1, 2. a) ¿Chuqui miʼ cʼojoʼtan jiñi tatʌlob añoʼ bʌ i yalobil xcolelobix bʌ? b) ¿Chuqui wem bʌ miʼ mejlelob i mel jiñi xcolelob?

CHEʼ bʌ jiñi tatʌlob Testigojoʼ bʌ miʼ qʼuelob ti chʼʌmjaʼ i yalobil, miʼ wen tajob i tijicñʌyel. Juntiquil hermana i cʼabaʼ Berenice an chʌntiquil i yalobil tsaʼ bʌ i chʼʌmʌyob jaʼ cheʼ maxto añobic 14 i jabilel. Tsiʼ yʌlʌ chaʼan cheʼ miʼ qʼuel i yalobilob chaʼan miʼ cajel i melbeñob i yeʼtel (troñel) Jehová, wen tijicña miʼ yubin yicʼot i ñoxiʼal. Pero miʼ cʼojoʼtañob jaʼel cheʼ wolix (choncolix) i tajob i colel yicʼot cheʼ mi caj i ñusañob wocol tac. Tajol cheʼʌch maʼ wubin jaʼel mi an wolix (yʌquelix) bʌ i tajob i colel a walobilob.

² Juntiquil sicólogo miʼ yʌl chaʼan wocolʌch miʼ ñusan jiñi tatʌlob yicʼot i yalobilob xcolelobix bʌ majlel. An muʼ bʌ i ñaʼtañob chaʼan jiñi i yalobilob maʼañic miʼ ñaʼtañob chuqui miʼ mel, i chaʼan lajalob to bajcheʼ alʌl. Pero jiñi sicólogo miʼ yʌl chaʼan jiñi wolix bʌ i tajob majlel i colel cabʌl chuqui miʼ ñaʼtañob i mel, añʌch bajcheʼ yubil miʼ yubiñob tiʼ pusicʼal yicʼot miʼ mulañob ajñel yicʼot i yamigojob. Tiʼ sujm, cabʌl chuqui wem bʌ miʼ mejlel i mel jiñi xcolelobix bʌ. Jumpʼejl ejemplo, miʼ mejlelob ti sujtel ti wem bʌ i yamigo Jehová cheʼ bajcheʼ tsiʼ mele Jesús cheʼ chut to (pejcan Lucas 2:52). Cheʼ jaʼel, miʼ mejlel i ñumen cʌñob subtʼan yicʼot miʼ yʌcʼob ti colel tiʼ pusicʼal  chaʼan miʼ ñumen melbeñob i yeʼtel (troñel) Jehová. Miʼ mejlel i ñaʼtañob chaʼan miʼ yʌqʼueñob i cuxtʌlel Dios yicʼot miʼ jacʼbeñob i tʼan mi cheʼʌch yomob. Mi an a walobilob xcolelobix bʌ, ¿bajcheʼ miʼ mejlel a coltañob i melben i yeʼtel Jehová? Tsajcan bajcheʼ tsiʼ mele Jesús. Laʼ laj qʼuel bajcheʼ miʼ mejlel a pʌsben a walobilob chaʼan mucʼʌch a cʼuxbiñob, chaʼan an a pecʼlel yicʼot chaʼan mucʼʌch a chʼʌmbeñob isujm.

3. ¿Bajcheʼ yujil jiñi apóstolob chaʼan i yamigojobʌch Jesús?

