1. a) ¿Chuqui tsiʼ chaʼle Pedro cheʼ bʌ yaʼañob ti mar i chaʼan Galilea? (Qʼuele jiñi dibujo am bʌ tiʼ tejchibal.) b) ¿Chucoch tsaʼ caji ti sujpʼel?

TI JUMPʼEJL bʌ acʼʌlel Pedro yicʼot yambʌ xcʌntʼañob tsaʼ tajleyob ti icʼ jaʼal cheʼ bʌ woli (choncol) i cʼaxelob majlel ti barco yaʼ ti mar i chaʼan Galilea. Mach yʌxʌlobic i yoj cheʼ bʌ tsiʼ qʼueleyob ti xʌmbal Jesús tiʼ pam jaʼ. Pedro tsiʼ cʼajtibe Jesús mi mejl ti xʌmbal jaʼel, i Jesús tsiʼ yʌlʌ chaʼan mucʼʌch. Jin chaʼan, tsaʼ jubi i tsiʼ xʌñʌ majlel baʼan Jesús. Pero ti wiʼil tsaʼ caji ti sujpʼel. ¿Chucoch? Come tsiʼ qʼuele jiñi icʼ jaʼal i tsiʼ chaʼle bʌqʼuen. Cheʼ jiñi, tsiʼ cʼajtibe Jesús chaʼan miʼ coltan. Jesús tsiʼ chucbe i cʼʌb i tsiʼ sube: «Jatet mach bʌ añic maʼ ñop ti pejtelel a pusicʼal, ¿chucoch tsaʼ tejchi tile bixel bʌ a pusicʼal?» (Mateo 14:24-32).

2. ¿Chuqui mi caj laj qʼuel ti ili temaj?

² Ti ili temaj mi caj laj qʼuel uxchajp muʼ bʌ mejlel laj cʌn tiʼ tojlel Pedro. Ñaxam bʌ jiñʌch bajcheʼ tsiʼ pʌsʌ i ñopoñel (chʼujbiya) ti Jehová chaʼan mucʼʌch caj i coltan. I chaʼpʼejlel jiñʌch chucoch tsaʼ caji i sʌt i ñopoñel. I yuxpʼejlel jiñʌch bajcheʼ tsiʼ chaʼ taja i ñopoñel. Ili uxchajp mi caj i coltañonla chaʼan ñumen pʼʌtʌl miʼ yajñel lac ñopoñel (1 Corintios 16:13).

3. a) ¿Chucoch tsaʼ jubi Pedro yaʼ ti barco i tsaʼ caji ti xʌmbal tiʼ pam jaʼ? b) ¿Chuqui lʌcʼʌ lajal bʌ melbil lac chaʼan jaʼel bajcheʼ jiñi?

³ Pedro tsaʼ jubi yaʼ ti barco i tsaʼ caji ti xʌmbal tiʼ pam jaʼ cheʼ bʌ Jesús tsiʼ pʌyʌ. ¿Chucoch? Come tsiʼ ñopo chaʼan Jehová mi caj i coltan cheʼ bajcheʼ tsiʼ mele tiʼ tojlel Jesús. Lʌcʼʌ lajal melbil lac chaʼan jaʼel xñoptʼañonbʌla. Cheʼ bʌ tsaʼ laj cʌñʌ chaʼan Jesús yom mi lac sujtel ti xcʌntʼan i chaʼan, tsaʼ la cʌqʼue laj cuxtʌlel Jehová yicʼot tsaʼ lac chaʼle chʼʌmjaʼ. ¿Chucoch? Come tsaʼ lac wen ñopo chaʼan Jehová yicʼot Jesús mi caj i coltañonla (Juan 14:1; pejcan 1 Pedro 2:21).

4, 5. ¿Chucoch ñuc i cʼʌjñibal jiñi lac ñopoñel?

