Cheʼ an chuqui tsijiʼ bʌ mi caj lac mel, tajol mi laj cʼajtiben lac bʌ: «¿Chuqui bʌ wenlel mi caj c taj?». ¿Mach ba weñic cheʼ lajal mij cʼajtiben c bʌ jaʼel chaʼan jiñi oración? An i tajol mach cheʼic. I tilelʌch cheʼ com lac ñaʼtan chuqui bʌ i wenlel an cheʼ mi lac melben oración Dios.

Ti jiñi yambʌ temaj tsaʼ bʌ laj qʼuele, mach chaʼañic jumpʼejl jach costumbre o bajcheʼ jumpʼejl terapia cheʼ mi lac mel oración. Jiñi isujm bʌ Dios miʼ yubin jiñi oración tac. Mi mucʼʌch lac mel ti toj yicʼot weñʌch i sujmlel chucoch mi lac mel, mi caj i ñʌchʼtʌbeñonla. Yicʼot jeʼel, miʼ subeñonla chaʼan mi lac lʌcʼtesan lac bʌ tiʼ tojlel (Santiago 4:8). Cheʼ jiñi, ¿chuqui mi caj lac taj cheʼ mi lac chʌn chaʼlen oración? Laʼ laj qʼuel.

Cheʼ bʌ an chuqui wocol woli (choncol) lac ñusan, ¿cʌlʌx ba miʼ yʌqʼuet ti pensal maʼ wubin? Jiñi Biblia miʼ subeñonla yom bʌ mi lac mel: «Chʌn chaʼlenla oración» yicʼot «subenla Dios chuqui tac yom ti oración» (1 Tesalonicenses 5:17; Filipenses 4:6). Jiñi Biblia miʼ yʌcʼ ili tʼan tiʼ tojlel muʼ bʌ i cʼajtibeñob i coltaya Dios: «I ñʌchʼtʌlel laʼ pusicʼal chʼoyol bʌ ti Dios mi caj i cʌntan laʼ pusicʼal yicʼot laʼ ñaʼtʌbal» (Filipenses 4:7). Cheʼ bʌ mi lac suben jiñi lac Tat am bʌ ti panchan chuqui lac wocol, maʼañix chuqui miʼ cʌlʌx acʼonla ti pensal. Jiñi Biblia miʼ subeñonla yom bʌ mi lac mel: «Aqʼuen a cuch lac Yum. Jini mi caj i cuchbeñet majlel» (Salmo 55:22).

Yonlel wiñicob xʼixicob (quixtañujob) tiʼ pejtelel pañimil (mulawil) an i yubiyob i tijicñʌyel cheʼ bʌ  miʼ melob jiñi oración. Juntiquil xʼixic chʼoyol bʌ ti Corea del Sur, i cʼabaʼ Hee Ran, tsiʼ yʌlʌ: «Cheʼ bʌ mic suben Dios chaʼan jiñi tsʌts tac bʌ c wocol, miʼ sejbʼan, jiñʌch miʼ coltañon c bej chaʼlen wersa majlel». Cecilia, chumul bʌ ti Filipinas, miʼ subeñonla: «Mic wen cʼojoʼtan chaʼan jiñi chaʼtiquil quixicʼal. Cheʼ jaʼel, mij cʌntan c mamá, maʼañix bʌ miʼ cʌñon tiʼ caj i cʼamʌjel. Wocolix i yʌlʌ jiñi oración, miʼ mejlel c mel ti tijicña jiñi queʼtel (troñel) ti jujumpʼejl qʼuin. Jehová mi caj i coltañon j cʌntañob».

¿Muʼ ba i yʌqʼuet ti cabʌl pensal cheʼ bʌ maʼ ñaʼtan chuqui miʼ mejlel ti ujtel ti a tojlel, o miʼ tajet jumpʼejl tsʌts bʌ wocol? Cheʼ maʼ pejcan jiñi Dios «muʼ bʌ i ñuqʼuesan lac pusicʼal», mi caj a taj a coltʌntel. Jiñi Biblia miʼ subeñonla chaʼan «Dios miʼ ñuqʼuesan lac pusicʼal tiʼ pejtelel lac wocol» (2 Corintios 1:3, 4).  Jumpʼejl ejemplo, ti jumpʼejl bʌ qʼuin, cheʼ bʌ Jesús an chuqui woli (yʌquel) i cʼojoʼtan, «tsaʼ ñocle. Tsiʼ chaʼle oración». ¿Chuqui tsaʼ ujti? «Tsaʼ tili ángel chʼoyol bʌ ti panchan chaʼan miʼ pʼʌtʼesan.» (Lucas 22:41, 43.) Nehemías, xucʼul bʌ i wiñic Dios, tsiʼ yila wocol jaʼel come jiñi jontoloʼ bʌ quixtañu tsiʼ chʼʌcʌyob chaʼan miʼ cʌy i melben i yeʼtel Dios. Tsiʼ mele oración, tsiʼ yʌlʌ: ‹Pʼʌtʼesañon›. Ti wiʼil tsiʼ qʼuele chaʼan Dios tsaʼʌch i colta i lʌtʼ i bʌqʼuen yicʼot miʼ tsʼʌctesan i yeʼtel (Nehemías 6:9-16). Reginald, chʼoyol bʌ ti Ghana, miʼ yʌl: «Cheʼ bʌ añon ti tsʌts bʌ wocol, mic mel oración, lajal yubil bajcheʼ tsaʼ c sube juntiquil quixtañu muʼ bʌ mejlel i coltañon yicʼot muʼ bʌ i subeñon chaʼan maʼañix mij cʌlʌx chaʼlen pensal». Tsaʼix laj qʼuele, cheʼ bʌ mi lac melben oración Dios, miʼ yʌqʼueñonla lac tijicñʌyel.