³ Ti wajali, juntiquil quixtañu am bʌ i moso maʼañic miʼ suben chuqui miʼ ñaʼtan yicʼot bajcheʼ miʼ yubin i bʌ. Pero Jesús mach cheʼic tsiʼ mele tiʼ tojlel i apóstolob. Tsiʼ subeyob chaʼan i yamigojobʌch, i chaʼan mach i mosojobic (pejcan Juan 15:15). Tsiʼ locʼsʌbe i yorajlel chaʼan miʼ subeñob chuqui miʼ ñaʼtan yicʼot bajcheʼ miʼ yubin i bʌ come tsiʼ wen cʼuxbiyob. Cheʼ jaʼel, cheʼ bʌ jiñi i apóstolob miʼ subeñob chuqui miʼ ñaʼtañob yicʼot bajcheʼ miʼ yubiñob i bʌ, tsiʼ ñʌchʼtʌbeyob ti wen (Marcos 6:30-32). Tiʼ pejtelel ili tsiʼ colta chaʼan miʼ sujtelob ti wem bʌ i yamigojob Jesús i chaʼan chajpʌbilob ti jiñi eʼtel muʼ bʌ caj i melob ti wiʼil.

4. ¿Bajcheʼ miʼ mejlel jiñi tatʌlob i sujtesan i yalobilob tiʼ yamigo? (Qʼuele jiñi foto am bʌ tiʼ tejchibal.)

⁴ Isujm chaʼan jatet an a weʼtel tiʼ tojlel a walobilob. Pero miʼ mejlel a sujtesañob ti a wamigo. ¿Bajcheʼ? Ñaxan, aqʼueñob i yorajlel. Tajol yom maʼ tsʼitaʼ cʌy a weʼtel o yan tac bʌ. Yom maʼ mel oración yicʼot maʼ wen ñaʼtan come wen i cʼʌjñibalʌch. I chaʼpʼejlel, ñaʼtan chuqui tac miʼ mulañob. Jumpʼejl ejemplo, ¿chuqui ti cʼay, película o alas miʼ mulañob? Chaʼlen wersa chaʼan mi a mel a wicʼotob muʼ bʌ i mulañob. Juntiquil hermana i cʼabaʼ Ilaria, chʼoyol bʌ ti Italia, miʼ yʌl chaʼan i tat i ñaʼ tsiʼ chʼʌmʌyob ti ñuc chuqui ti música miʼ mulan. Cheʼ bajcheʼ jiñi, tsaʼ caji i qʼuel bajcheʼ i yamigo jiñi i tat. Jiñʌch tsiʼ colta chaʼan maʼañic miʼ bʌcʼñan i suben chuqui jach yom. Jin chaʼan, mach a ñaʼtan chaʼan maʼañix mi caj i qʼueletob ti ñuc jiñi a walobilob mi tsaʼ sujtesayob ti a wamigo o tiʼ yamigo Jehová (Salmo 25:14). Jiñi a walobilob mi caj i qʼuelob chaʼan mucʼʌch a cʼuxbiñob yicʼot maʼ qʼuelob ti ñuc. I jiñʌch mi caj i coltañob chaʼan maʼañic miʼ bʌcʼñan i pejcañetob.

5. ¿Chuqui yom miʼ mel jiñi xcʌntʼañob i chaʼan Jesús chaʼan miʼ tajob i tijicñʌyel?

⁵ Jesús yujil chaʼan mi caj i tajob i tijicñʌyel jiñi xcʌntʼañob i chaʼan cheʼ miʼ melbeñob i yeʼtel Jehová yicʼot miʼ chʌn chaʼleñob subtʼan. Jin chaʼan, tsiʼ subeyob i yʌcʼ i ñaʼtʌbal ti subtʼan yicʼot chaʼan mi caj i coltañob ti jiñi eʼtel (Mateo 28:19, 20).

6, 7. Cheʼ bʌ jiñi tatʌlob miʼ ñʌntesañob i yalobil tiʼ melol i chaʼan bʌ Jehová, ¿chucoch jiñʌch junchajp bajcheʼ miʼ pʌsob i cʼuxbiya?

