I testigojonbʌlon Jehová mi lon c ñop chaʼan «chʼoyol ti Dios pejtelel i Tsʼijbujel» (2 Timoteo 3:16). Mi lon j cʼʌn jiñi Biblia chaʼan mij cʌn lojon tsaʼ bʌ i Meleyonla yicʼot chaʼan miʼ tojʼesañon lojon ti lon j cuxtʌlel.

Jiñi Tsʼijbujel miʼ yʌl: «Laʼ i cʌñob chaʼan a cʼabaʼ jiñʌch Jehová, come jatet jach jiñi Cʼax ñuquet bʌ tiʼ pejtelel Pañimil» (Salmo 83:18, TNM). Jin chaʼan cojach mic chʼujutesan lojon Jehová Dios. Mic chaʼlen lon wersa cʌcʼ lojon ti cʌñol i cʼabaʼ come i Testigojon lojon (Isaías 43:10-12).

xÑoptʼañon lojon yicʼot mic chʼujbin lojon chaʼan Jesús jiñʌch «i Yalobil Dios», * tsaʼ bʌ tili wʌʼ ti Pañimil i tsaʼ sujti bajcheʼ Mesías (Juan 1:34, 41; 4:25, 26). Cheʼ bʌ tsaʼ chʌmi, tsaʼ chaʼ tejchisʌnti i tsaʼ majli ti panchan (1 Corintios 15:3, 4). Ti wiʼil tsaʼ waʼchoconti bajcheʼ Rey tiʼ Yumʌntel Dios (Apocalipsis [Revelación] 11:15). Jumpʼejlʌch yumʌl añix bʌ muʼ bʌ caj i sujtesan ti jumpʼejl paraíso ili Pañimil (Daniel 2:44). Jiñi Biblia miʼ yʌl: «Jiñi utsoʼ bʌ i pusicʼal [...] tijicña mi caj i yubiñob cheʼ ñʌchʼʌlob i pusicʼal. Mi caj i yʌqʼuentelob jiñi pañimil jiñi tojoʼ bʌ» (Salmo 37:11, 29).

Mic ñop lojon chaʼan jiñi Biblia miʼ mejlel i coltan jiñi wiñicob xʼixicob (quixtañujob) ili ora (Isaías 48:17, 18). Jin chaʼan mic chaʼlen lon wersa tiʼ jacʼol jiñi mandar tac. Jumpʼejl ejemplo, jiñi Biblia miʼ yʌl chaʼan mach lac bibʼesan lac bʌcʼtal yicʼot lac pensar, jin chaʼan maʼañic mi lon c ñucʼ cʼujts mi muqʼuic j cʼʌn lon droga (2 Corintios 7:1). Cheʼ jaʼel maʼañic mi lon c mel muʼ bʌ i tsʼaʼlen jiñi Biblia, bajcheʼ yʌcʼʌjel (qʼuixñijel), tsʼiʼlel yicʼot jiñi xujchʼ (1 Corintios 6:9-11).