1. a) ¿Baqui ñumen ñuc an i chaʼan Dios? b) ¿Bajcheʼ yubil mi laj cubin cheʼ bʌ mi lac ñaʼtan chaʼan Dios cʼuxbiyajʌch?

JIÑI Biblia miʼ yʌl chaʼan «cʼuxbiyajʌch Dios» (1 Juan 4:8). Ili yom i yʌl chaʼan jiñi ñumen ñuc bʌ an i chaʼan jiñʌch cʼuxbiya. Dios cʼuxbiyajʌch, mach cheʼ jach miʼ yubin. Tiʼ pejtelel muʼ bʌ i mel chaʼañʌch cʼuxbiya. Wen tijicña mi laj cubin cheʼ jiñi cʼuxbiya tsiʼ ñijca chaʼan miʼ mel jiñi universo yicʼot tiʼ pejtelel chuqui cuxul.

2. ¿Chuqui mi lac ñop cheʼ la cujil chaʼan Jehová miʼ cʼuxbiñonla? (Qʼuele jiñi dibujo am bʌ tiʼ tejchibal.)

² La cujil chaʼan Jehová miʼ cʼuxbin tiʼ pejtelel chuqui melbil i chaʼan. Jin chaʼan, mi lac ñop chaʼan mi caj i tsʼʌctesan subebil bʌ i chaʼañonla. Jumpʼejl ejemplo, come miʼ cʼuxbiñonla, «tsaʼix i wʌn ñaʼta jini qʼuin cheʼ mi caj i chaʼlen meloñel ti toj» baqui mi caj i cʼʌn i Yalobil, Jesucristo (Hechos 17:31). Mucʼʌch lac ñop chaʼan Jesús miʼ caj ti meloñel ti toj. Jiñi muʼ bʌ i jacʼbeñob i tʼan Dios mi caj i tajob isujm bʌ tijicñʌyel tiʼ pejtelel ora yicʼot wen mi caj i yajñelob.

3. ¿Bajcheʼ yilal miʼ cajel jiñi talto bʌ qʼuin, cheʼ machic miʼ cʼuxbiñonla Jehová?

³ ¿Bajcheʼ yilal miʼ cajel jiñi talto bʌ qʼuin cheʼ machic miʼ cʼuxbiñonla Jehová? Come jiñi quixtañujob añob tiʼ cʼʌb Satanás, jiñi jontol bʌ dios, mi caj i chʌn yumañob i bʌ (2 Corintios 4:4; 1 Juan 5:19; pejcan Apocalipsis 12:9, 12). ¡Cheʼiqui, mach wis tijicñayic miʼ cajel jiñi talto bʌ qʼuin!

4. ¿Chucoch maʼañic tsiʼ jisa Jehová jiñi Satanás cheʼ bʌ tsaʼ caji i contrajin?

⁴ Satanás maʼañic tsiʼ jacʼbe i tʼan Jehová, tsiʼ mele jaʼel chaʼan Adán yicʼot Eva cheʼ miʼ melob. Tsiʼ yʌlʌ chaʼan Dios mach jiñic an tiʼ wenta miʼ chaʼlen yumʌntel ti panchan yicʼot wʌʼ ti Pañimil. Tsiʼ yʌlʌ chaʼan jiñʌch ñumen wem bʌ yumʌl (Génesis 3:1-5). Jehová juntiquilʌch Dios am bʌ cabʌl i ñaʼtʌbal, tiʼ tsʼitaʼ aqʼue ora Satanás chaʼan miʼ pʌs mi melelʌch tsaʼ bʌ i yʌlʌ. Pero tsaʼix tsictiyi chaʼan mi jiñic to Satanás yicʼot jiñi wiñicob wem bʌ yumʌlob.

5. ¿Chuqui ñusʌbil i chaʼan jiñi quixtañujob cʼʌlʌl ti wajali?

⁵ Ili ora, woli (choncol) i ñumen pʼojlel wocol ila ti pañimil (mulawil). Jiñi 100 jab ñumen bʌ, tiʼ caj guerra an chʌmen ñumen ti 100 millón wiñicob xʼixicob (quixtañujob). Jiñi Biblia miʼ yʌl chaʼan «ti cojix bʌ qʼuin tac», ñumen jontol miʼ cajelob jiñi quixtañu (2 Timoteo 3:1, 13). Miʼ yʌl jaʼel chaʼan maʼañic majqui miʼ mejlel i «bajñel tojʼesan majlel i bʌ. Mach mejlic i bajñel yajcan i bijlel» (Jeremías 10:23). Isujmʌch ili tʼan. Jiñi ñusʌbil bʌ i chaʼan quixtañujob cʼʌlʌl ti wajali, miʼ pʌs chaʼan maʼañic tsiʼ meleyonla Jehová chaʼan mi lac bajñel yuman lac bʌ.

