1. a) ¿Chuqui miʼ ñijcañonla chaʼan mi lac mel jiñi apóstol Juan? b) ¿Chucoch yom mi lac ñaʼtan bajcheʼ cʼamel miʼ cʼuxbiñonla Jehová?

JIÑI apóstol Juan tsiʼ yʌlʌ: «Cabʌl tsiʼ cʼuxbiyonla lac Tat» (1 Juan 3:1). Yicʼot ili tʼan, jiñi apóstol miʼ yʌqʼueñonla lac ñaʼtan bajcheʼ cʼamel miʼ cʼuxbiñonla Jehová yicʼot bajcheʼ miʼ pʌsbeñonla. Cheʼ mi lac ñaʼtan jiñi, mi caj lac sujtel ti ñumen wem bʌ i yamigo Dios i mi caj lac ñumen cʼuxbin.

2. ¿Chucoch an wocol bʌ miʼ ñopob chaʼan miʼ cʼuxbintelob ti Dios?

² An wiñicob xʼixicob (quixtañujob) maʼañic bʌ miʼ chʼujbiñob chaʼan miʼ cʼuxbintelob ti Jehová. Miʼ ñaʼtañob chaʼan maʼañic miʼ chʼʌjmelob ti ñuc. Chaʼan cojach miʼ yʌl chuqui yom miʼ mejlel, i chaʼan an chuqui miʼ tumben jiñi maʼañic bʌ miʼ jacʼob. An ñopbalʌl tac muʼ bʌ i yʌlob tiʼ cʌntesa chaʼan Dios wen jontol. Jin chaʼan cabʌl miʼ ñaʼtañob chaʼan mach mejlic laj cʼuxbin. Pero an muʼ bʌ i ñaʼtañob chaʼan miʼ cʼuxbin tiʼ pejtelel quixtañu i mach i wentajic chuqui miʼ melob. Pero la cujilix i sujmlel i chaʼan Jehová come tsaʼix lac tsaji jiñi Biblia. Yaʼi miʼ yʌl chaʼan cʼuxbiyajʌch i jin chaʼan tsiʼ choco tilel ti chʌmel i  Yalobil ti laj caj (Juan 3:16; 1 Juan 4:8). Pero tajol an i wiñicob Jehová maxto bʌ añic miʼ wen ñopob chaʼan mucʼʌch i cʼuxbintelob. Tajol cheʼ miʼ ñaʼtañob tiʼ caj chuqui ñusʌbil i chaʼañob.

3. ¿Chucoch mi la cʌl chaʼan mucʼʌch i cʼuxbiñonla Jehová?

³ ¿Chucoch mi la cʌl chaʼan mucʼʌch i cʼuxbiñonla Jehová? Come jiñʌch tsiʼ meleyonla (pejcan Salmo 100:3-5). Jin chaʼan jiñi Biblia miʼ yʌl chaʼan Adán «i yalobil Dios» (Lucas 3:38). Cheʼ bʌ Jesús tsiʼ cʌntesayonla lac mel oración, tsiʼ pʌsbeyonla chaʼan Jehová jiñʌch lac Tat (Mateo 6:9). Jin chaʼan, miʼ cʼuxbiñonla bajcheʼ juntiquil tatʌl miʼ cʼuxbin i yalobil.

4. a) ¿Bajcheʼ yilal bʌ tatʌl Jehová? b) ¿Chuqui mi caj laj qʼuel ti ili temaj yicʼot ti yambʌ?

⁴ Tajol an maʼañic bʌ miʼ wen ñopob chaʼan juntiquil tatʌl wen an i cʼuxbiya come cheʼ alʌlob to tsaʼ wen ticʼlʌntiyob tiʼ tat i ñaʼ. Pero Jehová maʼañic mi caj i wis aqʼueñonla ilaya wocol. Jiñʌch ñumen wem bʌ lac Tat (Salmo 27:10). Miʼ wen cʼuxbiñonla yicʼot cabʌl bajcheʼ miʼ cʌntañonla. Mi caj lac ñumen cʼuxbin cheʼ mi lac ñumen ubiben i cʼuxbiya (Santiago 4:8). Ti ili temaj mi caj laj qʼuel chʌnchajp bajcheʼ miʼ pʌsbeñonla i cʼuxbiya Jehová. Yaʼ ti yambʌ mi caj laj qʼuel chʌnchajp bajcheʼ miʼ mejlel lac pʌsben laj cʼuxbiya.

