AÑIX ñumen 200 jab, ili xtsʼijbaya tsiʼ yʌlʌ chaʼan maʼañic miʼ mejlel lac ñop tiʼ pejtelel muʼ bʌ i yʌl jiñi periódico tac. Lajal miʼ yujtel ili ora. Maʼañic miʼ mejlel lac ñop tiʼ pejtelel muʼ bʌ i yʌjlel ti Internet. Wʌle, cabʌl chuqui miʼ mejlel lac pejcan ti jujumpʼejl qʼuin tiʼ coltaya jiñi tecnología. An cabʌl isujmʌch bʌ yicʼot i cʼʌjñibalʌch, pero cabʌl lotiya bʌ jaʼel am bʌ i wocolel. Jin chaʼan yom tsajilonla. Cheʼ an majqui miʼ tech i cʼʌn Internet, tajol isujmʌch miʼ ñaʼtan woli bʌ ti ajlel yaʼi come an ti Internet o chaʼan tsaʼ chocbenti majlel tiʼ yamigo. Tajol jinto chuqui ñumen ñuc tac bʌ ujtem miʼ ñop. Pero jiñi Biblia miʼ yʌl: «Jini mach bʌ cʌntesʌbilic miʼ ñop pejtel chuqui miʼ yʌlob winicob. Jini cʌntesʌbil bʌ miʼ wen tsajin i bijlel» (Proverbios 14:15).

Jiñi mach bʌ cʌntesʌbilic miʼ luʼ ñop muʼ bʌ i subentel, pero jiñi tsajil bʌ cojach miʼ ñop jiñi yujil bʌ chaʼan isujmʌch. An cabʌl chuqui miʼ yʌjlel wen cʌmbil bʌ yaʼ ti Internet, pero mach isujmic. ¿Chuqui miʼ mejlel lac mel chaʼan maʼañic mi lac lotintel? Laʼ laj cʼajtiben lac bʌ: «¿Baqui tsaʼ c taja jiñi tsaʼ bʌ c pejca? ¿Ti jumpʼejl ba página baqui cojach miʼ yʌjlel i sujmlel bʌ o yaʼ baqui chuqui jach miʼ mejlel ti tsʼijbuntel? ¿Am ba chuqui miʼ yʌl mach bʌ ñaʼtʌbilic majqui tsiʼ mele? ¿Am ba yambʌ wem bʌ página am bʌ i pʌsʌ chaʼan mach isujmic jiñi muʼ bʌ i yʌjlel tac?». * Yom tsajilonla (Proverbios 7:7). Mi maʼañic miʼ mejlel lac ñop jiñi woli bʌ lac pejcan, tajol lotintel jach. ¿Ixcu mi tsaʼ cʼoti jumpʼejl mensaje baqui miʼ yʌl mach bʌ utsʼatic tiʼ tojlel yambʌ? Laʼ laj cʼajtiben lac bʌ: «¿Majqui miʼ yʌcʼ ti ñuc chaʼan yom miʼ pujquel iliyi? ¿Chucoch yom chaʼan miʼ pujquel ili tʼan?».

Cheʼ bʌ an majqui miʼ cʼotel i mensaje, ti ora miʼ chocben majlel yambʌ i yamigojob. Miʼ melob anquese  maxto yujilobic miʼ sujmʌch yicʼot cheʼ maxto i ñaʼtayob bajcheʼ miʼ mejlel i yʌcʼ ti wocol yañoʼ bʌ. Tajol yomob jach miʼ qʼuejlelob ti ñuc o chaʼan jiñob ñaxam bʌ miʼ tsictesañob woli bʌ ti ujtel (2 Samuel 13:28-33). Pero yom tsajilonla. Mach la comic chaʼan leco miʼ caj ti ajlel juntiquil quixtañu o jumpʼejl organización.

¿Chucoch an muʼ bʌ i pucob jumpʼejl tʼan cheʼ mach yujilobic miʼ sujmʌch? Come mach yomobic i sʌt qʼuin tiʼ ñaʼtʌntel. Tajol miʼ yʌlob: «Jiñobix miʼ mejlel i qʼuel miʼ sujmʌch o maʼañic». Pero tajol miʼ jiñobic añob i yorajlel i chaʼan (Efesios 5:15, 16). Jin chaʼan, mi maʼañic maʼ wen ñaʼtan mi utsʼatʌch o maʼañic jiñi mensaje, mach a choc majlel.