⁴ Wen i cʼʌjñibal cheʼ an lac ñopoñel come miʼ coltañonla lac mel jiñi mach bʌ mejlic yilal (Mateo 21:21, 22). Jumpʼejl ejemplo, Pedro tsaʼ mejli ti xʌmbal tiʼ pam jaʼ come añʌch i ñopoñel. Joñonla jaʼel an chuqui wocol tac bʌ melbil lac chaʼan come añʌch lac ñopoñel. Cabʌl tsaʼix bʌ laj qʼuexta jiñi lac melbal. I jiñi wiñicob xʼixicob (quixtañujob) miʼ qʼuelob chaʼan mach chʌn lajaloñixla bajcheʼ ti wajali. Cheʼʌch tsaʼ lac mele come mi laj cʼuxbin Jehová, i jiñʌch tsiʼ coltayonla (pejcan Colosenses 3:5-10). Cheʼ jaʼel, tsaʼ la cʌqʼue laj cuxtʌlel i tsaʼ sujtiyonla tiʼ yamigo come an lac ñopoñel tiʼ tojlel. Pejtelel iliyi tsaʼ mejli lac mel tiʼ coltaya Dios (Efesios 2:8).

⁵ Jiñi lac ñopoñel ñuc i cʼʌjñibal come miʼ yʌqʼueñonla lac pʼʌtʌlel chaʼan mi lac mʌlben (jotben) jiñi wen pʼʌtʌl bʌ laj contra, Satanás (Efesios 6:16). Cheʼ jaʼel, miʼ coltañonla lac lʌtʼ wocol tac. Jehová miʼ yʌcʼ i tʼan chaʼan mi caj i yʌqʼueñonla tiʼ pejtelel chuqui la com mi mucʼʌch lac chʼujbin yicʼot mi lac melben i yeʼtel (troñel) (Mateo 6:30-34). Mi añʌch lac ñopoñel, mi caj i yʌcʼonla ti chumtʌl yaʼ ti Paraíso tiʼ pejtelel ora (Juan 3:16).

6, 7. a) ¿Bajcheʼ miʼ mejlel lac lajin jiñi icʼ yicʼot jiñi jaʼ muʼ bʌ i wecʼulan i bʌ? b) ¿Bajcheʼ la cujil chaʼan majqui jach miʼ mejlel i sʌt i ñopoñel?

⁶ Laʼ lac chaʼ al chaʼan Pedro. ¿Chucoch tsiʼ chaʼle bʌqʼuen cheʼ bʌ woli (yʌquel) ti xʌmbal ti jaʼ? Jiñi Biblia miʼ yʌl chaʼan tsaʼ caji i qʼuel jiñi icʼ jaʼal i tsiʼ cʌyʌ i qʼuel Jesús (Mateo 14:30). Cheʼʌch tsaʼ caji i sʌt i chʼujbiya yicʼot tsaʼ caji ti sujpʼel. Jiñi wocol tac yicʼot lac pʌyol ti mulil miʼ mejlel ti lajintel bajcheʼ jiñi icʼ yicʼot jaʼ muʼ bʌ i wecʼulan i bʌ. Jehová miʼ mejlel i yʌqʼueñonla lac pʼʌtʌlel chaʼan mi laj cuch jiñi wocol tac anquese wen tsʌts. Pero mi cojach mi la cʌcʼ ti lac pusicʼal jiñi wocol, miʼ mejlel laj cʌy lac ñop chaʼan mi caj i coltañonla Jehová.

⁷ Majqui jach miʼ mejlel i sʌt i ñopoñel. ¿Bajcheʼ la cujil? Jiñi Biblia miʼ yʌl chaʼan cheʼ mach wen añic lac ñopoñel jiñʌch «mulil muʼ bʌ i yʌcʼonla ti cʌytʌl [o yajlel]» (Hebreos 12:1). Cheʼ mi lac wen acʼ ti lac pusicʼal jiñi wocol tac bajcheʼ tsiʼ mele Pedro, miʼ mejlel lac sʌt lac ñopoñel. ¿Bajcheʼ mi lac ñaʼtan mi an ti wocol lac ñopoñel? Laʼ laj qʼuel cʼajtiya tac muʼ bʌ i mejlel i coltañonla.

8. ¿Chuqui miʼ mejlel i cʌyonla chaʼan maʼañix mi lac chʌn ñop jiñi albilix bʌ i chaʼan Jehová?