⁶ Jatet a wom chaʼan a walobilob miʼ sujtelob ti wem bʌ i yamigo Jehová. Jehová tsiʼ yʌqʼueyet ti a wenta chaʼan maʼ cʌntesañob yicʼot maʼ tojʼesañob (Efesios 6:4). Jin chaʼan, ti bele ora yom maʼ cʌntesañob chaʼan bʌ jiñi Biblia. Ñaʼtancu, ¿chucoch maʼ chocob majlel ti escuela? Come a wujil chaʼan i cʼʌjñibalʌch muʼ bʌ i cʌñob yaʼi. Ñumento yom maʼ qʼuel chaʼan maʼañic miʼ cʌyob i bʌ ti tempa bʌ, ti jiñi colem tempa bʌ tac yicʼot ti Chʼujutesaya ti Familia. Cʼajtesan chaʼan jiñi muʼ bʌ i cʌñob chaʼan Jehová miʼ mejlel i coltʌbeñob i cuxtʌlel. Jin chaʼan, coltañob chaʼan miʼ yubiñob i tijicñʌyel cheʼ miʼ cʌñob chaʼan Jehová i cheʼ miʼ ñaʼtañob chaʼan jiñʌch majqui miʼ mejlel i cʌntesañob i mel chuqui wem bʌ (Proverbios 24:14). Yicʼot maʼ cʌntesañob i qʼuel chaʼan ñuc i cʼʌjñibal jiñi subtʼan. Tsajcan bajcheʼ tsiʼ mele Jesús yicʼot coltañob i yubin i tijicñʌyel cheʼ miʼ suben wiñicob xʼixicob (quixtañujob) chaʼan jiñi Biblia.

⁷ Junchajp bajcheʼ miʼ mejlelob ti cʌntesʌntel jiñʌch cheʼ miʼ ñʌntesʌntelob tiʼ tsajintel jiñi Biblia,  miʼ majlelob ti tempa bʌ yicʼot ti subtʼan. ¿Chucoch weñʌch cheʼ miʼ mejlel bajcheʼ jiñi? Juntiquil hermana ti Sudáfrica miʼ yʌl chaʼan maʼañic miʼ mulan yicʼotob i yeran cheʼ miʼ tsajiñob jiñi Biblia, majlel ti tempa bʌ yicʼot ti subtʼan. An i tajol yʌlol jach chuqui miʼ melob chaʼan maʼañic miʼ mejlel jiñi Chʼujutesaya ti Familia. Pero i tat i ñaʼ maʼañic tsiʼ cʌyʌyob i chaʼlen wersa. Ili hermana miʼ yʌl chaʼan wen tijicña miʼ yubin yicʼotob i tat i ñaʼ, come jiñʌch tsiʼ cʌntesayob chaʼan ñucʌch i cʼʌjñibal tiʼ pejtelel i chaʼan bʌ Jehová. Cheʼ bʌ maʼañic miʼ mejlel ti majlel ti tempa bʌ yicʼot subtʼan ili ora, ti orajach miʼ chaʼlen wersa chaʼan miʼ mel bajcheʼ ñʌmʌl tiʼ chaʼan Jehová.

8. a) ¿Bajcheʼ tsiʼ pʌsʌ i pecʼlel Jesús? b) ¿Bajcheʼ tsiʼ colta jiñi xcʌntʼañob i pecʼlel Jesús?

⁸ Anquese Jesús mach xmulilic, tsiʼ pʌsʌ i pecʼlel yicʼot tsiʼ sube chaʼan i cʼʌjñibal i chaʼañob i coltaya Jehová jiñi xcʌntʼañob i chaʼan (pejcan Juan 5:19). Ili mach yomic i yʌl chaʼan maʼañix tsaʼ caji i qʼuelob ti ñuc Jesús. Tsiʼ ñumen ñopoyob tiʼ tojlel cheʼ bʌ tsiʼ ñumen qʼueleyob i cʼajtiben i coltaya Jehová. Ti wiʼil tsiʼ tsajcayob bajcheʼ tsiʼ mele Jesús yicʼot tsiʼ pʌsʌyob i pecʼlel (Hechos 3:12, 13, 16).

