1, 2. ¿Chucoch mach lajaloñicla bajcheʼ jiñi añimal tac?

JOÑONLA mach lajaloñicla bajcheʼ jiñi añimal tac. Mi lac mejlel ti tʼan, ti tsʼijb, ti pejca jun yicʼot mi lac chʼʌmben isujm muʼ bʌ i yʌl jiñi yañoʼ bʌ. Miʼ mejlel lac melben oración Jehová yicʼot laj cʼʌyin. Jiñi científicojob maʼañic cʼotem i chʼʌmbeñob isujm bajcheʼ miʼ luʼ mejlel i mel lac sicojc iliyi.

² Jehová mach cojach tsiʼ yʌcʼʌ chaʼan mi lac mejlel ti tʼan, an yambʌ chuqui tsiʼ yʌqʼueyonla maʼañic bʌ i chaʼan jiñi añimal tac (Salmo 139:14; Apocalipsis 4:11). Come tsiʼ meleyonla tiʼ yejtal, libre tsiʼ meleyonla chaʼan mi lac ñaʼtan ti lac bajñelil chuqui com lac mel (Génesis 1:27). Jin chaʼan, miʼ mejlel lac yajcan mi com laj cʼʌn lac tiʼ chaʼan mi la cʌqʼuen i ñuclel yicʼot mi lac melben i yeʼtel (troñel).

3. ¿Chuqui aqʼuebil i chaʼañonla Jehová chaʼan miʼ mejlel lac yajcan chuqui wem bʌ?

³ Jehová tsiʼ yʌqʼueyonla jiñi Biblia chaʼan mi lac ñaʼtan bajcheʼ yom mij cʌqʼuenla i ñuclel yicʼot mi lac melben i yeʼtel. Wʌle muqʼuix i pejcʌntel ti tsʼʌcʌl o mach tsʼʌcʌlic ñumen ti 2,800 tʼan tac. Cheʼ mi lac pejcan jiñi Biblia yicʼot mi lac wen ñaʼtan muʼ bʌ i yʌl,  lajal mi laj cʌn pensar bajcheʼ Jehová (Salmo 40:5; 92:5; 139:17). Mi cheʼʌchi, mi caj lac yajcan lac mel chuqui wem bʌ yicʼot mi caj lac chumtʌl tiʼ pejtelel ora (pejcan 2 Timoteo 3:14-17).

4. a) ¿Chuqui yom i yʌl cheʼ mi lac wen ñaʼtan? b) ¿Chuqui tac mi caj i jajqʼuel ti ili temaj?

⁴ Cheʼ mi la cʌl chaʼan yom mi lac wen ñaʼtan, yom i yʌl chaʼan junsujm jach baqui caj la cʌcʼ lac jol yicʼot wen tsajibil mi caj lac ñaʼtan (Salmo 77:12; Proverbios 24:1, 2). Ñuc i cʼʌjñibal cheʼ mij cʌqʼuenla i yorajlel lac wen ñaʼtan muʼ bʌ laj cʌn chaʼan Jehová yicʼot Jesús (Juan 17:3). Ti ili temaj mi caj lac jacʼ ili cʼajtiya tac: ¿Chuqui miʼ mejlel lac mel chaʼan mi lac wen ñaʼtan? ¿Chuqui tac miʼ mejlel lac wen ñaʼtan? ¿Chuqui miʼ mejlel lac mel chaʼan ti bele ora mi lac wen ñaʼtan i chaʼan bʌ Jehová yicʼot ti tijicña?

5, 6. ¿Chuqui caj i coltañonla laj cʼajtesan yicʼot lac chʼʌmben isujm muʼ bʌ lac pejcan?

⁵ Ti lac pejtelel miʼ mejlel lac jap icʼ, xʌmbal o ñijca bicicleta, i mach cʼʌñʌlic mi lac wʌn ñaʼtan. Pero ¿lajal ba cheʼ an chuqui mi lac pejcan? Tajol woli (choncol) lac pejcan jun, pero yambʌ chuqui an ti lac jol. ¿Chuqui yom chaʼan mach cheʼ miʼ yujtel? Yom junsujm jach baqui mi caj la cʌcʼ lac jol yicʼot mi lac ñaʼtan chuqui yom i yʌl woli (yʌquel) bʌ lac pejcan. Cheʼ bʌ ujti lac pejcan jumpʼejl párrafo o subtítulo, laʼ laj cʼajtiben lac bʌ: «¿Chuqui miʼ cʌntesañon tsaʼ bʌ ujti c pejcan? ¿Woliyʌch ba c chʼʌmben isujm?».