6. ¿Chucoch woliʼ chʌn cʌy Jehová jiñi jontoloʼ bʌ?

⁶ ¿Chucoch woli (yʌquel) i chʌn cʌy Jehová jiñi jontoloʼ bʌ quixtañu? Chaʼañʌch miʼ pʌs chaʼan cojach i yumʌntel Dios miʼ mejlel i mel i yeʼtel. Ti talto bʌ qʼuin, tiʼ pejtelel jiñi jontol bʌ quixtañu mi caj i jisʌntel. Cheʼ jiñi, mi an muʼ bʌ i chaʼ al chaʼan Dios maʼañic tiʼ wenta miʼ chaʼlen yumʌntel, maʼañix chucoch chʌn cuxulto miʼ cʌy. Ti ora mi caj i jisan. ¿Wem ba cheʼ miʼ mel bajcheʼ jiñi? Chaʼan miʼ jacʼ iliyi, miʼ mejlel i yʌl chaʼan jiñi yumʌlob ila ti pañimil an i yʌqʼue cabʌl ilaya wocol jiñi quixtañujob. Ili jiñʌch muʼ bʌ caj i cʼʌn i pʌs chaʼan maʼañix chucoch miʼ ñusan jiñi jontolil.

7, 8. a) ¿Bajcheʼ tac miʼ pʌsbeñonla i cʼuxbiya Jehová?

⁷ Jehová cabʌl bajcheʼ miʼ pʌsbeñonla i cʼuxbiya. Jumpʼejl ejemplo, wen colem yicʼot utsʼatax tsiʼ mele jiñi universo. Tiʼ jochtʌlel jiñi, an cabʌl millón planeta yicʼot estrella tac. Jumpʼej jiñʌch jiñi Qʼuin. Maʼañic cuxtʌlel wʌʼ ti Lum cheʼ maʼañic jiñi Qʼuin. Cheʼ bajcheʼ miʼ yʌl Romanos 1:20, tiʼ pejtelel iliyi, miʼ pʌsbeñonla chaʼan Jehová jiñʌch tsaʼ bʌ i Mele tiʼ pejtelel chuqui an, i cheʼ jaʼel an i pʼʌtʌlel, i ñaʼtʌbal yicʼot i cʼuxbiya.

⁸ Jehová tsiʼ mele ili Lum chaʼan miʼ yajñel jiñi am bʌ i cuxtʌlel yicʼot chaʼan miʼ tajob i tijicñʌyel, tsiʼ yʌcʼʌ jaʼel ti wen utsʼatax bʌ ajñibʌl jiñi Adán yicʼot Eva. Cheʼ jaʼel, tsʼʌcʌl tsiʼ yʌqʼueyob i pensar yicʼot tsiʼ mele chaʼan miʼ chumtʌlob tiʼ pejtelel ora (pejcan Apocalipsis 4:11). Yaʼ ti Salmo 136:25 miʼ yʌl chaʼan Jehová miʼ yʌqʼuen chuqui yom tiʼ pejtelel jiñi cuxul bʌ come maʼañic i jilibal i cʼuxbiya.

9. Anquese Jehová xcʼuxbiyajʌch, ¿chuqui miʼ tsʼaʼlen?

⁹ Anquese Jehová cʼuxbiyajʌch, miʼ tsʼaʼlen tiʼ pejtelel mach bʌ weñic. Jin chaʼan, ti Salmo 5:4-6 miʼ yʌl chaʼan Jehová maʼañic miʼ mulan mach bʌ weñic yicʼot chaʼan miʼ tsʼaʼlen jontol bʌ quixtañujob, muʼ bʌ i chaʼleñob jatsʼ o tsʌnsa yicʼot muʼ bʌ i chaʼleñob lot.

10, 11. a) ¿Chuqui mi caj i chaʼlen ti mach jalix jiñi jontol bʌ quixtañujob? b) ¿Chuqui mi caj i yʌqʼuen Jehová jiñi quixtañu muʼ bʌ i jacʼbeñob i tʼan?