9. ¿Chucoch yomʌch maʼ pʌs a pecʼlel yicʼot a sajtemal?

⁹ Ti isujm, tajol an mach bʌ weñic mi caj a mel, come mach lajaletic bajcheʼ Jesús. Jin chaʼan, pʌsʌ a pecʼlel yicʼot cʌñʌ cheʼ bʌ maʼ taj a sajtemal (1 Juan 1:8). Jiñi wem bʌ a melbal mi caj i coltan a walobilob chaʼan miʼ qʼueletob ti ñuc yicʼot miʼ cʌñob i sajtemal. Ñaʼtancu awilan, ¿majqui maʼ ñumen qʼuel ti ñuc? ¿Jimba muʼ bʌ i cʌn chaʼan tsiʼ taja i sajtemal, o jiñi maʼañic bʌ baqui ora miʼ cʌn yicʼot maʼañic miʼ cʼajtin i ñusʌbentel? Juntiquil hermana i cʼabaʼ Rosemary miʼ yʌl chaʼan tiʼ pejtelel ora tsiʼ chaʼleyob wersa chaʼan miʼ cʌñob i sajtemal yicʼot i ñoxiʼal tiʼ tojlel jiñi uxtiquil i yalobilob. Miʼ yʌl chaʼan jiñʌch tsiʼ colta i yalobilob chaʼan maʼañic miʼ bʌcʼñañob i yʌl i wocol. Rosemary yicʼot i ñoxiʼal tsiʼ chʌn cʌntesayob chaʼan yom miʼ pejcañob Jehová ti oración yicʼot miʼ sʌclañob i coltʌntel ti jun tac loqʼuem bʌ ti Biblia cheʼ añob i wocol.

10. ¿Bajcheʼ tsiʼ pʌsʌ chaʼan añʌch i pecʼlel Jesús cheʼ bʌ an i tajol tsiʼ subeyob chuqui yom miʼ mel jiñi xcʌntʼañob i chaʼan?

¹⁰ Jesús an tiʼ wenta miʼ suben xcʌntʼañob i chaʼan chuqui yom miʼ melob. Pero ti bele ora tiʼ tsictesʌbeyob chucoch yom miʼ melob come añʌch i pecʼlel. Jumpʼejl ejemplo, tsiʼ subeyob: «Ñaxan sajcanla i yumʌntel Dios yicʼot i tojel». Pero tiʼ tsictesʌbeyob i wenlel cheʼ mucʼʌch i melob cheʼ bʌ tsiʼ subeyob: «Cheʼ jini mi caj laʼ wʌqʼuentel pejtelel chuqui tac anto yom laʼ chaʼan». Ti yambʌ qʼuin tsiʼ subeyob: «Mach mi laʼ wʌl [...] mi an i mul laʼ piʼʌlob». Pero tiʼ tsictesʌbeyob jaʼel chucoch: «Cheʼ jini,  maʼanic mi caj i yʌlob [...] mi an laʼ mul. Come cheʼ mi laʼ wʌl [...] mi an i mul laʼ piʼʌlob, mi caj i yʌlob [...] mi an laʼ mul [jaʼel]» (Mateo 6:31–7:2).

11. ¿Chucoch yomʌch maʼ tsictesʌben a walobilob cheʼ bʌ an chuqui maʼ ñaʼtan a mel?