5. ¿Chuqui miʼ yʌqʼueñonla Jehová ti lac pejtelel?

⁵ Cheʼ bʌ jiñi apóstol Pablo tsajñi ti Atenas, tsiʼ qʼuele chaʼan an cabʌl diosteʼ yicʼot chaʼan jiñi quixtañujob miʼ ñopob chaʼan jiñʌch muʼ bʌ i yʌqʼueñob i cuxtʌlel. Jin chaʼan, tsiʼ subeyob chaʼan Jehová tsiʼ «mele pañimil yicʼot pejtelel i bʌl». Cheʼ jeʼel, tsiʼ yʌlʌ chaʼan jiñʌch «miʼ yʌqʼueñonla laj cuxtʌlel yicʼot la quiqʼuilel yicʼot pejtelel lac chubʌʼan» yicʼot chaʼan «tilem ti Dios laj cuxtʌlel yicʼot lac pʼʌtʌlel ti xʌmbal. Tiʼ pʼʌtʌlel Dios añonla» (Hechos 17:24, 25, 28). Jehová miʼ yʌqʼueñonla tiʼ pejtelel chuqui la com chaʼan tijicña mi lac chumtʌl. Laʼ laj qʼuel chaʼpʼejl uxpʼejl aqʼuebil bʌ i chaʼañonla.

6. ¿Bajcheʼ yilal baqui tsiʼ yʌcʼʌyonla ti chumtʌl Jehová? (Qʼuele jiñi foto am bʌ tiʼ tejchibal.)

⁶ Jehová tsiʼ chajpʌbeyonla utsʼatax bʌ ajñibʌl chaʼan mi lac chumtʌl (Salmo 115:15, 16). Cojach ili Lum wen qʼuexel bʌ tsiʼ mele bajcheʼ jiñi yambʌ planeta tac. Jiñi científicojob an i tajayob cabʌl planeta yaʼ tiʼ jochtʌlel jiñi universo. Pero maʼañic tajbil yambʌ baqui mi lac mejlel ti chumtʌl. Tsʼʌcʌl bajcheʼ tsiʼ chajpa Jehová ili Lum chaʼan mi lac chumtʌl, wen utsʼatax yicʼot wen jach bajcheʼ tsiʼ mele chaʼan tijicña mi lac ñusan lac bʌ (Isaías 45:18). Cheʼ mi lac wen ñaʼtan ili utsʼatax bʌ Lum, miʼ cʼotel laj cʌn chaʼan Jehová mucʼʌch i cʼuxbiñonla (pejcan Job 38:4, 7 yicʼot Salmo 8:3-5).

7. ¿Bajcheʼ yambʌ tsiʼ pʌsʌ chaʼan miʼ cʼuxbiñonla?

⁷ Cheʼ bʌ Jehová tsiʼ yʌcʼʌ chaʼan miʼ mejlel lac pʌs cheʼ bajcheʼ yilal i melbal, tsiʼ pʌsʌ chaʼan miʼ cʼuxbiñonla (Génesis 1:27). Jin chaʼan miʼ mejlel la cubiben i cʼuxbiya yicʼot mi laj cʼuxbin. Yujil chaʼan jiñʌch muʼ bʌ i tijicñesañonla come cheʼ bʌ jiñi xcolelob miʼ yubiben i cʼuxbiya i tat i ñaʼ, tijicñayob. Cheʼ jaʼel, Jesús tsiʼ yʌlʌ chaʼan tijicñayonla mi lʌcʼʌl añonla ti Jehová (Mateo 5:3). Jiñi Biblia miʼ yʌl chaʼan miʼ yʌqʼueñonla «pejtelel chuqui tac yom chaʼan mi la cubin lac tijicñʌyel» (1 Timoteo 6:17). Jehová wen an i yutslel yicʼot miʼ wen cʼuxbiñonla (Salmo 145:16).

8. ¿Chucoch la com miʼ cʌntesañonla Jehová?

