1. ¿Chucoch i cʼʌjñibal an lac ñopoñel? (Qʼuele jiñi foto am bʌ tiʼ tejchibal.)

¿AM BAʼ cʼajtibe a bʌ mi mucʼʌch caj i coltañet Jehová cheʼ bʌ miʼ tilel jiñi ñuc bʌ wocol? Ti Hebreos 11:6 miʼ yʌl chaʼan yom an lac ñopoñel (chʼujbiya) ti Dios chaʼan utsʼat miʼ qʼuelonla mi la com cuxul mi lac ñusan ti jiñi bʌ ora. Tajol an majqui miʼ ñaʼtan chaʼan majqui jach miʼ mejlel i taj i ñopoñel. Pero ti 2 Tesalonicenses 3:2 miʼ yʌl chaʼan mach tiʼ pejtelobic añob i chaʼan. Ili chaʼpʼejl versículo miʼ pʌs chaʼan yom mi lac chaʼlen wersa lac pʼʌtʼesan lac ñopoñel.

2, 3. a) ¿Chucoch i cʼʌjñibal cheʼ pʼʌtʌl yom lac ñopoñel? b) ¿Chuqui tac ti cʼajtiya mi caj i jajqʼuel ti ili temaj?

² Jiñi apóstol Pedro tsiʼ yʌlʌ chaʼan ñuc i cʼʌjñibal cheʼ miʼ cʌjñel chaʼan añʌch wem bʌ lac ñopoñel (pejcan 1 Pedro 1:7). La com wem bʌ lac ñopoñel muʼ bʌ mejlel i coltañonla come wen lʌcʼʌlix jiñi ñuc bʌ wocol (Hebreos 10:39). Jin chaʼan yom mi lac chaʼlen wersa lac ñumen pʼʌtʼesan lac ñopoñel. Cheʼʌch mi caj i coltañonla Jesús cheʼ miʼ tilel i jisan ili pañimil (mulawil). Cheʼ bajcheʼ juntiquil wiñic tsiʼ cʼajtibe Jesús miʼ mejlel laj cʼajtiben Jehová jaʼel: «Cotyañon chaʼan mic más chʼujbiñet»  (Marcos 9:24, Jini wen bʌ tʼan). O miʼ mejlel laj cʼajtiben jaʼel tsaʼ bʌ i cʼajtibeyob Jesús i apóstolob: «Coltañon lojon chaʼan xucʼul mic ñopet lojon» (Lucas 17:5).

³ Ti ili temaj mi caj lac jacʼ uxpʼejl cʼajtiya: ¿Chuqui yom mi lac mel chaʼan pʼʌtʌl lac ñopoñel? ¿Bajcheʼ mi lac pʌs chaʼan pʼʌtʌlʌch lac ñopoñel? Yicʼot ¿chucoch mucʼʌch lac ñop chaʼan Jehová mi caj i yʌqʼueñonla lac ñopoñel mi tsaʼ laj cʼajtibe?

4. ¿Majquiyob tiʼ tojlel miʼ mejlel i coltañonla chaʼan miʼ ñumen pʼʌtʼan lac ñopoñel?

⁴ Jehová yom chaʼan pʼʌtʌl lac ñopoñel. Jin chaʼan, tsiʼ yʌcʼʌ ti tsʼijbuntel ejemplo tac yaʼ ti Biblia chaʼan tiʼ tojlel tsaʼ bʌ i pʌsʌyob cabʌl i ñopoñel (Romanos 15:4). Yaʼ miʼ tajtʌl ti tʼan Abraham, Sara, Isaac, Jacob, Moisés, Rahab, Gedeón yicʼot Barac (Hebreos 11:32-35). Pero miʼ mejlel laj cʌn jaʼel tiʼ tojlel cabʌl hermanojob ti ili bʌ ora. *

5. a) ¿Bajcheʼ tsiʼ pʌsʌ chaʼan pʼʌtʌl i ñopoñel Elías? b) ¿Chuqui yom mi laj cʼajtiben lac bʌ?

