¿Chucoch maʼañic tsiʼ colta Dios jiñi judíojob bajcheʼ ti wajali? ¿O chucoch maʼañic tsiʼ yʌcʼʌyob ti guerra chaʼan miʼ coltañob i bʌ? ¿Tsaʼix ba i qʼuexta bajcheʼ miʼ ñaʼtan chaʼan jiñi guerra tac? Maʼañic. Jiñi judíojob tsiʼ ñajtʼesayob i bʌ ti Dios come maʼañic tsiʼ ñopoyob Jesucristo bajcheʼ Mesías (Hechos 2:36). Jin chaʼan, Dios tsiʼ cʌyʌyob i maʼañix tsiʼ chʌn qʼueleyob bajcheʼ i tejclum (Mateo 23:37, 38).

Dios maʼañix tsaʼ chʌn caji i cʌntan jiñi judíojob yicʼot jiñi Lum wʌn albil bʌ. Jin chaʼan, jiñi judíojob maʼañic tsaʼ chʌn mejli i yʌlob chaʼan yicʼotob Dios cheʼ miʼ majlelob ti guerra. Jiñi tejclum Israel mach utsʼatic tsaʼ chʌn qʼuejliyob ti Dios, cheʼ bajcheʼ tsiʼ wʌn alʌ Jesús, jin chaʼan maʼañic tsiʼ chʌn coltʌntiyob. Wʌle, Dios tsiʼ yajca yambʌ tsijiʼ bʌ tejclum, jumpʼejl tejclum chʼujul bʌ, jiñi Israel i chaʼan bʌ Dios (Mateo 21:43). Iliyi jiñʌch junmojt xñoptʼañob yajcʌbiloʼ bʌ tiʼ tojlel Dios. Jin chaʼan, cheʼ ti ñaxam bʌ siglo tsaʼ subentiyob: «Wʌle i chaʼañetla [Dios]» (1 Pedro 2:9, 10).

Mi jiñi i tejclum Dios jiñobix jiñi xñoptʼañob, ¿tsaʼ ba i coltayob loqʼuel ti ticʼlʌntel yaʼ ti Roma yicʼot tsiʼ chaʼle guerra tiʼ tojlelob? ¿Tsaʼ ba i yʌcʼʌ chaʼan miʼ coltañob i bʌ? Maʼañic. ¿Chucoch? Cheʼ bajcheʼ tsaʼix laj qʼuele ti yambʌ temaj, cojach Dios miʼ yʌcʼ i tʼan baqui ora yom miʼ mejlel jiñi guerra. Dios maʼañic tsiʼ chaʼle guerra chaʼan miʼ coltan jiñi xñoptʼañob ti ñaxam bʌ siglo mi tsaʼic i subeyob chaʼan miʼ chaʼleñob guerra. Maxto i yorajlelic chaʼan miʼ jisan jiñi jontolil yicʼot ticʼlʌntel.

Jiñi xñoptʼañob tsaʼ to i pijtayob chaʼan miʼ coltʌntelob ti Dios, cheʼʌch bajcheʼ tsiʼ mele yambʌ xucʼul bʌ i wiñicob ti wajali. Dios maʼañic tsiʼ yʌcʼʌ i tʼan chaʼan miʼ techob guerra tiʼ bajñelob. Jesucristo wen tsiquil tsiʼ yʌlʌ come maʼañic tsiʼ sube chaʼan miʼ chaʼleñob guerra jiñi xcʌntʼañob i chaʼan. Tsiʼ subeyob: «Cʼuxbin laʼ contrajob. Tajala ti oración jini muʼ bʌ i contrajiñetla» (Mateo 5:44). Cheʼ bʌ tsiʼ yʌlʌ chaʼan jiñi romanojob mi caj i contrajiñob Jerusalén, Jesús tsiʼ subeyob chaʼan yom miʼ putsʼelob, i cheʼʌch tsiʼ meleyob (Lucas 21:20, 21).

Cheʼ jaʼel, jiñi apóstol Pablo tsiʼ yʌlʌ: «Mach mi laʼ bajñel qʼuextʌben jontol bʌ i melbal laʼ piʼʌlob, [...] come tsʼijbubil: ‹Joñon mij qʼuextan jontolil. Joñon mi cʌqʼueñob i tojol i mul›» (Romanos 12:19). Pablo tsiʼ taja ti tʼan jiñi añix bʌ cabʌl siglo albil i chaʼan Dios, cheʼ bajcheʼ tsʼijbubil yaʼ ti Levítico 19:18 yicʼot Deuteronomio 32:35. Tsaʼix laj qʼuele chaʼan Dios tsiʼ colta ti guerra  i tejclum ti wajali. Cheʼ bʌ Pablo tsiʼ yʌlʌ jiñi tʼan, miʼ pʌs chaʼan Dios weñʌch miʼ qʼuel jiñi guerra cʼʌlʌl cheʼ ti ñaxam bʌ siglo chaʼan miʼ coltan i wiñicob ti wocol tac yicʼot ticʼlʌntel. Pero jiñʌch Jehová miʼ yʌl baqui ora miʼ mejlel jumpʼejl guerra yicʼot majqui mi caj i mel, cheʼ bajcheʼ ti wajali.

Wen tsiquilʌch, Dios maʼañic tsiʼ yʌcʼʌ i tʼan chaʼan miʼ majlelob ti guerra jiñi ñaxam bʌ xñoptʼañob. Ili ora jaʼel, ¿am ba junmojt wiñicob xʼixicob (quixtañujob) wʌʼ ti Pañimil yicʼot bʌ i bendición Jehová chaʼan miʼ majlel ti guerra? ¿Tsaʼix ba cʼoti i yorajlel chaʼan miʼ coltan i wiñicob Dios? ¿Bajcheʼ yilal miʼ qʼuel Dios jiñi guerra tac ti ili ora? Ili mi caj i jajqʼuel yaʼ ti yambʌ temaj.