1, 2. ¿Chuqui miʼ ñaʼtʌntel tiʼ tojlel Dios?

ILI ora cabʌl wiñicob xʼixicob (quixtañujob) miʼ ñaʼtañob chaʼan mach i wentajic Dios chuqui mi lac mel o chuqui mi lac chaʼlen. Jumpʼejl ejemplo, ti noviembre i chaʼan 2013, tsaʼ ñumi tsʌts bʌ icʼ jaʼal yaʼ ti islas Filipinas. Ti wiʼil, i presidente jumpʼejl tejclum tsiʼ yʌlʌ chaʼan tajol Dios maʼañic tsiʼ coltayob come an yambʌ i yeʼtel (troñel).

² An muʼ bʌ i ñaʼtañob chaʼan Dios maʼañic miʼ qʼuel muʼ bʌ lac mel (Isaías 26:10, 11; 3 Juan 11). Jiñi apóstol Pablo tsiʼ yʌlʌ chaʼan an mach bʌ yomobic i yʌcʼ ti ñuc Dios tiʼ cuxtʌlelob ti jiñi bʌ ora. Jontolob, mach weñic i melbalob yicʼot miʼ wen mulañob chubʌʼañʌl (Romanos 1:28, 29).

3. ¿Chuqui yom mi laj cʼajtiben lac bʌ?

³ Joñonla la cujil chaʼan tiʼ pejtelel chuqui mi lac mel, Jehová miʼ qʼuel. Pero laʼ laj cʼajtiben lac bʌ: «¿Muʼ ba c ñop chaʼan miʼ qʼuelon ti ñuc? ¿Muʼ ba j qʼuel bajcheʼ miʼ coltañon?». Jesús tsiʼ yʌlʌ chaʼan an muʼ bʌ «caj i qʼuelob» Dios, yom i yʌl, mi caj i ñaʼtañob chaʼan woli (choncol) i coltañob (Mateo 5:8).  Jin chaʼan, ¿muʼ baʼ qʼuel bajcheʼ choncol i coltañet ti a cuxtʌlel? Jiñi Biblia miʼ yʌl chaʼan an maʼañic bʌ tsiʼ qʼueleyob i «pʼʌtʌlel» o i coltaya Dios yicʼot tsaʼʌch bʌ i qʼueleyob. Mi caj laj qʼuel ejemplo tac ilayi. Ti yambʌ temaj mi caj laj qʼuel chaʼan jiñi lac ñopoñel miʼ coltañonla laj qʼuel chaʼan Dios woli (yʌquel) i coltañonla.

4. ¿Chucoch maʼañic tsiʼ ñopoyob i contrajob Israel chaʼan Jehová woliʼ coltan i tejclum?

⁴ Ti wajali, an cabʌl tsaʼ bʌ mejli i qʼuelob bajcheʼ tsiʼ colta Dios jiñi israelob. Jumpʼejl ejemplo, Jehová tsiʼ mele milagro tac chaʼan miʼ locʼsañob ti Egipto yicʼot tiʼ mʌlol (jojtel) guerra tac yaʼ ti Lum tsaʼ bʌ wʌn Subentiyob (Josué 9:3, 9, 10). Cabʌl reyob tsiʼ ñaʼtayob chaʼan i melbalʌch Jehová jiñi. Pero tsiʼ temeyob i bʌ chaʼan miʼ ‹contrajiñob Josué yicʼot israelob› (Josué 9:1, 2). Cheʼ bʌ tsiʼ meleyob jiñi, tsaʼ mejli i qʼuelob jaʼel bajcheʼ tsiʼ colta Dios i tejclum. Tsiʼ qʼueleyob bajcheʼ tsiʼ waʼchoco Jehová jiñi Qʼuin yicʼot Uw «jinto tsaʼ ujti i jisañob i contrajob [jiñi israelob]» (Josué 10:13). Pero wen tsʌtsob jax i pusicʼal i maʼañic tsiʼ ñopoyob chaʼan Jehová woliʼ coltan i tejclum. Jin chaʼan tsaʼ jisʌntiyob (Josué 11:20).

5. ¿Chuqui maʼañic bʌ tsiʼ chʼujbi jiñi rey Acab?