⁵ Jumpʼejl ejemplo am bʌ ti Biblia jiñʌch chaʼan Elías. Laʼ laj qʼuel joʼchajp baqui tsiʼ pʌsʌ chaʼan pʼʌtʌlʌch i ñopoñel. Ñaxam bʌ, ti jumpʼejl bʌ qʼuin tsiʼ sube jiñi rey Acab chaʼan miʼ cajel jajmeñal (qʼuintuñil). Elías tsiʼ yʌlʌ chaʼan cheʼʌch miʼ cajel come i tʼañʌch Jehová (1 Reyes 17:1). I chaʼchajplel, tsiʼ ñopo chaʼan Dios mi caj i yʌqʼuen yicʼot jiñi yañoʼ bʌ chuqui i cʼʌjñibal bʌ i chaʼañob tiʼ yorajlel jajmeñal (1 Reyes 17:4, 5, 13, 14). I yuxchajplel, tsiʼ ñopo chaʼan Jehová mi caj i chaʼ tejchesʌben i yalobil mebaʼ xʼixic (1 Reyes 17:21). I chʌnchajplel, tsiʼ wen ñopo chaʼan Jehová mi caj i choc jubel cʼajc chaʼan miʼ pul jiñi majtañʌl woli (choncol) bʌ i yʌqʼuen yaʼ ti wits Carmelo (1  Reyes 18:24, 37). I joʼchajplel, cheʼ maxto ñumeñic jiñi jajmeñal, Elías tsiʼ ñopo chaʼan miʼ chaʼ cajel jaʼal i tsiʼ sube Acab: «Chaʼlen weʼel uchʼel, come tsiquil i tʼan jaʼal woli bʌ tilel» (1 Reyes 18:41). Cheʼ tsaʼix laj qʼuele ili, yom mi laj cʼajtiben lac bʌ: «¿Pʼʌtʌl ba c ñopoñel jaʼel bajcheʼ Elías?».

6. ¿Chuqui yom mi laj cʼajtiben Dios mi la com pʼʌtʌl lac ñopoñel?

⁶ Mi la com pʼʌtʌl lac ñopoñel, yom mi laj cʼajtiben chʼujul bʌ i yespíritu Dios. ¿Chucoch? Come jiñi ñopoñel yaʼ ochem jaʼel ti «i yʌcʼbal jini Espíritu» (Gálatas 5:22). Jesús tsiʼ yʌlʌ chaʼan yom mi laj cʼajtiben Jehová chaʼan miʼ ñumen aqʼueñonla i yespíritu, yicʼot tsiʼ yʌlʌ chaʼan mucʼʌch caj i yʌqʼuen majqui miʼ cʼajtiben (Lucas 11:13).

7. Tsictesan chuqui yom mi lac mel chaʼan chʌn pʼʌtʌl miʼ yajñel lac ñopoñel.

⁷ ¿Ixcu mi pʼʌtʌlʌch lac ñopoñel? Yom mi laj qʼuel chaʼan chʌn pʼʌtʌl miʼ yajñel. ¿Chucoch? Come lajal bajcheʼ jiñi cʼajc. Ti ñaxan tajol wen chʌc jiñi cʼajc. Pero mi caj i yʌjpel mi tsaʼ laj cʌyʌ la cotsʌben i siʼil. Cheʼ miʼ yujtel jaʼel ti lac chʼujbiya. Yom mi lac pejcan yicʼot mi lac tsajin jiñi Biblia ti jujumpʼejl qʼuin mi mach la comic miʼ yʌjpel. Cheʼʌch mi caj lac ñumen cʼuxbin Jehová yicʼot jiñi Biblia, i chʌn pʼʌtʌl miʼ yajñel lac ñopoñel.

8. ¿Chuqui miʼ coltañonla chaʼan pʼʌtʌl lac ñopoñel?

⁸ Chaʼan miʼ bej pʼʌtʼan majlel lac ñopoñel, mach jasʌlic jiñi tsaʼix bʌ laj cʌñʌ cheʼ maxto lac chʼʌmʌ jaʼ (Hebreos 6:1, 2). Jumpʼejl ejemplo, miʼ mejlel lac tsajin bajcheʼ tsʼʌctiyem profecía tac am bʌ ti Biblia. Cheʼ woli lac tsajin majlel, yom mi laj qʼuel jaʼel  mi woliyʌch lac pʌs ti laj cuxtʌlel chaʼan pʼʌtʌlʌch lac ñopoñel (pejcan Santiago 1:25 yicʼot 2:24, 26).