⁶ Ñumen wen cheʼ ti cʼunteʼ bʌ tʼan mi lac pejcan jun, mach jin cheʼ mucul jach. Jiñi científicojob an i qʼueleyob chaʼan mi lac ñumen cʼajtesan muʼ bʌ lac pejcan bajcheʼ jiñi. Jehová i yujilʌch come jin tsiʼ meleyonla. Jin chaʼan, tsiʼ sube i chʌn ‹ñaʼtan tiʼ pusicʼal› Josué jiñi mandar, o bajcheʼ miʼ yʌl ti hebreo jeʼel «miʼ pejcan ti cʼunteʼ bʌ tʼan» (pejcan Josué 1:8). I pejcʌntel Biblia bajcheʼ jiñi, junsujm jach baqui mi caj la cʌcʼ lac jol yicʼot mi caj laj cʼajtesan yʌquel bʌ lac pejcan.

7. ¿Baqui yicʼot jalaqui yom mi lac wen ñaʼtan i chaʼan bʌ Jehová? (Qʼuele jiñi dibujo am bʌ tiʼ tejchibal.)

⁷ An i tajol wocolʌch chaʼan cojach mij cʌcʼ lac jol yicʼot chaʼan mi lac wen ñaʼtan chuqui choncol lac pejcan. Tajol lujbonla o cabʌl chuqui miʼ sub i bʌ yaʼ baqui añonla. Jin chaʼan, yom mi lac sʌclan baqui ñʌchʼʌl jach o cheʼ maʼañic chuqui miʼ mejlel i yʌn lac pensar. Jumpʼejl ejemplo, David tsiʼ wen ñaʼta i chaʼan bʌ Jehová cheʼ ti acʼʌlel tac (Salmo 63:6). Jesús tsiʼ sʌcla baqui ñʌchʼʌl jach pañimil (Lucas 6:12).

8. a) ¿Chuqui tac yambʌ miʼ mejlel lac wen ñaʼtan? b) ¿Bajcheʼ yubil miʼ yubin Jehová cheʼ miʼ qʼuel mi laj cʌcʼ ti cʌñol tiʼ tojlel yañoʼ bʌ?

⁸ Miʼ mejlel lac wen ñaʼtan chaʼan yan tac bʌ jaʼel, mach cojach muʼ bʌ lac pejcan ti Biblia. Jumpʼejl ejemplo, cheʼ mi laj qʼuel jiñi melbil tac bʌ i chaʼan Dios, laʼ laj cʼajtiben lac bʌ: «¿Chuqui miʼ cʌntesañon chaʼan Jehová?». Ili mi caj i ñijcañonla la cʌqʼuen wocolix i yʌlʌ ti jumpʼejl oración. I mi añonla yicʼot yambʌ wiñicob xʼixicob (quixtañujob), miʼ mejlel lac subeñob bajcheʼ yubil mi laj cubin (Salmo 104:24; Hechos 14:17). Jehová woliʼ qʼuelonla, i tijicña miʼ yubin cheʼ miʼ qʼuel mi lac ñaʼtan, mi lac melben oración yicʼot mi la cʌcʼ ti cʌñol tiʼ tojlel yañoʼ bʌ. Jiñi Biblia miʼ yʌl: «An i chaʼan lac Yum i juñilel lac ñaʼtʌntel baʼ tsaʼ tsʼijbunti i cʼabaʼ tac jini muʼ bʌ i bʌcʼñañob lac Yum yicʼot muʼ bʌ i mulañob i ñaʼtan» (Malaquías 3:16).

9. a) ¿Chuqui tsaʼ subenti Timoteo ti Pablo? b) ¿Chuqui miʼ mejlel lac wen ñaʼtan cheʼ mi lac chajpan lac bʌ chaʼan acʼ estudio o chaʼan subtʼan?

