Mach a ñaʼtan chaʼan Dios maʼañic miʼ qʼuel jiñi ilaya wocol am bʌ ili ora yicʼot chaʼan maʼañic chuqui mi caj i mel (Salmo 72:13, 14). Dios miʼ yʌcʼ i tʼan yaʼ ti Biblia chaʼan mi caj i jisʌben i wocol ‹woli bʌ i yubiñob wocol›. ¿Jala? «Cheʼ baʼ ora miʼ tsictiyel lac Yum Jesús ti panchan yicʼot jiñi ángelob tiʼ pʼʌtʌlel, [...] chaʼañ miʼ qʼuextʌbeñob i jontolil jiñi mach bʌ añic miʼ cʌñob Dios yicʼot jiñi mach bʌ añic miʼ jacʼbeñob i wen tʼañ lac Yum Jesucristo.» (2 Tesalonicenses 1:7, 8, Jiñi tsijiʼ bʌ wen tʼañ chaʼañ estudio.) Ili tsaʼ bʌ i yʌlʌ Jesús mi caj i yujtel ti talto bʌ qʼuin, yaʼ «ti guerra muʼ bʌ caj i yujtel ti jini ñuc bʌ qʼuin, i qʼuiñilel Dios Mach bʌ Anic i Pʼisol i Pʼʌtʌlel», cʌmbil bʌ bajcheʼ Armagedón (Apocalipsis [Revelación] 16:14, 16).

Cheʼ bʌ miʼ cʼotel jiñi qʼuin, Dios mi caj i choc majlel i Yalobil Jesucristo yicʼot ángelob chaʼan miʼ contrajiñob jiñi jontoloʼ bʌ. Jiñobʌch muʼ bʌ caj i lajmesan wocol (Isaías 11:4; Apocalipsis 19:11-16).

Miʼ mejlel laj qʼuel chaʼan Dios maʼañic qʼuextʌbil i pensar chaʼan jiñi guerra tac. Miʼ yʌcʼ ti ujtel chaʼan miʼ jisʌntel jiñi wocol yicʼot jontolil. I cheʼ bajcheʼ ti wajali, cojach Dios miʼ yʌl baqui ora yicʼot majqui miʼ mejlel i tech jumpʼejl guerra. Tsaʼix laj qʼuele chaʼan ti talto bʌ qʼuin Dios mucʼʌch caj i jisan jiñi jontolil, i jiñʌch i Yalobil  muʼ bʌ caj i majlel ti ñaxan ti jiñi guerra. Ili yom i yʌl chaʼan Dios mach utsʼatic miʼ qʼuel mi jumpʼejlic guerra woli bʌ ti ujtel ili ora.

Laʼ laj cʌl jumpʼejl ejemplo: Ñaʼtancu chaʼan chaʼtiquil i yerañoʼ bʌ i bʌ miʼ techob jatsʼ cheʼ bʌ maʼañic yaʼañob i tat ti otot. Miʼ jumucʼ cʌyob jatsʼ, cheʼ jiñi miʼ pejcañob ti teléfono i tat. Juntiquil miʼ yʌl chaʼan tsaʼ bʌ i teche jatsʼ jiñʌch yambʌ i yeran, i jiñi yambʌ miʼ yʌl chaʼan jiñʌch tsiʼ teche i yeran. Tiʼ chaʼticlel yomob chaʼan miʼ ñopbentelob i tʼan. Pero cheʼ jiñi, jiñi tatʌl miʼ yʌl chaʼan miʼ cʌyob jatsʼ yicʼot miʼ pijtañob miʼ cʼotel. Jiñi chʼitoñob miʼ jumucʼ jacʼob, pero ti wiʼil miʼ chaʼ techob jatsʼ. Cheʼ bʌ miʼ cʼotel jiñi tatʌl mach utsʼatic miʼ qʼuel, i tiʼ chaʼticlel miʼ jajtsʼelob tiʼ caj ñusatʼan.