An chuqui tac miʼ cʼotel lac mel muʼ bʌ i qʼuextan laj cuxtʌlel yicʼot ti lac familia. ¿Bajcheʼ yom chaʼan mach cheʼic mi lac mel? Jiñi Biblia miʼ yʌl: «Mi anto yom laʼ ñaʼtʌbal cʼajtibenla Dios muʼ bʌ i pʼewbeñob pejtelel winicob. Cheʼ mi laʼ cʼajtiben mi caj i yʌqʼueñetla tiʼ yonlel i ñaʼtʌbal come mach yujilic aʼleya» (Santiago 1:5). Cheʼ mi laj cʼajtiben Dios chaʼan miʼ yʌqʼueñonla lac ñaʼtʌbal miʼ cʼʌn chʼujul bʌ i yespíritu chaʼan miʼ coltañonla lac mel ti wen chuqui ñaʼtʌbil bʌ lac chaʼan. Jesús tsiʼ yʌlʌ: «Laʼ Tat am bʌ ti panchan, ¿mach ba ñumen yujilic i yʌqʼueñob jini Chʼujul bʌ Espíritu jini muʼ bʌ i cʼajtibeñob?» (Lucas 11:13).

Jinto Jesucristo jeʼel tsiʼ cʼajtibe i coltaya i Tat cheʼ bʌ an chuqui ñaʼtʌbil i chaʼan miʼ mel. Cheʼ baqui ora tsiʼ yajca jiñi 12 apóstolob i chaʼan «ti pejtelel acʼʌlel tsiʼ pejca Dios» (Lucas 6:12).

Cheʼ bajcheʼ Jesús, yonlel quixtañu miʼ tajob i tijicñʌyel cheʼ bʌ miʼ qʼuelob bajcheʼ an coltʌbilob ti Dios tiʼ ñaʼtʌntel chuqui yom bʌ miʼ melob. Regina, chumul bʌ ti Filipinas, miʼ yʌl chaʼan wocol tsaʼ caji i yubin cheʼ bʌ tsaʼ chʌmi i ñoxiʼal, chaʼan miʼ sʌclan chuqui yom bʌ i familia, tsiʼ sʌtʌ i troñel yicʼot tsaʼ caji i bajñel cosan jiñi i yalobilob. ¿Chuqui tsiʼ colta chaʼan wen miʼ mel ñaʼtʌbil bʌ i chaʼan? Miʼ yʌl: «Jiñi oración jiñʌch muʼ bʌ i coltañon ti Jehová». Kwabena, chumul bʌ ti Ghana, miʼ yʌl chucoch miʼ cʼajtiben i coltaya Dios: «Come lon an wem bʌ queʼtel i tsaʼ c sʌtʌ. Cheʼ bʌ tsaʼ caji j qʼuel chuqui mi caj c mel, tiʼ pejtelel ora tsaʼ j cʼajtibe i coltaya Jehová chaʼan miʼ coltañon c mel ti wen chuqui ñaʼtʌbil c chaʼan. Tiʼ sujmlel mi cʌl, Jehová tsiʼ coltayon c taj jiñi queʼtel muʼ bʌ i coltañon chaʼan chuqui i cʼʌjñibal bʌ c chaʼan yicʼot tiʼ chaʼan bʌ Jehová». Miʼ mejlel a cʼajtiben Jehová ti oración jeʼel chaʼan miʼ coltañet a yajcan a mel chuqui maʼañic bʌ miʼ yotsañet ti wocol tiʼ chaʼan bʌ Jehová.

Maxto tiʼ pejtelel tsaʼ ajli chuqui bʌ wenlel miʼ mejlel a taj cheʼ bʌ maʼ mel oración. (Chaʼan mi laj qʼuel yambʌ wenlel, qʼuele jiñi recuadro « Muʼ bʌ lac taj cheʼ mi lac mel oración».) Mi a wom a taj a wenlel chaʼan jiñi oración, ñaxan cʌñʌ Dios yicʼot tiʼ pejtelel chuqui wʌn subebil bʌ i chaʼañonla. ¿Chucoch maʼañic maʼ suben juntiquil i testigo Jehová chaʼan miʼ coltañet a cʌn chuqui miʼ yʌl jiñi Biblia? * Tajol jiñʌch ñaxam bʌ yom maʼ mel chaʼan maʼ lʌcʼtesan a bʌ ti jiñi muʼ bʌ i ‹ñʌchʼtan la coración› (Salmo 65:2).