9, 10. a) ¿Bajcheʼ miʼ coltañonla lac ñumen pʼʌtʼesan lac ñopoñel jiñi hermanojob? b) ¿Bajcheʼ miʼ coltañonla jaʼel jiñi tempa bʌ tac? c) ¿Bajcheʼ miʼ coltañonla jiñi subtʼan?

⁹ Jiñi apóstol Pablo tsiʼ yʌlʌ chaʼan miʼ mejlel «lac tem ñuqʼuesʌben lac bʌ lac pusicʼal, come ti jumpʼejl lac pusicʼal woli lac ñop» (Romanos 1:12). ¿Chuqui yom i yʌl? Chaʼan miʼ ñumen pʼʌtʼan lac ñopoñel cheʼ an la quicʼot jiñi hermanojob, i ñumento yicʼot jiñi xucʼul bʌ an i ñusayob wocol tac (Santiago 1:3). Jiñi mach bʌ weñic amigojob miʼ jemob lac ñopoñel, pero jiñi weñoʼ bʌ miʼ pʼʌtʼesañob (1 Corintios 15:33). Jin chaʼan, jiñi Biblia miʼ yʌl chaʼan mach yomic mi laj cʌy lac bʌ ti tempa bʌ come yaʼʌch baqui mi lac tem coltan lac bʌ (pejcan Hebreos 10:24, 25). Muʼ bʌ laj cʌn yaʼi, miʼ ñumen pʼʌtʼesan lac ñopoñel. Ti Romanos 10:17 miʼ yʌl chaʼan miʼ ñumen pʼojlel lac ñopoñel cheʼ mi lac ñumen cʌn chaʼan jiñi Biblia. Jin chaʼan laʼ laj cʼajtiben lac bʌ: «¿Muʼ ba c majlel tiʼ pejtelel jiñi tempa bʌ tac?».

¹⁰ Yambʌ muʼ bʌ i coltañonla jiñʌch cheʼ mi laj cʌntesan yañoʼ bʌ chaʼan muʼ bʌ i yʌl jiñi Biblia. ¿Chucoch? Come cheʼ mi lac chaʼlen subtʼan, mi lac ñumen ñop ti Jehová yicʼot mi lac taj lac chʼejlel cheʼ bajcheʼ jiñi ñaxam bʌ xñoptʼañob ti wajali (Hechos 4:17-20; 13:46).

11. a) ¿Chucoch wen pʼʌtʌl i ñopoñel Josué yicʼot Caleb? b) ¿Bajcheʼ miʼ mejlel lac tsajcan jiñi Josué yicʼot Caleb?

¹¹ Cheʼ mi laj qʼuel bajcheʼ miʼ jacʼ la coración Jehová yicʼot miʼ coltañonla, miʼ ñumen pʼʌtʼan lac ñopoñel. Cheʼʌch tsaʼ ujti tiʼ tojlel Josué yicʼot Caleb. Tsiʼ wen pʌsʌyob i ñopoñel cheʼ bʌ tsajñi i qʼuelob jiñi lum tsaʼ bʌ i wʌn subeyob Jehová. Ti wiʼil, tsaʼ ñumen pʼʌtʼa majlel i ñopoñelob come tsiʼ qʼueleyob chaʼan Dios miʼ coltañob tiʼ pejtelel ora. Jin chaʼan, Josué tsiʼ yʌqʼueyob i tʼan jiñi israelob chaʼan Jehová tiʼ tsʼʌctesa tiʼ pejtelel chuqui tsiʼ yʌlʌ. Tsiʼ yʌqʼueyob ili ticʼojel: «Yom mi laʼ bʌcʼñan lac Yum  [Jehová]. Yom mi laʼ chʼujutesan». Yicʼot tsiʼ yʌlʌ: «Joñon yicʼot jini añoʼ bʌ ti cotot mi caj lac chʼujutesan lac Yum» (Josué 23:14; 24:14, 15). Mi mucʼʌch lac ñop Jehová jaʼel, mi caj laj qʼuelben i coltaya, i mi caj i ñumen pʼʌtʼan lac chʼujbiya (Salmo 34:8).

12. ¿Bajcheʼ mi lac pʌs chaʼan pʼʌtʌl lac ñopoñel?