¹¹ Cheʼ bʌ an chuqui maʼ ñaʼtan a mel a wicʼot a walobilob, sʌclan wem bʌ i yorajlel chaʼan maʼ tsictesʌbeñob chucoch cheʼ tsaʼ ñaʼta bajcheʼ jiñi. Tajol cheʼʌch mi caj i ñumen jacʼob a tʼan. Juntiquil hermano am bʌ chʌntiquil i yalobil miʼ yʌl chaʼan jiñi xcolelob mach wocolic miʼ yubiñob chaʼan miʼ chaʼleñob tʼan yicʼot i tat i ñaʼ cheʼ mucʼʌch i tsictesʌbentelob chucoch an chuqui tac miʼ ñaʼtan i melob. Ili miʼ coltan i chʼʌmbeñob isujm chucoch an chuqui tac miʼ ñaʼtañob i mel jiñi i tat i ñaʼ. Cʼajtesan chaʼan mach chʌn alʌlobix jiñi a walobilob. Wolix i cajel i chʼʌmbeñob isujm yicʼot i bajñel ñaʼtañob chuqui yom miʼ melob. Ili hermano tsaʼ bʌ ajli, miʼ yʌl chaʼan jiñi xcolelob yom miʼ cʌñob jaʼel chaʼan mach cojach yom miʼ yʌcʼob ti ñuc muʼ bʌ i yubiñob tiʼ pusicʼal cheʼ an chuqui yomob i mel (Salmo 119:34). Jin chaʼan pʌsʌ a pecʼlel yicʼot chaʼlen tʼan tiʼ sujmlel. Cheʼʌch mi caj i lajiñetob jaʼel. Yicʼot mi caj i ñaʼtañob chaʼan mucʼʌch a qʼuelob ti ñuc yicʼot chaʼan colemobix maʼ qʼuelob.

12. ¿Bajcheʼ tsiʼ colta Jesús jiñi Pedro?

¹² Jesús yujil tiʼ pejtelel ora bajcheʼ yom miʼ coltan xcʌntʼañob i chaʼan. Cheʼ bʌ tiʼ tsictesa chaʼan mi caj i tsʌnsʌntel, Pedro tsiʼ sube chaʼan maʼañic miʼ cʌlʌx acʼ ti ñuc jiñi. Jesús yujil chaʼan Pedro mucʼʌch i cʼuxbin. Pero yujil jaʼel chaʼan mach utsʼatic bajcheʼ tsiʼ ñaʼta. ¿Bajcheʼ tsiʼ colta Jesús jiñi Pedro yicʼot yambʌ xcʌntʼañob i chaʼan? Ñaxan tsiʼ tojʼesa Pedro. Ti wiʼil, tiʼ tsictesa chuqui mi caj i chaʼlen jiñi maʼañic bʌ miʼ jacʼbeñob i tʼan Jehová cheʼ bʌ an wocol. Tsiʼ yʌlʌ jaʼel chaʼan muʼ bʌ i yʌcʼob i bʌ tiʼ melol chuqui yom Jehová mi caj i tajob i majtan (Mateo 16:21-27). Pedro tsaʼʌch i cʌñʌ (1 Pedro 2:20, 21).

13, 14. a) ¿Bajcheʼ miʼ mejlel a ñaʼtan mi juntiquil a walobil yom coltʌntel chaʼan miʼ ñumen pʼʌtʼan i ñopoñel ti Dios? b) ¿Chuqui yom maʼ mel mi a wom a ñaʼtan bajcheʼ maʼ coltan a walobil?

¹³ Cʼajtiben Jehová chaʼan miʼ coltañet a chʼʌmben isujm chuqui miʼ ñaʼtan a walobilob yicʼot bajcheʼ yom maʼ coltañob (Salmo 32:8). Tajol maʼ qʼuel chʼijiyem juntiquil o mach weñic miʼ chaʼlen tʼan tiʼ tojlel hermanojob. O tajol maʼ qʼuel chaʼan an chuqui maʼañic woliʼ subeñet a walobil. Mach ti orajic yom maʼ ñaʼtan chaʼan woliʼ mucul mel mach bʌ weñic. * Pero mach yomic i yʌl chaʼan maʼañic chuqui mi caj a mel o chaʼan mi caj i bajñel tojʼan jiñi wocol. Tajol a walobil yom miʼ coltʌntel chaʼan miʼ ñumen pʼʌtʼan i ñopoñel (chʼujbiya) ti Dios.

