiñi Testigojob? Tsaʼ c wen ñaʼta cheʼ yaʼ ochem ti jiñi ñopbalʌl.» (Becky, chʼoyol ti California, Estados Unidos)
«Jiñi chumuloʼ bʌ tic tʼejl tsaʼ caji i pejcañob jiñi Biblia yicʼot i testigojob Jehová, i tsaʼ c ñaʼta: ‹¡Baqui tsiʼ locʼsayob i cʼabaʼ i ñopbal! ¿Chuqui yom i yʌl?›» (Zenon, chʼoyol ti Ontario, Canadá)
«Tsaʼ c ñaʼta quicʼot quijñam chaʼan cheʼ miʼ julaʼtañon lojon jiñi Testigojob chaʼan jach miʼ qʼuelob maʼañic mic majlel lojon ti templo. Yicʼot tsaʼ c ñaʼta lojon chaʼan mi maxto lon c taja jiñi woli (choncol) bʌ c sajcan lojon ti jiñi wen cʌmbil bʌ ñopbalʌl tac, mi yicʼotic to i testigojob Jehová.» (Kent, chʼoyol ti Washington, Estados Unidos)
«Tiʼ sujm, mach cujilic majquiyob yicʼot chuqui miʼ ñopob.» (Cecilie, chʼoyol ti Esbjerg, Dinamarca)
Tajol tsaʼix a qʼueleyob ti subtʼan ti otot tac, ti calle, miʼ yʌcʼob jun tac yicʼot miʼ yʌcʼob estudio loqʼuem bʌ ti Biblia mach bʌ tojbilic. Tajol ili revista jiñʌch tsiʼ yʌqʼueyetob. Pero tajol ñaʼtʌbil a chaʼan jaʼel bajcheʼ jiñi yañoʼ bʌ tsaʼ bʌ lac ñaxan alʌ, i maʼ cʼajtiben a bʌ majquiyob jiñi i testigojob Jehová.
¿Chuqui miʼ mejlel a mel mi an a cʼajtiya o an chuqui maʼ ñaʼtan tiʼ tojlelob? ¿Baqui miʼ mejlel a ñaʼtan chuqui miʼ ñopob, bajcheʼ miʼ tajob taqʼuin chaʼan miʼ melob i yeʼtel, i Yotlel Tempa bʌ tac yicʼot chucoch miʼ majlelob ti a wotot o miʼ pejcañetob ti calle?
Cecilie, tsiʼ chaʼ alʌ: «An cabʌl chuqui tsaʼ c pejca ti Internet chaʼan i testigojob Jehová. Tsaʼ cubi cabʌl tʼan yicʼot bajcheʼ miʼ ñaʼtʌntel tiʼ tojlelob, cheʼʌch tsaʼ caji c ñaʼtan jeʼel». Pero cheʼ bʌ tsiʼ pejcayob tsaʼ cʼoti i chʼʌmben isujm.
¿Chucoch maʼañic maʼ pejcan jiñi i testigojob Jehová chaʼan maʼ ñumen cʌñob? Jiñʌch tsaʼ bʌ i meleyob ili revista, i yom i coltañetob a tajben i jacʼbal a cʼajtiya tac (Proverbios 14:15). Com lojon chaʼan jiñi yan tac bʌ temaj miʼ coltañet a cʌn majquiyob, chuqui miʼ ñopob yicʼot chuqui miʼ melob.
