TEMAJ AM BΛ TIʼ TEJCHIBAL | MIʼ MEJLEL LAC CHʼΛMBEN ISUJM JIÑI BIBLIA
¿I cʼʌjñibal ba mi lac pejcan jiñi Biblia?
«Jiñi Biblia jiñʌch jumpʼejl libro i chaʼan ñopbalʌl wen cʌmbil bʌ. Pero mach yaʼic ochen chaʼan jiñi i cultura china.» (LIN, CHINA)
«¿Bajcheʼ mi caj c chʼʌmben isujm jiñi Chʼujul bʌ Biblia mi maʼañic mic ñaʼtan jiñi chʼujul bʌ tsʼijbujel tic ñopbal hindú?» (AMIT, INDIA)
«Mij qʼuel ti ñuc jiñi Biblia come jiñʌch jumpʼejl libro wajalix bʌ mejli. Pero maʼañic baʼ j qʼuele bajcheʼ yilal.» (YUMIKO, JAPÓN)
Tiʼ petol pañimil (mulawil) an cabʌl muʼ bʌ i wen qʼuelob ti ñuc jiñi Biblia anquese mach i wen cʌñʌyobic o mach yujilobic chuqui miʼ yʌl. Iliyi miʼ wen ujtel tiʼ tojlel cabʌl millón wiñicob xʼixicob (quixtañujob) ti Asia, pero miʼ yujtel jaʼel ti país tac baqui mucʼʌch i wen pujquel jiñi Biblia.
Tajol maʼ ñaʼtan chucoch yom maʼ pejcan jiñi Biblia. Cheʼ maʼ cʌn chuqui miʼ pʌs ili chʼujul bʌ libro miʼ mejlel i coltañet:
-
A taj a tijicñʌyel
-
A tojʼesan wocol tac ti a familia
-
A cʌy a ñaʼtan a cʼojol tac
-
A weñʼesan bajcheʼ añet a wicʼot yambʌlob
-
A cʼʌn ti wen jiñi taqʼuin
Jumpʼejl ejemplo, juntiquil xʼixic i cʼabaʼ Yoshiko chʼoyol bʌ ti Japón tsiʼ mulaj i ñaʼtan chuqui miʼ yʌl jiñi Biblia, jin chaʼan tsaʼ caji i bajñel pejcan. ¿Chuqui tsiʼ cʌñʌ? Yoshiko miʼ yʌl: «Jiñi Biblia an i coltayon c tajben i sujmlel j cuxtʌlel yicʼot an i yʌqʼueyon c pijtaya ti talto bʌ qʼuin. Añix j cʼʌjñibal mi cubin». Juntiquil wiñic i cʼabaʼ Amit, tsaʼ caji i tsajin jiñi Biblia. Tsiʼ yʌlʌ: «Tsaʼ toj sajti c pusicʼal chaʼan jiñi tsaʼ bʌ c pejca. Miʼ coltan tiʼ pejtelel quixtañujob muʼ bʌ i yʌl jiñi Biblia».
Jiñi Biblia an i colta cabʌl wiñicob xʼixicob chaʼan ñumen wen miʼ chumtʌlob. ¿Chucoch maʼañic maʼ ñop a pejcan yicʼot a qʼuel bajcheʼ miʼ mejlel i coltañet?