⁵ Ti wiʼil, juntiquil rey wen jontol bʌ cabʌl tsiʼ qʼuele bajcheʼ tsiʼ colta i tejclum Dios. I cʼabaʼ Acab. Jiñi xʼaltʼan Elías tsiʼ sube chaʼan maʼañic miʼ cajel jaʼal jinto miʼ yʌcʼ i tʼan (1 Reyes 17:1). Cojach Dios miʼ mejlel i yʌqʼuen i pʼʌtʌlel Elías chaʼan miʼ chaʼ acʼ ti yajlel jaʼal. Pero Acab maʼañic tsiʼ ñopo. Ti wiʼil, Elías tsiʼ cʼajtibe Jehová chaʼan miʼ choc jubel cʼajc, i tsaʼʌch i jacʼʌ. Elías tsiʼ sube Acab chaʼan Jehová mi caj i wen acʼ ti yajlel jaʼal. Cheʼʌch tsaʼ ujti (1 Reyes 18:22-45). Pero Acab maʼañic tsiʼ chʼujbi chaʼan jiñi milagro tac i melbalʌch Jehová. ¿Chuqui miʼ cʌntesañonla ili párrafo yicʼot ti yambʌ tsaʼix bʌ laj qʼuele? Chaʼan yom yʌxʌl laj co chaʼan mi laj qʼuel i pʼʌtʌlel Dios.

6, 7. ¿Chuqui tsiʼ ñopoyob jiñi gabaoñob yicʼot jiñi Rahab?

⁶ Tiʼ yorajlel jiñi israelob, an jumpʼejl tejclum i cʼabaʼ Gabaón. Mach wis lajalobic bajcheʼ jiñi yambʌ tejclum tac. ¿Chucoch? Come tsiʼ yubiyob tiʼ pejtelel bajcheʼ tsiʼ colta Jehová jiñi i tejclum Israel, i tsaʼʌch i ñopoyob. Jin chaʼan, jiñi gabaoñob maʼañic tsiʼ contrajiyob Israel, tsiʼ sʌclayob bajcheʼ miʼ yajñelob ti ñʌchʼtʌlel yicʼotob (Josué 9:3, 9, 10). Cheʼ tsiʼ ñopoyob chaʼan Jehová woliyʌch i coltan Israel jiñʌch wem bʌ tsiʼ meleyob.

⁷ Yambʌ tsaʼ bʌ i ñopo chaʼan Jehová woliʼ coltan i tejclum jiñʌch Rahab. Mach israelic bʌ xʼixic, pero tsiʼ yubi bajcheʼ tsiʼ locʼsa Jehová jiñi Israel yaʼ ti Egipto. Cheʼ bʌ tsaʼ cʼoti tiʼ yotot chaʼtiquil xyojchʼob israeloʼ bʌ, tsiʼ yʌlʌ chaʼan añʌch i ñopoñel ti Jehová chaʼan mi caj i coltan jiñi israelob tiʼ chʼʌmol i tejclum. Anquese yujil chaʼan tiʼ caj jiñi, an ti wocol i cuxtʌlel yicʼot i chaʼan i familia, tsiʼ ñopo chaʼan Dios mi caj i coltañob (Josué 2:9-13; 4:23, 24).

8. ¿Chuqui tsiʼ ñopoyob jiñi yambʌ israelob?

⁸ Laʼ lac chaʼ al tiʼ tojlel Acab. Cheʼ bʌ tsiʼ qʼuele tsaʼ yajli cʼajc ti panchan, maʼañic tsiʼ mulaj i chʼujbin chaʼan Dios tsiʼ jacʼʌ jiñi oración yicʼot tsiʼ mele jiñi milagro. Pero an israelob tsaʼʌch bʌ i ñopoyob. Jin chaʼan tsiʼ yʌlʌyob: «Lac Yum [Jehová] jiñʌch Dios» (1 Reyes 18:39).

9. ¿Chuqui yom mi lac mel chaʼan mi laj qʼuel chaʼan Jehová woliʼ coltañonla?

 ⁹ Tsaʼix laj qʼuele tiʼ tojlel jiñi maʼañic bʌ tsiʼ ñopoyob chaʼan Dios miʼ coltan i wiñicob yicʼot tiʼ tojlel tsaʼ bʌ i ñopoyob. Ili ora an yonlel jaʼel i wiñicob Dios muʼ bʌ i ñopob chaʼan mucʼʌch i coltañonla. Joñonla com lac lajiñob. Cheʼ mi lac wen cʌn majqui Jehová yicʼot bajcheʼ yilal i melbal tac, miʼ cʼotel lac «chʼʌmben isujm» bajcheʼ miʼ coltañonla (Efesios 1:18). Pero ¿chuqui miʼ pʌs chaʼan woliyʌch i coltan Jehová jiñi yomoʼ bʌ i mel chuqui utsʼat?