⁸ Jiñi wem bʌ tatʌl miʼ ticʼ i yalobilob  chaʼan utsʼat miʼ yajñelob come miʼ cʼuxbiñob. Pero cabʌl tatʌl maʼañic miʼ qʼuelob ti ñuc jiñi muʼ bʌ i yʌl jiñi Biblia. Maʼañic miʼ mejlel i pʌsbeñob chuqui wen o mach bʌ weñic i yalobilob. Jin chaʼan, jiñi i yalobilob maʼañix miʼ ñaʼtañob chuqui yom bʌ melol yicʼot mach tijicñayobic (Proverbios 14:12). Pero Jehová miʼ yʌqʼuen wem bʌ cʌntesa i yalobil come jiñʌch ‹Dios isujm bʌ› (Salmo 31:5). Miʼ cʌntesañonla i sujmlel bʌ tiʼ tojlel yicʼot bajcheʼ yom mi lac chʼujutesan. Miʼ cʌntesañonla jaʼel bajcheʼ ñumen wen yom mi lac chumtʌl (pejcan Salmo 43:3). Laʼ laj qʼuel chuqui cʌntesʌbil i chaʼañonla Jehová muʼ bʌ i wen pʌsbeñonla i cʼuxbiya.

9, 10. a) ¿Chucoch miʼ cʌntesañonla Jehová chaʼan tiʼ tojlel? b) ¿Chucoch miʼ cʌntesañonla chaʼan bʌ joñonla?

⁹ Ñaxan, miʼ cʌntesañonla ñuc tac bʌ i cʼʌjñibal tiʼ tojlel come yom mi laj cʌn (Santiago 4:8). Jin chaʼan miʼ pʌsbeñonla chuqui i cʼabaʼ. Cojach muʼ bʌ i ñumen tajbentel i cʼabaʼ yaʼ ti Biblia. Jehová miʼ cʌntesañonla jaʼel bajcheʼ yilal. Jumpʼejl ejemplo, cheʼ mi laj qʼuel chuqui melbil i chaʼan, miʼ cʼotel laj cʌn chaʼan an i ñaʼtʌbal yicʼot i pʼʌtʌlel (Romanos 1:20). Cheʼ mi lac pejcan jiñi Biblia, mi laj qʼuel chaʼan juntiquil Dios toj bʌ yicʼot muʼ bʌ i cʼuxbiñonla. Cheʼ mi lac ñumen cʌn majlel, ñumen mi caj lac lʌcʼtiyel tiʼ tojlel.

¹⁰ Jehová miʼ cʌntesañonla ñuc bʌ i cʼʌjñibal chaʼañonla jaʼel. Miʼ yʌl chaʼan ochemonla tiʼ familia. Miʼ tsictesʌbeñonla yom bʌ mi lac mel chaʼan mi lac melben i yeʼtel (troñel) ti ñʌchʼtʌlel yicʼot ti juntemel. Jiñi Biblia miʼ subeñonla chaʼan maʼañic tsiʼ meleyonla chaʼan joñonla mi lac yajcan chuqui wem bʌ o mach bʌ weñic  chaʼañonla (Jeremías 10:23). Jiñʌch yujil chuqui ñumen wen ti lac tojlel. Tijicña yicʼot ti ñʌchʼtilel mi caj la cajñel mi mucʼʌch lac jacʼben i tʼan yicʼot mi laj qʼuel ti ñuc. Jehová miʼ cʼuxbiñonla, jin chaʼan cʌntesʌbil i chaʼañonla iliyi.

11. ¿Chuqui subebil i chaʼañonla Jehová chaʼan ti talto bʌ qʼuin?

¹¹ Jiñi wem bʌ tatʌl miʼ cʼojoʼtan i yalobilob chaʼan jiñi talto bʌ qʼuin yicʼot yom chaʼan tijicñayob. Pero ili ora cabʌl mach yujilobic muʼ bʌ caj i yujtel tiʼ tojlelob ti talto bʌ qʼuin. Miʼ toʼol jisañob i bʌ ti eʼtel chaʼan i tajol jiñi mach bʌ yujilic jalijel (Salmo 90:10). Pero woli (choncol) bʌ lac melben i yeʼtel Jehová mi la cʌqʼuen wocolix i yʌlʌ cheʼ cʌntesʌbil i chaʼañonla chaʼan tijicñayonla ili ora yicʼot subebil i chaʼañonla wem bʌ lac pijtaya ti talto bʌ qʼuin.

12. ¿Bajcheʼ tsiʼ ñopo i coltan Jehová jiñi Caín yicʼot Baruc?