¹⁰ Bajcheʼ tsaʼix laj cʌñʌ, Jehová jiñʌch xcʼuxbiya bʌ Dios yicʼot miʼ tsʼaʼlen tiʼ pejtelel jontolil. Jin chaʼan, mi caj i jisan tiʼ pejtelel mach bʌ weñic wʌʼ ti Pañimil. Jiñi Biblia miʼ yʌl chaʼan mi caj i jisʌntel jiñi jontoloʼ bʌ, pero «jini muʼ bʌ i chʌn pijtañob lac Yum mi caj i yʌqʼuentelob i wenlel». Miʼ yʌl jaʼel chaʼan mach jalix mi caj i jilel i contrajob Jehová (Salmo 37:9, 10, 20).

¹¹ ¿Chuqui mi caj i yʌqʼuen Jehová jiñi quixtañujob muʼ bʌ i chʼʌmob ti ñuc i cʼuxbiya Dios? Mi caj i yʌqʼueñob i wenlel. Jiñi Biblia miʼ yʌl chaʼan «mi caj i yʌqʼuentelob jini pañimil jini tojoʼ bʌ. Mi caj i yajñelob tiʼ pejtelel ora» (Salmo 37:29). Jiñi xucʼuloʼ bʌ, tijicña mi caj i yajñelob yicʼot mi caj i tajob cabʌl i ñʌchʼtʌlel (Salmo 37:11). ¿Chucoch? Come Dios miʼ mel chuqui wem bʌ tiʼ pejtelel ora tiʼ tojlel xucʼul bʌ i wiñicob. Jiñi Biblia miʼ yʌl chaʼan «Dios mi caj i sujcubeñob i yaʼlel i wut. Maʼanix majch miʼ caj ti chʌmel. Maʼanix ucʼtaya mi uqʼuel mi wocol tiʼ pejtelel ora». Tiʼ pejtelel jiñi mi caj i jilel (Apocalipsis 21:4).

12. ¿Chuqui yom mi lac mel mi la com chaʼan Jehová maʼañic lac mul miʼ qʼuelonla?

¹² Ti Salmo 37:37, 38 miʼ yʌl chaʼan tiʼ pejtelel jiñi ‹xucʼuloʼ bʌ›, o maʼañobic bʌ i mul, tijicña mi caj i chumtʌlob ti talto bʌ qʼuin. Miʼ yʌl jaʼel chaʼan Dios mi caj i jisan jiñi jontoloʼ bʌ yicʼot maʼañic bʌ miʼ jacʼbeñob i tʼan. Mi la com chaʼan maʼañic lac mul miʼ qʼuelonla Jehová, yom mi laj cʌn yicʼot i yalobil, i mi lac jacʼ tiʼ pejtelel chuqui miʼ subeñonla (pejcan Juan 17:3). Yom mi lac ñop chaʼan mach jalix mi caj i jisʌntel ili pañimil, «pero miʼ yajñel tiʼ pejtelel ora jini muʼ bʌ i chaʼlen cheʼ bajcheʼ yom Dios» (1 Juan 2:17). Come lʌcʼʌlix i jilibal ili pañimil, yom mi lac jacʼ ti ora ili ticʼojel: «Ñopo lac Yum, jacʼben chuqui miʼ yʌl» (Salmo 37:34).

13. ¿Baqui bʌ jiñi ñumen ñuc bʌ bajcheʼ tsiʼ pʌsbeyonla i cʼuxbiya Dios?

¹³ Anquese xmulilonla, miʼ mejlel lac jacʼben i tʼan Dios. Mi lac mejlel ti sujtel tiʼ yamigo jeʼel come Jesús tsiʼ yʌcʼʌ i cuxtʌlel. Ili jiñʌch jiñi ñumen ñuc bʌ bajcheʼ tsiʼ pʌsbeyonla i cʼuxbiya Dios. Tsiʼ choco tilel ti chʌmel i Yalobil chaʼan miʼ loqʼuelob ti mulil yicʼot chʌmel jiñi muʼ bʌ i jacʼbeñob i tʼan (pejcan Romanos 5:12 yicʼot 6:23). Jehová tsiʼ ñopo chaʼan xucʼul mi caj i yajñel Jesús wʌʼ ti Pañimil come cheʼʌch tsaʼ chʌn ajñi yaʼ ti panchan. Cʼux tsiʼ yubi cheʼ tsiʼ qʼuele bajcheʼ tsaʼ wen ticʼlʌnti i Yalobil. Pero Jesús tsiʼ pʌsʌ tiʼ pejtelel ora chaʼan Dios an tiʼ wenta miʼ yumañonla. Cheʼ jaʼel, tsiʼ pʌsʌ chaʼan juntiquil toj bʌ wiñic xucʼul miʼ mejlel ti ajñel ti Dios anquese an ti tsʌts bʌ wocol.

