Jiñi i testigojonbʌla Jehová mucʼʌch lac wen ñaʼtañob jiñi la quermañujob (1 Pedro 2:17). Cabʌlonla cheʼ mi la cubin lac bʌ bajcheʼ Tannis, juntiquil hermana ti Kenia. Miʼ yʌl: «Mic wen mulan c ñaʼtan chuqui miʼ yujtel tiʼ tojlel jiñi quermañujob añoʼ bʌ tiʼ petol pañimil». ¿Bajcheʼ mi lac ñaʼtan bajcheʼ yilal añob jiñi yambʌ Testigojob? Tiʼ coltaya jiñi sección «Noticia tac» am bʌ ti jw.org, añix bʌ cʼʌlʌl ti 2013.

 Ili sección miʼ chʼʌm tilel i sujm bʌ noticia tac chaʼan jiñi eʼtel tac chaʼan bʌ construcción, cheʼ bʌ miʼ yujtel wocol tac yicʼot cheʼ bʌ an chuqui ñuc tac bʌ miʼ yujtel, jumpʼejl ejemplo jiñʌch cheʼ bʌ miʼ loqʼuel jumpʼejl tsijiʼ bʌ Biblia. Cheʼ jaʼel, miʼ subeñonla tiʼ tojlel jiñi hermanojob añoʼ bʌ ti cárcel tiʼ caj jiñi i ñopbal. Mi lac taj jaʼel utsʼatax bʌ experiencia tac chaʼan jiñi ñuc tac bʌ subtʼan yicʼot chaʼan jiñi i Cʼajtesʌntel i chʌmel Jesús. Pero ¿majqui miʼ melob ili noticia tac? ¿Majqui miʼ melob jiñi investigación yicʼot bajcheʼ miʼ chajpʌntel?

 Jiñi Oficina chaʼan Información Pública an tiʼ wenta jiñi sección «Noticia tac». Jiñi Comité chaʼan coordinadorob chaʼan bʌ jiñi Junmojt muʼ bʌ i pʌsob bij an tiʼ wenta chaʼan miʼ qʼuel ili departamento am bʌ ti central mundial i mucʼob ti coltaya ñumen ti 100 hermanojob yicʼot hermanajob, i cabʌlob mach yaʼic añob ti Betel. Ili hermanojob miʼ chaʼleñob tsʼijb, investigación, traducir yicʼot miʼ melob jiñi dibujo tac o foto tac. Cheʼ jaʼel, miʼ chaʼleñob tʼan yicʼotob jiñi añoʼ bʌ i yeʼtel, jiñi reporterojob o jiñi maestrojob ti universidad. Cheʼ jaʼel, ñumen ti 80 sección chaʼan bʌ Información Pública, am bʌ ti yan tac bʌ sucursal tiʼ petol pañimil, miʼ coltañob ili departamento.

 Jiñi Oficina chaʼan Información Pública miʼ chaʼlen eʼtel yicʼot jiñi sección Información Pública chaʼan miʼ chajpañob jumpʼejl noticia. Cheʼ bʌ jiñi hermanojob miʼ yubiñob chaʼan an chuqui tsaʼ ujti muʼ bʌ i mejlel ti loqʼuel ti noticia, miʼ wen melob jiñi investigación chaʼan miʼ ñaʼtañob ti tsʼʌcʌl chuqui tsaʼ ujti. Chaʼan miʼ mejlel jiñi, tajol miʼ melob entrevista tac o miʼ chaʼleñob tʼan yicʼot juntiquil experto. Cheʼ bʌ tsaʼix i wen meleyob jiñi investigación, miʼ tsʼijbuñob yicʼot miʼ tojʼesañob. Cheʼ jiñi, miʼ yotsañob jiñi foto tac i miʼ chocbeñob majlel jiñi Comité chaʼan coordinadorob chaʼan miʼ qʼuelob mi weñʌch.