Yom mi laj cʼajtiben lac bʌ: «¿Ñʌmʌlon ba c chaʼ puc jiñi mensaje muʼ bʌ i julel? ¿Am ba j cʼajti c ñusʌbentel tiʼ caj tsaʼ c choco majlel jumpʼejl mensaje mach bʌ isujmic? ¿Am ba majqui i subeyon chaʼan mij cʌy c chocben majlel mensaje?». Jiñi la camigojob miʼ mejlel i sʌclañob jaʼel chuqui yom bʌ i ñaʼtañob mi añob i chaʼan Internet. Mach i cʼʌjñibalic i chaʼañob cheʼ mi lac wen chocbeñob majlel alas tʼan, foto o video tac. Cheʼ jeʼel, mach yomic mi lac letsan discurso tac tsaʼ bʌ lac chaʼle ti grabar o mi lac tsʼijbun letsel. * Ñumen wen cheʼ ti jujuntiquil mi lac sʌclʌben i sujmlel jumpʼejl temaj, jiñi versículo tac muʼ bʌ i chʼʌm tilel o cheʼ mi lac chajpan lac bʌ chaʼan tempa bʌ.

Mi tsaʼ laj qʼuel woliʼ yʌjlel lotiya tiʼ tojlel i testigojob Jehová, ¿chuqui yom mi lac mel? Mach lac bej pejcan yicʼot mach lac ñop. Mach lac chocben majlel yambʌlob, come cojach mi caj lac ñumen puc. Mi tsiʼ yʌcʼʌyonla ti pensar tsaʼ bʌ lac pejca, laʼ laj cʼajtin lac ñaʼtʌbal ti Jehová yicʼot mi lac  suben juntiquil hermano tsaʼix bʌ i taja i colel (Santiago 1:5, 6; Judas 22, 23). Mach yomic toj sajtel lac pusicʼal cheʼ miʼ yʌlob mach bʌ isujmic ti lac tojlel. Cheʼʌch tsiʼ meleyob tiʼ tojlel Jesús. Cheʼ jaʼel, tsiʼ yʌlʌ chaʼan mi caj i tsʼaʼlentel xñoptʼañob yicʼot mi caj i yʌjlel lotiya tiʼ tojlelob (Mateo 5:11; 11:19; Juan 10:19-21). Mi tsajilonla, mi caj lac ñaʼtan cheʼ bʌ an majqui woli ti lot ti lac tojlel o woliʼ lotin yañoʼ bʌ (Proverbios 2:10-16).

Cheʼ com lac chaʼ al tsaʼ bʌ la cubi tiʼ tojlel la quermañojob, yom tsajilonla. Anquese isujmʌch, pero tajol mach weñic cheʼ mi lac chaʼ suben yañoʼ bʌ (Mateo 7:12). Jumpʼejl ejemplo, cheʼ mi la cʌl mach bʌ utsʼatic miʼ yʌjlel ti yañoʼ bʌ, maʼañic woli lac pʌs cʼuxbiya yicʼot maʼañic majqui mi caj i coltan (2 Tesalonicenses 3:11; 1 Timoteo 5:13). Cheʼ jaʼel, tajol an chuqui mach bʌ yomic mi lac chaʼ al. Mi an juntiquil am bʌ chuqui yom i yʌcʼ ti cʌñol tiʼ tojlel, jiñʌch jalaqui yicʼot bajcheʼ yom i mel, laʼ laj qʼuel ti ñuc. Mi ñaxañonla mi lac tsictesan, maʼañic woli laj qʼuel ti ñuc yicʼot miʼ mejlel lac low.

Ili ora, mach jalic miʼ pujquel chuqui miʼ yʌjlel. An isujmʌch bʌ yicʼot i cʼʌjñibal bʌ, pero an lotiya tac bʌ am bʌ i wocolel. Cʼajtesan chaʼan mi tsaʼ chocbe majlel mensaje juntiquil, ti jumucʼ jach miʼ mejlel i chaʼ chocben majlel yonlelob. Jin chaʼan, mach lac chaʼ chocben majlel tiʼ pejtelel la camigojob chuqui miʼ julel. Anquese jiñi Biblia miʼ yʌl chaʼan jiñi cʼuxbiya miʼ ñop tiʼ pejtelel, yom tsajilonla yicʼot mach lac ñop chaʼan luʼ i sujmʌch jiñi mensaje muʼ bʌ i julel (1 Corintios 13:7). Jiñi lotiya tac muʼ bʌ i yʌjlel chaʼan i yorganización Jehová yicʼot la quermañojob mach yomic mi lac ñop. Laʼ laj cʼajtesan chaʼan muʼ bʌ i yʌlob yicʼot i pucob lotiya tac woliʼ lajiñob Satanás come jiñʌch i tat jiñi lotiya (Juan 8:44). Jin chaʼan, yom wen tsajilonla ti jiñi mensaje tac. Laʼ laj cʼajtesan muʼ bʌ i yʌl jiñi Biblia: «Jini mach bʌ wenic i pusicʼal miʼ ñopben i melbal jini tontojoʼ bʌ. Jini weñoʼ bʌ i pusicʼal mi caj i yʌqʼuentelob i ñaʼtʌbal» (Proverbios 14:18).