10. ¿Chuqui miʼ pʌs chaʼan Jehová woliʼ chʌn coltan jiñi yomoʼ bʌ i mel chuqui utsʼat? (Qʼuele jiñi foto am bʌ tiʼ tejchibal.)

¹⁰ Cabʌl chuqui miʼ pʌs chaʼan Jehová woliʼ chʌn coltan jiñi yomoʼ bʌ i mel chuqui utsʼat. An la cubi bajcheʼ coltʌbil i chaʼan jiñi muʼ bʌ i cʼajtibeñob i coltaya ti oración (Salmo 53:2). Jumpʼejl ejemplo, Allan, juntiquil Testigo, woli ti subtʼan ti jumpʼejl alʌ isla yaʼ ti Filipinas. Juntiquil xʼixic tsaʼ caji ti uqʼuel cheʼ bʌ woliʼ suben jiñi wen tʼan. ¿Chucoch? Allan miʼ yʌl chaʼan ti jiñi bʌ sʌcʼan jiñi xʼixic tsiʼ cʼajtibe Dios chaʼan miʼ julaʼtʌntel. Cheʼ bʌ xcʼalʌl to tsiʼ chaʼle estudio yicʼot jiñi Testigojob. Pero tsaʼ ñujpuñi, tsaʼ loqʼui yaʼ ti isla i tsiʼ cʌyʌ jiñi estudio. Wen tijicña tsaʼ yubi come Dios ti ora tsiʼ jacʼbe i yoración. Mach i taja jumpʼejl jab cheʼ bʌ tsiʼ chʼʌmʌ jaʼ.

11, 12. a) ¿Bajcheʼ an i colta i wiñicob Jehová? b) Alʌ bajcheʼ tsiʼ colta Jehová juntiquil hermana.

¹¹ Ili ora, Jehová coltʌbil i chaʼan cabʌl i wiñicob. An yujiloʼ bʌ ñucʼ cʼujts, i cʼʌñol droga tac o i qʼuelol pornografía cheʼ bʌ  maxto Testigojobic. Cabʌl miʼ yʌlob chaʼan miʼ lon ñopob i cʌy, pero maʼañic miʼ mejlelob. Pero cheʼ bʌ tsiʼ cʼajtibeyob i coltaya Jehová, tsaʼ aqʼuentiyob ‹jiñi ñuc bʌ i pʼʌtʌlel›, i tsaʼ mejliyob i cʌy (2 Corintios 4:7; Salmo 37:23, 24).

¹² Jehová an i colta jaʼel jiñi i wiñicob añoʼ bʌ i bajñel wocol. Laʼ laj qʼuel tiʼ tojlel jiñi hermana Amy. Tsaʼ chojqui majlel ti coltaya ti jumpʼejl alʌ isla yaʼ ti Océano Pacífico chaʼan tiʼ melol jumpʼejl i Yotlel Tempa bʌ yicʼot jumpʼejl i yotot misionerojob. Pero wen wocol jax chumtʌl yaʼi. Ti bele ora maʼañic jaʼ yicʼot luz miʼ ñusañob, i jiñi calle tac miʼ wen bujtʼel ti jaʼ. Cheʼ jaʼel, wen chʼochʼoc jax jiñi hotel baqui jijlem yicʼot miʼ wen ñaʼtan i familia. Ti jumpʼejl bʌ qʼuin cheʼ woliyob ti eʼtel, tsʌts tsiʼ pejca juntiquil hermana. Mach tijicñayic tsiʼ yubi i bʌ cheʼ tsaʼ sujti majlel tiʼ cuarto. Ti jiñi bʌ ora icʼyochʼan (icʼchʼipan) come maʼañic luz. Tsiʼ pejca Jehová ti oración. Cheʼ bʌ tsaʼ tsʼʌjyi jiñi luz, tsiʼ taja jumpʼejl temaj yaʼ ti revista Lac Tsictesʌbentel baʼ miʼ yʌcʼ ticʼojel chaʼan misionerojob. Yaʼ ti temaj miʼ yʌl bajcheʼ yom mi lac ñusan jiñi chʼijiyemlel yicʼot cheʼ mach junlajaloñicla. Lajal bajcheʼ jin woliʼ pejcʌntel ti Jehová tsiʼ yubi jiñi Amy. I jiñʌch tsaʼ bʌ i chʌn aqʼue i pʼʌtʌlel (Salmo 44:25, 26; Isaías 41:10, 13).

