1, 2. ¿Chuqui la com ti lac pejtelel muʼ bʌ lac melben i yeʼtel Jehová? Acʼʌ jumpʼejl ejemplo.

¿CHUQUI mi lac ñaxan qʼuel cheʼ mi lac mʌn wut teʼ yaʼ ti mercado? Tajol jin mi jubeñʌch i tojol. Pero muʼ bʌ lac ñumen qʼuel jiñʌch mi weñix yicʼot mi mucʼʌch i mejlel laj cʼux. Jiñi cʼʌñix bʌ jiñʌch ñumen wem bʌ.

² Cheʼ lajal jaʼel, Dios miʼ qʼuel bajcheʼ añob tiʼ colel jiñi i wiñicob. Ili colel woli (choncol) bʌ laj cʌl mach chaʼañic ti lac jabilel, jiñʌch colel tiʼ chaʼan bʌ Dios. Juntiquil xñoptʼan miʼ yʌcʼ tiʼ ñaʼtʌbal chaʼan miʼ taj majlel i colel bajcheʼ i wiñic Dios. Cheʼ bʌ tsaʼix laj cʌñʌ i chaʼan bʌ Jehová yicʼot tsaʼix lac chaʼle chʼʌmjaʼ, ñumen com lac taj majlel laj colel. Jiñi apóstol Pablo tsiʼ sube jiñi xñoptʼañob ti Éfeso chaʼan miʼ mejlel i tajob i colel cheʼ bajcheʼ Cristo, pero yom chʌn temel miʼ yajñelob yicʼot miʼ chʌn cʌñob i chaʼan bʌ Jesús (Efesios 4:13).

3. ¿Bajcheʼ lajal jiñi congregación yaʼ ti Éfeso yicʼot jiñi congregación tac ti ili ora?

³ Cheʼ bʌ Pablo tiʼ tsʼijbube jumpʼejl carta jiñi congregación i chaʼan Éfeso, an cabʌl xñoptʼañob tsaʼix bʌ i tajayob i colel tiʼ chaʼan bʌ Jehová yicʼot wen cabʌlix bʌ chuqui yujilob. Pero an xñoptʼañob jaʼel yom to bʌ miʼ ñumen pʼʌtʼesañob i bʌ bajcheʼ i yamigo Dios. Ili  cheʼʌch miʼ yujtel ti cabʌl congregación ili ora. An cabʌl hermanojob am bʌ i melbeyob i yeʼtel (troñel) Jehová ti cabʌl jabil. Pero an maxto bʌ i tajayob i colel. Yaʼ ochem yonlel hermanojob mucʼoʼ bʌ ti chʼʌmjaʼ ti jujumpʼejl jab. Chaʼan miʼ sujtelob ti xñoptʼan tsaʼix bʌ i tajayob i colel yom miʼ chaʼleñob wersa. ¿Ixcu jatet? ¿Tsaʼix ba a taja a colel bajcheʼ xñoptʼan? (Colosenses 2:6, 7.)

4, 5. a) ¿Junlajaloʼ ba jiñi xñoptʼañob tsaʼix bʌ i tajayob i colel? b) ¿Chuqui junlajal an i chaʼañob jiñi tsaʼix bʌ i tajayob i colel? (Qʼuele jiñi foto am bʌ tiʼ tejchibal.)

⁴ Mach tiʼ pejtelelic lajal jiñi wut teʼ cheʼ cʼʌñix. Mach lajalic i colemlel, pero tsiquil chaʼan cʼʌñix tiʼ pejtelel come an chuqui miʼ yʌqʼueñonla laj cʌn junlajal bʌ. Cheʼʌch miʼ yujtel jaʼel tiʼ tojlel jiñi xñoptʼañob tsaʼix bʌ i tajayob i colel. Mach junlajalobic. Tajol yʌñʌlob i jabilel, i cultura yicʼot muʼ bʌ i mulañob, pero tsiquil chaʼan tsaʼix i tajayob i colel come añʌch chuqui junlajal bʌ bajcheʼ miʼ mejlel laj cʌñob. ¿Baqui tac bʌ ili?