14, 15. ¿Chuqui bʌ wenlel mi lac taj ti lac pejtelel tiʼ cuxtʌlel tsaʼ bʌ i yʌcʼʌ Jesús?

¹⁴ Jesús tsiʼ wen ila wocol, pero xucʼul tsaʼ ajñi tiʼ tojlel Dios cʼʌlʌl cheʼ tsaʼ chʌmi yicʼot tsiʼ pʌsʌ chaʼan cojach yom miʼ yumañonla i Tat. ¿Chuqui bʌ wenlel mi lac taj ti lac pejtelel cheʼ tsiʼ yʌcʼʌ i cuxtʌlel Jesús? Mi lac mejlel ti chumtʌl yaʼ ti Paraíso tiʼ pejtelel ora. Jiñi apóstol Pablo tiʼ tsictesa chaʼan ili jiñʌch baqui tsiʼ pʌsbeyoñobla jiñi ñuc bʌ i cʼuxbiya Jehová yicʼot Jesús. Pablo tsiʼ yʌlʌ chaʼan maʼañic juntiquil muʼ bʌ i yʌcʼ i cuxtʌlel chaʼan miʼ coltan «juntiquil toj bʌ», i tajol chaʼtiquil uxtiquil jach muʼ bʌ caj i yʌcʼ chaʼan «juntiquil uts bʌ». Pero tsiʼ yʌlʌ chaʼan Dios mucʼʌch i wen cʼuxbiñonla cheʼ bʌ tsiʼ choco tilel ti chʌmel i yalobil ti laj caj «cheʼ xmulilon tola» (Romanos 5:6-8). Jiñi apóstol Juan tiʼ tsʼijbu: «Tsiʼ pʌsbeyonla i cʼuxbiya Dios cheʼ bʌ tsiʼ choco tilel ti pañimil cojach bʌ i Yalobil chaʼan mi lac taj laj cuxtʌlel ti Jesús. Jiñʌch mero cʼuxbiya. Mach joñonicla tsaʼ laj cʼuxbi Dios pero jini tsiʼ cʼuxbiyonla. Tsiʼ choco tilel i Yalobil» chaʼan miʼ chʌmel ti laj caj (1 Juan 4:9, 10).

 ¹⁵ Jesús tsiʼ yʌlʌ chaʼan Dios tsiʼ yʌcʼʌ i cuxtʌlel cojach bʌ i Yalobil come miʼ wen cʼuxbin jiñi quixtañujob, i «majqui jach miʼ ñop i Yalobil, maʼanic miʼ sajtel. Miʼ taj i cuxtʌlel mach bʌ anic miʼ jilel» (Juan 3:16). Jehová tsiʼ yʌcʼʌ ti chʌmel i Yalobil ti laj caj, anquese wen cʼux tsiʼ yubi. Maʼañic baqui ora miʼ qʼuextʌyel jiñi come miʼ pʌsbeñonla chaʼan mucʼʌch i wen cʼuxbiñonla. Jin chaʼan Pablo tiʼ tsʼijbu: «Come cujil maʼanic chuqui miʼ mejlel i mʌctan i cʼuxbiya Dios cheʼ mi lac chʌmel o cheʼ cuxulon tola, mi ángelob, mi yumʌlob, mi jini pʼʌtʌloʼ bʌ, mi jinic mu bʌ i yujtel wʌle, mi jinic muʼ bʌ caj ti ujtel, mi chan tac bʌ, mi jinic am bʌ tiʼ yebal, mi yan tac bʌ melbil tac bʌ. Maʼanic chuqui miʼ mejlel i mʌctan i cʼuxbiya Dios muʼ bʌ lac taj ti lac Yum Cristo Jesús» (Romanos 8:38, 39).

16. a) ¿Chuqui jiñi Yumʌntel? b) ¿Majqui tsiʼ waʼchoco Dios bajcheʼ yumʌl ti jiñi Yumʌntel?