13. ¿Chuqui miʼ pʌsbeñonla chaʼan Jehová añʌch i colta i wiñicob chaʼan miʼ mejlelob ti subtʼan?

¹³ Jehová an i colta i wiñicob jaʼel chaʼan miʼ mejlelob ti subtʼan (Filipenses 1:7). Jumpʼejl ejemplo, cheʼ bʌ an i ñopoyob i mʌctan jiñi subtʼan jiñi yumʌlob, ajñemonla laj coltan lac bʌ ti ñuqui melobʌjʌl tac. An mʌlbil (jotbil) lac chaʼan cheʼ bʌ 268 wocol yaʼ ti melobʌjʌl wen cʌmbil bʌ tiʼ pejtelel pañimil. Cʼʌlʌl ti jabil 2000 yaʼ ti Tribunal Europeo de Derechos Humanos, mʌlbil lac chaʼan 24 wocol. Maʼañic majqui miʼ mejlel i mʌctan Jehová chaʼan miʼ coltan i tejclum (Isaías 54:17; pejcan Isaías 59:1).

14. ¿Chuqui tac yambʌ miʼ pʌsbeñonla chaʼan Dios woliʼ coltañonla?

¹⁴ ¿Chuqui yambʌ miʼ pʌsbeñonla chaʼan Dios woliʼ coltañonla? Junchajp jin cheʼ woliyonla ti subtʼan tiʼ pejtelel pañimil (mulawil) (Mateo 24:14; Hechos 1:8). Yambʌ jiñʌch cheʼ wen temel añonla i wiñiconbʌla Dios anquese mach junlajalic lac lumal. Maʼañic yambʌ wen temel bʌ añob bajcheʼ joñonla. An maʼañic bʌ miʼ melbeñob i yeʼtel Jehová muʼ bʌ i yʌlob: ‹Añʌch laʼ wicʼot Dios tiʼ sujm› (1 Corintios 14:25). Wen tsiquil chaʼan Dios woliyʌch i coltañonla (pejcan Isaías 66:14). ¿Ixcu jatet? ¿Muʼ baʼ qʼuel bajcheʼ woliʼ coltañet Jehová?

15. ¿Chucoch tajol maʼañic mi laj qʼuel bajcheʼ woliʼ coltañonla Jehová?

¹⁵ An i tajol maʼañic mi laj qʼuel bajcheʼ woliʼ coltañonla Jehová. ¿Chucoch? Tajol chaʼan cojach woli lac wen ñaʼtan lac wocol i mi lac ñajʌtesan bajcheʼ wen coltʌbil i chaʼañonla. Cheʼʌch tsaʼ ujti tiʼ tojlel Elías. Wen chʼejl bʌ wiñic. Pero cheʼ bʌ jiñi yumʌl bʌ xʼixic tsiʼ ñopo i tsʌnsan, Elías tsiʼ ñajʌtesa bajcheʼ an coltʌbil i chaʼan Jehová. Jiñi Biblia miʼ yʌl chaʼan tsaʼ to i ñaʼta chʌmel come tsaʼ wen bʌcʼñʌyi (1 Reyes 19:1-4). ¿Bajcheʼ miʼ mejlel i taj i coltʌntel? Jiñʌch cheʼ miʼ sʌclan ti Jehová (1 Reyes 19:14-18).

16. ¿Bajcheʼ miʼ mejlel laj qʼuel chaʼan woliʼ coltañonla Jehová cheʼ bʌ an lac wocol?