¹² Jiñi xcʌntʼan Santiago tsiʼ yʌlʌ: «Wolic ñop Dios cheʼ mic pʌsbeñet wen bʌ c melbal» (Santiago 2:18). Cheʼ bajcheʼ iliyi tsiʼ yʌlʌ chaʼan miʼ mejlel lac pʌs chaʼan pʼʌtʌl lac ñopoñel ti chuqui tac mi lac mel. Laʼ laj qʼuel bajcheʼ tac mi lac pʌs.

13. ¿Chucoch mi lac pʌs chaʼan añʌch lac ñopoñel cheʼ mucʼonla ti subtʼan?

¹³ Mi lac pʌs chaʼan an la ñopoñel cheʼ mi lac chaʼlen subtʼan. ¿Chucoch? Come woli lac pʌs chaʼan mucʼʌch lac ñop lʌcʼʌlix i jilibal ili pañimil yicʼot chaʼan mucʼʌch «caj i bʌcʼ tilel» (Habacuc 2:3). Mi com lac ñaʼtan mi pʼʌtʌlʌch lac ñopoñel yom mij cʼajtiben lac bʌ: «¿Ñucʌch ba i cʼʌjñibal jiñi subtʼan chaʼañon? ¿Woliyon ba ti wersa c suben tiʼ pejtelel quixtañujob i chaʼan bʌ Dios? ¿Muʼ ba c sʌclan bajcheʼ tac mic ñumen chaʼlen subtʼan?» (2 Corintios 13:5). Cheʼ mi lac chaʼlen wersa subtʼan, mi lac pʌs pʼʌtʌl bʌ lac ñopoñel (pejcan Romanos 10:10).

14, 15. a) ¿Bajcheʼ mi lac pʌs lac ñopoñel ti jujumpʼejl qʼuin? b) Alʌ bajcheʼ tsiʼ pʌsʌ chaʼan pʼʌtʌl i ñopoñel jumpʼejl familia ti Asia.

¹⁴ Yambʌ bajcheʼ mi lac pʌs chaʼan añʌch lac ñopoñel jin cheʼ mi lac lʌtʼ jiñi wocol tac ti laj cuxtʌlel. Mi lac ñop chaʼan Jehová yicʼot Jesús mi caj i coltañoñobla cheʼ an lac wocol chaʼan cʼamʌjel, laj cʼunlel, lac chʼijiyemlel, tiʼ caj taqʼuin o yan tac bʌ (Hebreos 4:16). Cheʼ mi laj cʼajtiben i coltaya Jehová, mi lac pʌs chaʼan añʌch lac ñopoñel. Jesús tsiʼ yʌlʌ chaʼan miʼ mejlel laj cʼajtin lac «waj chaʼan ili qʼuin» (Lucas 11:3). Mi lac taj cabʌl ejemplo yaʼ ti Biblia muʼ bʌ i pʌsbeñonla chaʼan Jehová miʼ mejlel i yʌqʼueñonla i cʼʌjñibal bʌ lac chaʼan. Jumpʼejl ejemplo, Jehová tsiʼ yʌqʼue jaʼ yicʼot chuqui miʼ cʼux Elías cheʼ tiʼ yorajlel qʼuintuñil yaʼ ti  Israel. Jiñi Biblia miʼ yʌl chaʼan «jini xʼacʼxiʼ tsiʼ chʼʌmbe cʼotel waj yicʼot weʼelʌl ti sʌcʼajel ti icʼajel» jiñi Elías, i chaʼan tsiʼ japʌ jaʼ ti jumpʼejl paʼ (1 Reyes 17:3-6). Miʼ mejlel lac ñop jeʼel chaʼan Jehová mi caj i yʌqʼueñonla chuqui i cʼʌjñibal lac chaʼan.

¹⁵ La cujil chaʼan mi caj i mejlel la cʌqʼuen chuqui i cʼʌjñibal i chaʼan lac familia mi mucʼʌch lac jacʼ jiñi ticʼojel am bʌ ti Biblia. Laʼ laj qʼuel chaʼan jumpʼejl familia yaʼ ti Asia. Jumpʼejl bʌ qʼuin, jiñi tatʌl tsiʼ qʼuele chaʼan woliʼ yochel ti wocol bajcheʼ an yicʼot Jehová tiʼ caj i yeʼtel (troñel). Tsiʼ ñaʼta yicʼot i yijñam chaʼan miʼ cʌy jiñi i yeʼtel i chaʼan mi caj i melob bʌlñʌcʼʌl chaʼan miʼ choñob come yomob i jacʼ muʼ bʌ i yʌl yaʼ ti Mateo 6:33 yicʼot Proverbios 10:4. Jiñi i yijñam miʼ yʌl chaʼan tsʌts miʼ chaʼleñob eʼtel, pero chaʼan maʼañic ñusʌbil i chaʼañob wiʼñal come Jehová tsiʼ cʌntayob. ¿Am ba a ñusa bajcheʼ jiñi, am bʌ i pʼʌtʼesa a ñopoñel?

