Ñaʼtancu chaʼan maʼ julaʼtan jumpʼejl país mach bʌ a cʌñʌyic. Maʼ taj a qʼuel chaʼan jiñi wiñicob xʼixicob (quixtañujob) wen qʼuexelob, jiñi costumbre, bʌlñʌcʼʌl yicʼot jiñi taqʼuin. Tiʼ sujm, miʼ mejlel a wubin a chʼijiyemlel.

Cheʼʌch miʼ mejlel a wubin jeʼel cheʼ bʌ cojax to woli (choncol) a pejcan jiñi Biblia. Mi caj a wubin chaʼan añet ti jumpʼejl pañimil (mulawil) wajalix bʌ ñumi yicʼot mach bʌ cʌmbilic a chaʼan. Mi caj a cʌn tejclum tac, bajcheʼ i tejclum filisteojob, yicʼot mi caj a cʌn tsijiʼ bʌ costumbre tac, bajcheʼ jiñi muʼ bʌ i tsilob i pislel. Mi caj a pejcan jaʼel chaʼan jumpʼejl bʌlñʌcʼʌl i cʼabaʼ maná yicʼot chaʼan jumpʼejl taqʼuin melbil bʌ ti plata i cʼabaʼ dracma (Éxodo 16:31; Josué 13:2; 2 Samuel 3:31; Lucas 15:8). Tajol maʼañic maʼ chʼʌmben isujm tiʼ pejtelel iliyi. Cheʼ bʌ yaʼañet ti yambʌ país, a womʌch cheʼ añic majqui miʼ coltañet. ¿Maʼañic ba maʼ mulan cheʼ añic majqui miʼ tsictesʌbeñet jiñi maʼañic bʌ maʼ ñaʼtan yaʼ ti Biblia?

Cʼʌlʌl cheʼ bʌ tsaʼ tejchi ti tsʼijbuntel jiñi Biblia, cheʼ ti jabil 1600 cʼʌlʌl ti 1501 cheʼ bʌ maxto tilemic Cristo, añʌch coltʌntel chaʼan miʼ chʼʌmbentel isujm jiñi Biblia. Jumpʼejl ejemplo jiñʌch Moisés, ñaxam bʌ tsaʼ waʼchoconti chaʼan miʼ mel i yeʼtel yaʼ ti tejclum Israel, tiʼ tsictesa jiñi tsʼijbujel tac am bʌ ti jiñi bʌ ora (Deuteronomio 1:5).

Cheʼ ñumeñix cheʼ bʌ 1,000 jab, chʌn anto xcʌntesajob chaʼan Biblia ti jiñi bʌ ora. Ti jiñi jabil 455 cheʼ bʌ maxto tilemic Cristo, junmojt judíojob yicʼot cabʌl alobob, tsiʼ tempayob i bʌ yaʼ ti tejclum Jerusalén. Jiñi xcʌntesajob chaʼan Biblia «tsiʼ pejcayob i mandar Dios ti jun [...]. Tsiʼ pʌsbeyob i sujmlel chaʼan miʼ wen chʼʌmbeñob isujm» (Nehemías 8:1-8).

Tsaʼ ñumi cheʼ bʌ 500 jab, Jesucristo tsiʼ mele jumpʼejl eʼtel chaʼan bʌ cʌntesa lajal bʌ bajcheʼ jiñi. Jiñi quixtañujob tsiʼ cʌñʌyob bajcheʼ juntiquil maestro (Juan 13:13). Tsiʼ cʌntesa yonlel quixtañujob. Ti jumpʼejl bʌ qʼuin, tsaʼ caji ti tʼan tiʼ tojlel yonlel quixtañujob i tsiʼ yʌcʼʌ jiñi wen cʌmbil bʌ Cʌntesa yaʼ ti Bujtʌl. «Tsaʼ toj sajtiyob i pusicʼal winicob xʼixicob.» (Mateo 5:1, 2; 7:28.) Cheʼ ti jabil 33, Jesús tsaʼ caji ti tʼan yicʼot chaʼtiquil xcʌntʼañob i chaʼan cheʼ bʌ woliʼ majlelob ti jumpʼejl tejclum lʌcʼʌl bʌ ti Jerusalén. Tiʼ tsictesʌbeyob «i sujmlel i Tsʼijbujel Dios» (Lucas 24:13-15, 27, 32).

Jiñi xcʌntʼañob i chaʼan Jesucristo tsaʼ sujtiyob jaʼel ti xcʌntesa tiʼ chaʼan bʌ i Tʼan Dios. Ti jumpʼejl bʌ qʼuin, juntiquil wiñic chʼoyol bʌ ti Etiopía wen ñuc bʌ i yeʼtel woliʼ pejcan jumpʼejl texto yaʼ ti Tsʼijbujel. Jiñi xcʌntʼan Felipe tsiʼ cʼajtibe: «¿Muʼ ba a chʼʌmben isujm jini tʼan woli bʌ a qʼuel?». Jiñi wiñic tsiʼ jacʼʌ: «¿Bajcheʼ miʼ mejlel c chʼʌmben isujm mi maʼanic majqui miʼ cʌntesañon?». Cheʼ jiñi, Felipe tiʼ tsictesʌbe i sujmlel jiñi texto (Hechos 8:27-35).

Cheʼ bajcheʼ ti wajali an xcʌntesajob muʼ bʌ i pʌsob chuqui miʼ yʌl jiñi Biblia, ili ora jaʼel, jiñi i testigojob Jehová cheʼʌch miʼ melob ti 239 país yicʼot ti tejclum tac (Mateo 28:19, 20). Ti jujumpʼejl semana, ñumen ti 9 millón miʼ coltʌntelob chaʼan miʼ chʼʌmbeñob isujm chuqui miʼ yʌl jiñi Biblia. Yonlel ili quixtañujob mach xñoptʼañobic. Ili cʌntesʌntel mach tojbilic, miʼ mejlel a wʌqʼuentel ti a wotot, ti teléfono, ti Internet o jin jach baqui.

Mi a wom a chʼʌm ili cʌntesʌntel, pejcan juntiquil i testigo Jehová. Mi caj a cʌn chaʼan jiñi Biblia jumpʼejlʌch libro mach bʌ wocolic ti chʼʌmbentel isujm. Mi caj a qʼuel chaʼan ‹an i cʼʌjñibal ti cʌntesa, chaʼan ticʼojel, chaʼan tojʼesʌntel, chaʼan tiʼ melol chuqui toj, chaʼan chajpʌbilet tiʼ pejtelel chuqui wen, chaʼan utsʼat miʼ mejlel jiñi eʼtel tiʼ pejtelel› (2 Timoteo 3:16, 17).