Joñon lojon jiñʌch jumpʼejl ñopbalʌl maʼañic bʌ chucul ti yambʌ, añon lojon tiʼ pejtelel pañimil (mulawil) i maʼañic mic xʌb lon c bʌ yicʼot yambʌ ñopbalʌl. Jiñi eʼtel (troñel) tiʼ pejtelel pañimil yaʼ miʼ qʼuejlel ti Estados Unidos. Yonlel Testigojob chumulob ti yan tac bʌ país. Añon lojon 8 millón tiʼ petol pañimil, cheʼ jaʼel ñumen ti 230 país mi lon cʌcʼ estudio loqʼuem bʌ ti Biblia. Cheʼʌch woli c tsʼʌctesan lojon tsaʼ bʌ i yʌlʌ Jesucristo: «Jiñi wen tʼan chaʼan i yumʌntel Dios mi caj i sujbel ti pejtelel pañimil chaʼan miʼ yubintel ti pejtelel pañimil» (Mateo 24:14).

Mach yʌlʌyic baqui chumulon lojon, mij qʼuel lojon ti ñuc yicʼot mi lon c jacʼ i mandar jiñi país, pero maʼañic mi cotsan lon c bʌ ti política. Cheʼ bajcheʼ iliyi, mic jacʼ lojon ili mandar tsaʼ bʌ i yʌqʼue Jesús jiñi xñoptʼañob: «Mach i chaʼañeticla pañimil». Jin chaʼan, maʼañic mi cotsan lon c bʌ ti política yicʼot maʼañic mi lon c majlel ti guerra (Juan 15:19; 17:16). Cheʼ ti Segunda Guerra Mundial yonlel Testigojob tsaʼ otsʌntiyon ti cárcel, tsaʼ pʼumpʼun ticʼlʌntiyob yicʼot an tsaʼ bʌ tsʌnsʌntiyob. Juntiquil obispo bʌ wajali ti Alemania tiʼ tsʼijbu: «Miʼ mejlel la cʌl chaʼan jiñob jach maʼañic bʌ tsiʼ jacʼʌyob i mel tsaʼ bʌ subentiyob yaʼ ti Alemania nazi, tsiʼ chʼʌmʌyob ti ñuc i conciencia».

Pero jiñi mach yomic i yʌl chaʼan maʼañic mic pejcan lojon jiñi quixtañujob. Cheʼ bʌ Jesús tsiʼ taja ti tʼan jiñi xcʌntʼañob i chaʼan, tsiʼ cʼajtibe Dios: «Maʼañic mij cʼajtibeñet chaʼan maʼ pʌyob loqʼuel ti pañimil» (Juan 17:15). Jin chaʼan, mic chaʼlen lojon eʼtel, mic chaʼlen lojon mʌñoñel yicʼot mic majlel lojon ti escuela cheʼ bajcheʼ yañoʼ bʌ.