⁸ ¿Chʌn am ba lac ñopoñel ti jiñi albil tac bʌ i chaʼan Jehová? Jumpʼejl ejemplo, albil i chaʼan Jehová chaʼan lʌcʼʌlix mi caj i jisan i pañimil (mulawil) Satanás. Pero miʼ mejlel laj cʌy lac ñop chaʼan lʌcʼʌlix i jilibal ili pañimil cheʼ mi laj cʌy chaʼan jiñi ñusaqʼuin tac miʼ mʌctañonla (Habacuc 2:3). Yambʌ ejemplo. Jehová tsiʼ yʌcʼʌ i tʼan chaʼan miʼ ñusʌbeñonla lac mul tiʼ coltaya i cuxtʌlel i yalobil. Pero mi wolito lac chʌn ñaʼtan jiñi mulil tsaʼ bʌ lac mele, miʼ mejlel lac ñaʼtan chaʼan Jehová maxto i ñusʌbeyonla (Hechos 3:19). Cheʼ jiñi miʼ mejlel laj cʌy subtʼan yicʼot mi lac sʌt lac tijicñʌyel tiʼ melol i yeʼtel.

9. ¿Chuqui miʼ mejlel ti ujtel mi maʼañix mi laj qʼuel ti ñuc Jehová ti laj cuxtʌlel?

 ⁹ ¿Woli ba lac chʌn melben i yeʼtel Jehová tiʼ pejtelel lac pusicʼal? Cheʼ mi la cʌcʼ lac bʌ ti melol i yeʼtel, miʼ ñumen xucʼtiyel jiñi lac pijtaya chaʼan cuxtʌyel. Pero ¿ixcu mi jiñi muʼ bʌ lac ñumen acʼ ti ñuc maʼañic miʼ cʌyonla lac melben i yeʼtel Jehová bajcheʼ ti ñaxan, tajol jumpʼej eʼtel baqui wen mi lac tojtʌl? Miʼ mejlel i cʼunʼesan lac ñopoñel yicʼot laj cʌy lac melben i yeʼtel tiʼ pejtelel lac pusicʼal (Hebreos 6:10-12).

10. ¿Chucoch añʌch lac ñopoñel ti Jehová mi lac pʌs cheʼ mucʼʌch lac ñusʌben i mul yañoʼ bʌ?

¹⁰ ¿Muʼ ba lac ñusʌben i mul yambʌ? ¿Muʼ ba lac michʼan cheʼ an majqui miʼ mel maʼañic bʌ mi lac mulan i maʼañix mi lac pejcan? Mi cheʼi, tajol woli laj cʌlʌx acʼ ti ñuc bajcheʼ yubil mi la cubin lac bʌ. Pero cheʼ mucʼʌch lac ñusʌben, mi lac pʌs lac ñopoñel ti Jehová. ¿Bajcheʼ? Come mi la com miʼ ñusʌbeñonla lac mul, yom mi lac ñusʌben i mul yañoʼ bʌ (Lucas 11:4). Mi cheʼ mi lac mel, mi lac pʌs chaʼan mucʼʌch lac ñop chaʼan tijicña mi caj i yubin Jehová yicʼot chaʼan mi caj i ñusʌbeñonla lac mul jaʼel. Jiñʌch ñumen i cʼʌjñibal i mach jiñic cheʼ mi la cʌqʼuen i toj jiñi am bʌ chuqui tsiʼ melbeyonla. Jiñi xcʌntʼañob i chaʼan Jesús yujilob chaʼan cʼʌñʌl an lac ñopoñel ti ñusʌbentel i mul yañoʼ bʌ. Jin chaʼan, cheʼ bʌ Jesús tsiʼ subeyob chaʼan cheʼ yom miʼ melob tiʼ tojlel jiñi mach bʌ junyajl jach miʼ tajob i sajtemal, tsiʼ jacʼʌyob: «Coltañon lojon chaʼan xucʼul mic ñopet lojon» (Lucas 17:1-5).

11. ¿Chuqui mach yomic lac mel cheʼ an majqui miʼ ticʼonla?

¹¹ ¿Muʼ ba lac michʼan cheʼ mi lac tijqʼuel? Cheʼ bʌ an majqui miʼ ticʼonla, yom mi laj qʼuel ti ñuc bajcheʼ miʼ mejlel i coltañonla jiñi ticʼojel. Pero maʼañic chuqui mi caj laj cʌn mi cojach mi laj qʼuel i sajtemal o chuqui miʼ subeñonla (Proverbios 19:20). Yom an lac ñopoñel yicʼot mi laj qʼuel jiñi ticʼojel bajcheʼ laj coltʌntel chaʼan lajal mi lac ñaʼtan bajcheʼ Jehová.