¹² Jehová tsiʼ ñopo i coltan Caín cheʼ bʌ maxto i mele mach bʌ weñic. Tsiʼ sube chaʼan miʼ tic i michʼajel yicʼot miʼ qʼuextan i pensar. Mi cheʼʌch miʼ mel, Jehová mi caj i yʌqʼuen bendición (Génesis 4:6, 7). Pero Caín maʼañic tsiʼ jacʼʌ, i tsiʼ taja cabʌl wocol (Génesis 4:11-13). Ti jumpʼejl bʌ qʼuin, Jehová tsiʼ qʼuele chaʼan Baruc, juntiquil i wiñic, tsaʼ lujbʼa yicʼot tsiʼ yubi i chʼijiyemlel come mach weñic chuqui an tiʼ pensar. Jin chaʼan Jehová tsiʼ sube chaʼan yom miʼ qʼuextan i pensar. Tsaʼʌch i jacʼʌ, i jiñʌch tsiʼ coltʌbe i cuxtʌlel (Jeremías 45:2-5).

13. ¿Chuqui tsiʼ cʌñʌyob i wiñicob Jehová cheʼ bʌ tsiʼ ñusayob tsʌts tac bʌ wocol?

¹³ Jehová miʼ tojʼesañonla yicʼot miʼ ticʼonla come miʼ cʼuxbiñonla. Miʼ tojʼesañonla cheʼ i cʼʌjñibal lac chaʼan yicʼot miʼ coltañonla chaʼan ñumen wem bʌ quixtañujonla (Hebreos 12:6). Jehová tsiʼ colta chaʼan miʼ ñumen tojʼan jiñi i wiñicob ti wajali. Jumpʼejl ejemplo, tsiʼ cʌyʌ chaʼan José, Moisés yicʼot David miʼ ñusañob tsʌts tac bʌ wocol. Yaʼʌch tsaʼ cʼoti i cʌñob chaʼan jiñʌch ñuc bʌ la queʼtel tiʼ melol i yeʼtel Jehová. Cheʼ mi lac pejcan yaʼ ti Biblia chaʼan Jehová miʼ coltan i wiñicob yicʼot chaʼan miʼ ñumen tojʼañob, mi laj qʼuel chaʼan miʼ wen cʼuxbiñonla (pejcan Proverbios 3:11, 12).

14. ¿Bajcheʼ miʼ pʌsbeñonla i cʼuxbiya Jehová cheʼ mi lac taj lac sajtemal?

¹⁴ Jehová miʼ pʌsbeñonla i cʼuxbiya cheʼ bʌ miʼ ticʼonla mi tsaʼ lac taja lac sajtemal. ¿Bajcheʼ? Jiñi xʼaltʼan Isaías tsiʼ yʌlʌ chaʼan Jehová miʼ ñusʌbeñonla lac mul «ti pejtelel i pusicʼal» (Isaías 55:7). Jiñi rey David tsiʼ yʌlʌ: «[Jehová] jiñʌch muʼ bʌ i ñusʌbeñon pejtelel c mul. Miʼ lajmesʌbeñon pejtelel j cʼamʌjel. Miʼ mʌñon loqʼuel baʼ colel c chʌmel. Miʼ chʼʌlon ti corona come cʼux miʼ yubiñon» (Salmo 103:3, 4, 12). Wen tsiquil chaʼan Jehová tiʼ pejtelel ora yom i ñusan lac mul. Pero yom mi lac chʼʌm jiñi lac tojʼesʌntel yicʼot mi laj qʼuextan lac melbal. Yom mi laj cʼajtesan chaʼan Jehová miʼ tojʼesañonla come miʼ cʼuxbiñonla (Salmo 30:5).

15. ¿Bajcheʼ yambʌ miʼ pʌsbeñonla i cʼuxbiya Jehová?

¹⁵ Jiñi wem bʌ tatʌl miʼ cʌntan i yalobilob chaʼan maʼañic miʼ tajtʌlob ti wocol. Cheʼʌch miʼ mel Jehová. Ti Salmo 97:10 miʼ yʌl chaʼan miʼ cʌntan i chaʼañoʼ bʌ yicʼot miʼ pʌyob loqʼuel tiʼ pʼʌtʌlel jontoloʼ bʌ. Ñaʼtan iliyi. Mi an chuqui miʼ mejlel i ticʼlan lac wut mi laj qʼuel, ti ora mi lac mʌctan. Jehová ti ora miʼ coltañonla jaʼel cheʼ bʌ la  com yajlel ti wocol. Cheʼʌch miʼ mel come miʼ cʼuxbiñonla (pejcan Deuteronomio 32:10).