⁵ Jiñi xñoptʼañob tsaʼix bʌ i tajayob i colel miʼ tsajcañob ti utsʼat i yejemplo Jesucristo (1 Pedro 2:21). Jiñʌch tsiʼ yʌlʌ chaʼan yom mi laj cʼuxbin Jehová tiʼ pejtelel lac pusicʼal, laj cuxtʌlel yicʼot lac ñaʼtʌbal. Cheʼ jaʼel, tsiʼ yʌlʌ chaʼan yom mi laj cʼuxbin jiñi yañoʼ bʌ cheʼ bajcheʼ mi laj cʼuxbin lac bʌ (Mateo 22:37-39). Miʼ chaʼleñob wersa i jacʼob ili mandar tac jiñi xñoptʼañob tsaʼix bʌ i tajayob i colel. Miʼ pʌsob bajcheʼ chumulob chaʼan jin ñumen i cʼʌjñibal cheʼ i yamigojob Jehová yicʼot cheʼ miʼ cʼuxbiñob yañoʼ bʌ.

6, 7. a) Anquese cʌmbilob chaʼan i cʼuxbiya, ¿chuqui junlajal an i chaʼañob jiñi xñoptʼañob tsaʼix bʌ i tajayob i colel? b) ¿Chuqui yom mi laj cʼajtiben lac bʌ?

⁶ Anquese cʌmbilob chaʼan i cʼuxbiya, ¿chuqui junlajal an i chaʼañob jiñi xñoptʼañob tsaʼix bʌ i tajayob i colel? (Gálatas 5:22, 23.) Utsob yicʼot yujilob pijt. Yujilob chuqui yom melol cheʼ bʌ añob ti wocol yicʼot maʼañic miʼ wen ubiñob i chʼijiyemlel cheʼ maʼañic miʼ tajob tsaʼ bʌ i lon ñaʼtayob, i maʼañic miʼ sʌtob i pijtaya. Cheʼ bʌ miʼ tsajiñob jiñi Biblia, miʼ sʌclañob ticʼojel tac muʼ bʌ i coltañob i cʌn chuqui wen yicʼot chuqui mach bʌ weñic, i jiñʌch muʼ bʌ i cʼʌñob chaʼan wen chuqui miʼ ñaʼtañob i mel. Añob i pecʼlel yicʼot yujilob chaʼan jiñi ñumen wem bʌ jiñʌch cheʼ miʼ jacʼbeñob i ticʼojel Jehová yicʼot i mandar. * (Pejcan jiñi nota.) Cheʼ jaʼel, miʼ chaʼleñob subtʼan yicʼot i chʼejlel, i miʼ chaʼleñob wersa chaʼan temel miʼ yajñel jiñi congregación.

⁷ Mach yʌlʌyic jaypʼejl jab caj lac melben i yeʼtel Jehová, yom mi laj cʼajtiben lac bʌ: «¿Baqui to yom mic ñumen tojʼan chaʼan mic lajin Jesús?». Laʼ laj qʼuel uxchajp muʼ bʌ i coltañonla chaʼan mi lac taj laj colel bajcheʼ Cristo.

8. ¿Bajcheʼ la cujil chaʼan Jesús wen cʌmbil i chaʼan jiñi Tsʼijbujel yicʼot tsiʼ wen chʼʌmbe isujm?

⁸ Jesucristo wen cʌmbil i chaʼan jiñi Tsʼijbujel yicʼot miʼ wen chʼʌmben isujm. Jumpʼejl ejemplo, cheʼ bʌ an jaxto 12 i jabilel tsaʼ cʌyle ti tʼan yicʼot jiñi xcʌntesajob yaʼ ti templo. Toj sajtelob i pusicʼal jiñi tsaʼ bʌ i yubiyob (Lucas 2:46, 47). Ti wiʼil wen utsʼatax tsiʼ cʼʌñʌ jiñi Tsʼijbujel i maʼañix chuqui tsaʼ mejli i jacʼ jiñi i contrajob (Mateo 22:41-46).

9. a) ¿Chuqui ti programa yom an lac chaʼan mi com la sujtel ti xñoptʼan tsaʼix bʌ i taja i colel? b) ¿Chuqui yom mi lac mel cheʼ bʌ mi lac tsajin jiñi Biblia?