Ili ora, jiñi país tac am bʌ ti guerra miʼ cʼajtibeñob i coltaya Dios. Pero Dios maʼañic miʼ yotsan i bʌ ti jumpʼejlic guerra. Jiñi Biblia miʼ yʌl: «Mach mi laʼ qʼuextan jontolil», yicʼot: «Mach mi laʼ bajñel qʼuextʌben jontol bʌ i melbal laʼ piʼʌlob» (Romanos 12:17, 19). Tsaʼix i yʌqʼue i ñaʼtan jiñi quixtañujob chaʼan yom miʼ pijtan chaʼan miʼ coltʌntelob, ili jiñʌch ti Armagedón (Salmo 37:7). Dios maʼañic miʼ mulan cheʼ miʼ contrajiñob i bʌ jiñi país tac, mach yujilobic bʌqʼuen miʼ pʌsob yilal bajcheʼ jiñi. Jin chaʼan, miʼ caj i pʌs i michʼajel yaʼ ti Armagedón yicʼot mi caj i jisan jiñi guerra tac tiʼ pejtelel pañimil (mulawil) (Salmo 46:9; Isaías 34:2). Jiñi Armagedón mi caj i jisan tiʼ pejtelel guerra tac.

Jumpʼejl bendición muʼ bʌ caj i yʌcʼ i Yumʌntel Dios jiñʌch cheʼ maʼañix miʼ cajel guerra tac. Ti ili oración Jesús tsiʼ yʌlʌ chaʼan jiñi yumʌntel: «Laʼ tilic a yumʌntel. Laʼ mejlic chuqui a wom ti pañimil cheʼ bajcheʼ ti panchan» (Mateo 6:10). Mach cojach mi caj i jisan guerra tac, mi caj i jisan jaʼel jiñi jontolil muʼ bʌ i yʌcʼ ti ujtel jiñi (Salmo 37:9, 10, 14, 15). * Jin chaʼan, jiñi xñoptʼañonbʌla wen comix laj qʼuel jiñi bendición muʼ bʌ caj i chʼʌm tilel jiñi i Yumʌntel Dios (2 Pedro 3:13).

¿Muʼto ba caj i wen jalijel chaʼan i Yumʌntel Dios miʼ jisan tiʼ pejtelel ilaya wocol, ticʼlʌntel yicʼot jontolil? Jiñi muʼ bʌ i yʌjlel yaʼ tiʼ Biblia wolix bʌ laj qʼuel ti tsʼʌctiyel miʼ pʌs chaʼ añonixla ti jiñi «cojix bʌ qʼuin» (2 Timoteo 3:1-5). * Lʌcʼʌlix chaʼan miʼ tilel Armagedón, i miʼ waʼchocontel jiñi i Yumʌntel Dios wʌʼ ti Pañimil.

Tsaʼix laj qʼuele chaʼan ti ili guerra mi caj i jilelob «jini mach bʌ anic miʼ chʼujbibeñob i wen tʼan lac Yum Jesucristo» (2 Tesalonicenses 1:8). Pero cʼajtesan chaʼan Dios maʼañic miʼ mulan chaʼan miʼ chʌmel mi juntiquilic, mi jiñic jiñi jontoloʼ bʌ (Ezequiel 33:11). Yom chaʼan cheʼ maxto tilemic i jilibal miʼ sujbel jiñi wen tʼan «tiʼ pejtelel pañimil chaʼan miʼ yubintel tiʼ pejtelel pañimil» come «mach yomic miʼ sajtel mi juntiquilic» ti ili cojix bʌ guerra (2 Pedro 3:8, 9; Mateo 24:14; 1 Timoteo 2:3, 4). Jiñi quixtañujob mucʼʌch i mejlel i cʌñob Dios, miʼ jacʼob jiñi wen tʼan i chaʼan Jesús yicʼot miʼ chumtʌlob ti jumpʼejl pañimil baqui maʼañix guerra, come jiñi i testigojob Jehová woliyob (choncolob) ti subtʼan tiʼ pejtelel pañimil.