 ¿Bajcheʼ yilal miʼ qʼuelob jiñi hermanojob jiñi sección «Noticia tac»? Juntiquil hermana chumul bʌ ti Filipinas i cʼabaʼ Cheryl miʼ yʌl: «Mic wen mulan c pejcan ti sʌcʼan jiñi noticia tac tiʼ tojlel jiñi organización yicʼot jiñi quermañujob».

 Cabʌlob muʼ bʌ i mulañob cheʼ jiñi noticia tac am bʌ ti jw.org mach lajalic bajcheʼ yambʌ noticia tac. Tatiana, chʼoyol bʌ ti Kazajistán, miʼ yʌl: «Mic wen qʼuel ti ñuc jiñi noticia tac am bʌ ti jw.org come i sujmʌch chuqui miʼ yʌl». Alma, juntiquil hermana ti México, miʼ yʌl: «Ili ora cabʌl jax noticia mach bʌ weñic, pero jiñi noticia tac am bʌ ti lac página chaʼan internet miʼ wen coltañonla».

 Jiñi sección «Noticia tac» miʼ pʼʌtʼesan lac ñopoñel, mach muqʼuic jach i subeñonla chuqui tac miʼ yujtel. Bernard, chʼoyol bʌ ti Kenia, miʼ yʌl: «Ili noticia tac tsiʼ coltayon chaʼan mij qʼuel jiñi hermanojob bajcheʼ c familia, mach yʌlʌyic baqui añob. Cheʼ bʌ mic pejcan Jehová ti oración miʼ mejlel c tajob ti tʼan tiʼ cʼabaʼob i mic suben chuqui tac woliʼ ñusañob». Bybron, yambʌ hermana chumul bʌ ti Kenia, miʼ yʌl: «¡Wen tijicña mi cubin cheʼ bʌ mic pejcan chaʼan tsaʼ loqʼui yambʌ Biblia! Miʼ cʼajtesʌbeñon chaʼan Jehová mucʼʌch i luʼ cʼuxbiñonla».

 Muʼto i coltañonla jaʼel jiñi noticia tac muʼ bʌ i loqʼuel tiʼ tojlel jiñi hermanojob woliʼ bʌ i tsʼaʼlentelob. Laʼ laj qʼuel muʼ bʌ i yʌl Jackline, yambʌ hermana chʼoyol bʌ ti Kenia: «Cheʼ bʌ mic wen ñaʼtan bajcheʼ miʼ pʌsob i chʼejlel miʼ pʼʌtʼan c ñopoñel. Tiʼ pejtelel ora mic sʌclan chuqui jiñi muʼ bʌ i coltañob i lʌtʼ wocol. I an j qʼuele chaʼan jiñi oración, jiñi i pejcʌntel jiñi Biblia o jiñi cʼay, jiñʌch muʼ bʌ i ñumen coltañob jiñi hermanojob».

 Juntiquil hermana ti Costa Rica i cʼabaʼ Beatriz miʼ wen qʼuel ti ñuc jiñi noticia tac muʼ bʌ i loqʼuel cheʼ bʌ miʼ yujtel wocol tac bajcheʼ icʼ jaʼal o yan tac bʌ: «Wen utsʼatax cheʼ bʌ jiñi organización ti ora miʼ coltan jiñi hermanojob cheʼ bʌ i cʼʌjñibal i chaʼañob. Weñʌch bajcheʼ miʼ mel i yicʼotʌch cʼuxbiya. Iliyi miʼ pʌsbeñon chaʼan ili jiñʌch jiñi i yorganización Jehová».

 ¡Wen tijicñayonla cheʼ an lac chaʼan jiñi sección «Noticia tac» ti lac página chaʼan internet! Cheʼ bajcheʼ iliyi miʼ mejlel lac ñaʼtan chuqui miʼ yujtel tiʼ tojlel jiñi la quermañujob añoʼ bʌ tiʼ petol pañimil. Pero an lac chaʼan iliyi tiʼ coltaya jiñi donación tac muʼ bʌ laʼ wʌcʼ, an i tajol mi laʼ wʌcʼ ti donate.pr418.com. Wen wocolix laʼ wʌlʌ chaʼan mi laʼ tʼox chuqui an laʼ chaʼan.