12. ¿Chuqui mi lac pʌs mi tiʼ pejtelel ora mi lac tech tʼan tiʼ tojlel añoʼ bʌ tiʼ wenta congregación?

¹² ¿Muʼ ba lac tech tʼan tiʼ tojlel añoʼ bʌ tiʼ wenta congregación? Cheʼ bʌ jiñi israelob tsiʼ yubiyob tsaʼ bʌ cʼoti i yʌl jiñi 10 xyojchʼob, tsiʼ techeyob tʼan tiʼ tojlel Moisés yicʼot Aarón. Jin chaʼan Jehová tsiʼ cʼajtibe Moisés: «¿Jaypʼejl to ora mi caj i michʼleñoñob ili wiñicob? ¿Jaypʼejl to ora maʼañic mi caj i pʼisob ti wenta jiñi ñuc tac bʌ c pʼʌtʌlel tsaʼ bʌ c pʌsbeyob?» (Números 14:2-4, 11). Cheʼ bʌ jiñi israelob tsaʼ cajiyob i contrajin i wiñicob Jehová, tsiʼ pʌsʌyob chaʼan maʼañobic i ñopoñel. Mi joñonla jaʼel tiʼ pejtelel ora mi lac tech tʼan tiʼ tojlel waʼchocobiloʼ bʌ i chaʼan Jehová yaʼ ti congregación, mi lac pʌs chaʼan choncol lac sʌt lac ñopoñel tiʼ tojlel.

13. ¿Chucoch mach yomic laj cʌy lac bʌ mi woliʼ cʼunʼan lac ñopoñel mi laj qʼuel?

¹³ Tajol mi laj qʼuel chaʼan tsaʼix cʼunʼa lac ñopoñel cheʼ tsaʼ ujti lac tsajin ili cʼajtiya tac. Pero mach laj cʌy lac bʌ. Yom mi laj cʼajtesan chaʼan Pedro tsiʼ chaʼle bʌqʼuen yicʼot tsiʼ sʌtʌ i ñopoñel. An i tajol Jesús tsiʼ tiqʼui i apóstolob come mach wen añobic i ñopoñel (Mateo 16:8). Pero an chuqui ñuc bʌ mi laj cʌn ti tsaʼ bʌ i mele Pedro ti wiʼil cheʼ tsaʼ caji i sʌt i ñopoñel yicʼot cheʼ tsaʼ caji ti sujpʼel.

14, 15. a) ¿Chuqui tsiʼ mele Pedro cheʼ bʌ tsaʼ caji ti sujpʼel? b) ¿Bajcheʼ miʼ mejlel laj qʼuel Jesús?

¹⁴ ¿Chuqui tsiʼ mele Pedro cheʼ bʌ tsaʼ caji ti sujpʼel? I wentʌlel tsiʼ chaʼle ñuxijel majlel yaʼ ti barco come wen yujil ñuxijel (Juan 21:7). ¿Chucoch mach cheʼic tsiʼ mele? Maʼañic tsiʼ ñopo i bajñel coltan i bʌ come tsiʼ qʼuele Jesús yicʼot tsiʼ cʼajtibe i coltaya. Mi tsaʼix cʼunʼa jiñi lac ñopoñel ti Dios  mi la cubin, yom mi lac lajin Pedro. ¿Bajcheʼ?

¹⁵ Pedro tsiʼ qʼuele Jesús. Jiñi Biblia miʼ yʌl chaʼan joñonla «toj yom mij qʼuela majlel Jesús» jaʼel (Hebreos 12:2, 3, Cuxul bʌ tʼan). (Qʼuele jiñi recuadro «¿Chuqui yom i yʌl?».) Pero maʼañic miʼ mejlel laj qʼuel cheʼ bajcheʼ tsiʼ qʼuele Pedro. Cheʼ jiñi, ¿bajcheʼ miʼ mejlel laj qʼuel Jesús? Yom mi lac tsajin chuqui tac tsiʼ mele yicʼot tsiʼ pʌsʌ, i mi lac tsajcan i yejemplo. Ili mi caj i coltañonla lac chaʼ taj jiñi lac chʼujbiya ti Dios. Laʼ laj qʼuel bajcheʼ tac miʼ mejlel lac lajin Jesús.