 ⁹ Jiñi apóstol Pablo tsiʼ sube Timoteo chaʼan miʼ wen ñaʼtan bajcheʼ woliʼ cʼotel tiʼ tojlel yañoʼ bʌ jiñi woliʼ bʌ i yʌl, i mel yicʼot jiñi i cʌntesa (pejcan 1 Timoteo 4:12-16 *). Joñonla miʼ mejlel lac wen ñaʼtan jaʼel jiñi. Cheʼ mi lac chajpan lac bʌ chaʼan acʼ estudio, yom mi lac tʼoxben i yorajlel ti wem bʌ ñaʼtʌntel. Laʼ lac ñaʼtan jumpʼejl cʼajtiya o ejemplo mejl bʌ i coltan ti sujtel tiʼ yamigo Dios. Ili mi caj i ñumen pʼʌtʼesan lac ñopoñel (chʼujbiya) ti Dios yicʼot chaʼan mi lac chaʼlen cʌntesa ti lac chʼejlel. Yom ñaxan mi lac wen ñaʼtan jeʼel cheʼ muʼto caj lac majlel ti subtʼan (pejcan Esdras 7:10). Miʼ mejlel lac pejcan jumpʼejl capítulo am bʌ ti Hechos, mi lac ñaʼtan jiñi versículo muʼ bʌ caj laj cʼʌn o jiñi jun muʼ bʌ caj la cʌcʼ. Ili mi caj i ñumen aqʼueñonla lac chʼejlel ti subtʼan jaʼel (2 Timoteo 1:6). Wen cheʼ mi lac ñaʼtan jaʼel chuqui i cʼʌjñibal bʌ i chaʼan jiñi wiñicob xʼixicob yicʼot chuqui muʼ bʌ mejlel lac subeñob. Bajcheʼ ili, ñumen utsʼat mi caj laj cʼʌn ti subtʼan jiñi Biblia (1 Corintios 2:4).

10. ¿Chuqui tac yambʌ miʼ mejlel lac wen ñaʼtan?

¹⁰ ¿Chuqui tac yambʌ miʼ mejlel lac wen ñaʼtan? Cheʼ mi lac tsʼijbun muʼ bʌ i yʌjlel ti tempa bʌ o ti colem tempa bʌ tac, yom mi lac tʼoxben i yorajlel lac chaʼ cʼajtesan. Laʼ laj cʼajtiben lac bʌ: «¿Chuqui tsaʼ j cʌñʌ chaʼan jiñi Biblia yicʼot i yorganización Dios?». Miʼ mejlel lac ñaʼtan jaʼel muʼ bʌ lac pejcan yaʼ ti revista Lac Tsictesʌbentel, yaʼ ti revista ¡Despertad! yicʼot yambʌ lac jun tac muʼ bʌ i yʌjqʼuel ti colem tempa bʌ tac. O cheʼ mi lac pejcan yaʼ ti Anuario chaʼan jiñi hermanojob, laʼ laj cʌqʼuen i yorajlel lac ñaʼtan tsaʼ bʌ  i ñusayob chaʼan miʼ cʼotel ti lac pusicʼal. Yom mi la cʌqʼuen i marcajlel yaʼ baqui woliʼ ñumen tsictesʌntel o mi lac tsʼijbun tiʼ tiʼ tac jiñi jun cheʼ wolito lac pejcan. Ili mi caj i coltañonla laj cʼajtesan jiñi ñuc tac bʌ i cʼʌjñibal mejl bʌ laj cʼʌn ti jumpʼejl lac discurso, cheʼ mi lac julaʼtan yambʌ hermano o juntiquil yom bʌ i cʌn chaʼan jiñi Biblia. Wen ñuc i cʼʌjñibal cheʼ mi lac tʼoxben i yorajlel chaʼan mi lac wen ñaʼtan woli bʌ laj cʌn, i cheʼʌch miʼ cʼotel ti lac pusicʼal yicʼot mi la cʌqʼuen wocolix i yʌlʌ Jehová.

11. a) ¿Baqui bʌ jiñi ñumen ñuc bʌ yom mi lac wen ñaʼtan, chucoch? (Qʼuele jiñi nota.)

¹¹ Cheʼ mi lac wen ñaʼtan jiñi Biblia jiñʌch ñumen ñuc bʌ miʼ mejlel lac mel. ¿Chucoch? Ñaʼtancu ti jumpʼejl bʌ qʼuin mi lac chilbentel jiñi Biblia. * Miʼ mejlel i chilbeñoñobla, pero maʼañic majqui miʼ mejlel i mʌctañonla chaʼan mi laj cʼajtesan tsaʼix bʌ lac loto ti lac jol, bajcheʼ texto tac o jiñi cʼay tac (Hechos 16:25). Yicʼot i yespíritu Jehová mi caj i coltañonla laj cʼajtesan tsaʼix bʌ laj cʌñʌ yicʼot chaʼan xucʼul mi laj cajñel (Juan 14:26).

12. ¿Chuqui miʼ mejlel lac mel chaʼan ti jujumpʼejl qʼuin mic pejcanla jiñi Biblia?