16, 17. ¿Bajcheʼ miʼ cʌntan i wiñicob Jehová?

¹⁶ Jehová miʼ chʌn cʼʌn i yángelob chaʼan miʼ cʌntan i wiñicob (Salmo 91:11). Jumpʼejl ejemplo, ti jumpʼejl jach acʼʌlel juntiquil ángel tiʼ tsʌnsa 185,000 soldadojob chaʼan miʼ coltan i tejclum Dios (2 Reyes 19:35). Tiʼ yorajlel jiñi ñaxam bʌ xñoptʼañob, Pedro yicʼot yañoʼ bʌ tsaʼ locʼsʌntiyob ti cárcel ti ángelob (Hechos 5:18-20; 12:6-11). Maxto wen jalic, ti jumpʼejl país i chaʼan África tsaʼ ujti jumpʼejl bʌbʌqʼuen bʌ guerra. Tsaʼ ujti cabʌl jatsʼ, xujchʼ, i chaʼlentel ti violar xʼixicob yicʼot tsʌnsa. Cabʌl Testigojob maʼañobic i chubʌʼan tsaʼ cʌyleyob, anquese maʼañic majqui tsaʼ chʌmi. Pero tsiʼ yubiyob chaʼan Jehová woliyʌch (yʌquelʌch) i cʌntañob. Tijicñayob anquese tsiʼ wen ilayob wocol. Cheʼ bʌ juntiquil muʼ bʌ ti eʼtel yaʼ ti Central Mundial yajcʌbil bʌ tsajñi i julaʼtañob, tsiʼ cʼajtibeyob bajcheʼ yilal añob. Tsiʼ yʌlʌyob chaʼan yicʼot i coltaya Jehová weñʌch añob.

¹⁷ Isujm, an i wiñicob Dios chʌmeñoʼ bʌ tiʼ caj i xucʼtʌlelob. Cheʼ tsaʼ ujti tiʼ tojlel jiñi xcʌntʼan Esteban yicʼot yañoʼ bʌ. Jin chaʼan, mach tiʼ pejtelelic ora miʼ mʌctan Jehová chaʼan maʼañic miʼ chʌmel i wiñicob. Pero mucʼʌch i cʌntañob cheʼ miʼ wʌn tsictesʌbeñob jiñi yac tac muʼ bʌ i yʌcʼ Satanás (Efesios 6:10-12). Ili miʼ mejlel lac taj yaʼ ti Biblia yicʼot ti jun tac muʼ bʌ i chajpan i yorganización. Jumpʼejl ejemplo, Jehová miʼ wʌn subeñonla jiñi wocol tac am bʌ ti Internet, tiʼ cʼuxbintel taqʼuin, libro, película yicʼot ti videojuego tac am bʌ i chaʼan tsʼiʼlel yicʼot jatsʼ o tsʌnsa. Jehová mucʼʌch i cʼuxbiñonla yicʼot yom i cʌntañonla.

18. ¿Bajcheʼ yubil mi la cubin cheʼ la cujil chaʼan miʼ cʼuxbiñonla Jehová?

¹⁸ Cheʼ bʌ tsiʼ cʼajtesa Moisés tiʼ pejtelel jiñi jabil tsaʼ bʌ i melbe i yeʼtel Jehová, tsiʼ ñumen ñopo chaʼan Dios mucʼʌch i cʼuxbin. Jin chaʼan tsiʼ yʌlʌ: «Laʼ jastiyicon lojon ti a wutslel ti jujumpʼejl sʌcʼajel. Cheʼ jiñi mux c chaʼlen lojon cʼay, tijicñayon lojon ti pejtelel qʼuin cʼʌlʌl mic ñoxʼan lojon» (Salmo 90:14). Laʼ laj cʼajtesan tsaʼ bʌ i yʌlʌ jiñi apóstol Juan: «Cabʌl tsiʼ cʼuxbiyonla lac Tat» (1 Juan 3:1). ¿Mach ba jiñic ñuc bʌ lac majtan cheʼ la cujil yicʼot mi la cubin chaʼan miʼ cʼuxbiñonla Jehová?