TEMAJ AM BΛ TIʼ TEJCHIBAL
¿Bajcheʼ yilal miʼ qʼuel Dios jiñi guerra tac?
Cabʌl wiñicob xʼixicob (quixtañujob) miʼ ñaʼtan chaʼan utsʼatʌch miʼ qʼuel Dios jiñi guerra tac come ti wajali (oñiyi) tsiʼ sube i wiñicob chaʼan miʼ melob, cheʼʌch bajcheʼ miʼ yʌl yaʼ ti Biblia. Pero an yujiloʼ bʌ chaʼan jiñi i Yalobil Dios, Jesucristo, tsiʼ cʌntesa chaʼan miʼ cʼuxbiñob i contra jiñi xcʌntʼañob i chaʼan (Mateo 5:43, 44). Miʼ ñaʼtañob chaʼan Dios muqʼuix i tsʼaʼlen guerra tac come tajol tsaʼ cʼoti i yorajlel chaʼan miʼ qʼuextan i pensar.
Cheʼ jiñi, ¿utsʼat ba miʼ qʼuel Dios jiñi guerra tac o maʼañic? Mi cheʼʌchi, ¿majqui miʼ coltañob ili ora? Cheʼ bʌ maʼ cʌmben i jacʼbal ili cʼajtiya tac miʼ mejlel ti qʼuextʌyel bajcheʼ maʼ qʼuel jatet jiñi guerra tac. Jumpʼejl ejemplo, cheʼ muqʼuic a wubin chaʼan Dios ochemʌch jaʼel ti jiñi guerra baqui yaʼ ochemet, tajol maʼ ñaʼtan chaʼan weñʌch yicʼot chaʼan mucʼʌch caj laʼ mʌl (jot) jiñi guerra. Pero ¿ixcu mi tsaʼ cʼoti a ñaʼtan chaʼan an ti a contra? ¿Muʼ ba caj a qʼuextan bajcheʼ maʼ ñaʼtan chaʼan jiñi guerra tac?
Pero anto yambʌ. Miʼ mejlel a qʼuextan bajcheʼ maʼ ñaʼtan tiʼ tojlel Dios cheʼ a wujil bajcheʼ miʼ qʼuel jiñi guerra. ¿Bajcheʼ mi lac ñaʼtan? Mi an a wila wocol bajcheʼ yambʌlob tiʼ caj guerra, tajol a wom a ñaʼtan mi woli (choncol) i yotsan i bʌ Dios yaʼi yicʼot mi cheʼʌch yom cheʼ mi la cubin i wocolel. O tajol maʼ cʼajtiben a bʌ mi maʼañic miʼ yʌcʼ ti ñuc jiñi muʼ bʌ i tajtʌlob ti wocol tiʼ caj jiñi.
Toj sajtel a pusicʼal cheʼ mi caj a qʼuel chaʼan jiñi Biblia mach cheʼic miʼ yʌl cheʼ bajcheʼ miʼ ñaʼtʌntel. Miʼ yʌl chaʼan maʼañic qʼuextʌyem bajcheʼ miʼ ñaʼtan Dios chaʼan jiñi guerra. Laʼ lac tsajin yaʼ ti Tsʼijbujel bajcheʼ tsiʼ qʼuele Dios jiñi guerra tac ti wajali yicʼot cheʼ tsajñi Jesucristo wʌʼ ti Pañimil. Iliyi mi caj i coltañonla lac chʼʌmben isujm bajcheʼ miʼ qʼuel Dios jiñi guerra tac ili ora, yicʼot chaʼan mi lac ñaʼtan mi muʼto i chʌn cajel ti talto bʌ qʼuin.