¹² ¿Chuqui miʼ mejlel lac mel chaʼan ti jujumpʼejl qʼuin mic pejcanla jiñi Biblia? Laʼ laj qʼuel. Ti jumpʼejl semana, miʼ mejlel lac pejcan chaʼpʼejl uxpʼejl qʼuin jiñi yom bʌ miʼ pejcʌntel yaʼ ti Escuela chaʼan bʌ i Yeʼtel Dios yicʼot mi lac tʼoxben i yorajlel chaʼan mi lac ñaʼtan. Yambʌ qʼuin miʼ mejlel lac pejcan ti tsʼitaʼ tac yaʼ ti Mateo, Marcos, Lucas o Juan, i mi lac ñaʼtan i cʌntesa yicʼot tsaʼ bʌ i mele Jesús (Romanos 10:17; Hebreos 12:2; 1 Pedro 2:21). Chaʼan mi lac ñumen tajben i wenlel cheʼ mi lac pejcan, miʼ mejlel laj cʼʌn lac jun tac bajcheʼ jiñi libro El hombre más grande, quepecña bʌ miʼ tsictesan tiʼ pejtelel tsaʼ bʌ i mele Jesús (Juan 14:6).

13, 14. ¿Chucoch ñuc i cʼʌjñibal cheʼ mi lac chʌn wen ñaʼtan chaʼan Jehová yicʼot Jesús, i chuqui mi caj i ñijcañonla lac mel jiñi?

¹³ Cheʼ mi lac wen ñaʼtan ti Jehová yicʼot ti Jesús, miʼ coltañonla lac taj laj colel bajcheʼ xñoptʼan yicʼot miʼ pʼʌtʼan lac ñopoñel (Hebreos 5:14; 6:1). Mi maʼañic mi laj cʌqʼuen i yorajlel jiñi, cʼunteʼ cʼunteʼ mi caj lac ñajtʼesan lac bʌ ti Jehová, i tajol mach chʌn i yamigojoñixla miʼ cajel (Hebreos 2:1; 3:12). Jesús tsiʼ wʌn alʌ chaʼan mi maʼañic mi lac jacʼ ti wen muʼ bʌ lac pejcan yaʼ ti Biblia, jiñi ‹cʼojol chaʼan bʌ ili pañimil yicʼot ti chubʌʼañʌl› mi caj i ñajtʼesañonla ti Jehová (Lucas 8:14, 15).

¹⁴ Jin chaʼan ñuc i cʼʌjñibal cheʼ mi lac chʌn wen ñaʼtan am bʌ ti Biblia yicʼot cheʼ ti jujumpʼejl qʼuin mi lac ñumen cʌn Jehová. Ili mi caj i ñijcañonla lac chʌn chaʼlen wersa lac lajiben i melbal yicʼot cheʼ bajcheʼ yilal (2 Corintios 3:18). Cheʼ mi lac chaʼlen wersa, mi caj lac bej cʌn chaʼan bʌ Dios yicʼot cheʼ bajcheʼ yilal. ¡Jiñʌch ñuc bʌ lac majtan! (Eclesiastés 3:11.)

15, 16. a) ¿Bajcheʼ miʼ coltañonla cheʼ mi lac wen ñaʼtan chaʼan Jehová yicʼot Jesús? b) ¿Chucoch wocol chaʼan mi lac tajben i yorajlel mi lac wen ñaʼtan i chaʼan bʌ Jehová? c) ¿Chucoch i cʼʌjñibalʌch cheʼ mi lac chaʼlen wersa lac wen ñaʼtan?

¹⁵ Cheʼ mi lac wen ñaʼtan chaʼan Jehová yicʼot Jesús miʼ coltañonla lac chʌn melben i yeʼtel Jehová yicʼot lac chʼejlel. Ili chʼejlel mi caj i toyben yambʌ la quermañojob yicʼot muʼ bʌ lac subeñob jiñi wen tʼan. Cheʼ mi lac  wen ñaʼtan jaʼel tsaʼ bʌ i mele Jehová cheʼ tsiʼ choco tilel ti chʌmel Jesús ti laj caj, mi laj cʌn chaʼan wen ñucʌch cheʼ i yamigojonla Dios (Romanos 3:24; Santiago 4:8). Juntiquil hermano ti Sudáfrica i cʼabaʼ Mark, tsaʼ ajñi uxpʼejl jab ti cárcel chaʼan i xucʼtʌlel ti Jehová. Tsiʼ yʌlʌ chaʼan cheʼ mi lac wen ñaʼtan i chaʼan bʌ Jehová lajal bajcheʼ mi lac majlel ti xʌmbal baqui mach laj cʌñʌyic. Mi lac ñumen cʌn chaʼan bʌ Jehová. Cheʼ bʌ chʼijiyemonla o an chuqui mi laj cʼojoʼtan, laʼ lac pejcan jiñi Biblia yicʼot lac tʼoxben i yorajlel tiʼ ñaʼtʌntel. Jiñʌch mi caj i yʌqʼueñonla lac ñʌchʼtʌlel.