¹⁶ Cheʼ lʌcʼʌl lajal tsaʼ ujti tiʼ tojlel Job. Maʼañic tsiʼ qʼuele i wocol cheʼ bajcheʼ miʼ qʼuel Jehová come tsiʼ wen cʼojoʼta i bʌ (Job 42:3-6). ¿Ixcu joñonla? Tajol maʼañic mi laj qʼuel bajcheʼ woliʼ coltañonla Jehová jaʼel cheʼ bʌ an lac wocol tac. ¿Chuqui mi caj i coltañonla laj qʼuel? Jiñʌch cheʼ mi lac pejcan jiñi Biblia, i mi lac wen ñaʼtan chuqui miʼ yʌjlel yaʼi yicʼot chaʼan jiñi ticʼojel tac. Cheʼ mi laj qʼuel bajcheʼ woliʼ coltañonla Dios yicʼot lac wocol, lajal bajcheʼ woliʼ pejcañonla. Cheʼ jiñi ñumen cuxul mi caj laj qʼuel Jehová i caj la cʌl cheʼ bajcheʼ Job: ‹Wʌle muqʼuix j qʼuelet›.

17, 18. a) ¿Bajcheʼ tac an i coltayonla Jehová ti laj cuxtʌlel? b) ¿Bajcheʼ an i colta i wiñicob Jehová ili ora?

¹⁷ ¿Muʼ baʼ mejlel a qʼuel bajcheʼ coltʌbil i chaʼañet Jehová? An hermanojob muʼ bʌ i yubiñob chaʼan jiñʌch tsaʼ bʌ i colta chaʼan miʼ tajob isujm bʌ ñopbalʌl. An muʼ bʌ i yʌlob jaʼel chaʼan Jehová tsiʼ coltayob tiʼ tojlel juntiquil hermano ti jumpʼejl tempa bʌ. O tajol miʼ yʌlob chaʼan jiñʌch cheʼ tsaʼ jacʼbentiyob i yoración. An muʼ bʌ i yʌlob chaʼan tsaʼ coltʌntiyob i tsʼʌctesan ñaʼtʌbil bʌ i chaʼañob ti ñumen melbentel i yeʼtel Dios. Yicʼot an muʼ bʌ i yʌlob chaʼan Jehová tsiʼ yʌqʼueyob cʼʌjñibal bʌ i chaʼañob cheʼ tsiʼ cʌyʌyob jumpʼej eʼtel muʼ bʌ i mʌctañob tiʼ tempa bʌ o ti subtʼan (Hebreos 13:5). Mi wem bʌ i yamigojonla Jehová, mi caj laj qʼuel chaʼan cabʌlʌch bajcheʼ woliʼ coltañonla.

¹⁸ Ti Kenia, juntiquil hermana i cʼabaʼ Sarah an juntiquil muʼ bʌ i yʌqʼuen estudio maʼañic bʌ miʼ yʌcʼ ti ñuc yilal chuqui miʼ cʌn. Sarah tsiʼ pejca Jehová i tsiʼ cʼajtibe mi yomix miʼ cʌy jiñi estudio. Cheʼ bʌ ujtel to mucʼ ti oración, jiñi muʼ bʌ i yʌqʼuen estudio tsiʼ pejca ti teléfono i tsiʼ cʼajti mi mejl ti majlel ti tempa bʌ yicʼot. ¡Toj sajtel tsiʼ yubi i bʌ! Yom chʌn yʌxʌl laj co jaʼel, chaʼan mi laj qʼuel bajcheʼ woliʼ coltañonla Jehová. Ti Asia, juntiquil hermana, i cʼabaʼ Rhonna, miʼ yʌl chaʼan tajol jal miʼ cʼotel laj qʼuel bajcheʼ miʼ coltañonla Jehová. Miʼ yʌl chaʼan wen utsʼatax cheʼ mi lac chʼʌmben isujm bajcheʼ cʼamel miʼ chʼʌmonla ti ñuc cheʼ mi laj qʼuelben ti ñuc i coltaya.

19. ¿Chuqui yom mi lac mel mi com laj qʼuel bajcheʼ miʼ coltañonla Dios?

¹⁹ Mi com laj qʼuel bajcheʼ miʼ coltañonla Dios ‹yom sʌc bʌ lac pusicʼal› (Mateo 5:8). Yom i yʌl chaʼan yom wen chuqui mi lac ñaʼtan yicʼot mi laj cʌy lac mel mach bʌ utsʼatic (pejcan 2 Corintios 4:2). Tsaʼix laj qʼuele chaʼan yom wem bʌ i yamigojonla Jehová mi com laj qʼuel bajcheʼ miʼ coltañonla. Ti jiñi yambʌ temaj mi caj lac tsajin bajcheʼ miʼ coltañonla jiñi lac ñopoñel chaʼan mi laj qʼuelben i coltaya Jehová ti laj cuxtʌlel.