16. ¿Bajcheʼ miʼ mejlel lac pʼʌtʼesan lac ñopoñel tiʼ Tʼan Dios?

¹⁶ Laʼ lac pʼʌtʼesan lac ñopoñel tiʼ Tʼan Dios. Jesús wen yujil chaʼan chʼoyol ti Dios jiñi Biblia yicʼot miʼ yʌcʼ wen tac bʌ ticʼojel (Juan 17:17). Ti jujumpʼejl qʼuin yom mi lac pejcan jiñi Biblia, mi lac tsajin yicʼot mi lac wen ñaʼtan woli bʌ laj cʌn mi la com pʼʌtʌl lac ñopoñel i mi lac lajin Jesús. Yom mi lac sʌclʌben i sujmlel mi an maʼañic bʌ mi lac chʼʌmben isujm. Jumpʼejl ejemplo, ¿mucʼʌch baʼ ñop chaʼan chumuloñixla ti cojix bʌ qʼuin? Tsajin jiñi profecía tac chaʼan jiñi cojix bʌ qʼuin i mi caj i pʼʌtʼesan a ñopoñel. ¿Mucʼʌch baʼ ñop chaʼan Jehová mi caj i tsʼʌctesan jiñi albil bʌ i chaʼan ti talto bʌ qʼuin? Tsajin jiñi profecía tac tsʼʌctiyemix bʌ. ¿Mucʼʌch baʼ ñop chaʼan miʼ coltañonla jiñi ticʼojel tac am bʌ ti Biblia ti ili ora? Pejcan bajcheʼ coltʌbil i chaʼan tiʼ cuxtʌlel jiñi hermanojob i mi caj i pʼʌtʼesan a ñopoñel jaʼel (1 Tesalonicenses 2:13). *

17. a) ¿Chuqui tsiʼ colta chaʼan Jesús miʼ lʌtʼ tsʌts tac bʌ wocol? b) ¿Bajcheʼ miʼ mejlel lac sajcʌben i yejemplo?

¹⁷ Laʼ lac ñaʼtan jiñi albil bʌ i chaʼan Jehová chaʼañonla. Jesús tsiʼ ñaʼta jiñi albil bʌ i chaʼan Jehová tiʼ tojlel. Jiñʌch tsiʼ colta i lʌtʼ jiñi tsʌts bʌ wocol tac (Hebreos 12:2). Maʼañic tsiʼ yʌcʼʌ chaʼan miʼ mʌctan jiñi an tac bʌ ti pañimil (Mateo 4:8-10). ¿Bajcheʼ miʼ  mejlel lac lajin i yejemplo Jesús? Yom mi lac ñaʼtan jaʼel jiñi albil bʌ i chaʼan Jehová chaʼañonla. ¿Bajcheʼ? Ñaʼtan bajcheʼ yilal cheʼ yaʼix añet ti Paraíso. Tsʼijbun o mele ti dibujo jiñi a wom bʌ a mel yaʼi, o tsʼijbun majqui tac a wom bʌ a pejcan ti jiñi muʼ bʌ caj i chaʼ tejchelob yicʼot chuqui a wom bʌ a subeñob. Ñaʼtan chaʼan jiñi albil bʌ i chaʼan Dios subebil i chaʼañet jaʼel.

18. ¿Chuqui miʼ mejlel i coltañonla chaʼan miʼ ñumen ñucʼan lac ñopoñel?

¹⁸ Laʼ laj cʼajtiben miʼ ñumen aqʼueñonla lac ñopoñel Jehová. Jesús tsiʼ pʌsʌ chaʼan jiñi xcʌntʼañob i chaʼan yom miʼ cʼajtibeñob Jehová chʼujul bʌ espíritu (Lucas 11:9, 13). Jiñi lac ñopoñel jiñʌch i yʌcʼbal jiñi chʼujul bʌ espíritu, i jiñi espíritu mi caj i ñumen ñuqʼuesan lac ñopoñel. Miʼ mejlel laj cʼajtiben i coltaya Jehová jeʼel chaʼan mi lac mʌlben jiñi mejl bʌ i cʼunʼesan lac chʼujbiya. Mi wocol mi la cubin chaʼan mi lac ñusʌben i mul yañoʼ bʌ, miʼ mejlel laj cʼajtiben Jehová chaʼan miʼ ñumen pʼʌtʼesan lac ñopoñel yicʼot chaʼan mi lac ñusan jiñi mulil.