¹⁴ Chaʼan maʼ ñaʼtan bajcheʼ yom maʼ coltan a walobilob, melbeñob cʼajtiya, pero yom tsajilet yicʼot ti wen jach maʼ melbeñob. Iliyi miʼ mejlel ti lajintel cheʼ bʌ mi lac luch jaʼ ti jumpʼejl pozo. Mi mach tsajalic maʼ mel, jiñi jaʼ mi caj i luʼ bejqʼuel. Jin chaʼan, yom tsajilet yicʼot wen jach bajcheʼ yom maʼ melbeñob cʼajtiya tac. Mi mach cheʼic maʼ mel, maʼañix mi caj i subeñetob bajcheʼ yubil miʼ yubiñob (pejcan Proverbios 20:5 *). Yaʼ ti párrafo 4 tsaʼ lac taja ti tʼan juntiquil hermana i cʼabaʼ Ilaria. Miʼ yʌl chaʼan cheʼ bʌ xcolel to, tsiʼ mulaj i ñusan cabʌl ora yicʼot i piʼʌlob ti clase. Pero yujil chaʼan mach weñic bajcheʼ jiñi, jin chaʼan miʼ yʌqʼuen i chʼijiyemlel. Jiñi i tatob tsiʼ qʼueleyob chaʼan an chuqui woliʼ cʼojoʼtan. Ti jumpʼejl bʌ ochʼajel qʼuin tsiʼ qʼueleyob chaʼan chʼijiyem i tsiʼ cʼajtibeyob mi an chuqui miʼ chaʼlen. Ilaria tsaʼ caji ti uqʼuel, tsiʼ yʌlʌ chuqui miʼ chaʼlen yicʼot tsiʼ cʼajti i coltʌntel. Jiñi i tat i ñaʼ tsiʼ meqʼueyob i tsiʼ subeyob chaʼan yujil bajcheʼ yubil miʼ  yubin yicʼot chaʼan mi caj i coltañob. Mach jalic tsaʼ caji i coltañob chaʼan mi taj wem bʌ i yamigojob yaʼ ti congregación.

15. ¿Bajcheʼ tsiʼ pʌsʌ Jesús chaʼan tsaʼʌch i chʼʌmbe isujm jiñi yañoʼ bʌ?

¹⁵ Jesús tsiʼ pʌsʌ chaʼan tsaʼʌch i chʼʌmbe isujm jiñi xcʌntʼañob i chaʼan cheʼ bʌ tsiʼ qʼuele wem bʌ i melbalob. Jumpʼejl ejemplo, cheʼ bʌ Natanael tsiʼ yubi chaʼan Jesús chʼoyol ti Nazaret, tsiʼ yʌlʌ: «¿Am ba chuqui wen chʼoyol bʌ ti Nazaret?» (Juan 1:46). Cheʼ yaʼic añet ti jiñi bʌ ora, ¿tsaʼ ba cʼoti a ñaʼtan chaʼan Natanael juntiquil wiñic mach bʌ weñic bajcheʼ tsiʼ chaʼle pensar yicʼot maʼañic bʌ i ñopoñel ti Dios? Jesús mach cheʼic tsiʼ ñaʼta. Tsiʼ chʼʌmbe isujm chuqui miʼ ñaʼtan Natanael yicʼot chaʼan mucʼʌch i yʌl i sujmlel. Jin chaʼan tsiʼ yʌlʌ: «Isujm jiñʌch juntiquil israel mach bʌ yujilic lot» (Juan 1:47). Jesús miʼ mejlel i cʌn chuqui miʼ ñaʼtan jiñi quixtañujob, i tsiquil chaʼan jiñʌch miʼ qʼuel chuqui wem bʌ tiʼ tojlelob.

16. ¿Bajcheʼ miʼ mejlel a coltan a walobilob chaʼan miʼ ñumen tojʼañob?