¹⁶ Yambʌ bajcheʼ miʼ pʌs chaʼan Dios mucʼʌch i cʼuxbiñonla jiñʌch i Yumʌntel. Dios jiñʌch tsaʼ bʌ i mele ili Yumʌntel, tsiʼ waʼchoco juntiquil muʼ bʌ i cʼuxbin quixtañujob yicʼot wen chajpʌbil bʌ chaʼan miʼ mel jiñi eʼtel (troñel) (Proverbios 8:31). Ili yumʌl jiñʌch Jesucristo, jiñi Mesías. Cheʼ jaʼel, Dios tsiʼ yajca 144 mil wiñicob xʼixicob chaʼan miʼ chaʼleñob yumʌntel yicʼot Cristo yaʼ ti panchan. Cheʼ miʼ tejchesʌntelob, jiñi cʌmbil bʌ i chaʼañob wʌʼ ti Pañimil miʼ chʼʌmob majlel yaʼ ti panchan (Apocalipsis 14:1). Cheʼ bʌ wʌʼ to an ti Pañimil Jesús, tsaʼ bʌ i ñumen alʌ tiʼ subtʼan jiñʌch chaʼan jiñi Yumʌntel. Tsiʼ cʌntesayob ti mel oración jiñi xcʌntʼañob i chaʼan: «C Tat lojon añet bʌ ti panchan, laʼ chʼujutesʌntic a cʼabaʼ. Laʼ tilic a yumʌntel. Laʼ mejlic chuqui a wom ti pañimil cheʼ bajcheʼ ti panchan» (Mateo 6:9, 10). Wen la comix miʼ tsʼʌctiyel ili oración yicʼot chaʼan miʼ chʼʌm tilel cabʌl bendición tiʼ pejtelel quixtañujob jiñi Yumʌntel.

17. ¿Chucoch mach lajalic bajcheʼ miʼ chaʼlen yumʌntel Jesús cheʼ bajcheʼ miʼ chaʼlen wiñicob?

¹⁷ Jesús mach lajalic miʼ chaʼlen yumʌntel bajcheʼ jiñi quixtañujob. Jiñi quixtañujob an i wen techeyob guerra yicʼot an i yʌcʼʌyob ti chʌmel yonlel quixtañu. Pero Jesús miʼ cʼuxbiñonla yicʼot an utsʼatax bʌ i melbal bajcheʼ Jehová, ñumento jiñi cʼuxbiya (Apocalipsis 7:10, 16, 17). Jesús tsiʼ yʌcʼʌ i tʼan: «Laʼ baʼ añon pejteletla woliyet bʌ la ti wocol eʼtel, al bʌ laʼ cuch. Joñon mi cʌqʼueñetla laʼ cʼaj laʼ wo. Yuʼu a bicʼ chaʼan maʼ wochel wʌʼ tij qʼuech. Ñopoyon come utson. Pecʼ mic mel c bʌ. Muqʼuix caj laʼ taj cʼaj o chaʼan laʼ pusicʼal. Come jini j qʼuech mach wocolic ti qʼuechol. Sejb a cuch muʼ bʌ cʌqʼueñet» (Mateo 11:28-30). ¡Jesús mucʼʌch i wen cʼuxbiñonla!

18. a) ¿Chuqui ujtem tilel cʼʌlʌl cheʼ ti 1914? b) ¿Chuqui mi caj laj qʼuel ti yambʌ temaj?

¹⁸ Jiñi Biblia miʼ pʌs chaʼan ti 1914 tsiʼ teche i mel i yeʼtel ti panchan jiñi i Yumʌntel Dios. Cʼʌlʌl ti jiñi bʌ ora tsaʼ caji ti tempʌntel jiñi 144 mil muʼ bʌ i cajelob ti yumʌntel yicʼot Cristo. Woliyix i tempʌntel jaʼel jiñi muʼ bʌ caj i chumtʌlob wʌʼ ti Paraíso cheʼ bʌ miʼ jisʌntel jiñi jontol bʌ pañimil. Ili jiñobʌch jiñi ‹motocñayoʼ bʌ wiñicob xʼixicob› muʼ bʌ i yʌl jiñi Biblia (Apocalipsis 7:9, 13, 14). ¿Jaytiquilob? ¿Chuqui yom Dios tiʼ tojlelob? Mi caj laj qʼuel ti yambʌ temaj.