⁹ Mi la com sujtel ti xñoptʼan tsaʼix bʌ i  taja i colel, yom mi lac mel bajcheʼ Jesús. Mach jasʌlic cheʼ laj cʌñʌyix jiñi ñaxam bʌ cʌntesʌntel tac am bʌ yaʼ ti Biblia. Cheʼ mi lac tsajin jiñi Biblia yom mi lac ñumen cʌmben i sujmlel muʼ bʌ lac pejcan come «mi laj cʼux waj cheʼ tsaʼix lac taja laj colel» (Hebreos 5:14). Yom «mi laj cʌn» chuqui i tojel bʌ miʼ yʌl jiñi Biblia (Efesios 4:13). Chaʼan miʼ mejlel jiñi, yom an lac chaʼan wem bʌ programa chaʼan estudio. Yaʼ ochem cheʼ mi lac pejcan jiñi Biblia ti jujumpʼejl qʼuin, ti lac bajñelil o yicʼot lac familia ti jujumpʼejl semana. Cheʼ mi lac tsajin jiñi Biblia, yom mi lac wersa cʌn bajcheʼ miʼ ñaʼtan yicʼot bajcheʼ yubil miʼ yubin i bʌ Jehová, cheʼ jiñi yom mi lac chʼʌm ti ñuc cheʼ an chuqui la com lac mel. Cheʼ mi lac mel bajcheʼ jiñi, mi caj lac ñumen pʼʌtʼan majlel bajcheʼ i yamigojonla Jehová.

10. ¿Bajcheʼ miʼ pʌsob chaʼan miʼ cʼuxbiñob i mandar yicʼot i ticʼojel Dios jiñi xñoptʼañob tsaʼix bʌ i tajayob i colel?

¹⁰ Anquese jiñi xñoptʼañob tsaʼix bʌ i tajayob i colel yujilobix chuqui miʼ yʌl jiñi Biblia, miʼ cʼuxbiñob i mandar yicʼot i ticʼojel Dios. ¿Bajcheʼ miʼ pʌsob? Miʼ chaʼleñob wersa i melob chuqui yom Dios, anquese an i tajol yom miʼ qʼuextañob bajcheʼ chumulob, chuqui miʼ ñaʼtañob yicʼot miʼ melob. Miʼ tsajcañob i yejemplo Jesús yicʼot miʼ qʼuextañob bajcheʼ yilalob ti ñaxan i jiñix miʼ melol chuqui toj bʌ yicʼot jiñi xucʼtʌlel (pejcan Efesios 4:22-24). Yom cʼajal lac chaʼan, Dios tsiʼ cʼʌñʌ chʼujul bʌ i yespíritu tiʼ tojlel jiñi wiñicob tsaʼ bʌ i tsʼijbuyob jiñi Biblia. Jin chaʼan, jiñi chʼujul bʌ espíritu miʼ coltan jiñi xñoptʼan muʼ bʌ i tsajin jiñi Biblia chaʼan miʼ ñumen cʌn majlel, chaʼan miʼ  ñumen taj i cʼuxbiya yicʼot miʼ sujtel ti wem bʌ i yamigo Jehová.

11. Cheʼ bʌ Jesús tsajñi wʌʼ ti Pañimil, ¿bajcheʼ yilal jiñi yambʌ quixtañujob?

¹¹ Cheʼ bʌ tsajñi Jesús wʌʼ ti Pañimil, juntiquilʌch wiñic toj bʌ. Pero jiñi i tat i ñaʼ, i yerañob yicʼot jiñi yambʌ wiñicob xʼixicob (quixtañujob) xmulilob. Cheʼ jaʼel, jinto jiñi xcʌntʼañob i chaʼan tsiʼ chanʼesayob i bʌ yicʼot tsiʼ bajñel ñaʼtayob i wenlel. Jumpʼejl ejemplo, ti jiñi bʌ acʼʌlel cheʼ mi caj i tsʌnsʌntel Jesús, tsaʼ caji subeñob i bʌ chaʼan majqui jiñi ñumen ñuc bʌ (Lucas 22:24). Pero Jesús tsiʼ ñaʼta chaʼan muʼto caj i tajob i colel i mi caj i melob jumpʼejl congregación temel bʌ mi caj i yajñel. Jin chaʼan, tsiʼ cʼajtibe Jehová ti jiñi bʌ acʼʌlel chaʼan miʼ coltañob ti temel ajñel jiñi xcʌntʼañob i chaʼan, cheʼ bajcheʼ an Jesús yicʼot i tat. Tsiʼ sube: «[Laʼ ajñicob] ti jumpʼejl jach i pusicʼal, cheʼ bajcheʼ jumpʼejl lac pusicʼal jaʼel» (Juan 17:21, 22).

12, 13. a) ¿Chuqui yom mi lac ñaʼtan lac mel ti lac pejtelel? b) ¿Bajcheʼ tsiʼ cʌñʌ juntiquil hermano chaʼan yom miʼ chaʼlen coltaya chaʼan temel miʼ yajñel jiñi congregación?