¹⁶ An i tajol wocol chaʼan mi lac tajben i yorajlel chaʼan mi lac wen ñaʼtan am bʌ ti Biblia. ¿Chucoch? Come ili pañimil (mulawil) wen butʼul ti muʼ bʌ mejlel i mʌctañonla. Juntiquil hermano ti África i cʼabaʼ Patrick miʼ yʌl chaʼan ti jujumpʼejl qʼuin cabʌl chuqui yom miʼ mel. An i tajol an chuqui tac miʼ wen pensalin. ¿Chuqui miʼ mel cheʼ jiñi? Ñaxan miʼ suben Jehová ti jumpʼejl oración. Cheʼi, ñumen tijicña miʼ wen ñaʼtan i chaʼan bʌ Jehová. Anquese mucʼʌch i tsʼitaʼ chʼʌmben i yorajlel, pero ñumen lʌcʼʌl miʼ yubin i bʌ ti Jehová. Cheʼ miʼ wen ñaʼtan, miʼ coltan jaʼel i chʼʌmben isujm jiñi cʌntesa tac i chaʼan Dios am bʌ ti Biblia (Salmo 94:19). Wen tsiquil chaʼan cheʼ mi lac pejcan jiñi Biblia yicʼot mi lac wen ñaʼtan ti jujumpʼejl qʼuin, miʼ wen aqʼueñonla lac wenlel. Ñucʌch i cʼʌjñibal cheʼ mi lac chaʼlen wersa (Hechos 17:11).

17. ¿Baqui ora maʼ locʼsʌben i yorajlel chaʼan maʼ wem ñaʼtan i chaʼan bʌ Jehová?

¹⁷ An ti sʌcʼan bʌ miʼ pejcañob jiñi Biblia, miʼ wen ñaʼtañob yicʼot miʼ melob oración. Yañoʼ bʌ miʼ melob ti xinqʼuiñil cheʼ mucʼob ti cʼaj o. An yañoʼ bʌ muʼ bʌ i mulañob cheʼ ti icʼajel (ochix qʼuin) o cheʼ muqʼuix i cajelob ti wʌyel. An muʼ bʌ i tsʼitaʼ pejcañob ti sʌcʼan yicʼot yambʌ ti acʼʌlel (Josué 1:8). Mach yʌlʌlic bajcheʼ ora mi lac mel, ti jujumpʼejl qʼuin yom mi lac locʼsʌben i yorajlel ti jiñi mach bʌ wen i cʼʌjñibalic tac tiʼ pejcʌntel jiñi Biblia yicʼot chaʼan mi lac wen ñaʼtan (Efesios 5:15, 16).

18. ¿Chuqui miʼ yʌl Jehová chaʼan mi caj i mel tiʼ tojlel muʼ bʌ i wen ñaʼtañob am bʌ ti Biblia yicʼot mucʼoʼ bʌ ti wersa tiʼ melol muʼ bʌ i cʌñob?

¹⁸ Jehová miʼ yʌqʼuen i tʼan jiñi muʼ bʌ i wen ñaʼtañob am bʌ ti Biblia yicʼot mucʼoʼ bʌ ti wersa tiʼ jacʼol muʼ bʌ i yʌl yaʼi, chaʼan mi caj i yʌqʼueñob i bendición (pejcan Salmo 1:1-3). Jesús tsiʼ yʌlʌ chaʼan ñumen tijicñayob majqui miʼ ñʌchʼtañob yicʼot miʼ jacʼob muʼ bʌ i yʌl jiñi Biblia (Lucas 11:28). Pero ñumen ñuc bʌ cheʼ mi lac wen ñaʼtan muʼ bʌ i yʌl jiñi Biblia ti jujumpʼejl qʼuin jiñʌch cheʼ mi caj lac chumtʌl chaʼan mi la cʌqʼuen i ñuclel Jehová. Tijicña mi caj lac chumtʌl ili ora, i Dios mi caj i yʌqʼueñonla jiñi cuxtʌlel maʼañic bʌ i jilibal yaʼ ti Paraíso (Santiago 1:25; Apocalipsis 1:3).