Cheʼ bʌ Dios tsiʼ chaʼle guerra yicʼot egipciojob miʼ pʌs chaʼan maʼañic miʼ tsʼaʼlen tiʼ pejtelel jiñi guerra. An i tajol tsiʼ yʌcʼʌ jaʼel chaʼan jiñi israelob miʼ contrajiñob yambʌ tejclum. Jumpʼejl ejemplo, tsiʼ subeyob majlel i contrajin cananeojob, wen jontol bʌ wiñicob xʼixicob (quixtañujob) (Deuteronomio 9:5; 20:17, 18). Jiñi rey David tsaʼ subenti i contrajin jiñi jontol bʌ filisteojob yicʼot tsaʼ subenti bajcheʼ yom miʼ mel chaʼan miʼ mʌl (jot) jiñi guerra (2 Samuel 5:17-25).

Jiñi relato tac am bʌ ti Biblia miʼ pʌs chaʼan Dios weñʌch tsiʼ qʼuele jiñi guerra chaʼan miʼ coltan jiñi israelob cheʼ bʌ miʼ ticʼlʌntelob yicʼot chaʼan maʼañic miʼ sajtel jiñi isujm bʌ chʼujutesaya. Pero an uxchajp yom bʌ mi lac chʼʌm ti ñuc chaʼan jiñi guerra tac baqui Dios mucʼʌch i yʌcʼ i tʼan chaʼan miʼ mejlel. ¿Baqui bʌ?

1. COJACH DIOS MIʼ YΛL MAJQUI MIʼ MAJLELOB TI GUERRA. Ti jumpʼejl bʌ qʼuin, Dios tsiʼ sube jiñi israelob: «Maʼanic mi caj laʼ chaʼlen leto [o guerra]». Come Diosʌch muʼ bʌ i cajel ti guerra tiʼ tojlelob (2 Crónicas 20:17; 32:7, 8). Mach junsujtelic tsiʼ mele bajcheʼ jiñi, cheʼʌch tsiʼ mele tiʼ contra egipciojob. Pero ti yan tac bʌ ora, Dios tsiʼ sube majlel ti guerra i tejclum chaʼan miʼ chʼʌmob jiñi Lum tsaʼ bʌ wʌn Subentiyob yicʼot chaʼan miʼ cʌntañob (Deuteronomio 7:1, 2; Josué 10:40).

2. COJACH DIOS MIʼ YΛL BAQUI ORA MIʼ TECHOB GUERRA. Jiñi i wiñicob Dios yom yujilob pijt jinto cheʼ bʌ miʼ yʌcʼ i tʼan chaʼan muqʼuix i majlelob ti guerra tiʼ tojlel jiñi jontol tac bʌ tejclum. Maʼañic miʼ mejlelob ti majlel mi maʼañic chuqui miʼ subentelob. Mi maʼañic miʼ jacʼob, Dios maʼañic miʼ coltañob. Yaʼ ti Biblia miʼ yʌl chaʼan miʼ wen tajob wocol cheʼ bʌ tiʼ bajñelil miʼ ñaʼtañob majlel ti guerra. *

3. DIOS MAʼAÑIC MIʼ MULAN MIʼ CHΛMEL MI JUNTIQUILIC. Jehová jiñʌch muʼ bʌ i yʌqʼueñonla laj cuxtʌlel yicʼot tsaʼ bʌ i Meleyonla (Salmo 36:9). Miʼ cʼuxbiñonla yicʼot mach yomic miʼ sajtel jiñi quixtañujob. Pero chʼijiyem jax cheʼ an muʼ bʌ i chajpañob bajcheʼ miʼ ticʼlan yañoʼ bʌ o chaʼan miʼ tsʌnsañob (Salmo 37:12, 14). An i tajol, Dios an i yʌcʼʌ ti ujtel guerra tac chaʼan miʼ jilel jiñi jontolil. Pero cheʼ bʌ tsiʼ subeyob guerra jiñi israelob tiʼ tojlel i contrajob, tsaʼʌch i pʌsʌ i yutslel yicʼot chaʼan yujilʌch pijt (Salmo 86:15). Junchajp bajcheʼ tsiʼ pʌsʌ jiñʌch cheʼ tsiʼ sube jiñi israelob chaʼan ñaxan yom miʼ «subeñob bajcheʼ yom miʼ melob» chaʼan miʼ qʼuextañob i melbal jumpʼejl tejclum muʼ bʌ caj i techbeñob guerra, i cheʼ jiñi maʼañic miʼ chʌn chaʼleñob guerra (Deuteronomio 20:10-13). Muʼ bʌ i pʌs chaʼan cheʼʌchi jiñʌch ili tʼan tsaʼ bʌ i yʌlʌ: «Mach comic miʼ chʌmel winic yicʼot i mul. Com miʼ laj cʌyob i mul chaʼan cuxul miʼ yajñelob» (Ezequiel 33:11, 14-16). *

Tsaʼ bʌ ujti laj qʼuel, mi laj cʌn chaʼan Dios tsiʼ yʌcʼʌ ti ujtel guerra tac ti wajali chaʼan miʼ jisan jiñi wocol yicʼot ticʼlʌntel. Pero jiñʌch Jehová Dios tsaʼ bʌ i yʌcʼʌ i tʼan baqui ora yom miʼ mejlel jiñi guerra yicʼot majqui mi caj i mel, mach jiñic jiñi wiñicob. Cheʼ jeʼel, mach yicʼotic cʌlʌx jontolil yicʼot becʼ chʼichʼ tsiʼ mele come miʼ tsʼaʼlen jiñi (Salmo 11:5). Pero ¿tsaʼ ba i qʼuexta i pensar cheʼ bʌ tsiʼ teche subtʼan i Yalobil, Jesucristo, ti ñaxam bʌ siglo?