Yonlel miʼ ñaʼtañob chaʼan sʌt qʼuin jach jiñi oración, chaʼan maʼañic majqui miʼ ñʌchʼtan. An yañoʼ bʌ miʼ yʌlob chaʼan maʼañic miʼ qʼuelbeñob i jacʼbal. Juntiquil maʼañic bʌ miʼ ñop Dios tsiʼ ñaʼta bajcheʼ yilal Dios cheʼ añic, i tsiʼ sube ti oración: «Anquese tsʼitaʼic jach maʼ mucul pejcañon». Pero tsiʼ yʌlʌ chaʼan cheʼ jach chʼuj mʌcʌl i yej tsaʼ ajñi.

Pero jiñi Biblia miʼ yʌl chaʼan Dios miʼ ñʌchʼtan la coración tac. Jiñi Tsʼijbujel miʼ yʌl ili tʼan tsaʼ bʌ subenti jumpʼejl tejclum ti wajali: «[Dios] mi caj i pʌsbeñetla i yutslel cheʼ miʼ yubin laʼ wuqʼuel. Mi caj i jacʼbeñetla» (Isaías 30:19). Yambʌ versículo miʼ yʌl: «Tijicña i pusicʼal chaʼan i yoración jini tojoʼ bʌ» (Proverbios 15:8).

Jiñi Biblia miʼ yʌl chaʼan an oración tac tsaʼʌch bʌ ubinti. Ti jumpʼejl versículo miʼ yʌl chaʼan Jesús «tsiʼ pejca Dios am bʌ i pʼʌtʌlel chaʼan miʼ yʌcʼ ti colel ame chʌmic. [...] Dios tsiʼ yubibe i tʼan» come tsaʼʌch i chaʼ tejchesa (Hebreos 5:7). Mi lac taj yambʌ ejemplo tac yaʼ ti Daniel 9:20, 21 yicʼot ti 2 Crónicas 7:1.

Cheʼ jiñi, ¿chucoch an muʼ bʌ i ñaʼtañob chaʼan maʼañic majqui miʼ ñʌchʼtʌbeñob i yoración? Mi la com chaʼan Jehová, * jiñi Dios i chaʼan Biblia, miʼ ñʌchʼtañonla, cojach yom mi lac melben oración. Mach jiñic yambʌ dios tac mi jiñic lac ñojteʼelob. Cheʼ jaʼel, jiñi tsaʼ bʌ i Meleyonla yom chaʼan «cheʼ bajcheʼ yom i pusicʼal» chuqui mi laj cʼajtiben, yom i yʌl, wem bʌ miʼ qʼuel. Mi cheʼʌch mi lac mel, miʼ yʌcʼ i tʼan chaʼan mi caj ‹i yubiñonla› (1 Juan 5:14). Jin chaʼan, mi la com chaʼan miʼ ñʌchʼtañonla Dios, yom mi laj cʌn yicʼot mi lac jacʼben i tʼan.

Yonlel quixtañu miʼ ñopob chaʼan Dios mucʼʌch i ñʌchʼtan yicʼot miʼ jacʼbeñob i yoración, i mach jumpʼejl jach costumbre. Isaac, chʼoyol bʌ ti Kenia, miʼ yʌl: «Tsaʼ j cʼajti j coltaya ti oración chaʼan mic chʼʌmben isujm jiñi Biblia. Ti wiʼil, an majqui tsaʼ tili i tsiʼ yʌlʌ chaʼan miʼ coltañon». Hilda, chʼoyol bʌ ti Filipinas, yom i cʌy ñucʼ cʼujts. Cabʌl tsiʼ lon ñopo, pero maʼañic tsaʼ mejli. Jiñi i ñoxiʼal tsiʼ sube chaʼan miʼ cʼajtiben i coltaya Dios. Cheʼʌch tsiʼ mele, i tsiʼ yʌlʌ: «Toj sajtel c pusicʼal cheʼ tsaʼ j qʼuele bajcheʼ tsiʼ coltayon Dios. Mach chʌn comix ñucʼ cʼujts tsaʼ caji cubin. Tsaʼ mejli j cʌy jiñi».

Mi cheʼʌch bajcheʼ miʼ mulan Dios jiñi muʼ bʌ a cʼojoʼtan, ¿yom ba i coltañet cheʼ jiñi?