¹² Jiñi xñoptʼañob tsaʼix bʌ i tajayob i colel miʼ chaʼleñob coltaya chaʼan temel miʼ yajñel jiñi congregación (pejcan Efesios 4:1-6, 15, 16). Ti lac pejtelel yom mi lac ñaʼtan chaʼan temel yicʼot utsʼat mi lac chaʼlen eʼtel yicʼot la quermañojob. Yom an lac pecʼlel tiʼ melol iliyi. Jumpʼejl ejemplo, ¿chuqui mi lac mel mi juntiquil hermano tsiʼ mele mach bʌ weñic o an chuqui tsiʼ yʌlʌ maʼañic bʌ tsaʼ lac mulaj? ¿Muʼ ba laj cʌy lac pejcan? ¿O muʼ ba lac chaʼlen wersa lac tojʼesan jiñi wocol? Mi xñoptʼañonla tsaʼix bʌ lac taja laj colel, mi caj lac chaʼlen wersa lac tojʼesan jiñi wocol i maʼañic mi caj lac ñumen tsʌtsʼesan.

¹³ Ñaʼtancu chuqui tsaʼ ujti tiʼ tojlel juntiquil hermano i cʼabaʼ Uwe. Miʼ wen michʼan cheʼ bʌ jiñi yambʌ hermanojob miʼ melob mach bʌ weñic. Pero jumpʼejl bʌ qʼuin tsiʼ ñaʼta i tsajin yaʼ ti Biblia yicʼot ti libro Perspicacia chaʼan bajcheʼ tsiʼ ñusa jiñi rey David. ¿Chucoch tsiʼ ñaʼta i tsajin jiñi? Come tsiʼ taja wocol tiʼ tojlel yambʌ i wiñicob Dios jaʼel. Jumpʼejl ejemplo, jiñi rey Saúl tsiʼ ñopo i tsʌnsan. Ti wiʼil, chaʼtiquil uxtiquil israelob tsiʼ ñaʼta i julob ti xajlel (tun) chaʼan miʼ tsʌnsañob. Ti jumpʼejl bʌ qʼuin jeʼel, jiñi i yijñam tsaʼto i wajle (1 Samuel 19:9-11; 30:1-6; 2 Samuel 6:14-22). Anquese cheʼ tsiʼ ñusa bajcheʼ jiñi, tsiʼ chʌn cʼuxbi Jehová yicʼot tsiʼ ñopo chuqui miʼ yʌl. Cheʼ jaʼel, tsiʼ wen pʌsʌ i yutslel tiʼ tojlel yañoʼ bʌ. Cheʼ bʌ Uwe tiʼ tsaji tsaʼ bʌ i ñusa David, tsaʼ cʼoti i ñaʼtan chaʼan yom miʼ lajin chuqui tsiʼ mele yicʼot chaʼan miʼ qʼuextan chuqui miʼ ñaʼtan tiʼ tojlel jiñi hermanojob. Cheʼ jaʼel tsaʼ cʼoti i ñaʼtan chaʼan yom miʼ ñusʌben i mul yañoʼ bʌ yicʼot tsiʼ chaʼle coltaya chaʼan temel miʼ yajñel jiñi congregación. ¿Mach ba yomic mi lac lajin bajcheʼ tsiʼ mele jiñi hermano?

14. ¿Majqui tsiʼ yajca Jesús tiʼ yamigo?

¹⁴ Jesucristo tsiʼ pʌsʌ i yutslel tiʼ tojlel quixtañujob. Jiñi wiñicob o xʼixicob, alobob yicʼot xñoxob wen tijicña tsiʼ yubiyob cheʼ añob yicʼot Jesús. Pero wen tsiʼ yajca majqui miʼ mejlel ti sujtel tiʼ yamigo. Ti jumpʼejl bʌ qʼuin tsiʼ sube i apóstolob: «Jatetla c piʼʌletla cheʼ mi laʼ chaʼlen chuqui mic subeñetla» (Juan 15:14). Jesús cojach tsiʼ yajca tiʼ yamigo xucʼuloʼ bʌ tiʼ tojlel, muʼ bʌ i cʼuxbiñob yicʼot i melbeñob i yeʼtel Jehová. Ñuc i cʼʌjñibal cheʼ cojach mi lac yajcan ti la camigo muʼ bʌ i cʼuxbiñob Jehová. ¿Chucoch?

15. ¿Chucoch wen cheʼ jiñi xcolelob miʼ sʌclañob tiʼ yamigo jiñi xñoptʼañob tsaʼix bʌ i tajayob i colel?