19. ¿Majqui yom mi lac yajcañob ti la camigo?

¹⁹ Laʼ lac yajcan ti la camigo pʼʌtʌloʼ bʌ i ñopoñel. Jesús tsiʼ wen yajca i yamigojob. Jiñi ñumen wem bʌ i yamigojob jiñʌch jiñi apóstolob come añob i xucʼtʌlel yicʼot miʼ jacʼbeñob i tʼan (pejcan Juan 15:14, 15). Yom mi lac yajcan ti la camigo pʼʌtʌloʼ bʌ i ñopoñel jaʼel yicʼot muʼ bʌ i jacʼbeñob i tʼan Jesús. Jiñi wem bʌ amigojob miʼ subeñob i bʌ i sujmlel bʌ. Cheʼ yom miʼ yʌcʼob jumpʼejl ticʼojel, miʼ melob. Mi joñonla yom bʌ mi la cʌqʼueñob, miʼ jacʼob (Proverbios 27:9).

20. ¿Chucoch yom mi laj coltañob i pʼʌtʼesan i ñopoñel jiñi yañoʼ bʌ?

²⁰ Laʼ laj coltañob i pʼʌtʼesan i ñopoñel jiñi yañoʼ bʌ. Jesús cabʌl chuqui tsiʼ mele yicʼot tsiʼ yʌlʌ chaʼan miʼ pʼʌtʼesʌben i ñopoñel jiñi xcʌntʼañob i chaʼan (Marcos 11:20-24). Yom mi laj coltañob jaʼel i pʼʌtʼesan i ñopoñel yañoʼ bʌ. Cheʼʌch mi caj lac pʼʌtʼesan lac ñopoñel jaʼel (Proverbios 11:25). ¿Bajcheʼ miʼ mejlel lac mel? Miʼ mejlel lac tsictesʌbeñob cheʼ woliyonla ti subtʼan chucoch mi lac ñop chaʼan añʌch Dios, chaʼan miʼ qʼuelonla ti ñuc yicʼot jiñʌch tsiʼ yʌcʼʌ ti tsʼijbuntel jiñi Biblia. Miʼ mejlel laj coltan jaʼel jiñi la quermañojob. Jumpʼejl ejemplo, cheʼ an majqui mi la cubin woliʼ tech tʼan tiʼ tojlel añoʼ bʌ ti wenta congregación, mach yomic leco mi lac ñaʼtan tiʼ tojlel i mi laj cʌy lac pejcan. Yom mi laj cʼʌn lac pijt chaʼan mi laj coltan i ñumen acʼ i chʼujbiya ti Jehová yicʼot chaʼan miʼ ñop jiñi hermanojob (Judas 22, 23). ¿xColelet ba i añet ti escuela? Pʌsʌ a chʼejlel yicʼot coltan a ñopoñel cheʼ bʌ jiñi a maestro miʼ yʌl chaʼan jiñi evolución. Mach a ñaʼtan chaʼan tajol mi caj i michʼan jiñi a maestro yicʼot a piʼʌlob ti qʼuel jun bajcheʼ maʼ ñaʼtan. Tajol toj sajtelob i pusicʼal i wen mi caj i jacʼob.

21. ¿Bajcheʼ mi caj i coltañonla Jehová ti jujuntiquil?

²¹ Jehová yicʼot Jesús tsiʼ coltayob chaʼan Pedro miʼ mʌlben i bʌqʼuen yicʼot pʼʌtʌl miʼ yajñel i ñopoñel. Ti wiʼil, Pedro tsaʼ sujti ti ñuc bʌ ejemplo chaʼan ti lac pejtelel. Jehová mi caj i coltañonla ti jujuntiquil jaʼel chaʼan pʼʌtʌl lac ñopoñel (pejcan 1 Pedro 5:9, 10). Anquese yom mi lac chaʼlen wersa, añʌch i wenlel mi cheʼ mi lac mel.