16. ¿Chuqui mi caj ti ujtel mi mucʼʌch lac ñop Jehová?

¹⁶ Cheʼ mi lac ñop yicʼot mi lac mel chuqui miʼ cʼajtibeñonla Jehová, mi caj i coltañonla. Jiñʌch tsaʼ bʌ i taja ti tʼan Pablo cheʼ bʌ tsiʼ cʼajtesʌbeyonla tsaʼ bʌ i yʌlʌ jiñi xʼaltʼan Habacuc: «Jini otsʌbilix bʌ tiʼ wenta Dios chaʼan tsiʼ ñopo Dios, cuxul miʼ yajñel» (Gálatas 3:11; Habacuc 2:4). Cheʼ jaʼel tsiʼ yʌlʌ chaʼan an i pʼʌtʌlel chaʼan miʼ coltañonla ti bajcheʼic jach (Efesios 3:20). La cujil chaʼan pʼisbil jach chuqui miʼ mejlel lac mel, pero mi lac chaʼlen wersa lac melben i yeʼtel Dios. Jin chaʼan mucʼonla ti wersa yicʼot mi lac ñop chaʼan Jehová mi caj i yʌcʼ i bendición ti chuqui mi lac mel. Tiʼ sujm, mi lac wen aqʼuen wocolix i yʌlʌ cheʼ miʼ coltañonla.

17. a) ¿Bajcheʼ tsiʼ jacʼbe Jesús jiñi apóstolob i chaʼan cheʼ bʌ tsiʼ ñumen cʼajtiyob i ñopoñel? b) ¿Bajcheʼ la cujil chaʼan mi caj i ñumen aqʼueñonla lac ñopol cheʼ mi laj cʼajtiben?

¹⁷ Cheʼ tsaʼix lac pejca ili temaj, tajol cheʼ mi la cubin bajcheʼ jiñi apóstolob cheʼ tsiʼ subeyob Jesús: «Coltañon lojon chaʼan xucʼul mic ñopet lojon» (Lucas 17:5). Jesús tsiʼ jacʼbeyob ti jumpʼejl qʼuiñijel chaʼan bʌ Pentecostés cheʼ ti jabil 33. Ti jiñi bʌ ora tsaʼ aqʼuentiyob jiñi chʼujul bʌ espíritu yicʼot tsaʼ mejli i ñumen chʼʌmbeñob isujm chuqui yom bʌ Dios. Ili tsiʼ ñumen pʼʌtʼesʌbeyob i ñopoñel. Cheʼʌch tsaʼ caji i techob ñuc bʌ subtʼan cheʼ bajcheʼ maʼañic wis ujtem (Colosenses 1:23). Jehová miʼ yʌcʼ i tʼan chaʼan mi caj i yʌqʼueñonla chuqui jach mi laj cʼajtiben cheʼ bʌ «bajcheʼ yom i pusicʼal» (1 Juan 5:14). La cujil chaʼan mi tsaʼ laj cʼajtibe miʼ ñumen aqʼueñonla lac ñopoñel, mi caj i yʌqʼueñonla.

18. ¿Bajcheʼ miʼ yʌqʼuen i bendición Jehová jiñi pʼʌtʌl bʌ i ñopoñel?

¹⁸ Cheʼ tsʼʌcʌl mi lac ñop ti Jehová, mi caj i yʌqʼueñonla bendición yicʼot lac ñopoñel cheʼ mi laj cʼajtiben. Cheʼ jaʼel, ñumen pʼʌtʌl miʼ cajel lac ñopoñel yicʼot «mi caj [laj] qʼuejlel ti utsʼat cheʼ miʼ tilel i yumʌntel Dios» (2 Tesalonicenses 1:3, 5).