¹⁵ Ñumen wen miʼ cʼʌnʼan jiñi wut teʼ cheʼ miʼ taj i ticwʌlel Qʼuin. Cheʼ lajal jaʼel i cʼuxbiya jiñi hermanojob yaʼ ti congregación bajcheʼ i  ticwʌlel jiñi Qʼuin. ¿Chucoch? Come miʼ coltañonla chaʼan mi lac sujtel ti xñoptʼan tsaʼix bʌ i taja i colel. Mi xcolelet, ¿a wujilix ba chuqui mi caj a mel ti a cuxtʌlel? Mi a wom a mel chuqui wem bʌ, sujtesan ti a wamigo jiñi hermanojob wajalix bʌ cajel i melbeñob i yeʼtel Jehová yicʼot woli (yʌquel) bʌ i chaʼleñob wersa chaʼan temel miʼ yajñel jiñi congregación. Añix ñusʌbil i chaʼañob cabʌl wocol i miʼ mejlel i coltañetob a yajcan bajcheʼ ñumen wen maʼ chumtʌl. Cheʼ mucʼʌch a wajñel a wicʼotob, mi caj i coltañetob a yajcan chuqui wem bʌ yom maʼ mel i maʼ sujtel ti juntiquil xñoptʼan tsaʼix bʌ i taja i colel (pejcan Hebreos 5:14).

16. ¿Bajcheʼ tsiʼ coltayob juntiquil hermana xcolel to bʌ jiñi hermanojob añobix bʌ i jabilel?

¹⁶ Juntiquil hermana i cʼabaʼ Helga tsiʼ yʌlʌ chaʼan lʌcʼʌl tiʼ pejtelel i piʼʌlob ti clase tsaʼ caji i yʌlob chuqui yom bʌ i tajob cheʼ jumpʼejl jax jab cʌyʌl chaʼan miʼ loqʼuel ti escuela. Cabʌl tsiʼ yʌlʌyob chaʼan yomob majlel ti universidad yicʼot miʼ chajpañob i bʌ ti jumpʼejl wem bʌ eʼtel. Pero Helga tsiʼ ñaʼta i cʼajtiben ticʼojel jiñi hermanojob yaʼ ti congregación añobix bʌ i ñaʼtʌbal. Yonlel hermanojob wen añobix i jabilel. Helga miʼ yʌl chaʼan tsiʼ wen coltayob yicʼot tsiʼ ñijcʌbeyob i pusicʼal chaʼan miʼ melben i yeʼtel Dios tiʼ pejtelel ora. Wocolix i yʌlʌ jiñi ticʼojel tac tsaʼ bʌ aqʼuenti tsiʼ chaʼle eʼtel joʼpʼejl jab bajcheʼ precursora. Anquese cʼʌlʌl ti jiñi bʌ ora ñumeñix cabʌl jab, maʼañic miʼ yubin i chʼijiyemlel cheʼ tsiʼ ñaʼta i melben i yeʼtel Jehová cʼʌlʌl cheʼ bʌ xcolel to.

17, 18. Mi la com ñumen an laj cʼʌjñibal tiʼ tojlel Jehová, ¿chuqui yom mi lac mel?

¹⁷ Mi mucʼʌch lac tsajcan bajcheʼ tsiʼ mele Jesús, mi caj lac sujtel ti juntiquil xñoptʼan tsaʼix bʌ i taja i colel. Mi caj lac sujtel ti ñumen wem bʌ i yamigo Jehová yicʼot ñumen mi caj lac mulan lac melben i yeʼtel. Cheʼ bajcheʼ jiñi, ñumen an laj cʼʌjñibal mi caj i qʼuelonla Jehová. Jesús tsiʼ sube jiñi xcʌntʼañob i chaʼan: «Pʌsbeñob wiñicob xʼixicob laʼ sʌclel yicʼot wen bʌ laʼ weʼtel. Cheʼ miʼ qʼuelob mi caj i tsictesañob i ñuclel laʼ Tat am bʌ ti panchan» (Mateo 5:16).

¹⁸ Cheʼ bajcheʼ mi laj qʼuel, jiñi xñoptʼan tsaʼix bʌ i tajayob i colel miʼ mejlel i wen coltañob jiñi congregación. Junchajp muʼ bʌ i yʌjqʼuelob ti cʌjñel jiñʌch cheʼ miʼ cʼʌñob ti utsʼat i conciencia. ¿Bajcheʼ miʼ coltañonla lac ñaʼtan ti wen chuqui com lac mel jiñi laj conciencia? ¿Bajcheʼ mi lac pʌs chaʼan mucʼʌch lac chʼʌm ti ñuc i conciencia yañoʼ bʌ? Ili mi caj laj qʼuel ti yambʌ temaj.