¹⁶ Ti isujm, mach mejlic a ñaʼtan chuqui miʼ ñaʼtan a walobilob, pero miʼ mejlel a chaʼlen wersa a chʼʌmbeñob isujm. Jehová mi caj i coltañet chaʼan maʼ qʼuelbeñob wem bʌ i melbal. Cheʼ bʌ miʼ melob mach bʌ weñic, mach a wʌl chaʼan jontolob o maʼañix i tsʼʌcalob. Mi yomic maʼ ñaʼtan bajcheʼ jiñi. Subeñob chaʼan maʼ qʼuel chuqui wem bʌ tiʼ tojlelob yicʼot a wujil chaʼan yomʌch i melob chuqui wem bʌ. Qʼuele bajcheʼ miʼ chaʼleñob wersa yicʼot chaʼan tijicña maʼ wubin. Cheʼ bʌ miʼ mejlel, aqʼueñob chuqui yom melol chaʼan miʼ bej tojʼañob majlel. Jesús cheʼʌch tsiʼ mele tiʼ tojlel xcʌntʼañob i chaʼan. Cheʼ bʌ añix jumpʼejl jab yicʼot xiñil tsiʼ cʌñʌ Natanael (cʌmbil bʌ bajcheʼ Bartolomé), Jesús tsiʼ waʼchoco bajcheʼ apóstol. Natanael wen tsiʼ mele i yeʼtel tsaʼ bʌ aqʼuenti (Lucas 6:13, 14; Hechos 1:13, 14). Jin chaʼan, tsajcan bajcheʼ tsiʼ mele Jesús. Mach a wʌqʼuen i ñaʼtan a walobil chaʼan maʼañic chuqui wem bʌ miʼ mel. Miʼ mejlel a suben tʼan muʼ bʌ i yʌqʼuen i tijicñʌyel. Cheʼ bʌ maʼ qʼuel miʼ chaʼleñob wersa, suben chaʼan tijicña maʼ wubin yicʼot Jehová, i chaʼan miʼ mejlel i cʼʌn i melbeñob i yeʼtel Jehová chuqui yujiloʼ bʌ melol.

17, 18. ¿Chuqui miʼ caj ti ujtel mi wen maʼ cʌntesan a walobilob?

¹⁷ Jiñi apóstol Pablo tsiʼ colta cabʌl xñoptʼañob chaʼan miʼ cʌñob Jehová. Pablo tsiʼ wen cʼuxbiyob yicʼot tsiʼ yʌcʼʌyob ti ñuc, lajal bajcheʼ miʼ mel juntiquil tatʌl. Mach yomic chaʼan juntiquil miʼ cʌy i melben i yeʼtel Jehová (1 Corintios 4:15; 2 Corintios 2:4). Cheʼ bajcheʼ Pablo, tajol maʼ wen cʼojoʼtan a walobilob. Pero ñaʼtan tsaʼ bʌ i yʌlʌ Victor, juntiquil Testigo. Cheʼ bʌ tsiʼ cosa uxtiquil i yalobil, tsaʼ cʼoti i cʌn chaʼan wocolʌch cheʼ xcolelob to, pero ñumen am bʌ jiñʌch tijicñʌyel, mach chʼijiyemlelic. Tiʼ coltaya Jehová, Victor yicʼot i yijñam tsaʼ mejli i sujtesañob i yalobilob tiʼ yamigojob.

¹⁸ Tatʌlob, cujil lojon chaʼan laʼ walobilob mi laʼ wen cʼuxbin yicʼot muqʼuetla ti wersa la cʌntesan. Mach laʼ cʌy la bʌ. Ñaʼtanla bajcheʼ yubil mi caj laʼ wubin cheʼ mi laʼ qʼuel miʼ yʌcʼob i bʌ tiʼ melol i yeʼtel Jehová tiʼ pejtelel ora (3 Juan 4).